JOHAN 19
19
1Cun kawn ah Pilat naw Bawipa Jesuh cu khü netah, tukthah sak gui ci. 2Gakap gui naw ng’hling lukhu k’bün ci gui; suinu asen phi m’sui ci gui. 3A pei ah hteit u netah, “Jew ghangpughang ak shou ghing sä” ci ne m’lau u ne, a hmai ung k’beeih ci gui.
4Pilat cu lut law ba mä netah, chang gui-am, “Ani ung sih nak vai ah katnak kä ka hmuh ah mawng cu, nangmi naw nami hmat vai ah nami ma ah ka law püi khai nei” cik ci.
5 Bawipa Jesuh cu ng’hling lukhu ng’büng ne, suinu asen sui ne ak phung ah lut law ba ci. Pilat naw, “Teng vä, ani nei” ci ne pyein ci.
6Taigüpa gui la Taigüim ngäng ci gui naw, hmu u netah, “Ani cu kutlam tung ung tai ne ngawn vä, kutlam tung ung tai ne ngawn vä” cine m’lau ci gui.
Pilat naw, “nami mät naw kutlam tung ung tai ne ngawn vä, ani ngawn nak vai ah mawng a i kä ka hmuk ci nei” cine pyein ci.
7Chang gui naw, “Ani cu amät naw a mät Khanpughi ah Hta ah a pyein ah hmawk ah sih nak peit vai ah keimi ah ng’thukhän ung om ci nei” cik ci gui.
8Chang gui ah m’lau ng’ya netah Pilat cu cäi ne kyi lawk ci. 9Cun ah kyasei kyong ah lut law ba netah, Bawipa Jesuh-am, “Nang a hawi kaa na lawk ci ang?” cine ng’shik ci.
10Cun ung phi Bawipa Jesuh naw käm shang ci. Pilat naw, “A i ah kiasei kä na nam shan ang? Kei naw nang ka ning k’phiawn hning la kutlamtung ung tai ne ka ning ngawn hning cu, kä na hmat ci ma?” cine pyen nak ci.
11 Bawipa Jesuh naw, “Kei ah khan ah cun ah na bi nak hning vai cu, Khanpughi ah ning peit ah kyak ci. Nang ah kut ung kei na ap lawk ciah chang cu a katnak däm pi ci” cine pyen nak ci.
12Cun ah a pyein cu ng’ya netah Pilat naw, Bawipa Jesuh k’phiawn nak vai ah lam cu shui ci. Cun ung phi chang gui naw, “Ani nak phiawn ah a kyak ung, nang cu ghangpughang ah teihpüi ah kä na kiak khai. Amät naw amät ghangpughang ah pyein ciah chang cu, ghangpughang ng’küütneet püi ciah kyak ci nei” cik ci gui.
13Cun ami cicu Pilat naw ng’ya netah, Bawipa Jesuh cu ak pung ah luh law püi ba netah, lung ami pyan ah bawi ah ngoh nak ung ngok ci. (Cun ah cu Hebrew ng’thu awn Gabbatha) ah pyein ci gui. 14Cun cu phiawn nak pawi a ngawi ung ami tün nak vai, hnüüp ng’lunglai yah ung ah kyak ci. Pilat naw, “Teng vä, nami ghangpughang” cine Jew chang gui-am pyen na gui ci.
15Ngami naw, “Ngawn vai nei, ngawn vai nei, kutlamtung ung tai ne ngawn vai nei” cine m’lau ci gui.
Pilat naw, “Nami ghangpughang cu kutlamtung ung tai ne ngawn vai nami ng’ya hlük ci ma? cine pyen na gui ci.
16Cun kawn ah Pilat naw Bawipa Jesuh cu kutlamtung tai ne ami ngawn vai ah ami kut ung ap gui ci.
