LUCAS 10
10
Canchis chunga runacunatami, Jesusca villagrichun agllashca
1Chai jipami, canchis chunga runacunata Jesusca agllarca. Paicunataca, pai yalina pueblocunapi, llactacunapi villashpa ñaupachunmi, ishcai ishcailla agllashpa cacharca. 2Shina cachajushpami Jesusca, paicunata cashna nijurca:
“Granota tandachinaca, ashtaca ashtacamari. Shina cajpipash, tandachijcunaca huaquinllami. Chaimandami, granota tandachijcunata cachamuchun, chagrayu Dueñota ninanda mañana canguichi. 3Cunanga, richilla. Cangunataca, atujcunapaj chaupipi llamagucunata cacharinshnami cachajuni. 4Cucavi muchilatapash, culqui muchilatapash, chaquipi churajunatapash na apashpa rinachu canguichi. Ñambi maijanhuan tuparishpapash, alillachu canchi nishpaca, na shayarinachu canguichi. 5Maijan huasiman chayashpapash: ‘Cangunaman Taita Dios ali causaita carachun’ ninami canguichi. 6Maijambash chaipi aliguta chasquij tiashpaca, casilla aligutapachami causanajunga. Ashtahuangarin chai shimita na chasquijpica, cangunamanllatami tigranga. 7Cangunata aliguta mingachishpa, imaguta carajpipash micushpa, ufiashpa chai huasipilla mingarishpa tianajunguichilla. Imaguta rurashpapash, chaimandallata japinatami charin. Huasin huasinga, na purinachu canguichi. 8Maijan puebloman chayajpipash, cangunata chasquishpa micunaguta carajpica, imaguta cashpapash micunallami canguichi. 9Huañujujcuna chaipi tiajpica, alichinguichilla. Shinallata: ‘Taita Dios mandanaca, ñami pactamushca’ nishpa villanguichi. 10Maijan puebloman chayajpipash, cangunata na mingachingapaj munajpica, ñanman llujshishpa, cashna ninguichi: 11‘Cangunapaj puebloman chayamujpi, ñucanchi chaquipi alpa catijushcatapash, cangunaca nalicuna cajpimi chafsinchi. Taita Dios mandanaca ñami pactamushca. Chaitaca yarianguichi’ nishpa ringuichi. 12Cangunataca cashnami nini: Dios ricuchijui punllapimi, chai pueblopi causajcunataca, Sodoma shuti pueblopi causashca gentetapash yali ashtahuan llaquichinga.
Na cazuj pueblocunaca, ¡aij imachari tucunga! nishcami
(Mat. 11:20-24)
13Corazín shuti pueblopi causajcunalla, ¡aij imachari tucunguichi! Betsaida shuti pueblopi causajcunalla, ¡aij imachari tucunguichi! Cangunahuan cashpami, pipash na rurai ushanallacunata rurajurcani. Tiro shuti, Sidón shuti pueblocunapi cashna rurashca cajpica, ninanda llaquirishpa uchami, Diospajman tigrarinman carca. Paicuna ninanda llaquirishcata ricuchingapaca, cañamuta churajushpami, uchufahuan shitarinman carca. 14Dios llaquichijui punllapimi, Tiro shuti, Sidón shuti pueblocunapi causashca gentecunatapash yali ashtahuan cangunataca llaquichinga. 15Capernaum pueblopi causajcuna, cangunaca jahua pachaman apai tucushunllami yanguichimi. Ashtahuangarin, ucu pachamanmi shitai tucunguichi. 16Canguna villajpi uyashpa cazujcunaca, ñucatami cazunajun. Ashtahuangarin cangunata yangapi churajcunaca, ñucatami yangapi churanajun. Ñucata yangapi churajcunaca, ñucata cachamuj Taitatami yangapi churanajun” nijurcami.
Canchis chungacuna ña tigramushcatami villajun
17Chai canchis chunga villajcunaca, ninanda cushijushpa Jesuspajman tigramushpami:
—Cambaj shutipi ñucanchi rimajpica, ayacunapash cazushpa gentecunamanda llujshircallami— ninajurca.
18Shina nijpimi Jesusca, paicunata cashna nirca:
—Satanastaca, jahua pachamanda, punchapamba shitamunshna urmajtami ricurcani. 19Cangunamanmi, culebracunata, alacrangunata sarushpa, cangunata na ricunayachijpaj ushaita mishachumbash, ushaita cararcani. Chaicunaca, cangunata imata ruraitapash na ushangachu. 20Cangunaca, ayacunata cazuchishpa llujchishpalla, na cushijunachu canguichi. Ashtahuangarin cangunapaj shuticuna, jahua pachapi escribishca tiajujpimi, cushijuna canguichi— nijurcami.
