LUCAS 9

Chunga ishcai yachajujcunatami, villachun cachashca

(Mat. 10:5-15; Mar. 6:7-13)

1Jesusca, paipaj chunga ishcai yachajujcunatalla tandachishpami, gentecunamanda tucui ayacunata llujchishpa cachana ushaitapash, huañujujcunata alichina ushaitapash paicunaman cararca. 2Taita Dios mandajujmanda villanajuchun, huañujujcunata alichinajuchunmi cacharca. 3Shina cachajushpami Jesusca, paicunataca cashna nijurca: “Ñanda ringapaca, imatallapash na apanachu canguichi. Tauna caspitapash, cucavi muchilatapash, tandatapash, culquitapash na apanachu canguichi. Túnica nishca churajunatapash, na ishcaita apanachu canguichi. 4Maijan huasiman yaicushpapash, shuj llactaman yalingacaman, chai huasipillami mingarina canguichi. 5Maijan pueblopi cashpapash, cangunata na chasquingapaj munajpica, llujshishpa ringuichilla. Chai pueblopi causajcuna, napacha ali cajta ricuchingapajmi, cangunapaj chaquipi churajushcapi catijuj alpatapash chafsishpa rina canguichi” nijurcami. 6Shina nijpi paipaj yachajujcuna rishpaca, ali villaita villashpandi, huañujujcunatapash alichishpandimi, tucuilla uchilla llactacunata purinajurca.

Bautizaj Juandami huañuchishca

(Mat. 14:1-12; Mar. 6:14-29)

7Jesús tucuita rurashpa purijujtaca, Galilea llactata mandaj Herodesmi uyarca. “Bautizaj Juanmi, huañushcacunapaj chaupimanda causarimushca” nishpa huaquinguna parlanajujpimi, Herodesca imata ruraitapash na ushajurca. 8Huaquingunaca: “Dios ima nishcata villaj Eliasmari ricurimushca” nishpami parlanajurca. Ashtahuan shujcunaca: “Dios ima nishcata Profeta puracunamanda, maijambashmi causarimushca yarin” ninajurcami. 9Ashtahuangarin Herodesca, cashnami nirca:

—Juanbaj umata fitichunga, ñucami mandarcani. Cunanga, shuj runami juyailla rurashpa purijun nijtami uyani. ¿Chai runaca, pita cangayari?— nircami.

Shina nijushpami Herodesca, Jesusta ricungapaj ninanda munarca.

Jesusca, picha huaranga gentecunamanmi, micuchun carashca

(Mat. 14:13-21; Mar. 6:30-44; Juan 6:1-14)

10Villachun cachashcacuna tigramushpaca, paicuna imaguta rurashcatami, tucuita Jesusman villanajurca. Shina villajpica, Betsaida shuti pueblo ladomanmi, jichushca pambaman, paipaj yachajujcunatalla pushashpa rirca. 11Chaiman rinajujta gentecuna yachashpa catimujpimi, Jesusca chasquirca. Paicunamanmi, Taita Dios mandajujmandaca villajurca. Shinallata huañujujcuna ali tucucunata munajcunatapashmi alichijurca. 12Ña tutayajujpica, Jesuspaj chunga ishcai yachajujcunaca, paipajman quimirishpami cashna ninajurca:

—Cai gentecunataca, chai uchilla llactacunapi, chai muyundi huasicunapi mingarishpa pacarigrichun, micunatapash mascagrichun cachailla. Caipica, jichushca pambapimi canchi— ninajurcami.

13Shina nijpimi, Jesusca:

—Cangunallata micunataca caraichilla— nirca.

Shina nijpimi, cashna ninajurca:

—Ñucanchica, picha tandaguta, ishcai pijigutallami charinchi. ¿Cai tucui gentecunaman micunata carangapachu, randigrichi ningui?— ninajurcami.

14Chai gentecunaca, picha huarangashnami tandanajushca carca. Shina tandanajushca cajpimi:

—Gentecunataca, picha chunga, picha chunga chaupishpa tiachipaichi— nishpa Jesusca, paipaj yachajujcunata mandarca.

