ATÜNNAK 40
40
Thawng Kyum ci gui ah Ng’Mang Joseph naw k’Phlan ci
1Cun sang ung Egypt ghangpughang ah yu cung bawi la ei tei bawi naw ghangpughang cu ng’küknet püi ne m’lungshe sak ci goi. 2Ghangpughang cu cun ah ang vai goi ah khan ah m’lungshe neta, 3cun goi cu pha goi ne, Joseph ami chum nak ah gabawi ah im ung chum tu goi ci. 4Ngani cu akshou thawng ung kyum lawk ci goi, gabawi naw Joseph cu ami changshäm ah kyak sak ci.
5Khomü ät ung yu cuung bawi la ei tei bawi cu ani ng’mang shek ci, cun cu a mawng a hei hei ah kyak ci. 6Joseph naw khongawi ah law ngawi neta, ngani cu kä yei ni sei hmu goi ci. 7Ani naw, “A i ah kyasei tuh ngawi nani thüi ang?” cine ng’shi goi ci.
8Ngani naw, “Keini kani mang shek ci, cun ah mang k’phlan khai shin ung a u kä om ci nei” cik ci goi.
Joseph naw, “Ng’mang cu cüivai nak pek ciah Khanpughi naw vah phlan hning ci, nani mang cu na m’thein ä” cik ci.
9Yu cuung bawi naw, “Kei ah mang cu ka ma ah sapyit shun om ci. 10Cun ung ang ban thum om ci. Cun ah ang ban gui cu hnah law u ne, m’guh ne pai ne up ci gui. 11Kei cu ghangpughang ah khap ka kawt ci, sapyit up gui cu k’bit ne sui neta, ani am ka pek ci” cine m’thein ci.
12Joseph naw, “Cun ah a mawng cu, ang ban thum cu hnüüp thum ah kyak ci. 13Hnüüp thum ah kyong ung ghangpughang naw ning chah ba ne ning m’taam ne, na ngoh nak te ung ning hmoh ba khai. Zu cuung bawi ah na kyak man ah kya ba ne, ghangpughang am na tu ba khai nei. 14Cun ung phi phyawng ne na bä ba hnüüp ung kei cu na na shüm ba vai nei. Na m’gein nak awn ghangpughang ah na na pyen pek vai, ka phyawn vai ah phi na na tha nak tu pek vai nei. 15Kei cu Hebru kho ah ami na hton ah kyak ci, Egypt khaw ung phi thawng kyum nak vai ka katnak kä om ci nei” cine pyen ci.
16Cun ah nik khai ah ng’mang ak phlan cu ei tei bawi naw ng’ya neta, Joseph am, “Kei phi ka mang shek ci; cun cu, m’htut dawn thum kalu ung ka tüng ci. 17Ak khan bäih dawn ung ghangpughang ah hmawk ah ei awk vai akda om ci, cun cu kha gui naw ei ci gui” cine m’thein ci.
18Joseph naw, “Cun ah a mawng cu, dawn thum cu hnüüp thum ah kyak ci. 19A hnüüp thum hnüüp ung ghangpughang naw ning chah ba khai, na lu ning m’chün khai. Cun kawn ah tung ung na pum ning tai u khäta, kha gui naw na sa cu ei khai gui nei” cine pyen nak ci.
20A hnüüp thum hnüüp ung ghangpughang naw angtüi nak hnüüp ah pawi cu a bawi gui avan awn bi püi gui ci. Zu cuung bawi la ei tei bawi cu chah ba goi ne a bawi gui ah ma ah law püi sak gui ci. 21Zu cuung bawi cu a ngoh nak ung hmoh ba ci, 22ei tei bawi cu tai ne ngawn ci. Joseph ah a pyen ah mäih ah kyak ci. 23Cun ung phi yu cuung bawi naw Joseph cu kä shüm ba ne m’hnih ci.
Currently Selected:
ATÜNNAK 40: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
