MAKUH 6

Bawipa Jesuh cu Nazaret ah Maa nak ci gui

(Mt 13:53-58; Lk 4:16-30)

1 Bawipa Jesuh cu ang düihpüi gui awn a täng ah acun ung kaa ng’düi law ba u ne; amät ah pigaw ah gawk lawk ci gui. 2Kyin hnüüp ung Bawipa Jesuh naw pum im ah hteit ne m’theithang gui ci. Cun ah am theithang gui cu ng’ya u netah chang gui cu cäicat u ne, “Shin ah chang naw shin ah hmuhmat nak a hawi kaa ang a gah? Ani ah hmuhmat nak cu a i hmuhmat nak ang? Cäi-aih vai gui mä a i hawkcha ah am dang hning ang? 3Shin ah chang cu Mari ah hta, im co ciah chang, James, Josef Judas la Simon ni ah ami phäi ah kä kya ne ang? Ani be gui phi mi pigaw chang gui ah maw?” cine ami mät ng’htau ci gui. Cun ah kyasei ngami naw Bawipa Jesuh cu maa nak ci gui.

4 Bawipa Jesuh naw, cun ah chang gui-am, “Profet cu amät ah pigaw, amät ah mätyah, amät ah kyongkhui ah kawn ah, a hawi phi chang m’sui nak om ci nei” cine pyen na gui ci.

5 Bawipa Jesuh cu cun ah pigaw ung gawpai ci gui api a kut taih ne a gai sak gui ah kawn ah cäi aih vai a i phi kä m’dang hning ci. 6Bawipa Jesuh cu ngami ung yum nak kä a om ah phäh ah cäi ng’ä ci.

Ang Düihpüi Chang Gha-lei-goi A Tüih Gui ah Mawng

(Mt 10:5-15; Lk 9:1-6)

7Cun kawn ah Bawipa Jesuh cu apigaw ah pei ng’et yung pigaw gui ah hteit ne m’theithang gui ci. Ang düihpüi gha-lei-goi cu khü gui netah, sing goi ciah ng’khap sak gui ne, pigaw gui ah tüi gui ci. Ngami-am khoshe m’khütnäng nak ah huham phi ap gui ci. 8Cun kawn ah Bawipa Jesuh naw, “Nami hteh nak ah ng’sho pawng ah kawn ah a i phi kä nami hteh püi vai, sho ei, ng’ya k’bah, ngui ng’ip gui a i phi kä nami hteh püi vai. 9Phahnak nami ng’cum vai, cun nung phi k’htu ng’yung kä nami m’shawih vai. 10A i pigaw ah phi nangmi ning dou gui htük ciah im cu, kä nami ng’plon taak vai. Kä nami hteh ba pha ah chuih acun ah im ung nami om tu vai. 11Nangmi ning maa na gui ciah pigaw ung kä nami om tu vai. Nami ng’thu kä ngai ciah chang gui nami hteh taak gui vai. Cun ah nami hteh taak gui ung nami kho pha ung kaa, m’vut nami khawn shüt vai, cun cu ngami ah hmawk ah ng’thu m’shi nami sho shüt ah kiak khai” cine m’cäi gui ci.

12Ang düihpüi gui cu hteit u ne chang gui ami katnak ung kaa ami ng’yu ba vai ah ng’thu pyein ci gui. 13Khoshe akda phi k’täm ci gui. Gawpai ciah chang akda cu khitui awn hluk ne gai sak ci gui.

Tuihnim Johan Asih ah Mawng

(Mt 14:1-12; Lk 9:7-9)

14 Bawipa Jesuh ah a mawng cu kho nüng ung thang law sei, Herod ghangpughang naw phi ng’ya tuk ci. Chang am shah naw Bawipa Jesuh-am, “Tuihnim Johan sih nak ungka tho ba ci nei, cun ah kia ne cäi aih vai gui phi m’dang ci nei” cine kyak ci gui.

15Chang am shah naw ani cu, “Elijah nei” cik ci gui. Chang am shah naw, “Ani cu, cäu profet gui man ah mäih ah kyak ciah profet nei” cik ci gui.

16Herod naw Bawipa Jesuh ah bilawh gui ah a mawng cu ng’ya netah, “Ani cu Tuihnim Johan nei, kei naw alu kam chün te tuhbäi ghing ba pyi ci nei” cik ci. 17Herod naw anau Philip ah chu Herodias cu gut ne akchu nak ah mawng ung Johan cu pha ne thawng ung a chum ah kyak ci. 18John naw, Herod-am, “Na nau ah chu gut ne nak chu nak cu, kä bä ci nei” cine a pyein tu laih laih ah hmawk ah kyak ci.