Jesusca, ninandami cushijushca
(Mat. 11:25-27; 13:16-17)
21Shina nishpallami Jesusca, Diospaj Espíritu yarichijpi ninanda cushijushpa, cashna nijurca: “Jahua pachatapash, cai pachatapash Mandajuj, ñuca Taitalla. Canga, alipacha yachajushca gentecunaman, alita yarishpa causanajuj gentecunamambash, cai yachajunataca na ricuchircanguichu. Ashtahuangarin huahuashna causajcunaman yachachishcamandami, candaca ninanda alicachini. Ari ñuca Taitalla, canga chashnatami munarcangui. 22Ñuca Taitami, imagutapash tucuita ñucamanlla carahuashca. Pipaj Churi cajtapash, gentecunaca na yachahuanllu, ñuca Taitallami yachan. Ñuca Taitatapash, pipash na rijsinllu. Ñucallami, paipaj Churi cashpa rijsini. Shinallata paipaj Churi paipaj Taitata maijanmambash rijsichijpillami, Taitataca rijsinajun” nijurcami. 23Shina nijushpami Jesusca, paipaj yachajujcunata tigrarishpa ricushpa, paicunatalla cashna nijurca: “Canguna ricunajushcata shujcuna paicunapaj ñavihuambacha ricushpaca, ninanda cushijuchun ninimi. 24Shinamandami cangunataca, cashna nini: Canguna cunambi ricunajunguichi, chaitaca Dios ima nishcata tauca villajcunapash, jatun mandajcunapash, ninandami ricungapaj munarca. Shina ricungapaj munashpapash, paicunaca na ricurcachu. Shinallata canguna cunambi uyanajujtapash, ninandami uyanayachirca. Shina uyanayachishpapash, paicunaca na uyarcachu” nijurcami.
Samaria llactamanda ali runagumandami parlashca
25Ricuichi, mandashca shimita yachachij shuj runami, Jesús imata tigrachijpipash, juchachingapaj cashna nishpa shayarirca:
—Causaita causagrinata ñuca japingapaca, ¿imatata rurana capani, Yachachij?— nircami.
26Shina nijpimi Jesusca, cashna nirca:
—Mandashcapica, ¿ima nishpata escribishca? ¿Imata nijujtata leyishcangui?— nishpami, Jesusca tapurca.
27Shina tapujpimi chai runaca, cashna nishpa tigrachirca:
—Mandashcapica cashnami nijun: ‘Canda Mandaj Taita Diostaca, tucui shunguhuan, tucui almahuan, cambaj tucui ushaihuan, cambaj tucui yuyaihuanmi juyana cangui. Cambaj cumba runagutapash, can juyarinshnallata juyangui’ nijunmi— nircami.
28Shina nijpimi Jesusca, cashna nirca:
—Aligutapachami canga tigrachingui. Chaita rurashpaca causanguipachami— nircami.
29Ashtahuangarin chai runaca, imatapash cashcatapacha rurashcashnalla paillata ricuringapaj munashpami, Jesustaca:
—¿Pita ñuca cumba runaguyari?— nishpa tapujurca.
30Shina tapujpimi Jesusca, cashna nishpa tigrachirca:
—Shuj runagumi Jerusalenmanda, Jericó shuti puebloman urai rijurca. Paitaca, shuhuacuna japishpami, imaguta charishcatapash, churajushcatapash tucuilla quichurca. Chashna quichushpaca, chaupita huañungacaman macashpami, saquishpa rirca. 31Chai ñandallatami, shuj curapash urai shamujurca. Ashtahuangarin chai runaguta ricushpapash, yalishpa rircallami. 32Shinallata shuj levita nishca runapash, chai ñandallatami rijurca. Chai runapash, chai macai tucushca runaguta ricushpapash, yalishpa rircallami. 33Ashtahuangarin Samaria llactamanda shuj runaguca, chai ñanda rijushpaca, macai tucushca runagupajman quimirishpami, sirijujta ricushpa ninanda llaquirca. 34Shina llaquishpami, chai runagupajman quimirishpa, chugricunapica aceitehuan, vinohuan javishpa, finduhuan pilluchirca. Chai jipaca, paipaj burrogupi tiachishpami, mingarij huasiman apashpa cuidashpa tiajurca. 35Samaria llactamanda runaguca, chai cayandi punlla rigrijushpaca, chai huasiyu runagumanmi, ishcai denario culquiguta saquirca. Shina saquishpaca, cashnami nirca: ‘Cai runaguta ali cuidapangui. Cai culquigu na pactajpipash, ñuca tigramushpaca cupashallami’ nircami. 36Shuhuacuna macajpi sirijushca runagutaca, chai quimsa runacunamandaca, ¿maijanda ali cumbagushna juyashcanga?— nishpami Jesusca, chai yachachij runataca tapurca. 37Shina nijpimi, chai runaca:
—Macai tucushca runaguta llaquij runami canga yanimi— nijurca.
Shina nijpimi, Jesusca:
—Cambash, chashnallata shujcunata llaquishpa causagrilla— nirca.
Martahuan, Mariahuan ñañapura causaj huasimanmi Jesusca chayashca
38Jesús rijushpaca, shuj uchilla llactamanmi chayarca. Chai llactapimi, Marta shuti shuj huarmica, paipaj huasipi Jesusta mingachirca. 39Chai huarmica, María shuti ñañatami charirca. Chai Mariami, Jesuspaj ñaupajpi tiarishpa, pai villajujtaca aligutapacha uyajurca. 40Ashtahuangarin Martaca, Jesusman micunaguta carangapajmi, alichishpa musparijurca. Shina purijushpami, Jesuspaj ñaupajman chayamushpa, cashna nirca:
—Apunchi Jesús, ñucalla tucuita rurajuchun saquishpa, ñuca ñaña tiajujtaca, ¿nachu ricungui? Ayudagri nipairi— nircami.
41Shina nijpimi Jesusca, cashna nirca:
—Marta, Marta. Canga, imatapash ruranatalla yariajllami musparishpa purijungui. 42Ashtahuangarin shujtallami, imaguta cashpapash rurana cangui. María huarmiguca, ashtahuan aliguta ruranata yarishpami, caipi tiajun. Ama chashna tiajuchun nitaca, pipash na ushangachu— nircami.
Currently Selected:
LUCAS 10: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