Bawipa Jesuh cu Kutlamtung ung Tai Ne Ngawn Ci Gui
(Mt 27:32-44; Mk 15:21-32; Lk 23:26-43)
Cun ah kyasei Bawipa Jesuh cu hteh püi ci gui. 17Bawipa Jesuh cu kutlamtung kawt ne, ‘Luguh Hmun’ ami ci nak ah hteit ci. 18(Acun cu Hebrew ng’thu awn Kolakotha) cik ci gui. Acun ah hmun ah Bawipa Jesuh cu kutlamtung ung tai ne ngawn ci gui. Bawipa Jesuh awn a täng ah a hei chang hnih cun phi, ak englam ah tumat, akpat lam ah tumat tai ne ngawn ci gui. Bawipa Jesuh cu ang lung ung tai ci gui. 19Pilat naw ca gu ne Bawipa Jesuh ah kutlamtung ung tai sak gui ci. Cun ah ca cu, “Jew chang gui ah ghangpughang Nazaret Jesuh” ciah kyak ci. 20Bawipa Jesuh kutlamtung ung tai ne ami ngawn nak cu, gawnu awn ng’et ci kyasei, chang akda naw cun ah ca cu phat ci gui. Cun ah ca cu Hebrew, Latin la Kagik ca gui awn ami guk ah kyak ci. 21Taigüpa gui naw, “Jew ghangpughang ah kä guk vai; shin ah chang naw, kei cu Jew ghangpughang ah ka kyak ci nei, cik ci nei” ciah guk vai, cine Pilat ah ma ah pyein ci gui.
22Pilat naw, “Kei naw ka guk pyi cu acun ah kyak khai” ci na gui ci.
23Gakap gui naw Bawipa Jesuh cu kutlamtung ung tai ne, ami ngawn kawn ah a suisak cu k’phli ah k’pai ne lak ci gui. Cun kawn ah a suinu phi lak ci gui. Cun ah suinu cu chui gui kä om khai ah tah ah kyak sei gakap gui naw, “Kä k’teek-en vä, m’shüih tawk ne mi lak khai nei” cik ci gui. 24Gakap gui naw cun ah ami bi cu, cacim ung; ngami naw kei ah suisak ng’pai ci gui, ka suinu phi m’shüih tawk ne lak ci gui” ci cu a khüm nak vai ah kyak ci.
25Cun yah ung Bawipa Jesuh ah anu la anu ah anau ni, Clopas ah k’chu Mari la Mari Makdalin ni gui cu Bawipa Jesuh ah kutlamtung pei ah ng’düi ci gui. 26Bawipa Jesuh naw anu la a nau ah pei ah am hni ah ang düihpüi tumat cu ng’düi sei hmuk ci. Cun ah kyasei, Bawipa Jesuh naw anu-am, “nu awi, shin cu nang ah hta nei” cik ci.
27Cun kawn ah ang düihpüi-am, “Shin cu na nu nei” ci nak ci. Cun ung tün ne cun ah ang düihpüi naw, anu cu a im ah hteh püi ne m’hteihtang ci.
Bawipa Jesuh ah Sih Nak
(Mt 27:45-56; Mk 15:33-41; Lk 23:44-49)
28Cun kawn ah Bawipa Jesuh naw avan küm pyi ciah hmat netah, cacim ung om ci ang dang vai ah “Kei tui ka gha ci nei” cik ci.
29Cun yah ah sapyit tui be ciah khlüng tumat om ci. Ngami naw tui m’yak awn sapyit tui cu cun netah, ng’lawi ung m’sawi ne, 30Bawipa Jesuh-am tu ci gui. Bawipa Jesuh cu cun ah sapyit tui aw netah, “Bi ng’pyi ci nei” cine ak hngü bat ne kät lawk ci.
Am Hnaak Htei awn Shun Ci Gui
31Jew chang ng’vai gui naw kutlamtung ung ami tai gui ah kho gui cu m’khep u netah, ami gook gui ami lak vai cu, Pilat ah ma ah pyein ci gui. Cun ah ami pyein ah mawng cu, cun nak hnüüp cu ak hmaa hnüüp ah kya sei, a ngawi ung ami kyin vai hnüüp ung, kutlamtung ah khan ah gook kä ah om vai la, cun ah kyin hnüüp cun phi hnüüp theing ah a kyak ah hmawk ah kyak ci. 32Cun kawn ah gakap gui cu law ne Bawipa Jesuh awn a täng ah ami ngawn goi ah kho cu tumat täi ah m’khep hnget ci gui. 33Bawipa Jesuh ah om nak ah ami gawk law ung kät pyi ciah kya khätah, a kho cu kä m’khep ci gui. 34Cun ung phi gakap tumat naw Bawipa Jesuh ah am hnaak cu k’htei awn shun khätah, acun vai-am si la tui cu lut lawk ci. 35(Shin ah a mawng gui cu nangmi naw phi nami yum tu vai ah hmu tuk ci amät naw a pyein ah kyak ci. Ani ah pyein cu hman ci, ani naw amät akcang a pyein phi hmat ci.) 36Cun cu’ani ah guh tumat phi kä hnget khai’ ciah cacim ung om ci cu a khüm nak ah kyak ci. 37Cun kawn ah phi, “Ngami naw ami k’htei awn ami shun cu, teng khai gui nei ciah cacim ung om ba ci.