19Cun ah kyasei Herodias naw, Johan cu ang htei ah ngawn hlük ci, cun ung phi kä ngawn hlawt ci. 20Johan cu chang k’ni la chang theing ah a kyak ah mawng cu Herod naw hmat netah, ani cu kyih ne akni ah om sak ci. Herod cu Johan ah ng’thu pyein ang yak tu päng ung, am lung kyong cäi ng’ä ne a kyak pang ung phi, yeikyai ne ngai tu hlük ci.

21Herod ah ng’tüi nak hnüüp ung Herodias ah bi bi nak hlü ah lam cu ng’dang lawk ci. Cun ah hnüüp ung Herod naw, Kalile kho ungka bawi ng’vaipi gui, gakap bawi gui, la mangpa gui nüng cu khü gui ne, mü-ei aktung ah pyang m’tham ne khin na gui ci. 22Cun ah mü-ei ami ei nak ung, Herodias ah hta hnumi cu law ne akni akiom ah ng’lam ci. Cun ah kyasei Herod la akhin gui cu ang htei ah yeikyai u netah, ghangpughang naw cun ah hnumihta-am, “Nam hni a i phi nang yoih vai, kei naw ka ning pek khai nei, 23Kei naw ka uknak ah kho a teih phi k’bou ne ka ning pek khai nei” cine ng’thu khän ne pyein ci.

24Cun ah hnumi hta cu anu ah va dawng ba netah, “kei naw a i ang kang yoih ung ani kaw” cine vang shi ba ci.

Anu naw, “Tuihnim Johan ah alupum ng’yoi ä” cine pyen nak ci.

25Hnumi hta cu acun vai-am ghangpughang ah ma ah dawnglaw ba netah, “Tuihnim Johan ah lupum cu tawnglawng ung m’khäp netah atuhbäi na na peit vai ka yum ci nei” cine pyein ci.

26Cun ng’ya netah ghangpughang cu ang htei ah a yä ci, cun ung phi khin gui khli ah ma ah, ng’thu khän ne a pyein pyi ah kia sei, kä peit ah kä om hlawt ci. 27Cun ah kyasei Johan ah lupum law püi khai ah gakap tumat cu tüi ci. Gakap naw thawng kyong ah hteit ne Johan ah lupum cu m’chün ci. 28Cun kawn ah tawnglang ung m’khäp ne law püi, khätah, cun ah hnumi hta-am pek ci gui, cun kawn ah ani naw anu-am pe ba mä ci. 29Johan ah ang khah püi gui naw cun ah a mawng cu ng’ya u netah, law u ne Johan ah a gook cu k’phuh ne m’cim ci gui.

Bawipa Jesuh naw Chang Phya Hma-kip M’bei ci

(Mt 14:13-21; Lk 9:10-17; Jn 6:1-14)

30Ang düihpüi gui cu Bawipa Jesuh ah law ba u ne, ami bilawh gui la ami m’theithang gui cu pyein law ba ci gui. 31Cun yah ung chang khli gui cu hteithton lut lang ne kya u sei, Bawipa Jesuh la ang düihpüi gui cu ei ami ei vai phi akhin kä gah ci gui. Cun ah kyasei Bawipa Jesuh naw, “Mik mi a u ah kä om nak ah hteit ne ashäng ming düm cang khai nei” cine pyein sei, 32Bawipa Jesuh la ang düihpüi gui cu, ang thuh nak lam ah hleiko awn pawng ne hteit ci gui.

33Cun ah ami hteh cu chang gui naw hmu gui u netah, Bawipa Jesuh la ang düihpüi gui ah hmat gui ci gui. Cun ah kya sei apigaw päng ungka lawk ciah chang gui cu, Bawipa Jesuh ah hteh nak vai lam ah, ng’yung lam ung ak yang ah ana ma u ne, Bawipa Jesuh la ang düihpüi gui kä gawk pha u sei, ana gawk ci gui. 34Bawipa Jesuh cu hleiko ung hang kai netah, chang khli cu hmu gui ci. Chang gui cu htoshäm kä om ciah hto gui ah mäih ah kia u sei m’gein gui netah, ng’Thu Ni akda cu pyein ne m’theithang gui ci. 35Khomü hun law khätah ang düihpüi gui cu Bawipa Jesuh ah pei ah law u netah, “Tuhbäi khomü law pyi ci, 36Shin yah ah chang a u phi kä om ci, ei awk vai khleih khai gui ah pigaw imlo yung ah chang gui cu tüi gui ä” cine pyein ci gui.

