ATÜNNAK 41
41
Ghangpughang ah Ng’mang Joseph naw k’Phlan ci
1Khokum goi alüng kawn ah Egypt ghangpughang cu ang mang she ba ci; Ani cu Nile tuinu kem ah ng’düi ci. 2Plan ne müi ciah vantang chih cu tuinu ungka lut law ne khu ei ci gui. 3Cun kawn ah kyung ne shek ciah vantang chih cu tuinu ungka lut lawk ci gui, ngami cu law htük ci gui ah pei ah tuikem ah ng’düi ci gui. 4Kyung ciah vantang gui naw plan ciah vantang gui cu ei ci gui, ciah ng’mang na neta, ghangpughang cu ng’shüm law ba ci. 5Ani cu ip ba khäta ang mang she ba mä ci; Ang ma däm ne ng’tak ciah htang vui chih cu, htang gong tumat ung lut lawk ci gui. 6Cun kawn ah ang ma gin ne khokhi aa sei ng’shi ciah htang vui chih cu lut lawk ci gui. 7Ang ma gin ciah htang vui gui naw, ang ma däm ciah htang vui gui cu m’zaw ci gui. Ghangpughang cu ng’shüm law ba neta ang mang ah hmat lawk ci. 8Ghangpughang cu ang’ä ai neta, a ngawi ung kho ngawi, puikaih gui la chang vai gui cu khü gui ne, ang mang cu m’thein gui ci. Cun ung phi a u naw kä k’phlan thei ci.
9Cun kawn ah yu cung bawi naw ghangpughang am, “Ka hma nak cu tuh ngawi ka ng’yuu ba ci nei. 10Nang cu kei la ei tei bawi ah khan ah m’lungshe ne gabawi ah im ung thawng ung na na chum goi ci. 11Mü ät ung keini cu ka ning mang shek ci, cun cu a mawng a hei hei ah kyak ci. 12Hebru chang nong tumat phi a cu ah thawng kyum tuk ci, ani cu gabawi ah shäm ah kyak ci. Keini naw ka ning mang m’thein ni ngäta, ani naw na k’phlan pe goi ci. 13Avan cu ani ah pyen ah mäih ah bä ci, kei cu ka ngoh nak te ung na na ngoh ba sak ci, ei tei bawi cu na m’kat ci” cine pyen ci.
14Ghangpughang naw Joseph cu khü sak gui sei, ani cu ang ghit ah k’plawk ba ci gui, ani cu ng’si ng’säi ng’thong chah neta, ghangpughang ah ma ah lawk ci. 15Ghangpughang naw ani am, “Kei ka mang shek ci, cun cu a u naw kä phlan hlawt ci. Nang cu ng’mang na k’phlan thei ciah pyen ne na m’thei lawk ci gui.
16Joseph naw, “Uk ciah bawi aw, kei a i kä ka hmat ci nei, Khanpughi naw akni pi ah k’phlan khai nei” cik ci.
17Ghangpughang naw, “Kei ah ka mang cu, kei cu Nile tuinu kem ah ka ng’düi ci. 18Cun yah ung plan ne müi ciah vantang chih cu tuinu ungka lut law u ne, tuikem ah khu ei ci gui. 19Cun kawn ah vantang chih cu lut law ba mä ci gui, cun gui cu kyung ne shek ci gui. Cun gui cu Egypt kho ungka hmutu man cii ah she pikbäih ci gui. 20Akyung gui naw akplan gui cu ei gui ci gui. 21Cun ung phi a u naw kä hmat gui ci, ngami cu ami shet te ah she lä ci gui. Cun ung kei ka ng’shüm law ba ci. 22Cun kawn ah ka mang ba cu; ang ma däm ne ng’tak ciah htang vui chih cu, htang gong tumat ung lut lawk ci gui. 23Cun kawn ah khokhi aa sei pim ne ng’shi ciah htang vui chih cu lut lawk ci. 24Akpim gui naw ang tak gui cu m’zaw ci gui. Puikaih gui am ka mang ka m’thein gui pyi ci, cun ung phi a u naw kä phlan thei ci” cine m’thein ci.
25Joseph naw ghangpughang am, “Na mang goi hnih cu a mawng täng ci, Khanpughi naw a i a bi law vai a ning m’thein ah kyak ci. 26Vantang akplan chih cu khokum chih, htang vui angtak chih cun phi khokum chih ah kyak ci, cun goi cu täng ci goi. 27Ak hnu ah law ba ciah kyung ciah vantang chih la khokhi aa sei ng’shi ciah htang vui chih cu kho ah yaw nak ah khokum chih ah kyak ci. 28Cun cu ka ning m’thein ah mäih ah Khanpughi naw a bi law vai cu a ning hmuh sak ah kyak ci. 29Egypt khaw avan ung khokum chi ung bämang nak om khai. 30Cun kawn ah khokum chih ung khoyaw khai. Kho a shet tä aih sei khokum ni gui cu maih yawp khai. 31Kho a shet tä aih sei bämang nak man gui cu a u naw kä shüm ba khai. 32Leng ba ba ne na ng’mang nak cu, acun ah mawng cu Khanpughi naw m’düng ne, kä shou pha sei ang dang sak vai ah hmawk ah kyak ci.
