Juan 9

Qapra runata Jesús aliyätsishqan

1Jerusaléncho Jesús purirmi rikarqan yurishqanpita patsa qapra runata. 2Tsaymi discïpulunkuna kayno nipäkurqan: <<Rabí, ¿imanirtaq kay runa qapra yurishqa? ¿Kikinpa jutsanpitaku o mamanpa y taytanpa jutsanpitaku?>>

3Tsayno tapuptinmi Jesús kayno nirqan: <<Manami kikinpa ni mamanpa ni taytanpa jutsanpitatsu kay runa qapra yurishqa, sinöqa Tayta Dios aliyätsishqanta runakuna musyananpaqmi. 4Junaq kashqanyaq kachamaqnï munashqanta rurashun#9.4a Wakin griego copiakunachöqa rurashaq ninmi.. Tsakaypaqa manami pipis aruyta kamäpakunnatsu.#9.4b Junaq kashqanyaq nirqa kay patsacho kaykashqäyaq nirqanmi. Tsakaypaq parlarqa wanuyninpaqmi parlarqan. Tsaynöpami Jesucristo nirqan kay patsacho kashqanyaq Tayta Dios lapan munashqanta cumplinanpaq kashqanta. 5Kay patsacho kashqäyaqqa atskimi kaykä>>.#9.5 Atski kashqanta nirqa runakunata salvaq kashqanta y Dios munashqanno kawananpaq tantiyatsiq kashqantami Jesús nirqan.#Sal. 27.1; 119.105; Prov. 6.23; Isa. 49.6; Juan 8.12.

6Tsayno nishpanmi toqayninwan mituta ruraykur tsay qapra runapa nawinta Jesús lushiparqan. 7Nirkurmi kayno nirqan: <<Siloé estanquiman aywaykur maylakamuy>>.

(Siloé ninanqa kachamushqa ninanmi.)

Jesús nishqanno maylakurirnami rikaykarna kutirqan. 8Tsaymi vecïnunkuna y payta reqiqkuna kayno nipäkurqan: <<¿Manaku kay runaqa limushnata manakuq qapra runa kaykan?>>

9Wakin kayno nirqan: <<Aw, paymi>>.

Wakinnami kayno nirqan: <<Manami paytsu. Itsanqa pay niraqmi>>.

Tsayno niptinmi kikin kayno nirqan: <<Noqami tsay runa kaykä>>.

10Tsawraqa tapupäkurqan kayno nir: <<¿Imanöpataq nawiki aliyaykushqa?>>

11Tsaymi kayno nirqan: <<Jesús jutiyuq runami mituta rurarkur nawïta lushipämashqa. Nirkurnami maylakunäpaq Siloé estanquiman kachamashqa. Nimashqanno maylakurirmi kananqa rikaykäna>>.

12Tsawraqa kayno tapupäkurqan: <<¿Maychötaq tsay aliyätsishuqniki runa kaykan?>>

Tsaymi kayno nirqan: <<Manami musyätsu>>.

Aliyashqa runata fariseukuna tapushqan

13Tsaypitanami qapra kashqanpita aliyashqa runata fariseukunaman pusharqan. 14Mituta ruraykur Jesús aliyätsishqan junaqqa jamay junaqmi karqan. 15Tsaymi imanöpa aliyashqantapis aliyaq runata fariseukuna tapupäkurqan. Paynami kayno nirqan: <<Juk runami nawïta mituwan lushipämashqa. Maylakurirmi kananqa rikaykäna>>.

16Tsaymi wakin fariseukuna kayno nipäkurqan: <<Tsay runaqa manami Tayta Dios kachamushqan runatsu. Tayta Dios kachamushqan runa karqa jamay junaqcho jamanmanmi>>.

Wakin fariseukunanami kayno nipäkurqan: <<Yarpapäkushqaykino jutsayuq karqa ¿imanöpataq aliyätsinman?>>

Tsayno ninakurmi kikinpura rabyanätsinakurqan.

17Tsaymi aliyashqa runata yapay tapupäkurqan kayno nir: <<Tsay aliyätsishuqniki runa ¿pï kashqantataq qam yarpanki?>>

Tsaymi kayno nirqan: <<Payqa profëtami>>.

18Tsayno niptinpis Israel runakunapa autoridäninkunaqa tsay runa qapra kashqanta manami criyipäkurqantsu. Tsaymi mamanta y taytanta qayaykatsimur 19tapupäkurqan: <<¿Kay runa tsurikiku? ¿Rasunpaku qapra yurirqan? ¿Imanöpataq aliyashqa?>>

20Tsaymi maman y taytan kayno nirqan: <<Aw, wamrämi. Rasunpami yurishqanpita patsa qapra kashqa. 21Itsanqa manami musyapäkütsu imanöpa aliyashqantapis ni pï aliyätsishqantapis. Payqa awkis runanami. Kikinta tapupäkuy>>.