37 Bawipa Jesuh naw, “Nangmi nami mät naw shin ah chang gui ei m’bei gui vä” ci nekiak na gui ci. Ang düihpüi gui naw, “Keimi naw tangka phia goi phu, ei vai khleih ne shin ah chang gui-am kami m’bei gui vai ma?” ci ne ng’shi ba ci gui.

38 Bawipa Jesuh naw, “Nangmi ung ei vai m’htut a i chü ang a om, hteit ne teng ba vä” cine pyen na gui ci. Ngami naw hteit ba ne ei vai hmuh u netah, “M’htut pum hma la nga pahnih om ci nei” cine pyein ba ci gui.

39 Bawipa Jesuh naw ang düihpüi gui-am, chang gui cu kho adou nak ung ang bum phäh phäh ah ami ngoh sak gui vai ah m’cäi gui ci. 40Chang gui cu hma-kip ni, phia ni ah ang bum phäh phäh ah ngoh sak gui ci gui. 41Cun kawn ah Bawipa Jesuh naw m’htut pum hma la nga pahnih cu la netah khankho dang ne Khanpughi ah bämang nak cu m’hlüng tai ci. Cun kawn ah m’htut cu k’bou ne chang gui-am ami tei gui vai ah ang düihpüi gui-am pe gui ci. Acun ah nga pahnih cun phi ang düihpüi gui-am pe gui ci. 42Chang gui ami van naw ami phü ciah ei ci gui. 43Cun kawn ah ang düihpüi gui naw m’htut la nga ami ei ah ak pawih cu, m’dawn ba u sei them dawn ung a gha-lei-goi lawk ci. 44Cun ung ei tuk ciah chang pami ng’vai bäng cu phia hma-kip lawk ci.

Bawipa Jesuh Cu Tui ah Khan ah Htei ci

(Mt 14:22-33; Jn 6:15-21)

45Cun kawn ah Bawipa Jesuh naw chang gui cu ami im ah tüi ba gui netah, acun vai-am ang düihpüi gui cu hleiko ung kai ba sak gui ne, tuili ah vang ga Bethsaida ah heik hma ba gui ci.

46 Bawipa Jesuh cu chang gui gidam gui shüt netah taigü khai ah khomhtung ah kai ci. 47Kho a mühun law yah ung ang düiphüi gui ah hleiko cu tuili lai ah om ci. Bawipa Jesuh läi cu amät kawng ah om shüt ci. 48Hleiko khan ah kho naw ng’pheet ne khi gui sei, ami yaica cu hmu gui netah Bawipa Jesuh cu tui khan ah m’khan ne hteit ne ami om nak ah lawk ci. Cun ah akhin cu ai khon htük ah kyak ci. Bawipa Jesuh cu ami pei ah phlän gui ne hteit khai ah pawng ci. 49Ngami naw tui ah khan ah Bawipa Jesuh a hteh cu hmu u netah, 50m’cha ah ngai u ne, kyi ne m’lau ci gui.

Acun vai-am Bawipa Jesuh naw, “Kä ng’ä vä, kä kyikyawk vä, kei nei” cine pyen na gui ci. 51Cun kawn ah ami om nak hleiko ah khan ah hang kai tuk ci. Ang düihpüi gui cu ang htei ah cäicat ne ngaih-tüh khit ci gui. 52A i ah kyasei ci ung, Bawipa Jesuh naw m’htut am bei gui yah ung ami hmuh te ah cäicat vai ah a mawng cu kä ami hmat ah hmawk ah kyak ci. Ngami ung cun ah mawng hmuhmat nak hlawt vai a i kä om ci.

Kennesaret ung Akgaw gui Gai Sak gui ci

(Mt 14:34-36)

53 Bawipa Jesuh la ang düihpüi gui cu tuili vang ga ah vang kat u ne, Kennesaret ah ami hleiko m’düm ci gui. 54Ngami hleiko ungka ami kyum law vai-am chang gui naw Bawipa Jesuh cu hmat ba ci gui. 55Apigaw päng avan ung dawng shüi shüi u ne, gawpai ci gui cu shui u netah, Bawipa Jesuh ah gawk nak vai ah ami ngaih nak päng ah, ak gaw gui cu kawt ne law püi ci gui. 56Bawipa Jesuh a hteh nak vai ah gawnu gui, lo gui la lam gui nüng ung ak gaw gui cu m’shän gui ci gui. A suinu ah pyai mawng hta pang ami tawn tu hlawt vai ah ng’coipa ne ng’yoi ci gui. Va tawn tu hta hlawt ciah chang phung cu ang ghit ah gai ci gui.

Currently Selected:

MAKUH 6: CBC

Highlight

Copy