JOHAN 15

Bawipa Jesuh cu Sapyit Phung Akcang ah kyak ci

1“Kei cu sapyit phung akcang ah ka kyak ci, Kapa cu kho ng’lei k’ngäng ah kyak ci. 2Kei ung kä m’thein ciah ang ban phung cu tupit ne ghawt ne, m’theih ciah ang ban cu am theih law pi vai ah pyang m’tham ci. 3Nangmi cu kei ah m’theithang nak awn nami theing cim pyi ci. 4Kei ung kawng ät ne om vä, kei phi nangmi ung kawng ät ne ka om khai. Ang ban tumat cu ang shun tung kaa apait ung kä m’theih hlawt ci. Acun ah mäih ah nangmi phi kei ung kä nami om ung kä nami m’theih hlawt khai.

5Kei cu sapyit phung ah ka kyak ci, nangmi cu ang ban ah nami kyak ci. Nangmi cu kei ung kä nami ng’yung ung a i kä nami m’khüt khai. Chang tumat cu kei ung om sei, kei phi ani ung ka om ah a kiak ung ani cu akda ah m’theih tak khai. 6Kei ung kä om cicu k’set ne ghawh ah ang ban chawng ah mäih ah kiak ci. Chang gui naw cun ah ang ban chawng gui cu k’bum ne mei ung m’khih u seih, mei naw ui yawp ci. 7Nangmi cu kei ung om uk ci sei, kei ah ng’thu cu nangmi ung a om ah a kyak ung, nangmi naw nami ng’yoih hlü phung ng’yoi ne nami gah khai. 8Akda ah nami m’theih tak nak awn Kapa ah bämang nak cu nami dang sak ci; nangmi cun phi kei ah ng’düihpüi ah nami kya lawk ci. 9Kapa naw kei a nam hni ah mäih ah kei naw ka ning m’hni gui ci. Kei ah kam hni ah om vä. 10Kei naw Kapa ah thukhän läk ne ani ah m’hni ah ka om ah mäih ah, kei ah thukhän nami läk ung kei ah m’hni ah nami om khai. 11Shin ah ng’thu ka pyein cu, kei ah yeikyai nak nangmi ung gawk sei, nangmi ah yeikyai nak a khüm be vai ah hmawk ah kyak ci. 12Kei ah thukhän cu; kei naw ka ning m’hni gui ah mäih ah tumat la tumat nami yumhni tu vai nei. 13A paw chang ah hmawk ah a ghin nak pe ne m’hni ciah, m’hni nak ah kawn ah, däm pi ciah m’hni nak kä om ba ci. 14Nangmi cu kei ah thukhän nami läk ung kei ah teihpüi ah nami kiak ci. 15Tuhbäi ung tün ne changshäm ah kä ka ning khü ba gui ci, a i ah kyasei ci ung, changshäm naw khuimah ah bilawh kä hmat ci. Kapa ah ng’thu kang yak avan cu ka ning m’thein gui pyi ah kiasei, tuhbäi ung tün ne ‘Teihpüi’ ah ka ning khü gui ci. 16Nangmi naw kei kä nami na ghü ci, nangmi hteit ne akda ah m’theih ne ang tak ah nami vui vai ah kei naw ghü ne ka ning m’düih gui ci. Cun ah kyasei kei ah ming awn nami ng’yoih phung cu Kapa naw ning pe gui khai. 17Cun kawn ah ‘Tumat la tumat nami yumhni tu vai nei’ ciah thukhän ka ning pe gui ci.

M’Dek Chang ah Ng’gen Nak

18M’Dek chang naw ami ning gen gui ung kei na gen ma ci gui ah nami hmat vai nei. 19M’dek khan ng’yak hlü cu nami khäm ah a kyak ung m’dek khan naw khäm ne ning m’hni gui khai. Cun ung phi shin ah m’dek khan ung kaa kei naw ka ning ghü gui ci, nangmi naw m’dek khan kä nami k’chaw na ba ci; cun ah kyasei m’dek chang naw nangmi cu ning gen gui ci. 20Nami shüm vai ah ka ning m’thein gui cu; ‘Chang shäm cu a bawi ah kä hlüngtai pi man ci.’ Kei ami na dukdeiu nak ung nangmi phi ning dukdeiu na gui khai gui; kei ah ng’thu ami ngaih ung nangmi ah ng’thu phi ngai khai gui. 21Ngami naw acun ah bik khai gui, a i ah kyasei ci ung, nangmi cu kei ah chang ah nami kyak ci ngami naw kei na tüi lawk ci phi kä hmat ci gui. 22Kei naw law ne kä kam thein gui vai sü ung ami katnak kä dang khai sü te; tuhbäi läi ami katnak a u naw phi käm’yih ba hlawt ci gui. 23Kei na gen ci naw Kapa phi gen ci.

24Kei naw ngami ah ma ah a u ah kä bi man gui kä ka bi vai sü ung, ngami ah katnak kä dang khai süte. Tuhbäi ngami naw kei ah bi gui cu hmu u netah, kei la Kapa cu na gen goi ci gui. 25Cun cu ami thukhän ung “Ngami naw kei cu alä ah na gen ci gui” ciah om cicu a khüm nak vai ah kyak ci.

26Khanpughi ah mawng cacim awn dang sak ciah, ning m’htei gui ciah Mumcha Theing cu lawk khai, ani cu Kapa ungka lawk ciah kyak ci, kei naw Kapa ungka ani cu ka tüi lawk khai, ani naw kei ah mawng thu pyein khai. 27Nangmi naw phi kei ah mawng thu nami pyein khai, a i ah kya sei ci ung akhtük ge ung nangmi cu kei awn a täng ah nami om ci kyak ci.

Currently Selected:

JOHAN 15: CBC

Highlight

Copy