Johan 19

1Cakhutaata Pilat ca Zingsuv kha la te a patuv sa yi. 2Rieka tie ta ahling lakhuv kha pakhuv yite, pangsepa kha ama pabuv. 3Vaahnue yite, “Judah siepahruo hing a hringkhue pasiy se,” ta yite a hmie lie kha ama cabe. 4Pilat ca pya pakhaa te, “Mang tie ung, ama ca a suena suokha hmuo hmung va ang tapa kha ica pachang sa khing nakaw yi ta i kya pyakhyi hing,” a ta. 5Zingsuv ca ahling lakhuv a khuv te a pangsepa hne cata a kya pya. Pilat ta, “Mang tie ung, cawsaapapaa hing!” a ta yi. 6Tluobyilepa tie hne paliy tie cata ama ama hmung pahne ta, “Vieluo cunglie thie tie! Vieluo cunglie thie tie!” tapata ama khi. Pilat ta, “A chiy ungla vieluo cunglie ca va thie tie ung; Kama ca a suena hmung va ang,” a ta yi. 7Judah ming ta, “Ama ca Khazing Saacapaa na i cuo a ta nakawta ima hnyipa phungbie haata thiy aa phuvpa tana a cuo,” ama ta.

8Capa bie ca a thyi pahne ta Pilat ca a ciy vie hryly. 9A ing chung luo kha a ngie pakhaa te Zingsuv kha, “Khaapa taata ma na cuo?” tapata a hiehriy. Cuorasala Zingsuv ta kaakha hmuo palie vyi. 10Cacuonakaw Pilat ta, “Na chaw khing va cama? Nama pathlie khuna, a cuo li kie vieluo cunglie thie khuna naw i hnyipa hing pachang va cama? a ta. 11Zingsuv ta, “Cungluo taata pi li pata ca i cunglie khaahmuo naw hnyi khu vaciy; cacuonakawta na kuv cungluo naa vya pachiy satuv hingna a sue vie a ta. 12Capa khutaa ca Pilat ca Zingsuv pathlie khuna riypa luo kha a huv. Cuorasala Judah ming ca khi yite, “Hingpapaa hing na pathlie kieca Sizar viesaa ta cuo'a vaciy. Ahunghmuo cuose siepahruo na i cuo a tapa ca Rom siepahruo cariepa tana a cuo,” ama ta.

13Pilat ta hingpa bie a thyi tiyta, Zingsuv kha ale luo kya pyakhyi te Hebru ryi ta Gabbatha ama tapa, bierinapa thude, Lungphie Phaa lie kha a kya tu. 14Capa cuo ca Lawsena Pyi cuo ta a ting ning, ningchung hraw ta a cuo. Judah ming kyihuo khata, “Nama siepahruo hing mang tie ung!” a ta yi. 15Khi yite, “Thie tie! Thie tie! Vieluo cunglie khepuo tie,” ama ta. Pilat ta, “Nama siepahruo hingma vieluo cunglie i thie aa?” a ta yi. Tluobyilepa tie ta, “Sizar ri li pata siepahruo hnyi va puv,” ama ta. 16Cakhutaata Pilat ta Zingsuv kha vieluo cunglie thie riypata iema kuv luo a pi yi.

Vieluo Lie Zingsuv Ama Thie

(Mat 27:32-44; Mar 15:21-32; Luk 23:26-43)

Cacuonakawta Zingsuv ca ama sikhyi. 17A vieluo kha amata tah a puv te Hebru ryi ta Galgotha ama tapa, Luvruv Hmang tapa luo kha a pha. 18Capa lieca vieluo cunglie ama khepuo, a hrangpa pahning zaw kha khepuo ra yite Zingsuv ca amaa lala lieta a aw. 19Pilat ta caa suokha cape te vieluo cunglie ca a taa. A capepa ca, “Nazareth khypa Zingsuv, Judah Siepahruo,” tapata a cuo. 20Zingsuv vieluo lie ama taana hmang ca khypuv hne a hla li nakaw hne a caa ca Hebru ryi, Latin ryi, hne Grik ryi ta ama cape nakawta Judah ming hluvpuv ta ama ri. 21Cacuonakawta Judah ming tluobyilepa tie ta Pilat kha, “Judah ming siepahruo,’ tapata cape kha, cuorasala ‘Hingpapaa hingna Judah ming siepahruo tana i cuo a ta,’ tapata cape tie,” ama ta. 22Pilat ta, “I cape tlipa ca i cape tlipa na a cuo,” a ta. 23Rieka tie ta Zingsuv kha vieluo cunglie ama thie tiyta a caw kha la yite che paliy ta che yite chekha cie ta amaa la. A buohryi zaw kha la yite a caw aw li pata a luv taata a lie te ama taapa ta a cuo. 24Cacuonakawta, pakha hne pakha kha, “Hingpa hing ca thlaa li pata vyisung ta a da ungsiy,” amaa ta. Caapathepa ta,

“Iema ca i caw kha a che yite,

I buohryi kha vyisung amaa da,”

a tapa a tlingna riypata a cuo.

