LUCAS 13
13
Diospajman tigrarichi, na cashpaca chingagringuichimi
1Chai punllacunapillatami, huaquin runacunaca Jesuspajman shamushpa, cashna nishpa villanajurca: “Galilea llactamanda runacuna rishpa, Diosman animalcunata carashpa huañuchinajujpimi, Pilatoca paicunatapash huañuchinajuchun cacharca. Chaimandami chai runacunapaj yahuarca, animalcunapaj yahuarhuan chapurirca” ninajurcami.
2Shina villajpimi Jesusca, paicunata cashna nijurca: “Galilea llactamanda runacunaca, chai llactapi tucui causajcunata yali ashtahuan juchayu cashpami, huañuchi tucushcanga, ¿yashpachu puringuichi? 3Cangunataca cashna nini: Na chashnachu. Ashtahuangarin ninanda llaquirishpa Diospajman na tigrarishpaca, tucuicunallatami paicunashnallata chingagringuichi. 4Shinallata Siloé shuti jatun pata urmashpaca, chunga pusaj runacunatami llapishpa huañuchirca. Paicunaca, Jerusalenbi causajcunata yali ashtahuan juchayu cashpami, huañuchi tucushcanga, ¿yashpachu puringuichi? 5Cangunataca cashnami nini: Na chashnachu. Ashtahuangarin ninanda llaquirishpa Diospajman na tigrarishpaca, tucuicunami paicunashnallata chingagringuichi” nijurcami.
Na fucuj jigos yurahuan chimbapurashpa parlashcami
6Jesusca, cashnahuambash chimbapurashpami parlajurca: “Shuj runaguca, paipaj alpapica jigostami tarpushcata charirca. Ña fucushcami canga yashpa, pallangapaj rishpaca, imatapash na tarircachu. 7Shinamandami chagrata cuidaj runataca, cashna nirca: ‘Uyapai, ña quimsa huatatami, cai yuramanda pallangapaca shamujunilla. Ashtahuangarin shuj jigostallapash na tarinichu, cuchupailla. Yangallatami, alpata huaglichishpa shayajun’ nircami. 8Shina nijpimi, chagrata cuidaj runaguca, cashna nirca: ‘Cunan huatagutaca saquipaira, taitalla. Chai yura siquita allashpa, huanuguta churapasha. 9Shina rurajpica, aliguta fucungapashchari. Na fucujpica, cuchui nihuanguilla’ nishpami tigrachirca” nijurcami.
Samana punllapimi Jesusca, huañujuj shuj huarmita alichishca
10Samana punllapimi Jesusca, tandanajuna huasipi yachachijurca. 11Chai ucupica, ña chunga pusaj huatata huañujujlla huarmimi tiajurca. Chai huarmica, aya jundashpa curcuyachishca cajpimi, imashna derecharitaca napacha usharca. 12Chai huarmita ricushpami Jesusca, paipaj ñaupajman cayarca. Shina cayashpami:
—Cunanga, ñami chai ung:uimandaca cachari tucushca cangui— nirca.
13Shina nishpami Jesusca, chai huarmipaj uma jahuapi maquita churarca. Shina churajhuan derecharishpami, Taita Diostaca ninanda alicachijurca. 14Samana punllapi Jesús chashna alichijpimi, tandanajuna huasipi mandaj runaca, ninandapacha fiñashpa gentecunataca cashna nijurca:
—Imata rurangapajpash, sucta punllatami charinchi. Chai punllacunapimi, alichihuai ningapaca shamuna canguichi. Samana punllapica, na shamunachu canguichi— nircami.
15Shina nijpimi Apunchi Jesusca, chai runataca cashna nijurca:
—Mishqui shimi, jayaj shungu runa. Samana punlla cajpipash, maijan cashpapash, ¿nachu huagrata cashpapash, burrota cashpapash corralmanda cacharishpa, yacuta ufiachingapaj rin? 16Cai huarmica, Abrahambaj mirai purami. Satanás huatashca charijujpimi, paica ña chunga pusaj huatata huañujujlla causajushca. Samana punlla cajpipash, ¿nachu paitaca huatashcashna charijujmanda cacharichina carcani?— nijurcami.
17Jesús chashna nijpimi, paita na ricunayachij runacunaca, tucuilla pingai tucurca. Ashtahuangarin tucuilla gentecunami, Jesús chashna juyailla rurajta ricushpaca, ninanda cushijunajurca.
Mostaza muyuhuan chimbapurashpami parlashca
(Mat. 13:31-32; Mar. 4:30-32)
18Jesusca cashnatapashmi nijurca: “Taita Dios mandajujtaca, ¿imahuan chimbapurashpata yachachisha? 19Dios mandajujca, shuj runa paipaj alpapi mostaza muyuguta tarpushcashnami. Chai muyugu viñashpa, jatun quiru tucujpimi, alasyu animalcunaca malquicunapi tazinda rurashpa causanajun” nijurcami.
