ATÜNNAK 37
37
Joseph la a Phäi gui
1Jakob cu apa ah om nak Kanaan khaw ah om tu lä ci. 2Shin cu Jakob ni kyong ah mawng ah kyak ci.
Jakob cu a khaw kum gha lei chih a law yah ung, apa ah chu tuba goi Bilhah la Zilpah ah hta gui awn a täng ah htawme gui shäm ci gui. Joseph naw a phäinau gui ah shetkat nak ah mawng cu apa am m’thein ba ci ci.
3Jakob naw Joseph cu a ghi kawn ah a hta nak ah kyasei, a hta gui avan ah ta m’hni pi ci, nipi ciah suinu phi m’sui ci. 4Ami pa Joseph am hni pi cu a phäi gui naw hmu u neta, Joseph cu thüi na u ne akni kä ng’thu ng’htau ba püi ci gui.
5Hnü ät ung Joseph naw ang mang cu m’thein tu gui khäta, a phäi gui naw gen law pi ci gui. 6Ani naw, “Ka ng’mang ka shui khai, ngai vä. 7Mikmi cu lai ma ah htang aat ne mi pawk yah ung, kei ah htang pawk cu ng’düi law khäta, nangmi ah htang pawk gui naw, koi ne khawihnah ci gui” cine pyen ci.
8A phäi gui naw, “Nang cu ghanpughang ah kya ne keimi na na uk gui khai ah na ngai ne ma, ci u neta ang mang a shui ah phäh ah gen law piktäi ci gui.
9Cun kawn ah Joseph cu a ng’mang she ba mä sei, a phäi gui ah ma ah shui ba mä ne, “Khawhni ni, cha ni, aisi gha lei ät ni naw kei cu na khawihnah ci gui” cine pyen ci.
10Joseph naw ang’mang cu apa am m’thein tu khäta, apa naw m’lungshe neta, “Na ng’mang cu a i hawkcha ah ang? Na nu ni, na phäi gui ni, kei ni naw nang cu law ne kami ning khawihnah khai ah na ngai ne ma?” cine pyen nak ci. 11A phäi gui ami van naw m’thüi nak ci gui. Cun ung phi apa naw cun cu m’hnüt ci.
Joseph Ami Yoih, Egypt Khaw ah Ami Hteh Püi
12Hnüüp ät ung Joseph ah a phäi gui cu ami pa ah htome shäm khai gui ah Shekhem ah hteit ci gui. 13Jakob naw Joseph am, “Na phäi gui naw htome ami shäm nak ah Shekhem ah na hteh tu vai ah ka ng’ya hlük ci nei” cik ci.
Joseph naw, “Ä, ka hteit khai nei” cik ci.
14Apa naw, “Na phäi gui ami gai la htome gui ami phyawn ah hteit ne teng neta, na na m’thein law ba vai nei” cine m’cäi ne, Hebron khaw ng’nawi ah ka Shekhem ah a hteh vai ah tüi ci.
Joseph cu Shekhem ah gawk ne 15bung ah hteit shüi shüi khäta, chang tumat naw hmu neta, “A i na shui ci ang?” cine ng’shik ci.
16Joseph naw, “Htome shäm ciah ka phäi gui ka shui gui ci nei, ami om nak na m’thein tuä” cik ci.
17Cun ah chang naw, “Ngami sha kä om ba ci gui nei, Dothan khaw ah hteh vai ci u sei ka ng’yak ci nei” cik ci. Joseph cu Dothan ah hteit neta a phäi gui cu hmu gui ci.
18A phäi gui naw a law cu hmu u neta, kä a gawk law pha ge ung ngawn vai ah k’bäi ci gui. 19Teng vä, ang mang bä cicu lawk ci nei, cine ami mät ng’htau ci gui. 20Ani cu ngawn neta, hu ciah khui shawk ung mi chah khai, sa naw lo ci nei, mi cik khai. Cun kawn ah ang mang cu mi näät khai nei” cik ci gui.
21Cun ami cicu Reuben naw ng’ya gui neta, Joseph cu gung khai ah k’tha nak ci. Ani naw, “Kä mi ngawn hnga kaw; 22bung puk ah hteh püi neta, khui ung mi yuk chah kaw” cine Joseph cu k’phiawn neta apa ah tüi ba khai ah ngai ci. 23Joseph cu a phäi gui ah om nak ah lawk law khäta, aktung pi ah ami m’sui ah suinu cu guh pe u ne, 24heth püi u neta, hu ciah khui ung yuk chah ci gui.
25Cun kawn ah ei ami ei yah ung Ishmaela ah chang bum gui cu tui ng’ui sing pli gui kalauk am k’phuih u ne, Kilead khaw ah kaa Egypt khaw ah hteit khai gui ah law u sei hmuk ci gui. 26Judah naw a phäi gui am, “Mi nau mi ngawn ne mi thuh ung a i ah mi ei mang vai kyak khai ang? 27Ani cu mi si, mi sa mi nau ah kyak ci, kä mi ngawn hnga ne, Ismaela chang gui am mi yoih na gui kaw” cisei ami van naw yum u neta, 28Midian sumlei chang gui ami law sang ung, a phäi gui naw Joseph cu khui ungka la ba u neta, Ismaela chang gui ah ngui phe m’ku ah yoi u sei, Egypt khaw ah hteh püi ci gui.
29Reuben naw Joseph cu teng law ba sei khui ung kä om ba khäta, a sui shum ne azä ci. 30Ani naw law ba neta a nau gui am, “A hmaw cu kä om ba ci nei, a i ah ka kyak khai ang?” cik ci.
31Cun kawn me ngawn u neta, Joseph ah sui cu asi awn hluk ci gui. 32Cun ah sui cu ami pa ah hteh püi u neta, “Shin kami hmuk ci nei, na hta ah k’htu ah kä kya ne ang?” cik ci gui. 33Ami pa naw hmat ba neta, “ä, ka hta ah kaa nei, ka hta Joseph cu sa naw lo ne phyit pyi ci kyak ci nei,” ci neta, 34Jakob cu a sui suut ne, ng’yuu sui sui ne, a hta ah phäh ah thüi kyap ci. 35A hta gui pami hnumi ami van naw m’cäi u sei phi, maa na gui ne, “Ka hta ah a hteh nak ah m’htei khaw ah ka hteit khai nei” cine Joseph ah hmawk ah thüi kyap ci.
36Joseph läi cu Midian chang gui naw Egypt khaw ah ghangpughang ah gabawi Potipha ah yoi ba ci gui.
Currently Selected:
ATÜNNAK 37: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
