ATÜNNAK 38
38
Judah la Tama
1Cun ah khin ung Judah cu a phäinau gui nawng gui shüt ne, Adullam gawnu ah ka Hirah ah pei ah hteit ne om tuk ci. 2A cu ah Judah cu Shua ah hta Kanaan hnumi hta awn ng’hmu ni ne, chu nak ci. 3A chu cu pami ah hta law sei Era ah aming sui ci. 4Cun kawn ah m’gaai ba ne pami ah hta law ba sei Onan ah sui ci gui. 5A chu cu pami ah hta ba mä ne Shelah ah aming sui ci. Cun yah ung Judah cu Achzib ah om ci.
6Judah naw a hta ng’vaipi Era am 7Tama cu lak pek ci. Era cu a omshe ne m’thüi khäta Bawipa naw m’sih ci. 8Judah naw Era ah nau Onan am, “Na phäi ah chu cu chu na tuba ne, na phäi cu ng’shon sak ä” cine pyen nak ci. 9Cun ung phi Onan naw aphäi ah chu cu a hta law ung, a hta ah kä kyak khai ah hmat neta, a phäi ah chu awn ani ng’yaw yah ung a patui cu akpung ah m’hlawi ci. Cun ah kya ne a phäi cu kä ng’shon sak ci. 10Cun ah a bi cu Bawipa naw kä m’hni neta, ani cu m’sih ci. 11Cun ah kya khäta Judah naw, a hta ah chu Tama am, “Nang cu na pa ah hteit ba neta, ka hta Shelah kä a ng’vai pha ah chuih hmeinu ah na om vai nei,” cine pyen nak ci. Cun cu a hta Shelah a sih ba vai ng’ä ai neta a pyen na kyak ci. Tama cu apa ah hteit ba ci.
12Cun kawn ah Judah ah a chu tumat cu sik ci. Judah cu a thüi nak ng’pyi khäta, Adullam ah ka, a teihpüi Hirah awn a täng ah, a htome gui amu k’teiu ci gui ah om nak Timnah ah hteit ci. 13Apughi htome ah mu k’teiu khai ah a hteh cu Tama am m’thein ci gui. 14Tama cu hmeinu ah sui ah a sui ng’thong ne, apum avan, a hmai avan shung khai ah suisa neta, Timnah ah hteh nak lam, Enaim pigaw m’kawt ung ana ngok ci. A i ah kyasei ci ung Judah ah hta hmawpi Shelah cu ng’vai law lang sei, Judah naw a hta am kä a chu nak sak ah phäh ah kyak ci.
15Judah naw a hmai shung ne ngok cicu hmu neta, hnumi she ah ngai ci. 16Judah cu cun ah hnumi ah pei lam ung hteit neta, “Kei awn ni ip khai aw?” cine pyen nak ci. (Ani naw cun ah hnumi cu a hta ah chu te ah kä hmat ci.)
Hnumi naw, “A i na na pek khai ang?” cik ci.
17“Ka me gui ungka Mehta tumat ka ning m’khäh lawk khai” cine Judah naw pyen nak ci.
Hnumi naw, “Bä khai, cun kä na na m’khäh law pha ung na khawh na kyän shüt vai nei” cik ci.
18Judah naw, “A i ka kyän shüt vai ang?” cik ci.
Hnumi naw, “Na mät ah m’hnüt nak a khüm mah la ng’shopawng cu na kyän shüt vai nei cik ci. Judah naw a cun ah pe sei ngani cu ng’yaw ci goi. Cun ah hnumi cu m’gaai ci. 19Tama cu hteit ba ne a hmai a shung nak cu suut ba neta, hmeinu sui cu sui ba ci.
20Judah naw a teihpüi Hirah cu mehta saw sak ne tüi ne a kyän shüt gui cu va lak ba sak ci. Cun ung phi cun ah hnumi cu Hirah naw kä hmu ba ci. 21Ani naw Enaim ah chang gui hmu gui neta, “Shin ah lam pei ung hnumi she ca a hawi ang?” cine ng’shi gui ci.
Ngami naw, “Shin ung hnumi she kä om ci nei” cik ci gui. 22Ani cu Judah ah om nak ah hteit ba neta, “Kä ka hmuk ci nei, Acu ah chang gui naw shin ung hnumi she kä om ci, cik ci gui nei” cine pyen ci.
23Judah naw, “Ka pek cu ka ei na sä, Chang naw ana gaih tu gui vai kä ka m’hni ci, pek vai ah k’tha nak ung phi nang naw kä na hmu hlawt ci” cik ci.
24Cha thum vai lüng khäta, chang tumat naw, “Na hta ah chu Tama cu m’gaai ci nei” cine m’thein ci gui.
Judah naw, “Ani cu la ne mei awn m’khih ne ngawn vä” cik ci.
25Tama cu ngawn vai ah law püi u khäta, apughi am ng’thu am shäk law cu, “Kei cu shin gui kaa nak ciah chang naw, na chu na sei ka m’gaai ci nei, shin ah m’hnüt nak a khüm la ng’shopawng cu teng vä, a u ah ka gui ang?” cine kyak ci.
26Judah naw cun gui cu teng neta, “Ani hman ci, kei ka hma ci, ka hta Shelah awn kä ka om ba sak goi cu, kä hman ci nei” ci neta, ani cu kä et ba phung ne om ci.
27A hta vai ng’et law khäta ang phi ah m’gaai ciah hmat lawk ci gui. 28A hta law sang ung tumat naw a kut k’tawn law sei, m’hta tui ci naw a kut ung k’pang ne, pyai sen awn khit neta, “Shin cu ng’tüi khük ci nei” cik ci. 29Cun ung phi ani naw a kut a saw ba sei a phäi cu ng’tüi law htük ci. M’hta tuk ci naw ng’tüi htük ci cu, na lam na khep ci, ci neta, “Perez ah sui ci.” 30Cun kawn ah a nau cu pyai sen awn a kut ung khit ne ng’tüi law sei “Zerah” ah aming sui ci.
Currently Selected:
ATÜNNAK 38: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
