LUCAS 12

Fariseocuna yachachishcacunaca, levadurashnami nishcami

(Mat. 16:5-12; Mar. 8:14-21)

1Chashna nijujhuanmi, huaranga huaranga gentecuna tandanajumushpa, caishuj chaishuj saruripi Jesuspajman shamunajurca. Jesusca, paipaj yachajujcunamanmi, cashna nishpa villai callarica: “Fariseocunaca, punguichij levadurashnami nij tucushpalla purinajun. Cangunaca, na paicunashna mishqui shimi, jayaj shungucuna canachu canguichi. 2Imata pacalla ruranapash na tianllu. Chai rurashcacuna ricuringapachami. Na yachai ushanalla ima pacallapash na tianllu. 3Shina cashcamandami, yana yana tutapi imata canguna parlashcataca, punllapi parlanajunga. Shinallata punguta vicharishpa, rinripilla imata parlashcatapash tucuicuna uyachunmi, huasi jahuapi shayarishpa caparinajunga.

Maijanda manllanatami, Jesusca yachachishca

(Mat. 10:26-31)

4Ñuca juyashca cumbacuna, ashtahuangarin cangunataca cashnami nini: Cangunapaj cuerpota huañuchingapaj munaj runacunataca, na manllanachu canguichi. Huañuchishca jipaca, imata ruraitapash na ashtahuan ushanllu. 5Shina cajpipash canguna maijanda manllanatapash, ñucami yachachigrini: Causaita quichushca jipa, ucu pachaman cachaita ushaj Diostami manllana canguichi. Ari, paitallami manllana canguichi ninimi. 6¿Nachu alasyu uchilla picha animalcunataca, ishcai uchilla culquipajlla jatunajun? Shina jatujpipash chaicunataca, shujllatapash Taita Diosca, na cunganllu. 7Paica, cangunapaj umapi mashna ajcha tiajtapash, tucuilla cuentashcallami. Chaimandami runacunataca, na manllana canguichi. Cangunacarin, chai ashtaca animalcunatapash ashtahuan yali valishcami canguichi.

Ñucamanda villanataca na pinganayachinachu canguichi nishcami

8Cangunataca, cashnami nini: Maijambash ñucamanda shuj gentecunapaj ñaupajpi villajpica, Runa Aichayu tucushca ñucapash, Taita Diospaj angelcunapaj ñaupajpimi paimandaca villasha. 9Ashtahuangarin gentecunapaj ñaupajpi na paipajchu cani nijpica, ñucapash Taita Diospaj angelcunapaj ñaupajpica, paica na ñucapajchu nishpami villasha. 10Maijan cashpapash, Runa Aichayu tucushca ñucata nalicachishpa rimashcataca Diosca cungangami. Ashtahuangarin Diospaj jucha illaj Espirituta nalicachishpa rimajtaca, napacha cungangachu. 11Tandanajuna huasicunaman, juezcunapaj ñaupajman, mandajcunapaj ñaupajman, cangunata apajpica: ‘¿Imatashi tigrachisha, imatashi nisha?’ yashpa, na manllanachu canguichi. 12Canguna imaguta rimachumbash, Diospaj jucha illaj Espiritumi, cangunataca chai horasllata yachachinga” nijurcami.

Ninan charij, juizu illaj runamandami villajun

13Chai gentecunapaj chaupimanda shuj runami, Jesusta cashna nirca:

—Yachachij, ñucanchi taitamanda imaguta japinataca ñucahuan chaupirichun, ñuca huauquita mandapai— nircami.

14Shina nijpimi Jesusca, cashna nirca:

—Cangunapaj juez cachun, na cashpaca canguna chaupirichun mandachunga, ¿pita ñucataca churahuarcayari?— nircami.

15Shina nishpallami Jesusca, cashna nirca:

—Ricui, charij tucunatalla na munashpami, aliguta yarishpa causana canguichi. Imata ninanda maijan runa charishpapash, chaihuan unaita causajuitaca, na ushangachu— nircami.

16Jesusca, cashnahuambash chimbapurashpa parlashpami, cutin yachachirca: “Shuj ninan charij runapaj alpacunapica, ninandami granocunaca fucujurca. 17Shina fucujpimi chai runaca: ‘¿Imatata rurashayari? Chai tucui granocunataca maipi alichitapash, na ushanachu cani’ yashpami purijurca. 18Shinamandami cashna yajurca: ‘Cunanga, cashna rurasha. Granota alichina ñuca huasicunataca, jatun huasicunata huasichingapaj urmachishalla. Shina urmachishpaca, tucuimanda yalita huasichishpami granocunatapash, imata charishcatapash tucuita alichisha. 19Shina rurashpaca, ñuca almataca cashnami nijusha: Ñuca almalla. Mashna huatacamambash micungapaj, ashtacatami alichishca charingui. Cunanga samajuilla, ninanda micushpa, ufiashpa, ninanda cushijusha’ nirijurcami. 20Ashtahuangarin Taita Diosca, chai runataca cashnami nirca: ‘Juizu illaj runa, cunan tutallatami cambaj almata mañangapaj shamunga. Can imata charishcatapash, ¿pimanshi saquingui?’ nircami. 21Chashnami, pailla imatapash ninan valishcacunata alichishpa charingapaj tandachij runaca tucun. Charij tucushpapash, Taita Diospaj ñaupajpica, imapash illajmi” nijurcami.

