GÉNESIS 15
15
Taita Diosca, Abrammanmi shuj churita carasha nishca
1Chai jipacunami Mandaj Diosca, Abrahamman muscuipishna ricurishpa, cai shimicunata cashna nishpa villarca:
—Abram, ama manllaichu. Ñucami, can jarcarina escudoshna cani. Can japinapash, ashtaca ashtacami canga— nircami.
2Shina nijpimi Abramga, cashna nishpa tigrachirca:
—Jatun Mandaj Dioslla, ¿imatashi carahuangui? Huahuataca na charipanichu. Ñuca huasipi mayordomopash, Damasco pueblomanda chai Eliezermi— nircami.
3Cashnatapashmi Abramga nirca:
—Ricui, huahuataca na carahuarcanguichu. Chaimandami ñuca ima charishcacunataca, ñuca huasipi huacharishca ñucapaj gañanlla japinga— nircami.
4Chai jipami Mandaj Diosca, cai shimicunata cashna nishpa Abramman villarca:
—Can imata charishcacunataca, paica na japingachu, ashtahuangarin cambaj churipachami japinga— nircami.
5Shina nishpami, Abramdaca canllaman pushashpa, cashna nirca:
—Cunanga, jahua pachata ricui. Chai luzerocunata cuentai ushashpaca, cuentailla— nircami.
Shinallata cashnatapashmi nirca:
—Cambaj miraicunapash, chai luzerocunashnami canga— nircami.
6Mandaj Dios villashcata crijpimi Abramdaca, imatapash cashcatapacha rurashcata ricushpa chasquirca. 7Paitaca cashnami nirca:
—Ñucami, caldeocuna causanajuj Ur shuti pueblomanda llujchimuj Mandaj Dios cani. Cai llactata cambaj cachun cungapajmi llujchimurcani— nircami.
8Shina nijpimi Abramga, cashna nishpa tigrachirca:
—Mandaj Jatun Dioslla, ¿ñuca japinataca imashnata yachapashayari?— nircami.
9Shina nijpimi, cashna nirca:
—Quimsa huatata charij maltun huagrata, quimsa huatata charij shuj huarmi chivota, quimsa huatata charij shuj jari llamata, shuj urpitapash, shuj palomatapash, ñucaman apamui— nircami.
10Shina nijpimi Abramga, tucui chai animalcunata japirca. Chai animalcunataca chaupishpami, cada chaupihuan chimbapurashpa churarca. Ashtahuangarin urpita, palomataca na chaupircachu. 11Chai huañuchishca aichacunata micungapajmi, ullahuangacuna urai shamunajurca. Abramga, chaicunata manllachishpami calpachijurca. 12Ashtahuangarin Abramdaca, ña indi huashajunallapimi, puñui japirca. Paitaca, ashtahuan manllanayai yana tutami ñapash japimurca. 13Chashna manllarijujpimi Mandaj Diosca, Abramdaca cashna nijurca:
—Cambaj mirai huahuacuna shujcunapaj llactapi causagrinataca, yachanapachami cangui. Chai llactapimi, gañan tucushpa causanajunga. Paicunaca, chuscu patsaj huatacamanmi, llaquichi tucushpa causanajunga. 14Ashtahuangarin canguna servishpa causana llactataca, ñucami llaquichisha. Chai jipami, cambaj miraicunaca ashtaca charishcacunata apashpa llujshimunga. 15Canga, imapash na tucushpa, aligutami cambaj taitacunapajman chayamungui. Alipacha rucuyashpami, huañushpa pambai tucungui. 16Cambaj miraicunaca, chuscu miraicuna tucushcapimi, caiman tigramunga. Amorreocunapash, cunangaman ninan nalicunataca, nara ruranllu— nijurcami.
17Ña indi huashajushca amsayajujpimi, cashna tucurca: Shuj jornomanda cushni llujshijujtami, Abramga ricurca. Animalcunata chaupishpa churashca sirinajuj chaupita, michumbi ninata japichishca yalijujtapashmi ricurca. 18Chai punllami Mandaj Diosca, Abramhuan ari nishpa cashna nirca:
—Cambaj miraicunamanmi, cai llactata carasha. Egipto llacta jatun yacumandaca, Eufrates jatun yacucamanmi carasha. 19Ceneo, cenezeo, cadmoneo nishca gentecunapaj llactatapash, 20heteo, ferezeo, refaíta, 21amorreo, cananeo, gergeseo, jebuseo nishca gentecunapaj llactatapashmi carasha— nircami.
Currently Selected:
GÉNESIS 15: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
