GÉNESIS 24
24
Abrahamga, Isaacmanmi huarmita mascashca
1Abrahamga, ashtaca huatacunata charij ña rucugupachami carca. Mandaj Diosca, tucuipimi Abrahamdaca bendiciashca carca. 2Abrahamga, paipaj huasipi tucui tiashcata mandaj, ashtahuan ruculla paipaj servijtami cashna nirca:
—Cunanga, cambaj maquita ñuca changapi churapai. 3Candaca, Mandaj Diospaj shutipimi juramentuchigrini. Paica, jahua pachapajpash Taita Diosmi. Cai pachapajpash, Taita Diosmi. Ñuca churipaj huarmi cachunga, cananeocunapaj cuitsacunamandaca, na japinachu capangui. Ñucaca, paicunapaj chaupipimi causajuni. 4Ashtahuangarin ñuca llactaman ñuca familia purapajman rishpami, ñuca churi Isaacpaj huarmi cachun japina capangui— nircami.
5Shina nijpimi chai servij runaca, cashna nirca:
—Imashpapash chai cuitsagu ñucata catishpa, cai llactaman na shamungapaj munajpica, ¿cambaj churitachu, can llujshimushca chai llactaman pushashpa tigrasha?— nircami.
6Shina nijpimi Abrahamga, cashna nirca:
—Ñuca churita chaiman pushanataca, yaitapash ama yanguichu. 7Jahua pachata Mandaj Taita Diosmi, ñuca taitapaj huasimanda, ñuca familiacunapaj llactamanda pushamuhuarca. Paimi: ‘Cambaj miraicunamanmi, cai alpataca carasha’ nishpa, ñucaman juramenturca. Paillatami, paipaj angelta cambaj ñaupajpi cachanga. Canga, chaimanda cuitsagutami ñuca churiman apamuna cangui. 8Cuitsagu canda catishpa shamungapaj na munajpica, cai ñuca juramentuchishcamandaca, cacharichi tucushcami cangui. Ñuca churitalla, ama chaiman tigrachipangui— nircami.
9Shina nijpimi chai servij runaca, paipaj maquita paipaj amo Abrahambaj changapi churashpa, chaitaca rurashapachami nishpa juramenturca. 10Chai servij runaca, paipaj amopaj camellocunamanda, chunga camellocunata japishpami, paipaj amo tucui imatalla charishcacunamanda, shuj shuj caranacunata agllashpa japishpa rirca. Ñanda japishpa rishpaca, Nacor shuti runa causajuj pueblomanmi, Mesopotamia llactaman chayarca. 11Camellocunataca, pueblomanda canllaman, yacuta llujchingapaj allashca jatun utuju ladopimi cungurichishpa samachirca. Jarihuan nara tacarishca cuitsacuna yacuman llujshina chishi horasmi carca. 12Chaipimi, cashna nijurca: “Ñuca amo Abrahamda Mandaj Taita Dioslla. Cunanga, alihuan tuparinata cuhuayari nipanimi. Ñuca amo Abrahamda llaquishpa, chaita rurapairi. 13Ricui ñucaca, cai yacu pugyu ladopimi cani. Cai pueblopi causanajuj runacunapaj ushicunaca, yacuta apangapajmi shamunata yachan. 14Jarihuan nara tacarishca chai cuitsagucunamandaca, maijanda cashpapash cashnami nisha: ‘Yacuta ñuca ufiachun, cambaj funduta uriajuchipairi’ nishami. Shina nijpica paica: ‘Ufiailla, shinallata cambaj camellocunapash ufiachun carashallami’ ningami. Shina nishpaca, canda servij Isaacman ricuchishca cuitsagu cachun. Cashna rurajpimi, ñuca amota llaquishcataca ricupasha” nijurcami.
