LAMKTU 11

Jerusalem Khrihthabum-am Peter ah Ca Guk

1Chang pakhui hei gui naw phi Khanpughi ah Thu Ni ami dogah tu ah mawng cu Judea kho ung ang düihpüi gui la yum pyi ci gui ah chang gui naw ng’ya ba ci gui. 2Peter cu Jerusalem ah gawk law khä tah vun aat bi ne yum ciah chang gui naw ng’cecäk püi ci gui. 3Ngahmi naw, “Nang cu vun aat nak kä bik ci gui ah chang gui ah hteit ne ngami awn a täng ah na ei awk tuk ci nei” ci nak ci gui. 4Cun ah kya sei Peter naw a mawng ama avan cu va tüi netah m’thein tu gui ci.

5Peter naw, “Kei naw Joppa pigaw ah kamik hmuh nak ung, yih dung nu ah mäih cu, ak kit phli ung k’pang ne, khankho ah kaa ami yuk chah law cu ka hmuk ci. 6Cun ah yihdung nu cu ka pei ah ng’et law sei, m’htei ne teng law ung, kuhyawng khisa, phyuciik khamkhaw, la phyukha gui ah kyasei ka hmuk ci. 7Cun kawn ah, “Peter tho law ne, ngawn ne ei gui ä” ciah k’aw cu ka ng’yak ci. Cun ung phi kei naw, “Bawipa, kä bä khai nei, kä theingthap ci la shekak cicu kei naw a i sang ung phi kä ka ei man ci nei” cine ka pyein tu ba ci. 8Cun ah k’aw naw, “Khanpughi naw theingthap ciah a pyein cu nang naw kä theingthap ciah kä na pyein vai” cine pyein ci. 9A cun laih laih ah thum vei kya netah, acun gui cu khankho ah ng’lim ne maih ba ci gui. 10Cun kawn ah ka om nak ah im ah chang sing thum gawk law ghet ci gui. 11Ngahmi cu Sisaria ah kaa kei ah ami tüih law gui ah kyak ci. 12Mumcha Theing naw kä ng’shauk ne ngami ung ka ng’läk tu ge vai ah pyein ci. Joppa gawnu ah kaa yum ciah chang sing chuk cun phi kei awn a täng ah hteit tu u sei, kami van cu Konelius ah im ah kami lut ci. 13Konelius naw a im kyong ah khankho chang ng’düi law sei a hmuh ah mawng la, cun ah khankho chang naw Joppa gawnu ah chang tüi ne Simon Peter ming nak ciah chang cu va khü ä. 14Ani naw nang la na kyong ungka gui naw hun nak nami gah nak vai ah thu ni cu ning thein gui khai nei” cine a pyein ah mawng cu nam then tu gui ci. 15Cun kawn ah kei naw tün ne thu ka pyein law yah ung, Mumcha Theing cu a htük ung keimi ah khan ah a gawk law ah mäih ah, ngahmi ah khan ah phi gawk law ci. 16Cun kawn ung Bawipa naw, “Johan naw tui awn hnim nak pek ci, cun ung phi nang mi cu Mumcha Theing awn hnim nak na mi gah khai” a ci cu ka shüm ba ci. 17Khanpughi naw Bawipa Jesuh Khrit mi yum ci gui am m’gein nak ana peit gui ah mäih ah akhui hei gui am phi a peit gui cu dang ci nei. Cun ah kyasei kei cu a i ah kya ne phi Khanpughi cu kä ka maa na hlawt khai” cine pyein ci.

18Cun ah thu ng’ya u netah cun ah chang gui cu, kä pyein m’shet ba u ne, “Khanpughi naw changpakhui hei gui am phi, ng’yuvat ba ne ghin nak gah vai ah mawng cu pe gui ci nei” cine Khanpughi cu m’hlüngtai ci gui.

Antiok Gawnu ah Khrithabum

19 Bawipa Jesuh yum ciah chang gui cu Stephen ami ngawn yah ung ami shedam ngawn pha gui ah hmawk ah a hei hei ah püipiang yawp ci gui. Am shah gui cu Phoenisia, Saipras, la Antiok gawnu yung ah gawk u ne thu ni cu Jew chang gui bäng am m’thein gui ci gui. 20Cun ung phi Sairin la Saipras ah kaa yum ciah chang gui cu Antiok ah hteit u ne, Bawipa Jesuh Khrit ah mawng thuni cu chang pakhui hei gui am phi m’thein gui ci gui. 21Ngahmi ung Bawipa ah hlüngtai nak cu om sei, chang akhli naw Bawipa cu yum ne ng’hlat lawk ci gui.

22Shin ah a mawng gui cu Jerusalem ah khrithabum gui naw ng’ya u netah Barnabas cu Antiok ah tüi ci gui. 23Ani cu cunah gawnu ah gawk ne, Khanpughi naw chang gui am hriham a peit gui cu hmu ne yeikyai netah, ami m’lung kyong avan awn Khanpughi yum ne ng’düng nak awn ami om vai ah m’cäi gui ci. 24Barnabas cu chang k’ni ah kya ne, Mumcha Theing awn phi be ne, Düng nak awn phi küm ci kya ne, chang akda cu Bawipa ah khü law gui ci.

25Cun kawn ah Barnabas cu Soul shui khai ah Tarsus ah hteit ci. 26Ani cu hmuh netah Antiok khaw ah law sei, ngami cu a khokum pum khrithabum gui awn ng’hmuh u ne, chang akda cu m’theithang ci goi. Bawipa yum ciah chang gui ak htük bäih ah Khritha ah ami khü nak gui cu Antiok gawnu ah kyak ci.

27Cun ah khin ung Prophet amshah gui cu Jerusalem ah kaa Antiok ah lawk ci gui. 28Cun gui ungka Akabus ming nak ciah prophet cu Mumcha Theing ah thamah nak awn düi law netah khomdek khan avan ung kho yaw ne ei ng’geing khai” cine k’cä ci. (Ghangpughang Klaudius ah uk sang ung akcang ah kho yaw ne ei ng’geing ci.) 29Zum ciah chang gui naw ami m’khüt hning phäh phäh ah, Judea kho ah khritha phäi nau gui cu peit taak gui vai ah k’bäi ci gui. 30Cun ah k’bäi u netah Jerusalem Khrithabum a gham gui am ami peit taak ah ngui gui cu, Barnabas la Soul am m’khäh gui ci gui.

Currently Selected:

LAMKTU 11: CBC

Highlight

Copy