MAKUH 9

1Cun kawn ah Bawipa naw, “Kei naw akcang ka pyein cu, hlüngtai nak awn Khanpughi ah uknak kho gawk law sei, kä ami hmuh phaa ah chuih, shin ah kho ung om ciah chang amshah gui cu kä sik khai gui nei” cine kyak na gui ci.

Amüi Hmai Ang Khuk Hlat ah Mawng

(Mt 17:1-13; Lk 9:28-36)

2Cun ung ka naw hnüüp chuk lüng khätah Bawipa Jesuh naw, Peter, James la Johan ni bäng khah püi gui ne, hlüng ciah khomhtung ah kai püi gui ci. Acun vai-am ami hmuh ge ah Bawipa Jesuh ah müi hmai cu ng’khuk hlat lawk ci. 3A suisak cu pyü ne ng’shü ne bawk ne khang lawk ci, acun ah mäih ah bawk khai ah khomdek khanchang naw a u naw kä m’sumsäi hlawt khai. 4Elijah la Moses cu dang law ni ne, Bawipa Jesuh awn a täng ah ng’cengcäk u sei, ang düihpüi thum gui naw hmuk ci gui. 5Cun ah kya khätah Peter naw, “Bawipa, shin ah hmun cu om nak vai ah nik ci nei, nang ah phäh ah k’pyu tumat, Mosesah phäh ah k’pyu tumat, Elijah ah phäh ah k’pyu tumat, k’pyu tung thum ah kami co khai nei” cine Bawipa Jesuh ah ma ah pyein ci. 6Ang düihpüi gui cu ang htei ah kyikyawk u ne, Peter naw a i a pyein vai phi kä hmat netah, acun ah a pyein ah kyak ci.

7Cun kawn ah khomei tumat dang law ne ami khan ah hnim law gui ci. “Shin cu kei ah m’hni ah Ka Htapa nei, ani ah ng’thu cu ngai vä” ciah k’ow cu khomei ungka ng’thang lawk ci. 8Cun ah kya khätah ang düihpüi gui naw ami pei yung ah mang shüi ne teng ci gui, cun ung phi Bawipa Jesuh ah kawn ah a u phi a om kä hmu ba ci gui.

9Cun kawn ah Bawipa Jesuh la ang düihpüi gui cu khomhtung khan ah kaa kyum law ba ci gui. Cun ah ami kyum law ba yah ung Bawipa Jesuh naw, “Nangmi naw tuhbäi nami hmuh cu, chang ah Htapa sih nak ungka kä a thawh ba pha ah chuih, a u-am phi kä nami m’thein-en vai” cine ang düihpüi gui cu khän ne m’cäi gui ci.

10Ngami naw cun ah thu khän cu ami ngaih pang ung phi, “Sih nak ungka tho ba cicu a i ang” cine ami mät ng’shi ng’thäh tu ne ng’cengcäk ci gui. 11Cun kawn ah thukhän saya gui naw, Bawipa Jesuh cu, “A i ah kyasei Elijah kyum law ba khai cine ami pyein ang” cine ng’shik ci gui.

12 Bawipa Jesuh naw, “Apäng avan cu ana pyang m’tham ma khai ah Elijah cu akcang ah kyum law ma khai. Cun ung phi cacim naw, “Chang ah Htapa cu yaica nak la shedam nak khan khai” cine a i ah kyasei a pyein ang? 13Elijah cu kyum law pyi ci nei, cacim ung lawk ciah mäih ah chang gui naw ani cu, ami ci-cum hlü hlü ah ci-cum pyi ci gui nei, cine nangmi-am ka ning m’thein gui ci,” cine kyak nak gui ci.

Bawipa Jesuh Naw Akhmaw Tumat ung Kaa Mumcha She K’täm Ci

(Mt 17:14-21; Lk 9:37-43a)

14 Bawipa Jesuh la ang düihpüi thum gui cu, a hei ang düihpüi gui ah om nak ah gawk law ba u netah, chang khli naw anak bui gui sei hmuk ci gui. Amshah thukhän saya gui la ana om ciah ang düihpüi gui cu ng’kük net ne ng’thu pyein ci gui. 15Chang gui cu Bawipa Jesuh a law ba hmu u netah cäicat u ne, yavaih ne ana dou ci gui. 16Bawipa Jesuh naw ang düihpüi gui-am, “Nangmi cu ngami awn a i ah mawnglam ang thu nami pyein?” cine ng’shi gui ci.