33“Tuhbäi cüivai lunglang ciah chang ghü ne kho avan ap ne ngäng sak ä. 34Bawi gui m’düih gui ne abä nak ah khokum chih ung, kho avan ung bum hma bum ät na loh sak gui vai. 35Khokum ni ah kyong ung ei vai na m’cuun sak gui vai. Mang gaw gui ung phi uk ci gui naw ei vai m’cuun ne mi ngäng vai ah na pyen vai. 36Cun ung khokum chih ung Egypt khaw ung kho a yaw ung phi, ei vai kä maih khai, chang gui cu ei ah kä cawi khai gui” cine pyen nak ci.
Joseph cu Egypt Khaw Uktubawi ah Kya Lawk ci
37Cun cu ghangpughang la a bawi gui naw ng’ge na u neta, ghangpughang naw a chang gui am, 38“Khanpughi ah mümcha naw a om nak ah shin ah Joseph ah mäih ah chang a hawi phi kä mi hmuk khai” cik ci. 39Ghangpughang naw Joseph am, “Shin gui cu Khanpughi ah ning pek ah kyasei, nang cu chang avan ah na cüivai pikbäih ci nei. 40Ka khaw avan ka ning uk sak khai, ka chang avan naw na ng’thu läk khai gui nei. Kei ah kawn ah nang ah huham cu aktung ah kyak khai nei. 41Tuhbäi kei naw nang cu Egypt khaw avan uktu ah ka ning m’düih ci nei” cik ci. 42Mang ah m’hnüt nak ah a kutpyün ungka kutcüp cu suut neta Joseph am m’hnaak ci. Pä suinu akni am’sui ne ghui shawi phi m’äh ci. 43Ani cu akhnih nak ah mang ah ng’hle ung ng’cuum sak neta, ngäng ne m’taam ciah chang gui ah maa ah, “Lam m’bawng vä” cine m’lau ci gui. Cu cha ah Joseph cu Egypt khaw avan uk khai ah m’düih ci gui. 44Ghangpughang naw ani am, “Kei cu ghangpughang ah ka kyak ci, nang ah yum nak kä om ciah Egypt khaw ung a u chang naw phi a kut khaw kä a chaan en vai” cine pyen nak ci. 45Ani naw Joseph cu Zephenath Paneah aming sui ba ne, Asenath cu chu na sak ci, ani cu Heliopolis mang gaw ah taigüpa Potipha ah htahnumi ah kyak ci.
46Joseph cu Egypt ghanpughang ah a kyak law yah ung a khokum thumkip lawk ci. Ani cu mang im ungka lut law ne a uknak khaw avan cu hteit ne teng ci. 47Bämang ciah khokum chih ah kyong ung geit cu akda ah ng’sep ci. 48Joseph naw cun gui cu mang gaw gui ung avan m’cuun ci. Mang gaw päng ung a pei ah lai gui ungka k’bum ne m’cuun ci. 49Htang a m’cuun m’seh cu tuinu kem ah laigin ah mäih ah da aih sei, Joseph naw kä khei ba ling ci.
50Kho kä a yaw pha ung Joseph cu Asenath awn pami hnih ah hta ci goi. 51Ani naw, “Ka yaica gui avan la kapa ah kyongkhui avan ka m’hnih vai ah Khanpughi naw bik ci nei” ci neta, a hta htük cu Manasseh ah sui ci. 52“Zaica nak ah khaw ung Khanpughi naw hta na pek ci nei” ci ba neta, a hta ba cu Ephraim ah sui ci.
53Bämang nak ah khokum chih cu Egypt khaw ung ng’pyi lawk ci. 54Joseph ah pyen ah mäih ah kho a shet nak ah kum chih cu ng’tün lawk ci. Kho päng ung kho shek ci, cun ung phi Egypt khaw ung ei vai om ba ci. 55Egypt chang gui cu ei ah cawi law u neta, kyap u ne, ghangpughang ah hteit ne ei vai ng’zoi ci gui. Cun ah chang gui cu Joseph ah tüi gui ne Joseph ah pyen ah mäih ah ami bi vai ah m’cäi gui ci. 56Kho a shet nak cu ka law pi ka law pi ne khaw avan ung gawk ci. Cun ah kyasei Joseph naw ei khei gui hmawng ne Egypt chang gui am yoih na gui ci. 57Khomdek khan avan ung kho she khäta, khomdek khan ung chang ah hta akda naw Egypt khaw ah law ne Joseph ah ei ng’zoi lawk ci gui.
Currently Selected:
ATÜNNAK 41: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