15Paicuna tiaripaichi nijpica, tucuilla tiarircallami. 16Ña tiarijpimi, picha tandagutapash, ishcai pijigutapash, Jesusca japirca. Shina japishpallami, jahua pachata ricushpa, Diosta pashi nirca. Chai tandatapash, pijitapash asha asha chaupishpami, chai gentecunaman carachun, paipaj yachajujcunaman curca. 17Shina carajpimi tucuicunallata, na munangacaman micurca. Paicuna na micui ushashcataca, chunga ishcai canasta jundatami, paipaj yachajujcunaca tandachirca.

Pedroca, Quishpichij Cristomi cangui nishcami

(Mat. 16:13-20; Mar. 8:27-30)

18Jesusca, pailla Diosta mañashpa tiajujpimi, paipaj yachajujcunapash, chaipi tianajurca. Shina tianajujpimi:

—Gentecunaca ñucataca, ¿maijan yashpashi ricuhuan?— nishpa, paipaj yachajujcunataca tapurca.

19Shina nijpimi paicunaca, cashna ninajurca:

—Huaquingunaca: ‘Bautizaj Juanmi canga’ ninajunmi. Huaquingunaca: ‘Dios ima nishcata villaj Eliasmi canga’ ninajunmi. Shujcunaca: ‘Dios ima nishcata Profeta puracunamanda maijambashmi causarimushcanga’ ninajunmi— nishpami tigrachinajurca.

20Shina ninajujpimi:

—Cangunaca cutin, ¿maijan nihuanguichita?— nishpa, Jesusca tapurca.

Shina tapujpimi:

—Taita Dios cachamushca Quishpichij Cristomi capangui— nishpa, Pedroca tigrachirca.

Jesusca, pai huañuatami villashca

(Mat. 16:21-28; Mar. 8:31—9:1)

21Pedro chashna nijpimi:

—Ñuca maijan cajtapash, pimambash napacha villanachu canguichi— nishpa Jesusca, paipaj yachajujcunata shinllitapacha mandarca.

22Shinallata cashnatapashmi nijurca:

—Runa Aichayu tucushca ñucaca, ninanda llaquichi tucunapachami cani. Mandaj rucucunapash, curacunata mandajcunapash, mandashca shimita yachachijcunapash, ñucataca ninandami na ricunayachishpa, huañuchijpi huañunapachami cani. Shina huañushpa, quimsa punllahuanga causarishallami— nijurcami.

23Shina nishpallami Jesusca, tucuilla gentecunata cashna nijurca:

—Maijan cashpapash ñucata catingapaj munashpaca, paipaj causaita na llaquishpa, paipaj cruzta punllandi aparinshna ñucata catihuachun. 24Maijan cashpapash paipaj causaita quishpichingapaj munashpaca, chingaitami chinganga. Ashtahuangarin ñucata catijushcamanda huañuchi tucushpaca, quishpiringapachami. 25Shuj runaca, cai pachapi ima tiajtapash, tucuita japishpa charijyashpapash, paillata huaglishpa, na cashpaca chingaita chingagrishpaca, ¿ima alita canga? 26Maijan cashpapash ñucamanda, ñuca villashca shimicunamanda, pinganayachishpa shujcunaman na villajpica, ñucapash ninandami pingaichisha. Runa Aichayu tucushca ñucami, jucha illaj punchapamba angelcunahuan, ñuca Taita punchapamba tiajunshna punchapamba shamushpa, chai pinganayachijtaca pingaichisha. 27Na llullashpami, cangunata cashna nini: Caipi shayanajuj puramanda huaquingunaca, Taita Dios mandajujtaca, nara huañushpallatami ricunguichi— nijurcami.

Jesús punchapamba tucushpami ricurishca

(Mat. 17:1-8; Mar. 9:2-8)

28Shina villajushca pusaj punllashna jipami, cashna tucurca: Pedrota, Juanda, Jacobota pushashpami Jesusca, Diosta mañangapaj urcuman vichai rirca. 29Chaipi mañajujpimi, ñavipash shujman tigrashpa, churajushcapash yuraj yuraj punchapamba ricurirca. 30Chaipica, ishcai runacuna Jesushuan parlanajujmi, ñapash ricurirca. Shujca Moisés, shujca Eliasmi carca. 31Paicunaca, punchapamba chaupipi shayanajushpami, Dios munashcata pactachingapaj, Jerusalenbi huañuchi tucunami cangui nishpa villanajurca. 32Pedroca, paipaj cumbacunandimi, ninanda puñuihuan na ushashpa puñunajurca. Ña rijcharishpaca, Jesús punchapamba shayajujta, ishcai runacuna paihuan shayanajujtapashmi ricunajurca. 33Jesushuan cashcamanda shayanajushcacuna anchurishpa rijpimi Pedroca, Jesusta cashna nirca:

