LUKA 17

Katnak

(Mt 18:6-7; 21:22; Mk 9:42)

1 Bawipa Jesuh naw, ang düihpüi gui-am, “Katnak bi nak vai ah tüihtok nak cu akcang ah om khai, cun ung phi cun ah tüihtok nak bik ciah chang ah hmawk ah ang htei ah kyihkyawk vai kyak ci. 2Ak hmaw tumat katnak ung gawk khai ah tüihtok nak bik ciah chang cu lungsum khit ne a gawn ung m’äh netah tuili ung shum ung bä tu ba khai. 3Cun na kyasei geing na ne nami bilawh vai.

“Na phäi nau naw a ning katnak ung, ani cu na m’cäi vai, ani ang yu ba ung akat nak nam gein vai. 4Ani naw kho hnüüp ät ung chih vei ning kat na netah, acun päng ung law ne kei ka katnak ka ng’yu ba ci nei a ci ung, nang naw ani ah katnak cu nam gein vai,” cine m’cäi gui ci.

Yumnak

5Ang düihpüi gui naw, Bawipa-am, “Kami yum nak na hlüngtai sak gui ä” cik ci gui.

6 Bawipa Naw, “Nangmi ung yumnak anhta ui teih pang a om ah a kyak ung, nangmi naw shin ah anli ghing-am,” Na phung ah ng’son ne, tuinu ung ghing ne ng’düi ä” nami ci ung nami pyein ah mäih ah kyak khai nei.

Changshäm ah Bi Vai

7“Nangmi ungka a u naw, lai thawn netah baw, htome shäm netah baw, law ba ciah akchangshäm-am, a gawk law ba vai-am, ei ei law ä cine ana khü khai ang? 8“Kei ah hmawk ah ei lo chang ne, ka ei awk yah ng’bi ng’lawh ne, na khap pyang netah, ka ei yawp khawn ah na ei tu vai, cik khai ah kä kya ne ang? 9Changshäm cu pyein ah a om ah phäh ah na bä ni ci nak vai kä om ci. 10A cun ah mäih ah nangmi cun phi; ami ning bi sak gui avan nami bi yawp ung, “Keimi cu changshäm düt ah kami kyak ci, kami bi vai ah kyak ci cu, kami bi ah kyak ci nei, nami ci vai” ci ne m’cäi gui ci.

Khei-lei ah ei Chang Sing Ghaa Theek Sak ci

11 Bawipa Jesuh cu Jerusalem ah a hteh nak lam ah Samaria la Kalile kho ah khogi lam ung hteit ci. 12Pigaw tumat ung ami gawk law ung khei-lei ah ei chang sing ghaa naw Bawipa cu ana dou ci gui. Ngami cu ang shawng pi pi ah ng’düi u netah, 13“Bawipa Jesuh aw, keimi nam gein gui ä” cine m’lau ci gui.

14 Bawipa Jesuh naw, hmu law gui netah, “Nangmi hteit ne taigü gui-am nami pumsa vam hnuh gui vä” cik ci.

Ngami cu Taigü gui ah ami hteh nak lam ah hteit ba yawp ci gui. 15Ngami ung kaa, chang tumat cu anat nak a maih hmat law netah, Khanpughi cu m’lau ne m’hlüngtai ne, Bawipa Jesuh ah pei ah law ba ci. 16Cun kawn ah a kho pei ah m’khuuk doong ne kawp ne, abäkhäk ah mawng cu m’tamkhah ci. 17Ani cu Samaritan chang ah kyak ci. Bawipa Jesuh naw, “Khei-lei ah ei chang sing ghaa cu theek ba ci gui, chang sing ko mä a hawi ang? 18Khanpughi m’hlüngtai khai ah shin ah chang khui hei ah kawn ah a u kä om ba ne ma?” cine ng’shi gui ci. 19Cun kawn ah ani-am, “ng’düi law ne hteit ba ä, na yum nak awn na nat nak theek pyi ci nei” cine pyen nak ci.

Uknak ah Kho Agawk Law Nak Vai ah Khin

(Mt 24:23-28, 37-41)

20Pharisee amshah gui naw, “Khanpughi ah uknak kho cu a i yah ung gawk lawk khai ang?” cine Bawipa Jesuh cu ng’shik ci gui. Bawipa Jesuh naw, “Khanpughi ah Uknak kho cu mik awn hmuh vai ah dang ciah kä kyak ci. 21A u naw phi teng tu vä, Khanpughi ah uknak kho cu shin ung om ci, cän ung om ci, cine pyein thei vai kä kyak ci. Akcang ah pyein ung Khanpughi ah uknak kho cu na m’lung kyong ah om ci nei” cik ci.

22Cun kawn ah Bawipa Jesuh naw ang düihpüi gui-am, “Chang ah Htapa ah kho hnüüp ät la nangmi ah ng’yak hlü ah kho hnüüp cu gawk lawk khai. Cun ung phi cun goi cu, kä ng’bui khai. 23Chang gui naw, “Chang ah Htapa cu shi ah nei a om, cä ah nei a om” cine ami pyein ung phi, läk ne kä nami shui en tu vai. 24Kho a lai läp ung khankho mik cu kho cawi, kho kem ah khüt ne adei khang ah mäih ah, chang Htapa a kyum law ba hnüüp kyak khai nei. 25Cun ung phi chang ah Htapa cu nuipai ciah yaica nak la tuhchü chang gui ah huut-taap nak cu bui maa khai nei. 26Noah ah om yah ung a kyak ah mäih ah chang ah Htapa a gawk law ba khin ung kya law ba khai. 27Noah ni, htein-paw im kyong ah ami luh kawn ah tui naw lin gui sei, chang gui ami didap ah hnüüp kä gawk pha ung chang gui cu, ei ne aw ne, ng’chu-la ne om te ci gui. 28Acun ah mäih ah Lotah ah om yah ung phi, chang gui cu ei aw ne, sumlei ne, k’pyu-im ne, kholo ne om te ci gui. 29Sodom ungka Lotah ang düih law hnüüp ung khankho ah kaa yam mei kho aa law sei, chang gui avan dimaih yawp ci gui. 30Chang ah Htapa ang dang law ba hnüüp ung phi acun ah mäih ah kia law ba khai.

31A cu hnüüp im m’kiung khan ah om ciah chang naw, a khawhchaam va la ba khai ah im kyong ah kä a vah luh-en ba vai. Lai ah om ciah chang phi im mah kä a hteh-en ba vai. 32Lotah ah chu nami shüm ba vai. 33A ghin nak hun hlük ci cu, a ghin nak ng’chah khai, a ghin nak ah kä ng’vang cicu hun nak gah khai. 34Kei naw akcang ka pyein cu, cun ah mü ung, ih phak tumat ung ip ghawm ci goi ah chang hnih ung kaa, tumat cu la ne tumat cu nawng shüt khai. 35Sum ng’gon ne suk ciah hnumi hnih ungka tumat cu la ne, tumat cu nawng shüt khai. 36Lai a täng ah bik ci goi ah pami hnih ungka tumat cu la ne, tumat cu nawng shüt khai” cine m’thein gui ci.

37Ang düihpüi gui naw, “Bawipa, cun gui cu, a hawn ah kho ung kia lawk khai ang?” cine ng’shi u khätah;

Bawipa Jesuh naw, “Aksi gui ah om nak ah langta gui ng’bum lawk khai gui nei” cine m’thein gui ci.

Currently Selected:

LUKA 17: CBC

Highlight

Copy