MAKUH 8

Bawipa Jesuh naw Chang Phia Phli-kip Am Bei ah Mawng

(Mt 15:32-39)

1Kä shou pha sei chang khli cu ng’bum law ba ci gui. Cun ah chang gui ami ei vai kä om khätah; 2Bawipa Jesuh naw ang düihpüi gui khü gui netah, “Shin ah chang gui cu kei awn a täng ah kho hnüüp thum om lawk ci gui kya ne ami ei vai kä om ba ci. Cun ah kyasei kei naw kam gein gui ci. 3Chang amshah gui cu lam a shou nak ah kaa lawk ci gui, ngami cu a i kä m’bei gui ah tüih ba gui ung, lam ah cawi ne ng’yän yawp khai gui nei” cine pyein ci.

4Ang düihpüi gui naw, “Shin ah bungnu ah chang shikchü am m’bei vai, ei vai a hawi gah vai ang?” cine ng’shi ba ci gui.

5 Bawipa Jesuh naw, “Nangmi ung m’htut a i chü ang a om” cine ng’shi gui ci. Ang düihpüi gui naw, “M’htut pum chih om ci nei” cine pyein ci gui.

6 Bawipa Jesuh naw chang gui cu m’dek ung ngok sak gui netah, m’htut pum chih cu la ne, Khanpughi m’hlüngtai netah, m’htut cu k’bou ne chang gui-am ami tei gui vai ah ang düihpüi gui-am pe gui ci. Ang düihpüi gui naw chang gui-am tei gui ci gui. 7Ngami ung nga phi api om ci. Bawipa Jesuh naw Khanpughi m’hlüngtai netah, ngacun phi chang gui-am ami tei gui vai ah ang düihpüi gui cu täk gui ci. 8Chang gui ami van naw ami phü ah ei ci gui. Ami ei ah pawih gui cu them dawn chih ung k’bum ne m’khäp ci gui. 9M’htut ei ciah chang gui cu phia phli-kip lawk ci gui. Bawipa Jesuh naw cun ah chang gui cun ungka tüi ba gui ci. 10Acun vai-am amät cu ang düihpüi gui awn a täng ah hleiko ung kai ba ne, Dalamanutha kho ah hteit ci gui.

Pharisee Gui naw Cäiaih vai Ami Thäh ah Mawng

(Mt 16:1-4)

11Pharisee amshah gui cu law u netah, Bawipa Jesuh cu ng’kütneet ne ng’cuhcan püi ci gui. Ngami naw ami thuvi nak awn, “Khanpughi naw a ning m’hni nak saksi dang khai ah cäi aih vai tumat cu m’dang law shüm ä,” cine thäh ci gui.

12 Bawipa Jesuh naw ngai shäng netah, “Tuhchü chang gui naw a i ah kyasei cäi aih vai ami thäh ang? Kei naw akcang ka pyein cu, shin ah chang gui-am, cun ah cäi aih vai gui cu, kä m’dang gui vai nei” cine kyak na gui ci.

13 Bawipa Jesuh cu cun ungka ng’düi law ba ne, hleiko ung kai ba netah, tuili vangtäng ga ah vang kat vü ba ci.

Pharisee gui la Herod ah K’caw

(Mt 16:5-12)

14Ang düihpüi gui naw hleiko khan ah ei vai akda kä law püi ah m’htut pum ät bäng law püi ci gui. 15Bawipa Jesuh naw, “Nang mi naw Pharisee gui ah k’caw la Herod ah k’caw cu geing nah ne nami hlawi vai nei” cine ang düihpüi gui cu m’cäi gui ci.

16Ang düihpüi gui cu ei vai kä ami shaw a mawng pyein ne ami mät ng’cengcäk ci gui.

17Cun ah ami ng’cengcäk cu Bawipa Jesuh naw hmat gui netah, “Nangmi naw ei vai kä nami shaw ah mawng cu a i ah kyasei nami pyein ang? Tuhgüt kä nami hmuhmat phak ci ma? A i ah kyasei nami m’lung hnga a pang aih ang? 18Nami mik om lang sei kä nami hmuk ci ma? Nami hnga om lang sei kä nami ng’yak ci ma? 19Kei naw chang phia hma-kip-am m’bei vai m’htut pum hma kak bou cu kä nami shüm ba ci ma? Cun ung m’htut ak pawih gui them dawn ung a i chü ang nami kaw ba?” cine ng’shi gui ci.

Ang düihpüi gui naw, “Them dawn ung a gha-lei goi ah kami kaw ba ci nei” cik ci gui.

20Cun kawn ah Bawipa Jesuh naw, “Kei naw chang phia phli-kip-am m’bei vai m’htut pum chih kak bou yah ung, m’htut ak pawih cu dawn a i chü ung ang nami kaw ba?” cine ng’shi ba gui ci.

Ang düihpüi gui naw, “Them dawn ung ak chih ah kami kaw ba ci nei” cik ci gui.

