GÉNESIS 16
16
Agarmandapash, Ismaelmandapashmi villajun
1Abrambaj huarmi Saraica, huahuacunata na tarinllu carca. Paica, Egiptomanda paita servij Agar shuti huarmitami charirca. 2Chaimandami Sarai huarmica, Abramdaca cashna nirca:
—Mandaj Diosllatami ñucataca, huahuata na tarij huarmita rurahuashca. Chaitaca canllata ricuhuanguimi. Chaimandami candaca, ñucata servij huarmipi chayapai nini. Paimandarapash, huahuacunata charishapashchari— nircami.
Shina nijpimi Abramga, Sarai huarmi ninanda mañashcata uyarca. 3Abrambaj huarmi Saraica, Egiptomanda paita servij Agar huarmitami, paipaj cusa Abrambaj huarmi cachun apamushpa curca. Paicunaca, ña chunga huatata Canaán llactapi causanajushpami, chashna tucunajurca. 4Agar huarmipi Abram chayajpimi, chai huarmica vijsayu tucurca. Shina vijsayu tucushca cashpami, paita mandaj Sarai huarmitaca, yangapi churashpa ricui callarirca. 5Chaimandami Sarai huarmica, Abramdaca cashna nirca:
—Ñuca rimai tucushpa, pingaichi tucushcapash, cambaj jahuallata cachun. Ñucallatami ñucata servijtaca, cambaj huarmi cachun curcani. Paica vijsayu cashpami, ñucataca yangapi churashpa ricujuhuan. Nalita can rurashca cajpipash, ñuca rurashca cajpipash, Mandaj Diosllata ricuchijuchun— nircami.
6Shina nijpimi Abramga, Saraitaca cashna nishpa tigrachirca:
—Ricui, canda servij huarmica, cambaj maquipillatami. Cambaj ima ali cajpipash, can ricushpa imatapash rurailla— nircami.
Agar huarmica, Sarai huarmi ninanda llaquichi callarijpimi, paipaj ñaupajmanda pacajushpa rirca. 7Shina rijujpimi, Mandaj Diospaj angelca, Shur shuti jichushca pamba ñambi tiaj pugyu ladopi tuparirca.
8Shina tuparishpami, cashna nirca:
—Saraita servij Agar, ¿maimandata canga shamujungui, maimanda rijungui?— nircami.
Shina nijpimi chai huarmica, cashna nishpa tigrachirca:
—Ñucata mandaj Sarai huarmipaj ñaupajmandami pacajushpa rijuni— nircami.
9Shina nijpimi Mandaj Diospaj angelca, cashna nirca:
—Canda mandaj Sarai huarmipajman tigrailla. Imata mandajpipash, paita cazunguilla— nircami.
10Mandaj Diospaj angelca, cashnatapashmi nirca:
“Cambaj miraicunataca, ninandami mirachisha. Chashna ninandapacha mirashcamandami, cuentaitapash na ushanalla canga” nircami. 11Mandaj Diospaj angelca, ashtahuan cashnatapash nircarami: “Ricui, cunanga vijsayu tucushcanguimi. Chaitaca, jari huahuatami ungungui. Chai huahuataca, cambaj llaquita Mandaj Dios uyashca cajpimi, Ismael shutita shutichingui. 12Paica, ninan millai runami canga. Paica tucuihuanmi fiñajunga, shinallata tucuicunami paitaca fiñanga. Tucuilla paipaj huauquicunapaj ñaupajpimi causanga” nircami.
13Chaimandami Agar huarmica, paihuan rimaj Mandaj Diostaca: “Canga, ricujuj Taita Diosmi cangui” nishpa shutichirca. Paica: “¿Nachu ñucapash, ñucata caipi ricujuj Diostaca ricurcani?” nircami. 14Chaimandami, yacuta llujchingapaj allashca jatun utujutaca: “Ñucata ricushpa Causajujpaj yacuta llujchina jatun utuju” nishpa shutichirca. Ricuichi, chaica Cades shuti, Bered shuti pueblocunapaj chaupipimi.
15Agar huarmica, Abrammanmi shuj churiguta ungurca. Abramga, Agar huarmi ungushca churitaca, Ismael shutitami shutichirca. 16Ismaelta Agar huarmi ungujpica, Abramga pusaj chunga sucta huatatami charirca.
Currently Selected:
GÉNESIS 16: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
