LUKA 16

Theileh Ciah Changvai

1 Bawipa Jesuh naw ang düihpüi gui-am, “Hngü ät ung bühmang ciah chang ung a changvai tumat om ci. Ani naw mang ah khawhchaam gui cu ei mang m’di m’dap yawp ci, cine chak ci gui. 2Mang naw ani cu khü netah, ‘Nang ah mawng akda ah kang yak ci, na bilawh nak gui cu apüh akheh ah pyang ne law püi ä, nang cu kei ah changvai ah kä na kya ba khai” cine pyen nak ci. 3Cun ah kya khätah changvai cu, “Kei a i ah ka kyak khai, kei nang naw changvai ungka na na k’täm pyi ci, kei ung m’dek cawh nak hning vai k’thagui kä om ci, ng’yoi ne ka ei vai phi ka ng’aa ci. 4Cun ung phi kei cu changvai ungka ka ng’plawt kawn ah kei na dou ne na ng’khawt püi khai ka hmat pyi ci” cine amät ng’htau netah, 5a mang ah pu ng’yoi tu man ciah chang gui avan khü gui ci. A htük bäih ah chang tumat-am, “Kei ah mang-am na thung ba vai a i chü ang a om?” cine ng’shik ci. Ani naw, “Khitui pit phiaa om ci” cik ci. 6Changvai naw, “A tuhbäi ngo ne pit hmakip ah ca uk ung na hei guk vai” ci na khätah acun ah guk ci. 7Cun kawn ah a hei tumat mä khü ne, “Nang mä na thung vai a i chü nei a om?” cine ng’shik ci. Ani naw, “Htang m’guh tang phia gha ka thung vai om ci” ci khätah, “A tuhbäi na ca-uk la ne phiaa cheit ah na guk vai nei” ci sei, acun ah guk ci.

8Cun ah theileh ne a bilawh ah hmawk ah kä ng’düng cih changvai cu amang naw m’hlüngtai ci. A i ah kyasei ci ung khomdek chang gui cu, khomdek khan ah mawng bilawh nak ung akdei ah hta gui ah mä ami theileh pi ah hmawk ah kyak ci.

9“Cun kawn ah kei naw ka ning m’cäi gui cu, khomdek khawhchaam bühmang nak kawn m’gein sei ng’khawtsheng nak cu bi vä. Cun ung vah cun ah bühmang nak ang pyi law ung, Khanpughi naw nangmi cu ang täi ghin nak ghui im ah ning na dou gui khai. 10Api bi ung bekhüt ciah chang cu akdäm bi ung phi bekhüt ci. Api bi ung düng ciah chang cu akdäm bi ung phi düng ci. 11Cun ah kyasei nangmi cu khomdek khawhchaam bühmang nak ung, bekhüt nak kä a om ung, bühmang nak akcang cu, a u naw nangmi am ning ap gui khai aw? 12Nangmi cu chang ah khawhchaam ah khan ah bekhüt nak kä a om ung a u naw nami mät ah khäm ah khawhchaam cu ning ap gui khai aw?

13A u chang phi bawimang hnih ah changshäm ah kä kya hning ci, Ani cu tumat gen ne tumat m’hni lawk khai. Tumat ah khan ah ng’düng nak awn om ne, tumat cu a i ah kä sui ba khai. Nangmi cu Khanpughi la khomdek khawhchaam ah ng’yak hlü cu a täng ah kä nami bi hlawt khai” cik ci.

Bawipa Jesuh ah Ng’thu Amshah

(Mt 11:12-13; 5:31-32; Mk 10:11-12)

14Ngui ng’ya hlük ciah pharisee gui cu, cun ah ng’thu cu ng’ya u netah, Bawipa Jesuh cu m’lep nak ci gui. 15Bawipa Jesuh naw, “Nangmi cu, nami mät naw nami mät chang khän gui ah chang ah ma ah nami m’dang ci. Cun ung phi Khanpughi naw nami m’lung kyong ning hmat gui ci. Chang gui naw ang khän ah ami ngaih cu Khanpughi ah ma ah m’sheshai ah kyak ci.

