MAKUH 7

Pupa Gui ah Thungyo ah Mawng

(Mt 15:1-9)

1Pharisee gui la Jerusalem ah kaa lawk ci gui ah thukhän saya gui naw, Bawipa Jesuh cu veing ne k’bui ci gui. 2Cun yah ung ang düihpüi gui naw ami kut kä theingthap ci awn ei ami ei cu hmuk ci gui.

3Pharisee gui la Jew chang gui cu pupa gui ah thungyo läk ci gui ah chang gui ah kyak ci. Ami kut m’ya avan kä ami m’si ung ei kä ei man ci gui. 4Ei vai ami khleih ung phi m’si yüm yüm netah ei ci gui. Um k’am koi m’yak gui m’si m’säi nak ung tün ne pupa gui ah thungyo cu läk ci gui.

5Cun ah kyasei pharisee gui la thukhän saya gui naw, “A i ah kyasei nang düih püi gui naw pupa gui ah thungyo kä läk u ne, ami kut kä m’si ah ei ami ei ang?” cine Bawipa Jesuh cu ng’shik ci gui.

6 Bawipa Jesuh naw,

“Nangmi ah mawng profet Isaiah naw a pyein cu bä ne ng’khän ci nei Nangmi cu thuvi ciah chang gui nei, Cun ah kyasei Isaiah naw nangmi ah mawng a guk cu;

“Shin ah chang gui naw kei cu, ami m’gawng shai awn nam hlüngtai ci gui nei,

Cun ung phi ngami ah m’lung kyong cu, Kei awn ng’shawng aih ci nei.

7Ngami naw kei ah ami taigü cu A kholä ah kyak ci nei.

A i ah kyasei ci ung ngami naw chang ah Pian ah thukhän gui cu, Khanpughi ah thukhän ah mäih ah m’theithang ci gui nei” ciah kiak ci nei.

8Nangmi cu Khanpughi ah thukhän nawng-en u ne, chang ah thungyo m’theithang düt cu nami läk ci nei” cine kyak na gui ci.

9Cun kawn ah mä Bawipa Jesuh naw, “Nangmi naw nami mät ah m’theithang nami läk hlawt vai ah Khanpughi ah thukhän cu, k’phiui hnawk ne nami theileh aih ci nei. 10Moses naw ang thukhän ung, “Nanu la napa cu nak chang m’sui goi vai, anu pa yüigen ciah chang cu sih nak ung hteit sä,” cine pyein ci. 11Cun ung phi nangmi naw chang tumat cu anu pa am htei nak vai khawhcham a om ah a kyak ung, “Cun cu Corban” (Khanpughi naw a khäm pyi) ah a kyak ah khoi ung, 12ani naw anu pa am hteihtang vai kä hlü ba khai” ciah nami m’thei thang ci. 13Acun ah nangmi naw nami thungyo gui bäng bäng ng’dou ne nami m’theithang nak awn Khanpughi ah thukhän cu nami m’shet ci. A cun ah mäih ah a hei thungyo gui phi nangmi naw akda nami läk ba ci” cine pyen na gui ci.

Chang Shetkat Sak ciah Amawng Gui

(Mt 15:10-20)

14Cun kawn ah Bawipa Jesuh naw chang gui cu a pei ah khü ba gui netah, a pyein ba mä cu, “Kei ah ng’thu cu nami van naw ngai ne, hmat yawp vä. 15Ak pung ah kaa chang ung lut ci naw, chang cu kä shetkat sak hlawt ci, chang ah puk kyong ungka lut lawk ci naw chang cu shetkat sak ci. 16(Ak hnga om ci naw ng’ya sä) cine pyen na gui ci.

17Cun kawn ah Bawipa Jesuh cu chang gui ah ng’lung ah kaa ng’düi law ba ne, kyong ah lut ba khätah, ang düihpüi gui naw am tumtäng nak ah mawng cu am thein gui vai ah ng’shik ci gui. 18Bawipa Jesuh naw, “Nangmi shin hlawk hngaw kä nami hmat hlawt ci ma? 19Ak pung lam ah kaa chang ah akyong ah lut ci phung cu chang ah m’lung kyong ung kä gawk hlawt ci, chi-khawn ung gawk netah pumsa ah ak pung ah lut law ba yawp ci. Cun ah kyasei chang ah pumsa kyong ah yulut vük ci naw chang kä shetkat sak hlawt ci, ci cu kä nami hmat ci ma?” cine pyen na gui ci. (Shin ah a pyein nak ung ei man gui phung cu avan ei vai ciah am dang nak ah kiak ci.)

