Matewuzhu 23

Yinsa onkhattaza onaafikhi wa Mafwarizeewu na wa anamanozela a kano

1Aphano Yinsa khuwooza atthu apale na anakhiyoni awe yoori: 2“Anamanozela a kano na mafwarizeewu eekhalela khukulu ya Munsa. 3Mwiwaashututele na mwithokorele zooshi epile aniwuuzaanini. Ila mwihiweezele vitthu anrettaazo. Maana khanrumeyela epile antafusiraazo. 4Yo anfuka maphuta oolemela na owaattikha atthu mmafuzi, ila yo khantakha hatha oshashula na yaala. 5Zooshi anrettaazo antakha yoori ooniwe pi anaatamu. Yo anjifukela hirizi mmwishwa mwaya, na olepisa mashaka a ajapi zaya. 6Owaatuvela puuro zooshapweya za va njampo na wiikhala wiilokozi nsinakooka, 7owaatuvela ochelisiwa vamwanttiwa na wiitthiwa Mwaaliimu. 8Mweeyo mwihiitthiwe yoori Mwaaliimu, maana Mwaaliimu enu mmote paasi, mweeyo mooshi mwa attwi. 9Ahiiyevo vathi apha mwinttelaaye omwinkha khalamu ya ‘opaapa’, maana Papeenu ori mmote paasi, otule ari pinkuuni. 10Hatha vattitthiiru mwihiitthiwe yoori namalokozela maana namalokozela ori mmote paasi, Al-Masiihu. 11Ila otule eeyiye nwulu vakatthi venu eeye karumeya. 12Otule anjiwulisaaye ontta opushuwisiwa, otule anjipushuwisaaye ontta owulisiwa.

13“Olaanikha pu weenu mweeyo anamanozela a kano na mafwarizeewu, manaafikhi, maana mwiniwafukela atthu ofwalume wa pinkuuni, ila na mweeyo khuheettimo na khamwintakha owaalikha weettamo apale antakhaaye weettamo waya! 14Olaanikha pu weenu mweeyo anamanozela a kano na mafwarizeewu, manaafikhi, maana mwimpala maali za anamfweliwa pi amannazaya na ojitapwatelana oretta lompa zoolepa; khwa etthiipo mwinteela ohukhumwiwa saaneene.

15“Olaanikha pu weenu mweeyo anamanozela a kano na mafwarizeewu, manaafikhi, maana mweeyo mwinlokha pahari na mwineettetta nti wooshi mweekesaka owaathuula atthu mwiwaatthe ntiini mweenu. Na amana mwimpattha ntthu aya oto onretteya swaafu piiri wiiya mwaana wa motthooni zayita mweeyo.

16“Olaanikha pu weenu mweeyo, anamalokozela oohooni! Maana mwinlupa yoori: ‘Amana ntthu alapha khwa mwimpari, eto khina maana. Ila amana ntthu alapha khwa weero ya omwimpari oto ona sharuthi ya oretta etile alaphiyeeyo.’ 17Alolo oohooni! Eriina fwayita ti tiivi, weero ama mwimpari opule onttakatthisaaye weero? 18Mweeyo mwinlupa theenya yoori: ‘Amana ntthu alapha khwa nzina la alitaari, olapha waya opo khuna maana, ila ntthu amana alapha khwa zaakha etile eriiye vatulu vaya, oto ona yoorumeyela olapha wawe.’ 19Atthu oohooni, eriina fwayita ti tiivi, zaakha ama alitaari anttakatthisaaye zaakha? 20Nakataalikha otule anlaphaaye khwa alitaari onlapha khwa alitaari na yooshi etile eriivo. 21Amana ntthu alapha khwa mwimpari, onlapha khwa mwimpari na khwa otule aniikhalaaye attaapho. 22Na otule anlaphaaye khwa pinku onlapha khwa khukulu ya Nluku na khwa otule ekhaleliyeeyo.

23“Olaanikha pu weenu mweeyo anamanozela a kano na mafwarizeewu, manaafikhi, maana mweeyo mwinimwinkha Nluku lifunku la khuumi mpakha vitthu za nwoorotha na nyaani zootuva na samuli, ila mwinkhijilela oruma wa fwayita wa kano, wiiyiye: shariya, huruma na waamineya, nakataalikha mwaarina ya oretta epo zaya woohiweraweri epile kiina. 24Anamalokozela oohooni! Mwinshuja kuuku, ila khumiza enkamiiya.

25“Olaanikha pi weenu mweeyo, anamanozela a kano na mafwarizeewu, manaafikhi, maana mweeyo mwinoosa pilawuri na parathu oje waya, ila nkatthi mweenu weetaalamo wiiya na omaashokopho. 26Mafwarizeewu oohooni, moose khapula pilawuri nkatthi mwaya, aphano phantte etile ya oje entta wiiya yooshapweya.

27“Olaanikha pu weenu mweeyo, anamanozela a kano na mafwarizeewu, manaafikhi, maana mweeyo mwiri nkhama vilalo yoovaaziwa khinampo, oje waya enumpuwaaye nkhama yooshapweya, ila nkatthi mwaya eetaaliyemo makhonkolo alupa ofwa na wakhula nanna ya vitthu zoovutta. 28Oje weenu mwinuupuwa nkhama anashariya, ila nkatthi mweenu mweetaala onaafikhi na vitthu zootakhala.

29“Olaanikha pu weenu mweeyo, anamanozela a kano na mafwarizeewu, manaafikhi, maana mwiniwaajekela khapuri a manapiyu, khuretta wiiya vilalo za akemaani. 30Mwinlupa yoori: ‘Eriwaka neettiye wiiyavo wakathi wa amarehemu apapazetthu, khanaari wiiyana phantte khwa yo ya owoola manapiyu.’ 31Etthiipo, mweeyo mwinjilawela oshaahiti yoori mwa aana a apale awooliyeeyo manapiyu. 32Mwilikhe wiitaaza mphimo wa twampi za amarehemu apapazenu. 33Nyookha! Ojama wa evili! Mwinttela owerawera toovi hukhumu ya motthooni? 34Tiito miiyo kooperekhezani manapiyu, anaakhili na anamanozela a kano. Akina mwinteela owoola, mwiwaakhomele, mwiwaajaphe nsinakooka mweenu na mwiwaalupatthaka sitati khwa sitati. 35Khwa etthiipo enuukhwelani paathuli ya taamu yooshi ya anashariya yiittikheliyeeyo vathi, waaza taamu ya nashariya Apeele, mpakha taamu ya Zakariiya mwaana wa Barakiiya, mwimuuliyeeyo vakatthi wa omwimpari na alitaari. 36Miiyo kiniwuuzani khweele yoori, zooshi epo ziniwateela atthu a leelo.

Ojiliza monkoni wa Yeruzaleemu

37“Yeruzaleemu, Yeruzaleemu, weeyo oniwoola manapiyu na owaavonya apale aperekhiweeyo! Swaafu kavi miiyo kitakhaka owaakusanya aanaawo nkhama mwanakhu aniwaakusanyaazo aanaawe mmapaphelo mwawe, ila weeyo khuhitakhi. 38Moone, yoori nyuupa yenu enttela wiiya yoothamiwa. 39Maana miiyo kiniwuuzani yoori, mweeyo khamwinteela okoona theenya, mpakha mwilupe yoori: ‘Wooparikhiyiwa ti otule antaaye khwa nzina la Mbwana.’ ”

Currently Selected:

Matewuzhu 23: eko

Highlight

Copy