JOHAN 14

Bawipa Jesuh cu Pa Khanpughi ah Hteh Nak Lam ah kyak ci

1 Bawipa Jesuh naw, “Nangmi kä ng’ä ai vä, Khanpughi yum vä, kei phi na yum vä. 2Kapa ah imah kyongkhui akda om ci, cun kä ah om ung nangmi ah om nak vai hteit ne ka pyang khai ah kä ka pyein khai 3Kei cu hteit ne nami om nak vai pyang netah, law ba ne ka om nak ung nami om tu vai ah ka ning la law ba gui khai. 4Kei ah hteh nak ah gawk nak vai ah lam cu nangmi naw nami hmat ci” cine pyein ci.

5Thomas naw, “Bawipa, keimi naw nang a hawi na hteh vai kä kami hmat ci; a i hawkcha ah na hteh nak vai ah lam cu ka mi hmat khai ang?” cine pyein ci.

6 Bawipa Jesuh naw, “Kei cu lam ah ka kyak ci, thutak ah phi ka kyak ci, ghin nak ah phi ka kyak ci, kei ung kä hteit ciah chang phung cu Kapa ah om nak ah kä gawk khai. 7Tuhbäi kei nami na hmat pyi ci, Kapa phi nami hmat lawk khai. Tuhbäi ung tün ne Kapa cu hmat ne nami ng’hmuh püi pyi ci nei” cine pyein ci.

8Philip naw, “Bawipa, Mipa cu nam hmuh gui ä, cun cu kami van ah ng’yak hlü ah kyak ci nei” cine k’thäh ci.

9 Bawipa Jesuh naw, “Philip, kho cän güt ung nangmi awn a täng ah ka om ci, Kä na na hmat ci ma? Kei na hmuk ciah chang naw Kapa cu hmuk ci, a i ah kyasei, ‘Mipa nam hnuh gui ä’ na ci ang? 10Kei kapa ung ka om ci, Kapa kei ung om ci ‘Ka cicu kä na yum ci ma? Nangmi ah ma ah kei ah pyein gui cu ka mät ah ng’thu ah kä kyak ci, kei ah bi gui cu kei ung om ciah Kapa ah bi gui ah kyak ci. 11Kei kapa ung ka om ci, Kapa kei ung om ci, ka cicu yum vä. Kä nami yum ung ka bi gui cu teng netah yum vä. 12Kei naw akcang ka pyein cu, Kei na yum ciah chang naw kei ah bi gui cu bi hlawt khai. 13Cun ah däm pi ci phi bi hlawt khai, a i ah kyasei ci ung: kei cu Kapa ah om nak ah hteit netah, nangmi naw kei ah ming awn nami taigü phung cu, ka bik khai nei. Cun cu Khanpughi ah bämang nak A Htapa ung ang dang vai hmawk ah kyak ci. 14Nangmi naw kei ah ming awn a i phi nami ng’yoih ah a kyak ung, nami ng’yoih ah mäih ah kei naw ka bik khai nei.”

Mumcha Theing awn Shaitaak Nak

15“Kei nami nam hni ung ka thukhän cu nami läk khai. 16Kei naw Kapa ah kang yoih ung, Kapa cu nangmi awn a täng ah om ne nangmi ning m’htei gui khai cu tüi law hnga khai. Ani cu Khanpughi ah a mawng cacim awn m’dang ciah Mumcha Theing ah kya ci. 17Khomdek chang gui naw cun ah Mumcha Theing cu kä hmuhmat man ci gui kya ne kä yum hlawt ci gui. Cun ung phi ani cu nangmi awn a täng ah om ne, nangmi ung om ci kyasei nami hmat ci.

18“Kei ka hteh law ung nami mät kä ka ning nawng gui khai, 19Nangmi ah om nak ah kei ka law ba khai. Ashäng shäng ung m’dek chang gui naw kei kä na hmu law ba khai gui, cun ung phi nangmi naw nami na hmuk khai; a i ah kyasei ci ung, Kei ka ghing ci kyasei nangmi phi nami ghing khai. 20Cun ah hnüüp ung, ‘kei Kapa ung ka om ci, nangmi ung kei ka om ah mäih ah, kei ung nangmi nami om ci’ ka cicu nami hmat khai.

21“Ka thukhän dou ne läk ciah chang cu kei nam hni ciah kyak ci. Kei nam hni cicu Kapa naw m’hni ci, kei naw phi ani cu m’hni ne, ani ung ka mät kang dang khai” cik ci.

22(Judas Iskariot ah kä kyak ciah) a hei Iskariot naw “Bawipa a i hawkchaa ah m’dek chang gui ung kä dang ah keimi gui ung nang dang khai ang?” cine ng’shik ci.

23 Bawipa Jesuh naw, “Kei nam hni ciah chang naw kei ah m’thei thang cu ngai khai. Ani cu Kapa naw m’hni khai, Kapa la kei cu law ni ne ani a täng ah kani om püi khai. 24Kei kä nam hni ciah chang naw, kei ah m’thei thang phi kä ngai khai. Kei ah ning m’thei thang gui cu ka mät ungka lawk ciah kä kyak ci, kei na tüi lawk ciah Kapa ungka lawk ciah kyak ci.

25“Nangmi awn a täng ah ka om yah ung shin ah ka ning m’thein gui ah kyak ci. 26Kapa naw kei ah ming awn a tüih law ah ning m’htei gui ciah Mumcha Theing naw a päng avan ning m’thei thang gui ne, kei naw ka ning m’thei thang gui phi avan ning shüm ba sak gui khai.

27“Kei naw dimdeeih nak ka ning nawng pe gui shüt ci, kei ah dimdeeih nak nangmi am ka ning pe gui ci. M’dek chang gui ah peit ah mäih ah ka ning peit gui ah kä kyak ci, kä ng’ä ai vä, kä kyikyawk vä. 28Kei tuhbäi ka hteh ung phi nangmi ah om nak ah ka law ba khai’ ka cicu nami ng’ya pyi ci. Kapa cu kei ah hlüngtai pi ci, acun ah kyasei, nangmi naw kei nami nam hni ung, Kapa ah ka hteh ba ung nami yeikyai khai. 29Shin ah a mawng gui agawk law ung nangmi naw nami yum vai ah hmawk ah kä a gawk law pha ung ka ning m’thein gui ah kyak ci. Nangmi awn kei aksho kä mi ng’thu ba khai, 30Khomdek khan uk cicu gawk law pyi ci, cun ung phi, ani ung kei anam khüt nak vai a i kä om ci. 31Cun ung phi kei naw Kapa kam hni cu m’dek chang avan naw a hmat vai nei, Kei naw Kapa cu m’hni ne a nam cäi phung avan ka bik ci, ‘Law vä a hei ah mi hteit kaw’ cik ci.

Currently Selected:

JOHAN 14: CBC

Highlight

Copy