ATÜNNAK 39
39
Joseph la Potipha ah Chu
1Tuhbäi Ismaela chang gui naw Joseph cu Egypt khaw ah hteh püi u ne, Potipha ah yoi ci gui. Potipha cu ghangpughang ah bawi, mang im gakap ng’vai ah kyak ci. 2Joseph cu Bawipa naw m’htei ne m’khüt näng nak pek ci. Ani cu Egypt chang a bawi ah im ah om ci. 3Joseph cu Bawipa naw om püi sei, a bi päng ung m’khüt näng nak om ci, cicu a bawi naw hmat ci. 4Potipha naw Joseph cu yum neta, a changzum ah hmoh ne, im khawh avan ap ne m’htei sak ci. 5Cun ung tün ne Joseph ah hmawk ah Bawipa naw Egypt chang ah kyongkhui la im khawh avan la lo lai gui cu hriham pek ci. 6Potipha naw a khawh avan Joseph am a ap kawn ah, a ei awk ah kawn ah, a khawh a i chü a om ba cu kä hmat ba ci.
Joseph cu khüighaat ne a müi phi kyom ci. 7Cun ah kyasei a bawi ah chu naw Joseph cu m’hni law neta, ni pi khai cine khü ci. 8Joseph naw ma neta, ani am, “Teng ä, ka bawi naw shing ah im ung khawh avan cu amät naw kä ma nak ci. Ani naw khawh avan cu kei am na m’htei sak ci nei. 9Shin ah im ung kei cu ka bawi ah mäih ah huham om ci. Nang ah kawn ah a i phi kä bi vai ah ana maa nak kä om ci nei. Kei naw shin ah mäih ah akshe kä ka bik khai, katnak cu ka hnungtuk püi khai nei” cik ci. 10A cun ah mäih ah a hnüüp tä sei ani naw Joseph cu khü sei phi, Joseph naw kä ih püi phung ci.
11Hnüüp ät ung Joseph cu im kyong ah bii bik khai ah lut lawk ci. Cun yah ung kyong ah a u kä om ci. 12Hnumi naw a suinu ung pha ne k’pang neta, “Ni ip khai nei” cik ci. Joseph naw a suinu cu hnumi ah kut ung suut shüt ne dawng ci. 13A sui nawng shüt ne lut law ne a dawng cu cun ah hnumi naw hmu neta, 14a changshäm gui cu khü ne, “Teng vä, ka cei ah law püi shin ah Hebru chang naw na yawshe na gui ci nei. Ani naw ka ih nak kyong ah lut law ne, na yaw hlük ci nei, cun ung phi kei cu nisei ka m’lau ci nei. 15Cun ah m’lau ngäta, kei ah pei ah a sui nawng shut ne lut law ne dawng ci nei cik ci.
16Hnumi naw Joseph ah suinu cu, a bawi ami im ah a law ba güt ung gim ci. 17Acei law ba khäta a na m’thein ne, “Na law püi ah shin ah Hebru chang naw a khan kyong ah lut law ne na phye hlük ci nei. 18Cun ung phi m’lau ngäta a suinu ka pei ah nawng shüt ne, lut law ne dawng ci nei” cik ci.
19Joseph ah bawi cu m’lungshe neta, 20Joseph cu pha ne, ghangpughang naw chang gui a chum nak ah thawng ung chum u sei, thawng ung chuum ci. 21Cun ung phi Bawipa naw Joseph cu om püi ne hriham pek ci, thawng bawi naw phi yei nak ci. 22Ani naw Joseph cu thawng kyum ci gui avan uk sak ne, thawng kyong bi lawh nak avan ung phi khawng mang sak ci. 23Thawng bawi naw a i a bi ba vai kä hlü khai ah Joseph naw bik ci. Joseph cu Bawipa naw m’htei sei a bi nak päng ung m’khüt näng nak om ci.
Currently Selected:
ATÜNNAK 39: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
