Juan 14

Jesús näni kashqan

1<<Ama lakikäriytsu. Tayta Diosmanpis y noqamanpis yärakärimuy. 2Taytäpa wayinchöqa atskami cuartukuna kaykan. Tsayno mana kaptinqa manami <qamkunapaq cuartu kamarikuq aywashaq> nïmantsu karqan. 3Kamarirkamurnami qamkunata pushanäpaq kutimushaq. Tsaynöpami noqa kashqä kaqcho qamkunapis kankipaq. 4Musyankimi mayqan nänipa tsayman chayanaykipaq kashqantapis>>.

5Tsayno niptinmi Tomás kayno nirqan: <<Tayta, mayman aywanaykipaq kashqantapis mana musyaykarqa ¿imanöpataq nänita reqïman?>>

6Tsaymi Jesús kayno nirqan: <<Noqami näni kaykä, rasun kaqmi kaykä y runakunata kawayta qoqmi kaykä. Noqata mana chaskikamarqa Taytä kaqman manami pipis chayanqatsu.#Mat. 11.27; Juan 1.18; 6.46; Hech. 4.12. 7Noqata reqimarqa Taytätapis reqipäkunkimi. Tsaymi kananpitaqa payta rikashqankina y reqinkina>>.

8Felipinami kayno nirqan: <<Tayta Diosta reqiykatsilämay, Tayta. Reqitsimaptikiqa manami tapukushaykinatsu>>.

9Tsaymi Jesús kayno nirqan: <<Felipe, nawpapitana qamkunawan kaykaptï ¿manaku reqimankiraq? Noqata reqimaq kaqqa Taytätapis reqinmi. Reqiykämarqa ¿imanirtaq: <Taytaykita reqitsimay> nimanki? 10¿Manaku criyinki Taytäwan juklayla kaykashqäta y Taytäpis noqawan juklayla kaykashqanta? Tsaymi qamkunata nishqäkunaqa kikïpa yarpayniläpitatsu kaykan, sinöqa noqacho kaykaq Taytäpitami. Paymi munashqanta noqawan ruran. 11Taytäwan juklayla kaykashqäta y paypis noqawan juklayla kaykashqanta niykaptïqa criyipäkuy. Nishqäkunata mana criyimashpaykipis milagru rurashqäkunata rikaykarqa criyipäkuy.

12<<Rasunpami kayno nï: Taytä kaqman aywakuptï noqaman yärakamaqkunaqa noqa rurashqänömi rurapäkunqa. Mas espantaypaq kaqkunatapis rurapäkunqami. 13Noqapa jutïcho imatapis Taytäta manakäriptikiqa rurashaqmi. Tsurin karmi tsayno rurashaq Taytä alabashqa kananpaq. 14Jutïcho imatapis manakuptikiqa manakamashqaykita rurashaqmi.#Mat. 7.7-11; Luc. 11.9-13; Juan 15.7, 16; 16.23-24; 1Juan 3.21-22; 5.14-15.

Espíritu Santuta kachamunanpaq Jesús nishqan

15<<Noqata kuyamarqa lapan mandamientükunata cumplipäkuy.#Deut. 6.4-9; 11.1. 16Tayta Diosta ruwakuptïmi juk Yanapakuqta kachamunqapaq. Paymi imayyaqpis qamkunawan kaykanqa. 17Payqa rasun kaqta tantiyatsikuq Espíritu Santumi kaykan. Tayta Diosta mana cäsukuqkunaqa Espíritu Santutapis manami chaskikunqatsu. Tsayno mana chaskikunqatsu payta mana ashir y payta mana reqirmi. Qamkunami itsanqa reqipäkunki qamkunawan kaykaptin y qamkunacho kananpaq kaptin.

18<<Qamkunata manami waktsataqa kachashaykitsu, sinöqa kutimushaqmi. 19Walka junaqlanami pishiykan runakuna mana rikamänanpaq. Qamkunami itsanqa rikamankipaq. Noqa kawashqäpitami qamkunapis kawapäkunkipaq. 20Tsay junaqmi tantiyapäkunki Taytächo noqa kaykashqäta, noqacho qamkuna kaykashqaykita y qamkunacho noqa kaykashqätapis. 21Mandamientükunata cumpliq kaqmi rasunpaqa kuyaman. Kuyamaq kaqtaqa Taytäpis kuyanmi. Noqapis kuyarmi paywan kaykäshaq>>.

22Mana Iscariote kaq Judasnami tapurqan kayno nir: <<Noqakunawan kaykarqa ¿imanirtaq wakin runakunawanpis mana kankipaqtsu, Tayta?>>

23Tsaymi Jesús kayno nirqan: <<Pipis kuyamarqa nishqäkunata cäsukunmi. Kuyamaq kaqtaqa Taytäpis kuyanmi. Tsaymi Taytäwan shamur imayyaqpis paywan kaykäshaq. 24Mana kuyamaqkunaqa nishqäkunata manami cäsukärintsu. Noqa nishqäkunaqa manami kikïpa yarpaynïpitatsu kaykan, sinöqa kachamaqnï Taytäpitami.

25<<Lapan kaykunata niykä qamkunawan kaykashqäyaqmi. 26Aywakuptïnami noqapa trukä Yanapakuq Espíritu Santuta qamkunaman Taytä kachamunqa. Paymi lapanta yachatsishunki y lapan yachatsishqäkunata yarpätsishunki.

27<<Jawka kawaytami qamkunata kachapaykü. Ali kawaynïtami qamkunata qoykü. Noqa yanapashqäno manami pipis yanapashunkitsu. Ama lakikäriytsu ni mantsakäriytsu. 28Qamkunata maynami nishqä aywakurpis kutimunäpaq kashqanta. Taytä kaqman aywakuptï ama lakikärinkitsu. Payqa noqapita mas munayniyuqmi kaykan. Rasunpa kuyamarqa lakikunaykipa trukan kushikärinkimanmi. 29Qamkunata tsayno wilapaykä manaraq aywakurmi. Aywakuptïnami musyapäkunkipaq nishqäkuna rasunpa kashqanta.

30<<Kay patsapa mandaqnin aywaykämunnami.#14.30 Kay patsapa mandaqninpaq parlarqa Satanáspaqmi Jesús parlarqan. Tsaymi qamkunawan aläpaqa mana parlashaqnatsu. Wanutsimänanpaq manami paypa munaynin kantsu. 31Tsayno kaptinpis Taytä nimashqanta rurarmi wanutsimänanpaq kachapäshaq. Tsaynöpami runakuna musyanqa Taytäta kuyashqäta. ¡Sharkuy, kaypita jukla aywakushun!>>

Currently Selected:

Juan 14: qvmB

Highlight

Copy