—Ñucanchica, alipajmari shamupashcanchi, Yachachij. Cunanga, quimsa chugllagutami rurashun ninchi. Shujtaca canman, shujtaca Moisesman, shujtaca Eliasmanmi ruragrinchi— nircami.

Shina nishpami Pedroca, paillata imata nijushcatapash na yacharca. 34Shina nijujpillatami fuyu pillushpa, paicunataca ñapash quilparca. Chai fuyu ucuman yaicunataca, chai quimsa yachajujcunaca ninandami manllarca. 35Chai fuyu ucumandaca, cashna rimajmi uyarirca:

—Caimi, ñuca juyashca Churigu. Pai imata yachachishcatami, aliguta uyana canguichi— nircami.

36Shina rimamuj uyarishca jipaca, Jesuslla shayajushcatami ricunajurca. Paicunaca, imata ricushcatapash chai punllacunapica, pimambash na villashpami, upalla purinajurca.

Aya jundashca huambratami, Jesusca alichishca

(Mat. 17:14-21; Mar. 9:14-29)

37Cayandi punllami, urcumanda urai shamunajujpica, ashtaca gentecuna Jesusta tuparingapaj shamunajurca.

38Paicunapaj chaupimanda, shuj runa ninanda caparishpaca, cashnami nirca:

—Yachachij, ñuca churiguta alichipai. Cai huahuatallami charipani. 39Paitaca, aya jundashpami, cungashcapi ninanda caparichin. Shinallata ninandapacha chujchuchishpami, babasta shitachimupan. Caiman chaiman shitashpami, ashacamanlla saquishpa rin. 40Ayata llujchipaichi nishpami, cambaj yachajujcunapajman apamuparcani. Ashtahuangarin paicunaca, na llujchi usharcachu— nijurcami.

41Shina nijpimi Jesusca, cashna nirca:

—Ñucata nali crij miraicuna, jatun nalicuna. ¿Ima horascamanda cangunahuanda cashna cashayari? ¿Ima horascamanda cangunamandaca llaquirijushallayari?— nishpallami:

—Cambaj churiguta apamui— nirca.

42Jesuspajman chai huambragu quimirijujpimi, alpapi urmachishpa ayaca, ninandapacha chujchuchirca. Ashtahuangarin Jesusca, mapata rurachij ayata ninanda rimashpami, chai huambramandaca llujchirca. Shina rurashpami, chai taitataca:

—Cambaj churigutaca pushailla— nirca.

43Taita Dios ninan ushaihuan chashna rurashcata ricushpami, tucuicuna manllarinajurca.

Jesusca, cutinmi pai huañunata villajushca

(Mat. 17:22-23; Mar. 9:30-32)

Tucui imagutapash rurajta ricushpa, tucuicuna manllarijpimi Jesusca, paipaj yachajujcunata cashna nirca:

44—Cashna ñuca villashcataca, na cungashpami, aligutapacha yarina canguichi. Ashtahuangarin Runa Aichayu tucushca ñucataca, runacunapaj maquipi japichihuangami— nijurcami.

45Ashtahuangarin ima nishpa Jesús chashna nijtapash, paicunapaj yuyaica quilpashcashna cashpami, paipaj yachajujcunaca na yachai usharca. Imashpa chai shimicunata nishcata tapungapajpash manllarcami.

¿Maijanshi ashtahuan yali ali canchi? ninajushcami

(Mat. 18:1-5; Mar. 9:33-37)

46Chai jipami, Jesuspaj yachajujcunaca:

—¿Maijanshi ashtahuan yali ali canchi?— nishpa, paicunapura parlai callarirca.