21 Bawipa Jesuh naw, “Cun ah kya lang sei nangmi cu tu ä güt a i kä hmuhmat ne nami om ci ma?” cine ng’shi gui ci.

Bawipa Jesuh naw Bethsaida Pigaw ah Amik M’daüh Am Dei Sak ah Mawng

22 Bawipa Jesuh la ang düihpüi gui cu Bethsaida pigaw ah gawk lawk ci gui. Cun yah ung chang gui naw a mik m’dauh tumat cu law püi u netah, ani cu a kut awn tawk ne a gai sak vai ah ng’yoi ci gui.

23 Bawipa Jesuh naw a mik m’dauh cu a kut awn k’pang ne pigaw k’pung ah hteh püi ci. Acun ah mik cu am shi awn m’thawh netah, ak khan ah a kut taih ci. Cun kawn ah, “Tuhbäi na hmuk ci ang?” cine ng’shik ci.

24Ani naw täu law netah, “Kei cu chang gui ka hmuk ci nei, ngami cu sing ghing gui awn täng ci gui, cun ung phi hteit hton ci gui” cine ptein ci.

25Cun kawn ah Bawipa Jesuh naw ani ah mik khan ah a kut taih ba mä ci. Cun kawn ah ani cu k’tha na ne m’dei khätah amik cu m’dei law sei, a i phi ng’htei khai ah hmu lawk ci. 26Bawipa Jesuh naw ani cu, “Pigaw ng’lung ah kä na hteh-en ba vai” cine m’cäi netah, a im ah tüi ba ci.

Bawipa Jesuh ah Mawng Peter ah ng’kiaa Nak

(Mt 16:13-20; Lk 9:18-21)

27 Bawipa Jesuh la ang düihpüi gui cu Caesarea Philippi pigaw yung ah hteit shüi ci gui. Lam ami hteh yah ung Bawipa Jesuh naw, “Chang gui naw kei cu a u ah ka kyak ciah ang, ami pyein, pyein vä,” cine ang düihpüi gui cu ng’shi gui ci.

28Ang düihpüi gui naw, “Chang amshah naw nang cu; Tuihnim Johan nei cik ci gui, chang amshah naw, ‘Elijah’ nei cik ci, chang amshah naw’ profet tumat nei’ cik ci” cine pyein ci gui.

29 Bawipa Jesuh naw, “Nangmi naw mä kei cu a u ah ang nami na ngaih” cine ng’shi gui ci.

Peter naw, “Nang cu Messiah nei” cine ng’kiaa ne pyein ci.

30Cun kawn ah Bawipa Jesuh naw, “Kei a u ah ka kyak ah mawng cu a u-am kä nami m’thein-en vai nei” cine khän ne m’cäi gui ci.

Bawipa Jesuh naw Ayaica nak Vai La Asih nak Vai ah Mawng Pyein ci

(Mt 16:21-28; Lk 9:22-27)

31Cun kawn ah Bawipa Jesuh naw ang düihpüi gui-am, “Chang ah Htapa cu yaica nak akda bui awt khai, chang ng’vaigui, taigüpa gui la thukhän saya gui naw hnu ng’tuk püi khai gui. Ani cu ngawn khai gui, cun ung phi ak hnüüp thum hnüüp ung tho ba ne ghing ba khai” cine m’thein thang gui ci. 32Cun gui cu Bawipa Jesuh naw akdei dang ah m’thein gui ci. Cun ah kyasei Peter naw Bawipa Jesuh cu ang thuh nak ah khü netah, m’kat ne ng’thu püi ci. 33Bawipa Jesuh naw ang düihpüi gui cu teng gui netah, Peter am, “Nang khoshe a hei ah hteit ä, nang ah ngaih-tüh cu Khanpughi ung ka lawk ciah kä kyak ci, chang ung ka lawk ciah kyak ci” cine k’she na ne m’cäi ci.

34 Bawipa Jesuh naw ang düihpüi gui la chang khli gui cu a pei ah khü gui netah, “Kei ah chang ah kya hlük ciah chang naw, amät ah hmawk cu nawng ne, amät ah kutlamtung kawt ne, ka hnu ah ana läk vai. 35Amät ah hnun gui k’phiawn hlük ciah chang cu dimaih khai, kei la Thuni ah hmawk ah a hnun gui pek ciah chang cu hun nak gah khai. 36Chang cu khomdek khan avan a uk ung phi, a hnun gui adi maih ung ninak bänak a i om khai yaw? 37Amät ah hnun gui ghin nak adi maih ung a i awn m’thawng ba hlawt khai-aw? 38Khanpughi kä shüm ne shetkat nak ah tuhchü akhin ung, kei ah hmawk la kei ah m’theithang ah hmawk ah lü ng’a ciah chang cu, Apa Khanpughi ah bämang nak awn, chang ah Htapa, khanchang theing gui naw’ kiuung u sei a kyum law ba hnüüp ung ani ah hmawk ah lü ng’a nak om khai nei” cine kyak na gui ci.

Currently Selected:

MAKUH 8: CBC

Highlight

Copy