25Cahaa dala cata rieka ta ama tue.

Capa ning cata Zingsuv vieluo a thaa lie a daapa ca a nung, Glopas napuvnung a nung nuta Mary hne Mary Magdalin zaw khata ama cuo. 26Zingsuv ta a nung hne a thaa lie a daapa a duepa a ziytuv kha a hmung tiy yi ta, a nung kha, “Canung, Ama kha na saacapaa ta a cuo kha,” a ta. 27A ziytuvpa zaw kha, “Ama kha na nung ta a cuo kha,” a ta. Capa cuo taacata a ziytuvpa ta Zingsuv nung kha a ing lie a pa-aw sa.

Zingsuv Thiyna

(Mat 27:45-56; Mar 15:33-41; Luk 23:44-49)

28Capa khutaa cata Zingsuv ta zezaw bangkhuo a tlung tli tapa kha pachang te Caapathepa bie a tlingna riypata, “I tiy na a hrie,” a ta. 29Capa lieca mingsuv tiy thuepa bi suokha aw te mingsuv tiy thuepa chung luo kha pangcaw naw yite hissop aarasung daw lie kha ciypuo yite Zingsuv ca a pakaa luo ama kya tuv. 30Zingsuv ca mingsuv tiy thuepa kha vya saw te, “Aa lang tli,” a ta. A luv kha pangie te a huv a ci.

A Vuo Lie Asyi Ta Ama Daw

31Capa ning ca Atingdawning a cuo nakawta ama thiepa tie riy Sabbath ning ta vieluo cunglie a pathliepa kha Judah ming ta khing vayi. Tahematapakieca capa Sabbath ning ca aa pathecepa ning ta a cuo. Cacuonakawta Pilat'a luo kha a ngie yite vieluo cunglie ama thiepa tie ngieluo kha thli pata ama riy la riypata ama hie. 32Rieka tie kha vaa yite Zingsuv hne ama thiehnepa pahning tie ngieluo kha ama thli. 33Cuorasala Zingsuv'a luo ama chiy ca a thiy tlipa kha hmung yite a ngieluo thli vayi. 34Cadyiseca rieka pakha ta a vuo kha asyi ta kya daw te sungkha ta thiy hne tiy kha a kya pya. 35(A ming ta a hmungpapaa hrahring ta tehte a khuopa cuote niema nama zang the na riypata a cuo. A tehte khuopa ca aa hmuopa cuote ama ta biedangpa a ripa kha a pachang.) 36Hing hmang hing Caapathepa lieta, “A ruv suokha hmuo thli'a vayi,” a tapa a tlingna riypata a cuopa a cuo. 37Caapathepa a hrang lie zaw, “Iema ta ama dawpa kha ama mang aa,” a ta.

Zingsuv Ama Paby

(Mat 27:57-61; Mar 15:42-47; Luk 23:50-56)

38Cakhutaacata Judah ming a ciy nakaw yi ta a paruv ta Zingsuv hnang ziytuv a cuopa Arimathea khy ming Josef ta Zingsuv riy la riypata Pilat kha a hie. Pilat ta, ‘na la khu,’ a ta nakawta a riy kha a la. 39Zingsuv a taw riypata zuo ta a vaa buopapaa Nikodemu zaw kha Josef'a luo vaa te mura hne aloes pyapa ziyhmyi paw zakha tluv a riypa kha aa cyi. 40A riy kha la yite Judah ming riy a pabyna phung haata ziyhmyi bya yite pawruo ta ama cataw. 41Zingsuv ama thiena hmang lie kha diedung suokha aw te capa diedung chunglie ca ahunghmuo ama paby buo linapa thluo thaapa suokha a aw. 42Judah ming Atingdawning a cuo nakaw hne a ngie lie thluo a aw nakawta capa lieca Zingsuv kha ama paby.

Currently Selected:

Johan 19: LNT1

Highlight

Copy