Bawipa Jesuh Ami M’cim ah Mawng
(Mt 27:57-61; Mk 15:42-47; Lk 23:50-56)
38Cun kawn ah Arimathea ah kaa Josef cu Pilat ah hteit ne, Bawipa Jesuh ah gook cu a lak sak vai ah pyein ci. (Josef cu Bawipa Jesuh ah ang khah püi ah kyak ci, cun ung phi Jew chang ng’vai gui kyih gui ne a düm ah ng’läk tuk ciah kyak ci.) Pilat naw hlawt sei, Bawipa Jesuh ah a gook cu Josef naw la ne hteh püi ci. 39Ayan khomü ah Bawipa Jesuh hmu law te ciah Nikodemus cun phi, tui ng’ui a hlü hlü pit m’ku-lei-hma law püi ne, Josef cu läk tuk ci. 40Ngani naw Jew chang gui ah ami thung man ah, tui ng’ui awn shawi ne, yih bawk awn hlawp ne k’tom ci goi. 41Bawipa Jesuh kutlamtung ung tai ne ami ngawn nak pei ah lo-chaam tumat om ci. Cun ah chaam ung a u phi kä ami k’phuh nak phaa ah khui cawh ak thai om ci. 42Cun ah hnüüp cu, Jew chang gui naw a ngawi ung ami kyin nak vai ah hnüüp ah kyasei Bawipa Jesuh ah gook cu acun ah khui ung k’phuh ci gui.
Currently Selected:
JOHAN 19: CBC
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.
JOHAN 19
19
1Cun kawn ah Pilat naw Bawipa Jesuh cu khü netah, tukthah sak gui ci. 2Gakap gui naw ng’hling lukhu k’bün ci gui; suinu asen phi m’sui ci gui. 3A pei ah hteit u netah, “Jew ghangpughang ak shou ghing sä” ci ne m’lau u ne, a hmai ung k’beeih ci gui.
4Pilat cu lut law ba mä netah, chang gui-am, “Ani ung sih nak vai ah katnak kä ka hmuh ah mawng cu, nangmi naw nami hmat vai ah nami ma ah ka law püi khai nei” cik ci.
5 Bawipa Jesuh cu ng’hling lukhu ng’büng ne, suinu asen sui ne ak phung ah lut law ba ci. Pilat naw, “Teng vä, ani nei” ci ne pyein ci.
6Taigüpa gui la Taigüim ngäng ci gui naw, hmu u netah, “Ani cu kutlam tung ung tai ne ngawn vä, kutlam tung ung tai ne ngawn vä” cine m’lau ci gui.
Pilat naw, “nami mät naw kutlam tung ung tai ne ngawn vä, ani ngawn nak vai ah mawng a i kä ka hmuk ci nei” cine pyein ci.
7Chang gui naw, “Ani cu amät naw a mät Khanpughi ah Hta ah a pyein ah hmawk ah sih nak peit vai ah keimi ah ng’thukhän ung om ci nei” cik ci gui.
8Chang gui ah m’lau ng’ya netah Pilat cu cäi ne kyi lawk ci. 9Cun ah kyasei kyong ah lut law ba netah, Bawipa Jesuh-am, “Nang a hawi kaa na lawk ci ang?” cine ng’shik ci.
10Cun ung phi Bawipa Jesuh naw käm shang ci. Pilat naw, “A i ah kiasei kä na nam shan ang? Kei naw nang ka ning k’phiawn hning la kutlamtung ung tai ne ka ning ngawn hning cu, kä na hmat ci ma?” cine pyen nak ci.