15Shina nijushcatapash nara tucuchijpillatami, cashna tucurca: Betuel shuti runapaj ushi Rebeca cuitsaguca, paipaj rigra jahuapi funduta churashcami, ñapash llujshimurca. Betuel shuti runaca, Abrahambaj huauqui Nacorpaj huarmi Milcapaj churimi carca. 16Jarihuan nara tacarishca chai cuitsaguca, juyaillaguta ricurijuj cuitsagumi carca. Paica, jaritapash nara rijsishca cuitsagumi carca. Paimi yacuman uriajushpa, fundupi jundachishpa tigrajurca. 17Ña tigrajujpimi chai servij runaca, paita catishpa cashna nirca:
—Cambaj fundumanda asha yacuguta ufiangapaj carahuai nipanimi— nircami.
18Shina nijpimi, chai cuitsaguca:
—Ñuca amolla, ufiapailla— nishpa, paipaj maquihuan apajushca funduta ucha uriajuchishpa, ufiachun curca.
19Yacuta ufiachun cushca jipami, cashna nirca:
—Shinallata cambaj camellocunapash na munangacaman ufiachun, yacuta llujchimushallami— nircami.
20Shina nishpaca, paipaj fundumanda yacuta pilón rumipi ucha talishpami, chai jatun utujumanda yacuta llujchingapaj cutin calparca. Shina calpashpaca, chai servij runapaj tucuilla camellocunamambashmi, yacuta llujchimurca. 21Chai servij runaca, cuitsagutaca manllarishpami ricujurca. Ñanda pai rijujpi Mandaj Dios ali pushajushcata, nali pushajushcata yachangapajmi upalla ricujurca. 22Camellocuna yacuta ufiai tucuchijpica servij runaca, sucta gramotashna pezaj oro surtijastami curca. Shinallata patsaj chunga chuscu gramota pezaj, ishcai brazaletetapashmi curca. 23Shina cushpami, cashna nirca:
—¿Pipaj ushiguta capangui? Villahuai nipanimi. ¿Cambaj taitapaj huasipica, ñucanchi mingarina tiapanllu?— nircami.
24Shina nijpimi, chai cuitsaguca:
—Nacorpaj huarmi Milca ungushca Betuelpaj ushimi cani— nishpa tigrachirca.
25Cashnatapashmi nirca:
—Ñucanchi huasipica ujshapash, ashtaca jihuapash, maipi puñunapash tianmi— nircami.
26Shina nijpimi, servij runaca cumurishpa, Mandaj Diosta ninanda alicachirca. 27Paica, cashnami nirca: “Ñuca amo Abrahamda Mandaj Taita Dioslla, alicachi tucushcami capangui. Ñuca amota llaquinatapash, chashna cashcatapacha pactachinatapash na cungapashcanguichu. Ñuca amopaj huauquicunapaj huasiman pushamushpami, chaitaca ricuchihuashcangui” nircami.
28Shina nijujpimi, jarihuan nara tacarishca chai cuitsaguca, caicunata paipaj mama yachachun, huasipi villangapaj calparca. 29Rebeca cuitsaguca, Labán shuti shuj turitami charirca. Chai turimi, yacu pugyu ladopi tiajuj servij runapajman calpashpa llujshirca. 30Paipaj panipaj maquipi surtijasta, brazaletecunata ricushpa, paipaj panipash: “Chai runaca, cashnami rimahuarca” nijta uyashpami, chai runapajman shamurca. Chai runaca, camellocunahuanmi yacu pugyu ladopi tiajurca. 31Shina cajpimi Labán runaca, cashna nirca:
—Mandaj Dios bendiciashca runagu, shamuilla. ¿Imashpata canllapi cangui? Huasipipash ñami tucuita alichishcani. Camellocuna samachumbash alichishcallami— nircami.
32Shina nijujpimi servij runaca, huasiman shamurca. Labanmi, camellocunapi apachishcacunata uriajuchishpa ujshacunata, jihuacunata carajurca. Chai servij runagupaj chaquita, paihuan shamushca runacunapaj chaquita maillachumbashmi, yacuta curca.
33Ashtahuangarin paicunapaj ñaupajpi micunata churajpimi, servij runaca cashna nirca:
—Ñuca villachun mingashpa cachamushcata nara villashpallataca, na micupashachu— nircami.
Shina nijpimi, Labán runaca:
—Imata nina cashpapash nilla— nirca.
