GÉNESIS 25
25
Abrahamhuan, Cetura shuti huarmihuanmi huahuacunata charishca
(1 Crón. 1:32-33)
1Abrahamga, cutin shuj huarmitami japirca. Chai huarmipaj shutica, Cetura shutimi carca. 2Chai huarmica: Zimram, Jocsán, Medán, Madián, Isbac, Súa shuti huahuacunatami ungurca. 3Jocsán shuti runaca, Seba shuti, Dedán shuti churicunatami charirca. Dedán shuti runapaj churicunaca: Asurim, Letusim, Leumim shuticunami carca. 4Madián shuti runapaj churicunaca: Efa, Efer, Hamoc, Abida, Elda shuticunami carca. Tucui paicunami, Cetura shuti huarmipaj miraicuna carca.
5Abrahamga, tucui imata pai charishcatapash, Isaacmanmi curca. 6Ashtahuangarin caishuj huarmicunahuan charishca churicunamanga, ima caranacunatapash ashagutallami cararca. Shina carashpaca, pai causajushpallatami, paipaj churi Isaacmanda caruyachishpa, indi llujshimuj lado caru llactaman cacharca.
Abraham huañujpi, pambashcatami villajun
7Abraham causashca huatacunaca, caicunami: Paica, patsaj canchis chunga picha huatacunatami causarca. 8Abrahamga, alipacha rucuyashpa ashtaca huatacunata causashpami, paipaj espíritu llujshijpi huañurca. Huañushpaca, paipaj gentecunahuanmi tandanajugrirca. 9Pai huañujpica, Isaac shuti, Ismael shuti paipaj churicunami, Macpela shuti pambapi tiaj jatun utujupi pambarca. Macpela shuti pambaca, heteopura Zohar shuti runapaj churi Efrón shuti runapaj alpa ladopi, Mamre shuti pamba chimba purapimi. 10Het shuti runapaj miraicunapaj alpataca, Abrahammi randishca carca. Chai alpapimi Abrahambash, paipaj huarmi Sarapash, pambai tucurca. 11Abraham huañushca jipami, cashna tucurca: Taita Diosmi, Abrahambaj churi Isaacta bendiciarca. Isaac runaca, “Ñucata ricushpa Causajujpaj yacuta llujchina jatun utuju” nishca ladopimi causajurca.
Ismael runapaj miraicunatami villajun
(1 Crón. 1:28-31)
12Abrahambaj churi Ismael runapaj miraicunaca, caicunami: Ismaeltaca, Sara shuti huarmita servij, Egiptomanda Agar shuti huarmimi ungurca. 13Ismaelpaj churicunapaj shuticunaca, caicunami: Paicuna imashna huacharishcapimi, catishpa churashca: Ismaelpaj punda churica, Nebaiot shutimi, cati churicunaca: Cedar, Adbeel, Mibsam, 14Misma, Duma, Massa, 15Hadar, Tema, Jetur, Nafis, Cedema shuticunami. 16Paicunami, Ismaelpaj churicuna. Caicunami, paicunapaj shuticuna. Uchilla pueblocunapi, carpacunapi causanajushpami chashna carca. Paicunapaj familiacunamandaca, chunga ishcai mandajcunami tiarca.
17Ismael causashca huatacunaca, caicunami: Paica, patsaj quimsa chunga canchis huatatami causajurca. Paipaj espíritu llujshijpi huañushpami, paipaj gentecunahuan tandanajugrirca. 18Ismaelpaj miraicunaca, Havila shuti llactamandaca Shur shuti llactacamanmi causanajurca. Chai llactacunaca, Asiria llactamanda shamuna, Egipto llacta chimba purapimi. Ismaelca, tucui paipaj huauquicunapaj ñaupajpimi huañurca.
Jacobopash, Esaupash huacharishcatami villajun
19Abrahambaj churi Isaac runapaj miraicunaca, caicunami: Abrahamga, Isaac shuti churitami charirca. 20Isaac runaca, chuscu chunga huatata charishpami, Betuel shuti runapaj ushi Rebecataca, paipaj huarmi cachun japirca. Betuel runaca, Padan-aram shuti llactapi causaj arameo purami carca. Rebecapaj turi Labanbash, arameo purallatami carca. 21Isaac runaca, paipaj huarmimandami Mandaj Diosta mañajurca. Paipaj huarmica, huahuata tarinata na yacharcachu. Chai mañashcata Mandaj Dios chasquijpimi, paipaj huarmi Rebecapash vijsayu tucurca. 22Paipaj huahuacunaca, vijsa ucupimi ninanda macanajunajurca. Chaimandami, Rebeca huarmica: “Chashna cajpica, ¿imapajta causashayari?” nishpa, Mandaj Diosta tapugrirca. 23Shina tapujpimi Mandaj Diosca, cashna nishpa tigrachirca:
“Cambaj vijsa ucupica, ishcai llactacunami tian.
Cambaj vijsa ucumandapachami, ishcai llactacuna shican shican llujshinga.
Shuj llactaca, caishuj llactata ashtahuan yali shinllimi canga.
Punda churimi, jipa churita servishpa causanga” nircami.
24Unguna punllacuna pactajpica, paipaj vijsa ucupica ishcai huahuacuna tiajtami, ñapash yachanajurca. 25Punda llujshij huahuaca, puca ajcha, milma junda carashnami carca. Paitaca, Esautami shutichinajurca. 26Chai jipaca, paipaj huauqui Esaupaj chaquipi alipacha charirishcami llujshirca. Paitaca, Jacobo shutitami shutichirca. Isaac runaca, paipaj huarmi ungujui punllapica, sucta chunga huatatami charirca.
Esaú runaca, punda churi cashpa pai japinatami jatushca
27Huahuacunaca, ñami viñarca. Esaú runaca, pambapilla causaj cashpami, animalcunata huañuchinata alipacha yachan carca. Ashtahuangarin Jacoboca, carpacunapi casilla causaj huambragumi carca. 28Isaac runaca, Esautami pai huañuchishca animalcunapaj aichata micuj cashpa, ninanda juyan carca. Ashtahuangarin Rebeca huarmica, Jacobotami ninanda juyan carca.
29Jacoboca, micunayai caldotami yanujurca. Esaú runaca, pambamanda shaijushca tigramushpami, 30Jacobotaca cashna nirca:
—Chai pucalla micunaguta micungapaj carahuai nipanimi. Ninandami shaijushcani— nircami.
Chaimandami paitaca, Edom shutita shutichirca.
31Shina nijpimi, Jacoboca:
—Can punda churi cashpa imatalla japinataca, cunan punllallata jatuhuailla— nishpa tigrachirca.
32Shina nijpimi Esaú runaca, cashna nirca:
—Ricui, ñucaca ña huañugrijunimi. Shina cashpaca punda churi cashcapash, ¿imapajta ali cangayari?— nircami.
33Shina nijpimi, Jacoboca:
—Cunan punllallata ñucaman juramentuhuai— nijpi, Esaú runaca juramenturca.
Chashna nishpami, pai punda churi cashpa imatalla japinataca, Jacoboman jaturca. 34Chai jipami Jacoboca, tandatapash, lentejas caldotapash, Esauman curca. Esaú runaca, micushpa ufiashpaca, jatarishpa rircallami. Chashnami Esaú runaca, pai punda churi cashpa imatalla japinataca, yangapi churarca.
Currently Selected:
GÉNESIS 25: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