16Tuihnim Johan kä a ng’dang pha ung Moese ng’thukhän gui la profet gui ah cacim gui cu kümbe te ci. Johan ang dang kawn ah tün ne, Khanpughi ah uknak ah mawng ng’Thu Ni cu pyein sak law ah kyak ci. Chang akda gui Khanpughi ah uknak kho ah ng’gut ne lut lawk ci gui. 17Cun ung phi Thukhän shaitaakcang’ma ng’lung ät adi maih vai ah mä, khomdek la khankho adi maih vai cu yäi tuba ci.

18Akchu nawng ne a hei chu na tu ba ciah pami cu, akchu ah khan ah kat nak bik ciah kyak ci. Chang ah ng’chaa püi ah hnumi chu nak ci cu chang ah chu kat püi ciah kyak ci.

Chang Mangpa La Lazarus

19Hngü ät ung chang mangpa tumat om ci. Ani cu ak hnüüp tä akni ak kiom suisa ne, bühmang ä le ne om ci. 20Ani ah im kawt pei ah ghawipyam yaica ciah Layarus ming nak ciah chang tumat cu ng’yän ne om ci. Ani cu apumsa nüng khei bäng ah kyasei ui gui naw law ne akhei cu m’leik ci ci gui. 21Ani cu mangpa ah ei k’book kaw ne a ei tu vai ah ng’yoi tu ci ci. 22Cun kawn ah ghawipyam cicu si sei, khankho chang gui naw la law u ne, Abraham ah k’coi ung m’shän ci gui, Mangpacun phi si sei, m’cim ci gui. 23Ani cu m’htei mei khui ah ang htei ah gein vai law aih ne khankho cu han dang netah, Abraham la a k’pat lam ah ngok ciah Layarus cu hmu goi ci. Cun ah hmu goi netah, Mangpa naw; 24“Pa Abraham aw, kei cu nam gein ä, kei cu m’htei mei khui ung ang htei ah ka geinvai ci nei. Layarus naw a kut m’dawng awn tui tawk netah ka m’lei ung ana m’hteei tu vai ah ka om nak ah yuk tüi law” cine m’awi ne ng’khü ci.

25Cun ung phi Abraham naw, “Ka hta aw, khomdek khan ah nang bühmang gui man la Layarus ah ghawipyam yaica man gui cu, ngai ba ne shüm ba ä. Tuhbäi ani cu bämang nak ung gawk sei, nang cu geinvai nak ung na gawk pyi ci. 26Cun bäng ah kä kyak ciah keimi la nangmi ah ng’lak ung thuuk aih ciah gheem-kiaa nu om ci. Cun ah kyasei keimi lamah kaa nangmi lam ah phi bäi, nangmi lam ah kaa keimi lam ah phi bäi a u kä hteit hton hlawt ci nei” cine pyen nak ci.

27Mangpa naw, “Kapa aw, cun ah a kyak ung kei ah kapa ah im ah Layarus cu na tüih law ba vai ah ka ng’ya hlük ci nei. 28Kei ah ka nau chang sing hma om ci, ngami bawtah shin ah geinvai nak ah kä ami gawk law tu vai ah va m’thein ba gui khai ah Layarus cu yuk tüi law ba ä” cik ci. 29Abraham naw, “Nang ah nau gui-am m’thein tu gui khai ah Moses la profet gui om ci gui. Ngami ah ng’thu ngai tu u sä” cine pyen nak ci. 30Cun ung phi mangpa naw, “Kapa, Abraham, cun ah kä kyak ci nei, akcang ah si pyi ciah chang gui ungka tumat cu ngami ah a hteh ba ah a kyak ung ngami cu ng’yu ba hman khai gui nei” ci nak ci. 31Abraham naw, “Ngami cu Moses la Profet gui ah ng’thu kä a mi ngaih läi ung sih nak ungka tho law ba ci a om ung phi ngami naw, kä yum hlawt khai gui cik ci” cine m’thein gui ci.

Currently Selected:

LUKA 16: CBC

Highlight

Copy