11 Bawipa Jesuh naw, “Kei ah khan ah cun ah na bi nak hning vai cu, Khanpughi ah ning peit ah kyak ci. Nang ah kut ung kei na ap lawk ciah chang cu a katnak däm pi ci” cine pyen nak ci.
12Cun ah a pyein cu ng’ya netah Pilat naw, Bawipa Jesuh k’phiawn nak vai ah lam cu shui ci. Cun ung phi chang gui naw, “Ani nak phiawn ah a kyak ung, nang cu ghangpughang ah teihpüi ah kä na kiak khai. Amät naw amät ghangpughang ah pyein ciah chang cu, ghangpughang ng’küütneet püi ciah kyak ci nei” cik ci gui.
13Cun ami cicu Pilat naw ng’ya netah, Bawipa Jesuh cu ak pung ah luh law püi ba netah, lung ami pyan ah bawi ah ngoh nak ung ngok ci. (Cun ah cu Hebrew ng’thu awn Gabbatha) ah pyein ci gui. 14Cun cu phiawn nak pawi a ngawi ung ami tün nak vai, hnüüp ng’lunglai yah ung ah kyak ci. Pilat naw, “Teng vä, nami ghangpughang” cine Jew chang gui-am pyen na gui ci.
15Ngami naw, “Ngawn vai nei, ngawn vai nei, kutlamtung ung tai ne ngawn vai nei” cine m’lau ci gui.
Pilat naw, “Nami ghangpughang cu kutlamtung ung tai ne ngawn vai nami ng’ya hlük ci ma? cine pyen na gui ci.
16Cun kawn ah Pilat naw Bawipa Jesuh cu kutlamtung tai ne ami ngawn vai ah ami kut ung ap gui ci.
Bawipa Jesuh cu Kutlamtung ung Tai Ne Ngawn Ci Gui
(Mt 27:32-44; Mk 15:21-32; Lk 23:26-43)
Cun ah kyasei Bawipa Jesuh cu hteh püi ci gui. 17Bawipa Jesuh cu kutlamtung kawt ne, ‘Luguh Hmun’ ami ci nak ah hteit ci. 18(Acun cu Hebrew ng’thu awn Kolakotha) cik ci gui. Acun ah hmun ah Bawipa Jesuh cu kutlamtung ung tai ne ngawn ci gui. Bawipa Jesuh awn a täng ah a hei chang hnih cun phi, ak englam ah tumat, akpat lam ah tumat tai ne ngawn ci gui. Bawipa Jesuh cu ang lung ung tai ci gui. 19Pilat naw ca gu ne Bawipa Jesuh ah kutlamtung ung tai sak gui ci. Cun ah ca cu, “Jew chang gui ah ghangpughang Nazaret Jesuh” ciah kyak ci. 20Bawipa Jesuh kutlamtung ung tai ne ami ngawn nak cu, gawnu awn ng’et ci kyasei, chang akda naw cun ah ca cu phat ci gui. Cun ah ca cu Hebrew, Latin la Kagik ca gui awn ami guk ah kyak ci. 21Taigüpa gui naw, “Jew ghangpughang ah kä guk vai; shin ah chang naw, kei cu Jew ghangpughang ah ka kyak ci nei, cik ci nei” ciah guk vai, cine Pilat ah ma ah pyein ci gui.
22Pilat naw, “Kei naw ka guk pyi cu acun ah kyak khai” ci na gui ci.
23Gakap gui naw Bawipa Jesuh cu kutlamtung ung tai ne, ami ngawn kawn ah a suisak cu k’phli ah k’pai ne lak ci gui. Cun kawn ah a suinu phi lak ci gui. Cun ah suinu cu chui gui kä om khai ah tah ah kyak sei gakap gui naw, “Kä k’teek-en vä, m’shüih tawk ne mi lak khai nei” cik ci gui. 24Gakap gui naw cun ah ami bi cu, cacim ung; ngami naw kei ah suisak ng’pai ci gui, ka suinu phi m’shüih tawk ne lak ci gui” ci cu a khüm nak vai ah kyak ci.
25Cun yah ung Bawipa Jesuh ah anu la anu ah anau ni, Clopas ah k’chu Mari la Mari Makdalin ni gui cu Bawipa Jesuh ah kutlamtung pei ah ng’düi ci gui. 26Bawipa Jesuh naw anu la a nau ah pei ah am hni ah ang düihpüi tumat cu ng’düi sei hmuk ci. Cun ah kyasei, Bawipa Jesuh naw anu-am, “nu awi, shin cu nang ah hta nei” cik ci.