34Shina nijpimi servij runaca, cashna nijurca:
—Ñucaca, Abrahamda servij runami capani. 35Mandaj Diosmi, ñuca amotaca ninandapacha bendiciashca. Chaimandami, paica ninan charijpacha tucushca. Llamacunata, huarmi huagracunata, culquita, orota, servij jaricunata, servij huarmicunata, camellocunata, burrocunatapashmi carashca. 36Ñuca amopaj huarmi Sarapash, paya cashpapash shuj churigutami, ñuca amoman ungurca. Tucui imata pai charishcatapash, chai churimanmi cushca. 37Ñuca amomi, cashna nishpa juramentuchihuarca: ‘Ñuca churipaj huarmi tucunataca, ama cananeocunapaj ushi puracunamanda japipanguichu. Ñucaca, paicunapaj llactapimi causajuni. 38Ashtahuangarin ñuca taitapaj huasi ucu purapajman, ñuca familiapajman rishpa, ñuca churipaj huarmi cachun japipangui’ nihuarcami. 39Shina nijpimi ñucaca: ‘Cuitsaguca, ñucata catimungapaj napash munangachu’ nircani. 40Shina nijpimi Abrahamga, cashna nihuarca: ‘Mandaj Diospaj ñaupajpimi purijushcani. Paipaj angelta canhuan cachajpimi, cambaj ñandaca tucuipi ali pushanga. Shinamandami ñuca churipaj huarmi tucunataca, ñuca familiamanda, ñuca taitapaj huasi ucu puramanda japigringui. 41Shinamandami, ñuca familiapajman chayashpaca, ñuca juramentushcamandaca cacharishca quedangui. Cuitsaguta canhuan na cachamujpipash, ñuca juramentushcamandaca cacharishcami quedangui’ nihuarcami.
42Shinamandami, pugyuman cunan chayashpaca, cashna nijurcani: ‘Ñuca amo Abrahamda Mandaj Taita Dioslla, cunan ñuca shamushca ñandaca, tucuipi ali pushamushca cashpami ali cahuanguiman. 43Ricui ñucaca, cai yacu pugyu ladopimi cani. Yacuta apangapaj shamuj jarihuan nara tacarishca maijan cuitsagutapash: Cambaj fundumanda asha yacuguta, ñuca ufiangapaj carahuai nipanimi nishami. 44Shina nijpimi: Ufiailla, shinallata cambaj camellocunamambash, yacuta llujchishallami nishpa tigrachinga. Shina nishpa tigrachij cuitsagumi ñuca amopaj churiman, Mandaj Dios ricuchishca huarmi canga’ nijurcanimi. 45Shina nishpa, ñuca shungupi rimaita nara tucuchijpillatami Rebeca cuitsaguca, paipaj rigra jahuapi funduta churashca, ñapash llujshimurca. Pugyuman uriajushpa, yacuta llujchimujpimi paitaca: ‘Yacuta ufiangapaj ñucaman carahuai nipanimi’ nircani. 46Shina nijpica, paipaj funduta paipaj rigra jahuamanda ucha uriajuchishpami: ‘Ufiailla, shinallata cambaj camellocunamambash, yacuta ufiachishallami’ nishpa carajpi ufiarcani. Shinallata ñuca camellocunamambashmi, yacuta ufiachirca. 47Shina ufiachijpimi paitaca: ‘¿Pipaj ushiguta capangui?’ nishpa tapurcani. Shina tapujpimi paica: ‘Taita Nacorpaj huarmi Milca ungushca, Betuel shuti runapaj ushimi capani’ nirca. Shina nijpimi, shuj surtijastaca paipaj singapi, brazaletecunataca paipaj rigrapi churachircani. 48Chai jipami cumurishpa, Mandaj Diosta ninanda alicachircani. Ñuca amo Abrahamda Mandaj Taita Diostaca, aligumi capangui nijurcanimi. Paimi, ñuca amo Abrahambaj churipaj huarmi cachun, huauquipaj ushita japigrichun, na pandana ñanda pushamuhuashca. 49Cunanga, canguna ñuca amota llaquishpa, na llullashpa pactachinatapash villahuaichiyari. Na nina cashpapash villahuaichilla, ñucaca ali ladota cashpa, lluqui ladota cashpapash ripashallami— nijurcami.