17Chang khli ah ng’lung ah ka chang tumat naw, “Bawipa, ka hta cu nang ah om nak ah ka law püi ci nei, khoshe naw a kai law ba päng ung, 18kiuh ne ng’yän ne, am shi phawp gui lut law sei, a ha kyeet ne, kiai ne ng’yän ci ci nei. Nang ah nang düihpüi gui naw cun ah khoshe cu ami k’täm vai ah khü gui ung phi, ngami naw käm khüt ci gui nei,” cine ng’yawi ne pyein ci.

19 Bawipa Jesuh naw, “Nangmi cu a i hlawk ah a yum nak kä om ciah chang gui ang? Kei cu nangmi awn a täng ah a i güt ka om vai ang? A i güt nangmi ka ning ngaih peit gui vai ang? cun ah ak hmaw kei ah om nak ah law püi vä” cine kyak na gui sei, 20Cun ah ak hmaw cu a pei ah law püi ci gui.

Khoshe naw Bawipa Jesuh a hmuh vai-am, ak hmaw cu ci cun law ba sei, ani cu ng’tum ne ng’khlet ne, am shi phawp hmoh ne, m’dek ung kyu ne ng’yän ne ng’taih shüi shüi ci. 21Bawipa Jesuh naw, “Shin ah a kyak law shou law ne ang” cine apa cu ng’shik ci.

Apa naw, “A yoh hta yah ge ung a cän ah kyak ci nei, 22Khoshe naw ak hmaw asih vai ah, mei ung phi, tui ung phi akda vei luh sak ci nei. Nang Bawipa naw nam khüt hning vai a kyak ung nam gein gui ne nam htei tu pe gui ä” cine pyein ci.

23 Bawipa Jesuh naw, “Nam khüt hning vai a kyak ung cine a i ah kyasei na pyein ang? A yum nak om ciah chang naw kä am khüt a i kä om ci” cine pyen nak ci.

24Acun vai-am ak hmaw ah pa naw, “Kei naw akcang ah a yum ci nei, ka yum nak kä be ci kya sei, nam gein tu hta ä” cine m’lau ne ng’paa nak ci.

25A pei ah chang gui dawng law u sei, Bawipa Jesuh naw hmu gui netah, “Ang ne pang ciah khoshe, tuhbäi ak hmaw ungka lut law ne a hei ah na hteh vai, a i yah ung phi kä na ng’et-en law ba vai, kei naw ka ning k’täm ci nei” cine khoshe cu k’täm ci.

26Khoshe cu m’lau ne, ak hmaw cu ng’tum ne ng’thüng khai ah ng’khlet sak netah, lut law ne a hei ah hteit ci. Cun ah ak hmaw cu aksi vai sü ah ng’yän sei, chang gui naw, “Ak hmaw sik ci nei” cik ci gui. 27Cun ung phi Bawipa Jesuh naw, ak hmaw cu a kut ung k’pang ne m’tho sei tho law ba ci.

28 Bawipa Jesuh im ah law ba ne a om yah ung ang düihpüi gui naw, “Keimi naw cun ah khoshe cu a i ah kyasei kä kami k’täm hlawt ang?” cine ng’shik ci gui.

29 Bawipa Jesuh naw, “Taigü nak bäng awn nei, shin ah mäih khoshe cu k’täm hlawt vai, cun kawn ah k’täm nak vai a hei kä om ci” cine kyak na gui ci.

Bawipa Jesuh naw Asih Vai ah Mawng Pyein Ba Mä Ci

(Mt 17:22-23; Lk 9:43b-45)

30 Bawipa Jesuh la ang düihpüi gui cu, acun ungka naw Kalile kho cu sun pah ne hteit ci gui. Cun ah ami sun pah cu a u naw phi a hmat vai kä ng’ya hlük ci. 31A i ah kyasei ci ung, “Chang gui ah kut ung chang ah Htapa cu ap khai gui, ani cu ngawn khai gui, cun ung phi ak hnüüp thum hnüüp ung sih nak ungka tho ba khai” cine ang düihpüi gui-am am thei thang gui su ah kyak ci.

32Cun ung phi ang düihpüi gui naw, Bawipa Jesuh ah m’theithang cu kä hmat ci gui, cun ung phi ami ng’shi vai ah kyik ci gui.