27Cun kawn ah ang düihpüi-am, “Shin cu na nu nei” ci nak ci. Cun ung tün ne cun ah ang düihpüi naw, anu cu a im ah hteh püi ne m’hteihtang ci.
Bawipa Jesuh ah Sih Nak
(Mt 27:45-56; Mk 15:33-41; Lk 23:44-49)
28Cun kawn ah Bawipa Jesuh naw avan küm pyi ciah hmat netah, cacim ung om ci ang dang vai ah “Kei tui ka gha ci nei” cik ci.
29Cun yah ah sapyit tui be ciah khlüng tumat om ci. Ngami naw tui m’yak awn sapyit tui cu cun netah, ng’lawi ung m’sawi ne, 30Bawipa Jesuh-am tu ci gui. Bawipa Jesuh cu cun ah sapyit tui aw netah, “Bi ng’pyi ci nei” cine ak hngü bat ne kät lawk ci.
Am Hnaak Htei awn Shun Ci Gui
31Jew chang ng’vai gui naw kutlamtung ung ami tai gui ah kho gui cu m’khep u netah, ami gook gui ami lak vai cu, Pilat ah ma ah pyein ci gui. Cun ah ami pyein ah mawng cu, cun nak hnüüp cu ak hmaa hnüüp ah kya sei, a ngawi ung ami kyin vai hnüüp ung, kutlamtung ah khan ah gook kä ah om vai la, cun ah kyin hnüüp cun phi hnüüp theing ah a kyak ah hmawk ah kyak ci. 32Cun kawn ah gakap gui cu law ne Bawipa Jesuh awn a täng ah ami ngawn goi ah kho cu tumat täi ah m’khep hnget ci gui. 33Bawipa Jesuh ah om nak ah ami gawk law ung kät pyi ciah kya khätah, a kho cu kä m’khep ci gui. 34Cun ung phi gakap tumat naw Bawipa Jesuh ah am hnaak cu k’htei awn shun khätah, acun vai-am si la tui cu lut lawk ci. 35(Shin ah a mawng gui cu nangmi naw phi nami yum tu vai ah hmu tuk ci amät naw a pyein ah kyak ci. Ani ah pyein cu hman ci, ani naw amät akcang a pyein phi hmat ci.) 36Cun cu’ani ah guh tumat phi kä hnget khai’ ciah cacim ung om ci cu a khüm nak ah kyak ci. 37Cun kawn ah phi, “Ngami naw ami k’htei awn ami shun cu, teng khai gui nei ciah cacim ung om ba ci.
Bawipa Jesuh Ami M’cim ah Mawng
(Mt 27:57-61; Mk 15:42-47; Lk 23:50-56)
38Cun kawn ah Arimathea ah kaa Josef cu Pilat ah hteit ne, Bawipa Jesuh ah gook cu a lak sak vai ah pyein ci. (Josef cu Bawipa Jesuh ah ang khah püi ah kyak ci, cun ung phi Jew chang ng’vai gui kyih gui ne a düm ah ng’läk tuk ciah kyak ci.) Pilat naw hlawt sei, Bawipa Jesuh ah a gook cu Josef naw la ne hteh püi ci. 39Ayan khomü ah Bawipa Jesuh hmu law te ciah Nikodemus cun phi, tui ng’ui a hlü hlü pit m’ku-lei-hma law püi ne, Josef cu läk tuk ci. 40Ngani naw Jew chang gui ah ami thung man ah, tui ng’ui awn shawi ne, yih bawk awn hlawp ne k’tom ci goi. 41Bawipa Jesuh kutlamtung ung tai ne ami ngawn nak pei ah lo-chaam tumat om ci. Cun ah chaam ung a u phi kä ami k’phuh nak phaa ah khui cawh ak thai om ci. 42Cun ah hnüüp cu, Jew chang gui naw a ngawi ung ami kyin nak vai ah hnüüp ah kyasei Bawipa Jesuh ah gook cu acun ah khui ung k’phuh ci gui.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Cho Bible Common Language © Bible Society of Myanmar, 2016.