50Shina nijpimi Labán shuti, Betuel shuti runacunapash cashna nishpa tigrachinajurca:
—Mandaj Diospaj munaimandami, cashna tucushca. Chaimandami nalichu nitapash, alimi nitapash na ushapanchi. 51Ricui, Rebeca cuitsaguca, cambaj ñaupajpimi. Mandaj Dios nishcashnallata, cambaj amopaj churipaj huarmi cachun pushashpa ripailla— ninajurcami.
52Shina ninajujta Abrahamda servij runa uyashpaca, Mandaj Diospaj ñaupajpi cungurishpami, alpaman chayajta cumurirca. 53Chai servij runaca culquita, orota juyailla rurashcacunata, churajunacunatapash alichishcamanda llujchishpami, Rebecaman cararca. Shinallata ashtahuan shuj juyaillacunatapashmi, paipaj turimambash, paipaj mamamambash cararca. 54Abrahamda servij runaca, paihuan shamushca runacunandimi micushpa, ufiashpa puñunajurca. Paicunaca tutamandata jatarishpami:
—Ñuca amopajman cachahuaichiyari— ninajurca.
55Shina nijpimi, paipaj turipash, paipaj mamapash, cashna nishpa tigrachirca:
—Jarihuan nara tacarishca cuitsaguca, chunga punllatallapash ñucanchihuan shuyapachunra. Chai jipaca ringallami— ninajurcami.
56Shina nijpimi chai servij runaca, cashna nirca:
—Mandaj Dios tucuipi ali ñucata pushamushca cajpillataca, na ashtahuan shuyachinachu cahuanguichi. Ñuca amopajman ringapaj ucha cachahuaichilla— nircami.
57Shina nijpimi paicunaca:
—Jarihuan nara tacarishca cuitsaguta cayashpa tapushunchi— ninajurca.
58Rebecata cayashpaca:
—¿Canga, cai runahuan ringuillachu?— nijpimi paica:
—Ari, rishallami— nishpa tigrachirca.
59Shina nijpimi, paipaj pani Rebecataca, paita viñachij mamandi, Abrahamda servij runandi, caishuj servij runacunandi richun saquinajurca. 60Rebecataca, cashna nishpami bendicianajurca: “Ñucanchi panilla, huaranga huarangacunapaj mama tucupangui. Canmanda miraicunaca, paicunata fiñajcunata mishashpa, pueblo pungucundi japinajuchun” ninajurcami.
61Shina nishca jipa, Rebeca jatarishpaca, jarihuan nara tacarishca paita servij cuitsagucunandimi, camellocunapi tiarishpa, chai servij runata catinajurca. Servishpa causaj chai runaca, Rebecata pushashpami rijurca.
62Isaac runaca, Neguev llactapi causajushcamandami, “Ñucata ricushpa Causajujpaj yacuta llujchina jatun utuju” nishca ladomanda tigramujurca. 63Isaac runaca, ña chishipimi, yarishpandi purijungapaj pambaman llujshishca carca. Pai vichai ricushpaca, camellocuna shamunajujtami ñapash ricurca. 64Rebecapash vichai ricushpaca, Isaactami ricurca. Shina ricushpami, camellomanda uriajurca. 65Paica, Abrahamda servij runataca:
—¿Pambata ñucanchipajman shamujuj chai runaca, pita?— nishpami tapushca carca.
Shina tapujpimi, Abrahamda servij runaca:
—Paica, ñuca amomi— nishpa tigrachishca carca.
Shina nijpimi paica, ñavita quilparina telata japishpa, ñavita quilparirca.
66Chai jipami Abrahamda servij runaca, tucui imatalla rurashcata, Isaacman villajurca. 67Isaac runaca, paipaj mama Sarapaj carpamanmi, Rebecataca pushamurca. Shina pushamushpami Rebecataca, paipaj huarmi cachun japishpa ninanda juyarca. Chashnami Isaac runaca, paipaj mama huañushcamanda llaqui cashpapash cushijurca.
Currently Selected:
GÉNESIS 24: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