Imatapash ninanda munashpa, na musparinachu canguichi nishcami

(Mat. 6:25-34)

22Chai jipami Jesusca, paipaj yachajujcunata, cashna nijurca: “Cangunataca, cashnami nini: ‘¿Imata micushpa, imata churajushpata causashun?’ nishpaca, na chaitalla yariashpa musparishpaca causanachu canguichi. 23Cangunapaj causaica, micunatapash ashtahuan yali aligumi. Shinallata cuerpogupash, churajunataca ashtahuan yali aligumi. 24Alasyu animalcunata ricushpami, yarina canguichi: Paicunaca na tarpunllu, granotapash na tandachinllu. Granocunata alichingapaj shuj huasitallapash, na charinllu. Paicuna micuchunga, Taita Diosmi caramujun. ¿Nachu cangunaca, chai alasyu animalcunatapash yali canguichi? 25Canguna puramandaca, ashtahuan jatunyangapaj munanajushpapash, ¿maijanshi chuscu chunga centimetrotallapash mirachita ushanguichi? 26Chaitallapash na ushashpaca, ¿imashpata ashtahuan shujcunapash yarinajunguichi? 27Lirio sisacuna pambapi viñashcata ricushpami, yarina canguichi: Chai sisacunaca, na imatapash ruranllu, na puchanajunllu. Ashtahuangarin cangunataca, cashnami nini: Salomonga, ninan charij cashpapash, na chai sisagushna punchapambata churajuitaca usharcachu. 28Taita Diosmi, jihuagutapash juyailla viñachishpa sisachin. Shina juyaillagu cajpipash, cayapaca cuchushpa, tulpapi rupachinllami. Na tucui shunguhuan crishpa causajcuna. ¿Nachu cangunamangarin churajunaguta caramunga? 29Cangunaca, ima micunamandapash, ima ufianamandapash na musparinachu canguichi. Na chaicunamandalla imatapash ninanda ruranata yariashpa llaquilla purinachu canguichi. 30Cai pachapajtalla rurashpa causanajuj gentecunami, tucui chaicunatalla yariashpa causanajun. Ashtahuangarin cangunapaj Taitaca, chaicunata canguna minishtijujtaca ña yachanmi. 31Ashtahuangarin Taita Dios mandajujpi causanatarami mascana canguichi. Shina causajpica, tucui chaicunata canguna munashcataca, jahuan jahuan caramujungallami.

Jahua pachapi charij canamandami yachachishca

(Mat. 6:19-21)

32Ñuca llamagucuna, cangunaca ashalla cashpapash, na manllanachu canguichi. Cangunapaj Taitaca, mandanataca cushijushpami cangunaman carashapacha nijun. 33Canguna imata charishcatapash jatushpa, chai culquitaca imagutapash na charijcunaman caraichi. Jahua pachapi, causaita causaicaman na tucurina muchilacunapi imagutapash alichishpa charinata yarichi. Jahua pachapica, shuhuacunapash na yaicungachu, polilla jurucunapash na micushpa tucuchingachu. 34Maipi imata charishpapash, shungupica chaita yariajllami purinajunguichi.

Chapariashpa shuyajuj servij runamandami villajun

35Aliguta chumbilishcashna, michacunatapash japichishcashnami, chapariana canguichi. 36Cazarajui bodamanda paicunapaj amo tigramushpa, punguta huactachijpi pascangapaj shuyajuj servijcunashnalla, cangunapash shuyaichi. 37Rijcharianajujta paicunapaj amo japij shamujpica, servijcunaca ninandami cushijun. Na llullashpami, cangunataca cashna nini: Amoca ali chumbilirishpami, paita servijcunata tiachishpa, micunataca paipacha caranga. 38Chaupi tuta cashpa, punllayajujta cashpapash, rijchariajujta paicunapaj amo japij shamujpica, servijcunaca ninandami cushijun. 39Ashtahuan caitapash yarichi: Shuhua shamunata huasiyu dueño yachashpaca, paipaj huasita utujushpa amo shuhuachun saquingapaca chaparianmanmi. 40Shinallatami, Runa Aichayu tucushca ñucapash, cungashcapi ñapash shamusha. Shinamandami cangunaca, alichirishcalla causana canguichi” nijurcami.