Ak Hlüngtai Pibäih Cu a u Ang?

(Mt 18:1-5; Lk 9:46-48)

33 Bawipa Jesuh la ang düihpüi gui cu Kapernaum gawnu ah gawk u ne, ami im kai ah im kyong ah gawk u netah, Bawipa Jesuh naw, “Nangmi lam cawih ah a i ah mawng ang nami pyein?” cine ng’shi gui ci. 34Ang düihpüi gui cu kä shipdep ne om ci gui, a i ah kyasei ci ung, ami mät gui ungka a u ak hlüngtai pi ah kyak ci, ci ah lam cawih ah ng’thu ami pyein te ah hmawk ah kyak ci. 35Bawipa Jesuh cu ngoh netah, ang düihpüi gha-lei-goi cu khü gui ne, “Ak hlüng pi ung gawk hlük ciah chang cu, ang neim pi ung om khai, chang avan naw atäk phan pi ah phi kyak khai” cine kyak na gui ci. 36Cun kawn ak hmaw tumat cu khü ne ang düihpüi gui ah ma ah m’düih netah, ak hmaw cu yäk ne chang ne, 37‘Kei ah ming awn shin ah mäih ah ak hmaw dou ciah chang cu kei na dou ciah kyak ci. Kei na dou ciah chang cu kei bäng na dou ciah kä kyak ci, kei na tüi lawk ci phi dou ciah kyak ci” cine kyak na gui ci.

Kä Na Hnu Ng’tuk Püi Gui Ci Cu Mikmi ah Chang ah kyak ci

(Lk 9:49-50)

38Johan naw, “Bawipa, nang ah ming awn chang tumat naw, khoshe cu k’täm sei kami hmuk ci. Ani cu keimi awn a täng ah kä hteit tuk ci. Cun ah kyasei keimi naw, nang Bawipa ah ming kä a pyein vai ah kami maa nak nei” cine m’thein lawk ci. 39Bawipa Jesuh naw, “Ani kä nami maa nak vai, kei ah ming awn cäi aih vai gui cu bi netah, kei nam shetkat khai ah chang a u kä om ci. 40Mikmi kä na hnu ng’tuk püi gui ciah chang cu mik mi ah chang ah kyak ci. 41Kei naw akcang ka pyein cu, kei ah ng’düihpüi ah nami kyak cu a hmat nak awn nangmi-am tui m’yak ät ning tu gui ci cu, akcang ah m’khum taih ne gah tang nak om khai.

Tüihtok nak awn Cheishoh nak

(Mt 18:6-9; Lk 17:1-2)

42“Kei a na yum nak di maih khai ah, shin ah mäih ak hmaw tumat lam hma sak ciah chang cu, ak hnü-gawn ung lungsum nu khit ne, m’awi netah, tuinu ung buhtawn ung ani ah phäih ah bä tuba khai. 43-44Na kut naw na yum nak adi maih sak ung, cun ah kut cu na tukpit vai, na kut avan küm sei, angtäi ah däi ciah m’htei-mei ung, na luh akdam, na kut vangtäng pit sei angtäi ghin nak nagah cu bäpi khai. 45-46Na kho naw na yum nak adi maih sak ung, cun ah kho cu na tukpit vai, na kho avan küm sei angtäi ah däi ciah m’htei-mei ung na luh akdam, na kho vangtäng pit sei angtäi ghin nak na gah cu bäpi khai. 47-48Na mik-ui naw na yum nak adi maih sak ung, cun ah mik cu kawih ne na ghawh vai, geinvai vai ah m’kyiit naw shawk ne a ei nak la angtäi sei däi ciah m’thei-mei ung namik-ui küm sei na gawk ah k’dam, na mik vangtäng m’dauh sei Khanpughi ah uknak kho ung na gawk cu bä pi khai.

49“Ng’ghu-tha nak cu m’shi shum ne theingthap sak ah mäih ah, chang nüng nüng cu mei naw theingthap sak khai nei.

50“M’shi cu nik ci, cun ung phi a tuui amaih ah a kyak ung, nangmi naw a i cha tuui khai ah kä nami pyang ba hlawt khai. “Nangmi ung teihpüi mah nak ah m’shi cu om sak u netah, nami mät gui dimdeeih nak awn om vä” cine m’cäi gui ci.

Currently Selected:

MAKUH 9: CBC

Highlight

Copy