20Cun kawn ah mä Bawipa Jesuh naw, “Chang ah puk kyong ung kaa lut lawk ci naw chang cu shetkat sak ci. 21Chan ah pukhui m’lung kyong ungka shetkat ciah ngaih tüh nak gui cu lut lawk ci; cun gui cu ng’yo ng’pawm hlü nak, m’guk nak, chang ngawn nak; 22chang ah chu chang ah hta kat püi nak, ng’yak hlü aih nak, nget ngawng nak, hleei hlak nak, ng’yak hlü düt ah om nak, m’thüimkhang nak, chang ah ming m’shet nak, chang ah ng’shei nak, gu-ang nak, gui ah kyak ci. 23Shin ah shetkat nak gui nüng cu chang ah puk kyong ung kaa lut lawk ciah kya ne, chang cu shetkat sak ci” cine m’thein gui ci.

Hnuminu Tumat ah Zum nak

(Mt 15:21-28)

24 Bawipa Jesuh cu cun ungka Tire gawnu ah hteit ci. Cu ah a gawk ung im tumat ah kai netah, ani a gawk ah mawng a u naw phi a hmat vai kä ng’ya hlük ci. 25Cun ung phi ng’thup ne kä om hlawt ci. A hta hnumi khoshe ah kai ah hnumi nu tumat cu, Bawipa Jesuh a gawk law ah mawng ng’ya tu netah, acun vai-am dawng law ne a kho pei ah kawp lawk ci. 26Ani cu Siria kho Phoenicia gawnu ungka Karik hnumi ah kiak ci. Ani naw a hta hnumi ungka khoshe cu, Bawipa Jesuh naw ak täm peit vai ah law ne ng’huipa ci. 27Bawipa Jesuh naw, “Hta hmaw gui cu ak htük ung phü khai gui ah m’bei gui vai kyak ci, hta hmaw gui ah ei vai sü la ne, ui-am kä vuh vai nei” cine pyen nak ci.

28Cun ah hnumi naw, “Bawipa, cun cu hman ci nei, cun ung phi hta hmaw gui ah k’book theh, ei dawn ka ah ng’yaih ci cu, ui gui naw ei tu man ci gui nei” cine pyein tu ba ci. 29Cun ci khätah Bawipa Jesuh naw, “Nang naw cun ah nam hlan tu ba cu bä ci nei, na im ah hteit baä, na hta ungka khoshe cu dawng pyi sei na hmuk khai nei” ci ne pyen nak ci. 30Cun ah hnumi nu cu a im ah hteit ba netah, a hta hnumi hta ung kaa khoshe cu dawng pyi sei, ani cu adüm hta ah ng’yän ne ip sei hmuk ci.

Bawipa Jesuh naw Pang ne Ang ciah chang Gai sak ci

31 Bawipa Jesuh cu Tire gawnu ungka pawng ba ne Sidon gawnu la Dekapoli kho gawnu gha cu sun ba pah ne Kalile tuilinu ah gawk ba ci. 32Chang gui naw pang ne ang ciah chang tumat cu law püi u netah, “Ani ah khan ah na kut taih pe ä” cine ng’yoi ci gui. 33Bawipa Jesuh naw chang gui ah ng’lung ah kaacun ah chang cu chang ah kä om nak ah khü netah, ak hnga khui ah a kut m’dawng awn hei tawk ci. Am shi awn m’thawh ne am lei phi tawk pek ci. 34Cun kawn ah khan mawpi dan ne, “Ephphatha” cine pyein ci, cun cu “Ng’lang sä” a ciah kyak ci.

35Acun vai-am cun ah chang cu ak hnga ng’lang ne am lei düng law sei, akni ah htu law thei ci. 36Bawipa Jesuh naw cun ah a mawng gui cu, a u-am phi kä ami m’thein-en vai ah m’yih sak gui ci. Cun ah Bawipa Jesuh naw m’yih sak gui sei phi, chang gui naw acun ah mawng cu pyein law pi k’täi ci gui. 37Cun ah a mawng ng’ya tuk ciah chang gui cu ang htei ah cäicat u netah, “Bawipa naw a päng avan cu düng khai ah bi pyi ci nei, ak hnga pang ci gui ng’lang sak gui ne, awng ang ci gui ng’thu thei sak gui ci nei” cine pyein aih ci gui.

Currently Selected:

MAKUH 7: CBC

Highlight

Copy