Amota na cazuj runamandami villajun

(Mat. 24:45-51)

41Chashna villajpimi Pedroca, Jesusta cashna nishpa tapurca:

—Apunchi Jesús, ¿ñucanchimanllachu cashna chimbapurashpa parlajungui, na cashpaca tucuicunamanllu cashna nijungui?— nircami.

42Shina nijpimi Apunchi Jesusca, cashna nirca:

—Shuj amoca: ‘Ñuca huasiguta cuidapangui. Micuna horas chayajpica, ñucata servijcunaman micunaguta carapangui’ nishpami, mingashpa saquin. Chaita aliguta cazushpa, aliguta yarishpa pactachij mayordomoca, ¿maijanda canga? 43Chashna mingashcata pactachijujta amo japij shamujpica, chai servij runaguca ninandami cushijunga. 44Na llullashpami, cangunataca cashna nini: Chai runagumanmi amoca, pai imata charishcatapash, tucuillata minganga. 45Ashtahuangarin chai servij runaca, paipaj shungupica: ‘Ñuca amoca, na ucha shamunllu’ nijungami. Shina nijushpami, servishpa causaj jaricunatapash, huarmicunatapash macai callaringa. Shinallata micushpa, ufiashpa, machashpami purijunga. 46Ima punlla, ima horas shamunatapash na yachashca chashna purijujpillatami, amoca ñapash shamunga. Shina shamushpami, chai runataca ninandapacha llaquichishca jipaca, na cazujcunahuan tandachishpa saquinga. 47Chai servijca, amo imata rurachun munashcatapash yachashca jahua napacha alichirishpa na rurashpaca, ninandami asti tucunga. 48Ashtahuangarin shuj runaca, amo imata rurachun munashcatapash na yachaimandami, asti tucunapacha nalita ruranga. Shina rurashcamandaca, ashatallami asti tucunga. Maijanmambash ashtacata Dios carashca cashpaca, ashtacatallatami tigrachihuai ninga. Imatapash ashtahuan rurachun mingashca cashpaca, ashtahuan rurashcata ricuchihuai ningami.

Ñucata crijpica fiñangami nishpami, Jesusca yachachishca

(Mat. 10:34-36)

49Cai pachapi ninata japichingapajmi shamurcani. Cunanga, ñami japirishca. ¿Ashtahuanga imatata munasha? 50Bautizarinshnami, shuj ninan llaquita apana cani. ¡Chai punlla chayanamandaca, ninandami llaquirini! 51Cai pachapi causajcunaman, casilla ali causaita cungapajmi shamushca yahuanguichiman. Cangunataca, cashnami nini: Chaita cungapaca, na shamurcanichu. Ashtahuangarin fiñanajushpa causachunmi shamurcani. 52Cunan punllamandapachami, shuj huasipi causaj pichapura familiacunaca, shicanyaringa. Quimsacunaca, ishcai puratami fiñanga. Ishcaicunaca, quimsa puratami fiñanga. 53Taitapash paipaj churita, churipash paipaj taitata, mamapash paipaj ushita, ushipash paipaj mamata, suedrapash paipaj jachunda, jachumbash paipaj suedrata fiñashpami shicanyaringa— nijurcami.

Cunambi ima tucujujtapash, ¿imashpata na yachanguichi?

(Mat. 16:1-4; Mar. 8:11-13)

54Jesusca, chai ashtaca gentecunatami, cashnatapash nijurca: “Cangunaca, indi huashajuj pushtumanda fuyu llujshimujpica: ‘Ñami tamiagrin’ ninatami yachanguichi. Canguna nishcashna tamianllami. 55Shinallata urai ladomanda huaira shamujpica: ‘Tamia pascarigrinmi’ ninguichimi. Canguna nishcashna pascarinllami. 56¡Mishqui shimi, jayaj shungucuna! Cangunaca fuyuta, huairata ricushpami, imatapash yachanguichi. Ashtahuangarin cunambi ima tucujujta ricushpapash, ¿imashpata na yachai ushanguichi?

Canda fiñaj runahuanga, ali tucunami cangui nishcami

(Mat. 5:25-26)

57¿Imashpata cangunallata na aliguta ricushpa, imatapash cashcatapacha na ruranguichi? 58Mandajpaj ñaupajman pipash canda juchachishpa apajujpica, ñanda rijushpallata paihuanga ali tucunata yaringui. Paihuan ali tucungapaj na ucha munajpica, pactarallapash aisashpara candaca juezpaj ñaupajman apanman. Shina apajpica juezca, llaquichij runamanmi cunga. Chai runaca, prezuna huasipimi churanga. 59Candaca, cashnami nini: Prezuna huasipica, canmanda cuna culquita tucuilla cungacamanmi, na llujshi ushashpa tiajungui” nijurcami.

Currently Selected:

LUCAS 12: QUII

Highlight

Copy