47Paicunapaj shungupi chashna yarinajushcata yachashpami Jesusca, shuj huahuata maquimanda aisamushpa, paicunahuan shayachirca. 48Shina shayachishpami, paicunataca cashna nirca:

—Maijambash cai huahuaguta ñuca shutipi chasquijca, ñucatami chasquin. Shinallata maijambash ñucata chasquishpaca, ñucata cachamuj Taitatapashmi chasquin. Ashtahuangarin maijanmi canguna purapi huahuagushna causan, chaimi ashtahuan yali jatun— nircami.

Ñucanchita na fiñajca, ñucanchi purallatami nishcami

(Mar. 9:38-40)

49Chai jipami Juanga, Jesusta cashna nishpa tigrachirca:

—Yachachij. Cambaj shutipi rimashpami shuj runaca, ayacunata gentecunamanda llujchijurca. Paica, ñucanchihuanga na cumba tucushpa, canda catinllu. Shinata ricushpami: ‘Ama chashna ruraichu’ nishpa jarcarcanchi— nircami.

50Shina nijpimi Jesusca, cashna nirca:

—Na jarcashpa, saquinallami canguichi. Maijambash ñucanchita na fiñashpa purijushpaca, ñucanchi purallatami— nircami.

Jacobota, Juanda Jesús jarcashpa rimashcami

51Jahua pachaman apai tucuna punllacuna chayamujujpimi Jesusca, Jerusalenman rinapachami cani nishpa ri callarirca. 52Shina rijushpami, Jesusta ñaupashpa villagrichun cacharca. Paicunaca, Samaria llactaman chayashpami, shuj uchilla llactapi Jesús mingarichun, huasita mascanajurca. 53Ashtahuangarin Jerusalenman rijujta yachashpami, Samaria llactapi causajcunaca, na mingachingapaj munanajurca. 54Chaitaca, Jesuspaj yachajujcuna ricushpami Jacobondi, Juandi cashna ninajurca:

—Apunchi Jesús. Eliaspaj punllacunapi ninahuan tucuchishcashna, ¿nachu chai gentecunapaj jahuapi jahua pachamanda nina urmamuchun mañashun?— ninajurcami.

55Shina nijpimi Jesusca, tigrarishpa ricushpa shinllita rimashpa, cashna nirca:

—Cangunaca, Diospaj Espiritupaj cajta na yachashpami, chashna ninguichi. 56Runa Aichayu tucushca ñucami, gentecunata quishpichingapaj shamurcani, na tucuchingapaj shamurcanichu— nircami.

Shina nishpallami paicunaca, shuj uchilla llactaman yalirca.

Jesusta catingapaj munajcunamandami villajun

(Mat. 8:18-22)

57Paicuna rinajujpimi shuj runaca, ñambi cashna nirca:

—Apunchi Jesús, can maita rijujpipash catipashallami— nircami.

58Shina nijpimi Jesusca, cashna nirca:

—Añascunapash, paicuna causana utujuta charinmi. Jahuata rij alasyu animalcunapash, tazinda charinmi. Ashtahuangarin Runa Aichayu tucushca ñucaca, maigupi siririshpa samanatallapash na charinichu— nircami.

59Shina nishpami Jesusca, shuj runataca:

—Ñucata catihuai— nirca.

Shina nijpimi chai runaca, cashna nirca:

—Canda cantingapaca, ñuca taitata pambashpara tigramugripasha. ¿Ñacha saquihuanguiman, Apunchi Jesús?— nircami.

60Shina nijpimi Jesusca, cashna nirca:

—Huañushcashna causajcunaca, paicuna purallata huañushcataca pambanajuchun saquilla. Ashtahuangarin canga, Taita Dios mandajujmanda villangapaj ri— nijurcami. 61Shina nijpimi, shuj runapash cashna nirca:

—Apunchi Jesús, canda catisha nipanimi. Ñuca huasipi causajcunatara, cayacaman nishpa tigramugripasha. ¿Nacha saquihuanguiman?— nircami.

62Shina nijpimi Jesusca, chai runatapash cashna nirca:

—Maijan runapash yapujushpaca, na huashaman tigrashpa ricushpandi yapunllu. Chashna yapuj runashna cashpaca, Taita Dios mandajuj llactapaj ruraitaca, napacha ushangachu— nircami.

Currently Selected:

LUCAS 9: QUII

Highlight

Copy