Levadurahuan chimbapurashpami parlashca
(Mat. 13:33)
20Jesusca cashnatapashmi nirca: “Taita Dios mandajujtaca, ¿imahuan chimbapurashpata yachachisha? 21Dios mandajujca, shuj huarmi quimsa batea junda jacupi levadurata chapushpa, tucuilla masa punguingacaman pacashpa saquin, chashnapachami” nijurcami.
Quichiji punguta yaicunatami, Jesusca yachachishca
(Mat. 7:13-14,21-23)
22Jerusalenman Jesús rijushpaca, pueblocunapipash, uchilla llactacunapipash, yachachishpandimi rijurca. 23Paita shuj runa tapushpaca:
—¿Huaquingunallachu quishpiringa, imashi, Apunchi Jesús?— nircami.
Shina nijpimi Jesusca, cashna nijurca:
24—Quichiji punguta yaicungapaca, shinlli tucunami canguichi. Cangunataca, cashnami nini: Ashtacacunami, chaiman yaicungapaca munanga. Shina munashpapash, na ushangachu. 25Huasiyu runa jatarishpa punguta vichajpirami, cangunaca canllapi cashpaca: ‘Mingachihuai taita, punguta pascapai’ nishpa, punguta huactachishpa caparinguichi. Ashtahuangarin huasiyu runaca: ‘Cangunaca maimandachari canguichipash, na rijsinichu’ ningami. 26Shina nijpimi cangunaca, cashna ni callaringuichi: ‘Canhuanmi micushpa, ufiashpa tianajun carcanchi. Ñucanchi plazacunapimi, canga yachachishpa purircangui’ ninguichimi. 27Shina nijpimi cangunataca, cashna ninga: ‘Cangunataca, maimanda cajtapash na rijsinichu nijunica. Cangunaca, tucuillamari nalita rurajcuna canguichi. Caimandaca anchurichi’ ningami. 28Taita Dios mandanapica, ñaupa taita Abrahambash, Isaacpash, Jacobopash, Dios ima nishcata villajcunapash, tucuillami chaipi canga. Paicunata ricushpami, cangunaca shitai tucushca cashpa, quirutapash canirishpa, ninanda huacashpa causanguichi. 29Indi llujshimujmanda, indi huashajujmandapash, vichaimanda, uraimandapash gentecunaca, Taita Dios mandajujpi micungapajmi tandanajunga. 30Ricuichi, huashaman churai tucushcacunaca, pundapimi churai tucunajunga. Shinallata pundapi churai tucushcacunaca, huashamanmi churai tucunajunga— nijurcami.
Jerusalenbi causajcunata llaquishpa, Jesusca huacashcami
(Mat. 23:37-39)
31Chai punllapimi, fariseo puracunamanda huaquin runacuna shamushpa, Jesustaca cashna ninajurca:
—Herodesca, canda huañuchingapajmi munajun. Caimandaca, llujshishpa ucha ri— ninajurcami.
32Ashtahuangarin Jesusca, paicunataca cashnami nijurca:
—Richi, atujshna yachaj tucushca runaman, cashna nishpa villanguichi: ‘Cunan punllapash, cayapash gentecunamanda ayacunata llujchinami cani. Huañujujcunatapash alichinarami cani. Quimsa punllapica, ñuca imata ruranatapash tucuchishallami’ nijunmi nishpa villanguichi. 33Ashtahuangarin cunambash, cayapash, cayandi punllapash, cai ñandaca purijunarapachami cani. Dios ima nishcata villajcunaca, Jerusalenmanda llujshishpa huañunataca na charinllu. 34¡Jerusalén, Jerusalén! ¡Cangunaca, Dios ima nishcata villajcunata huañuchijcunamari canguichi! ¡Cangunaman villachun paillata cachamushca runacunatapash, rumicunahuan huañuchijcunamari canguichi! ¡Shuj atalpa, paipaj huahua pollocunata ugllanshnami, cangunataca cutin cutin tandachingapaj munarcani! Ashtahuangarin na munashpami puringuichi. 35Ricui, cangunapaj huasica jichushcamari. Cangunataca, cashnami nini: ‘Jatun Diospaj shutipi shamujujtaca, Dios bendiciashca cachun’ ninajuna punllacamanmi, cunanmandapacha cangunaca ñucataca na ricuhuanguichi— nijurcami.
Currently Selected:
LUCAS 13: QUII
Highlight
Share
Copy
Want to have your highlights saved across all your devices? Sign up or sign in
Quichua Imbabura Bible © United Bible Societies, 1994.
