LAMKTU 12
12
K’dudeiu nak Däm Law Pi Ci
1Cun ah khin ung ghangpughang Herod cu Khritha gui k’dudeiu nak gui vai ah tha nak ci. 2Ani naw Johan ah nau James cu khim awn ngawn sak gui ci. 3Cun ah a mawng Jew chang gui naw ami ng’yaak hlü hmat netah Peter cu pha ne khit ci. (Cun ah khin cu k’cow kä shum ne m’htut den ah pawi khin ah kya ci.) 4Herod naw Peter cu a pha kawn ah chang sing phli ci lawk ciah gaakap hläm phli am ap ne thawng ung chum ci. Herod naw ani cu Pasakha pawi ang pyi kawn ah Jew chang khli ah ma ah ng’thumcha vai ah k’bäi ci. 5Cun ah kya sei Peter cu thawng ung chum ci gui. Cun ung phi khrithabum gui naw ami m’lung m’hlün ne Khanpughi ah taigü pek ci gui.
Thawng ungka Peter Phyawng lawk ci
6Herod naw Peter cu chang gui ah ma ah kä a k’plawk pha ah kho mü ät ung, Peter cu ngäng ciah gaakap hnih ang lak ung ip ci. Ani cu m’si gui hnih awn khih u ne, thawng m’kawt pei ah phi gaakap gui naw ngäng ci gui. 7Khanpughi ah khankho chang cu ang ghit ah Peter ah pei ah ng’düi law sei, thawng im kyong cu dei ne khang ci. Khankho chang naw Peter cu ak phleing ung pang ne, “Ang ghit ah tho law” ci ne m’tho ci. Acun vai am Peter ah kut ung m’si gui gui cu ng’phian ne yu kya vü yawp ci. 8Khankho chang naw, “Na khei htün ne na phahnak ng’cum ba ä” ci ne pyen nak ci. Peter naw a pyein na mäih ah bik ci. Cun kawn ah khankho chang naw, “na suinu sui ne ka hnu ah na läk lawä” cik ci. 9Peter cu thawng kyong ah kaa lut law ne khankho chang ah hnu ah läk ci. Ani naw khankho chang ah bi cu akcang ah kä ngai ci, amät mik hmuk ciah vah ngai ci. 10Ngahni cu vah hleih ci la tawi nak ah ami ngäng nak ah m’kawt cu phlän ni ne, thawng m’si m’kawt nu pei ah gawk law ci goi. Cun ah m’si kawt cu amät hmawng law khä tah ngah ni cu lam gäk gäk ung lut law ne hteit ci goi. Cun kawn ah khankho chang cu ang ghit ah Peter ah pei ah kaa maih ba ci.
11Peter cu ang shüm law ba kawn ah, “Khanpughi naw a khankho chang cu tüi law ne, Herod ah kut ungka la Judah chang gui naw kei ah khan ah ami bi law vai ah yaica nak ungka a na phiawn cu tuk bäi ka hmat pyi ci nei” cik ci.
12Cun ah a hmat law ba kawn ah ani cu Johan Makuh ah nu Mari ah im ah hteit ci. Cun ah im ah chang akda ng’cut ne taigü ci gui. 13Peter naw cunah im kawt cu hei khäk khä tah, choh hmawng khai ah Rodah ming nak ciah ami shäm ah hnumi hta cu lawk ci. 14Ani cu Peter ah k’aw hmat ba ne yeikyai netah, choh phi kä hmawn ling ah im kyong ah dawng ne lut ba ne, m’kawt pei ah Peter law ne ang düih cu chang gui am m’thein gui ci. 15Cun ah chang gui naw, “nang na gu ci ma?” cine kyak nak ci gui. Cun ung phi cun ah ami shäm ah hnumi hta naw ak cang a pyein nah ling ba khä tah cun ah chang gui naw,” Cun ung Peter ah khanchang ah kyak khai” cik ci gui.
16Peter naw choh cu hei khäk laih laih khä tah choh ak hmawng u ne, Peter cu hmu u netah cäicat ci gui. 17Peter naw a düm ah ami om vai ah a kut awn nüt ne m’cäi gui netah, Khanpughi naw thawng ungka ak phiawn ba ah mawng cu m’thein tu gui ci. Cun kawn ah “Shin ah mawng cu James la khritha phäi nau gui am m’thein tu gui vä” cine m’cäi gui netah a kho hei lam ah hteit ci.
18Kho thai law khä tah, “Peter hawi kyak ci ang” ci ne ngäng ciah gaakap gui cu ang htei ah cäicat ne kyikyawk ci gui. 19Herod naw Peter cu shui ba sak gui sei, shui ba ne kä hmuh ba u khä tah ngäng ci gui cu ngawn gui vai ah k’bäi ci.
Cun kawn ah Herod cu Judea kho nawng shüt ne Sisaria ah hteit ne om shäng shäng ci.
Herod Ghangpughang A Sih a Mawng
20Herod cu Tire la Sidon ung om ci gui ah chang gui ah khan ah ang htei ah m’lung she khätah, ngami cu ng’cut u ne ani cu hmuk khai gui ah lawk ci gui. Ak htük bäih ah mang im uk ciah chang Blastus cu hmuh u netah, ani ah m’gein nak gui awn ghangpughang ah hteit u ne dim gei nak htu pyein ci gui. A i ah kya sei ci ung ngami cu Herod ah kho ungka ei auk vai ami gah tu ah hmawk ah kyak ci.
21A mi k’bäi nak hnüüp ung Herod cu bawi ah mang yih sui ne, ghangpughang ah mangkiang ung ngoh netah, chang gui ah ma ah ng’thu pyein ci. 22Chang gui naw, “Shin ah k’aw cu chang ah k’aw ah kä kyak ci Khanpughi ah k’aw ah kyak ci” ne cine m’lau ci gui. 23Acun vai am Herod cu Khanpughi kä akchang m’sui ah phäh ah Khanpughi ah khankho chang naw m’di sei, ak seng naw ei sei sik ci.
24Cun yah ung Khanpughi ah thu cu kho ung thang sei yum ci cu da law pi law pi k’täi ci.
25Barnabas la Soul cu ani bi ng’pyi law sei Johan Makuh khah püi ne Jerusalem ah law ba ci goi.
Currently Selected:
LAMKTU 12: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