22Tsayno nipäkurqan autoridäkunata mantsakushpanmi. Autoridäkunaqa wilanakushqanami karkaykarqan mayqanpis <<Jesúsqa Tayta Dios kachamushqan Cristumi>> niq kaqtaqa sinagögapita qarqunanpaq.#9.22 Sinagögapita autoridäkuna pitapis qarquq imaypis manana kutinanpaqmi. Tsaymi manana kutiqnatsu Tayta Diosta adorananpaq ni runakuna sesionta ruraptin parlananpaqpis. 23Tsayta mantsakurmi maman y taytan kayno nipäkurqan: <<Payqa awkis runanami. Kikinta tapupäkuy>>.

24Tsawraqa qapra kashqanpita aliyashqa runata autoridäkuna yapay qayaykatsir tapupäkurqan kayno nir: <<Tayta Diospa nawpanchömi nirkaykä. Rasun kaqta wilamay. Musyapäkümi tsay aliyätsishuqniki runa jutsasapa kashqanta>>.

25Tsawraqa tsay runa kayno nirqan: <<Noqa manami musyätsu jutsasapa kashqanta o jutsaynaq kashqantapis. Itsanqa musyä qapra kashqäpita rikaykashqätami>>.

26Tsayno niptinmi yapay tapupäkurqan: <<¿Imatataq rurashqa nawiki aliyänanpaq?>>

27Tsawraqa kayno nirqan: <<Qamkunata maynami wilashqä. Wilaptïpis manami criyipäkamankitsu. ¿Imanirtaq yapay tapuykämanki? ¿Qamkunapis paypa discïpulun kaytaku munarkaykanki?>>

28Tsayno niptinmi rabyakushpan kayno nipäkurqan: <<Qamchari paypa discïpulunqa kaykanki. Noqakunaqa Moiséspa discïpulunmi karkaykä. 29Musyapäkümi Moisésta Tayta Dios parlapashqanta. Tsay aliyätsishuqniki runapaqqa manami musyapäkütsu maypita shamushqantapis>>.

30Tsayno niptinmi kayno nirqan: <<Tsay runa nawïta aliyaykätsimaptinqa ¿imanirtaq mana criyipäkunkitsu Tayta Diospita shamushqanta? 31Musyantsimi jutsasapakunataqa Tayta Dios mana cäsupashqanta. Payta mantsakur munashqanno kawaqkunatami itsanqa yanapan.#Prov. 15.29. 32Manami imaypis mayashqantsitsu yurishqanpita patsa qapra runata pipis aliyätsishqanta. 33Tsay runa Tayta Diospita mana shamushqa karqa manami ima milagrutapis ruranmantsu>>.

34Tsayno niptinmi autoridäkuna kayno nipäkurqan: <<¡Qamqa yurishqanki pasaypa jutsayuqmi! ¿Tsayno kaykarchi noqakunata yachatsimayta munaykanki?>>

Tsayno nishpanmi sinagögapita tsay runata qarqurqan.

Jesústa mana chaskikur qaprano kashqan

35Tsay aliyätsishqan runata sinagögapita qarqushqantami Jesús musyarqan. Tsaymi tsay runawan tinkuykur kayno nirqan: <<¿Runapa Tsurinman#9.35 Wakin griego copiakunachöqa Tayta Diospa Tsurinman ninmi. criyinkiku?>>

36Niptinmi kayno nirqan: <<Tayta, ¿pitaq tsay runa? Wilaykalämay payman criyinäpaq>>.

37Tsawraqa Jesús kayno nirqan: <<Maynami rikashqanki. Tsay runaqa noqami kaykä>>.

38Tsayno niptinmi Jesústa adorar kayno nirqan: <<Qammanmi yärakulä, Tayta>>.

39Tsayno niptinmi Jesús kayno nirqan: <<Kay patsaman noqa shamushqä runakunata juzganäpami. Juzgaptïmi qaprakuna rikanqapaq y rikaqkuna qaprayanqapaq#9.39 Tsayno nirqa Jesús kaynömi nirqan: Juzgaptïmi mana tantiyaqkuna tantiyakunqapaq y yachaqkunanami mana tantiyakunqatsu.>>.#Isa. 6.10; 42.19; Mar. 4.12; Juan 12.40.

40Tsayno nishqanta mayashpanmi tsaycho kaykaq wakin fariseukuna kayno nipäkurqan: <<Tsayno kaptinqa ¿noqakunapis qaprachi karkaykä?>>

41Tsawraqa Jesús kayno nirqan: <<Qapra kashpaykiqa manami jutsayuqtsu kapäkunkiman. Rikashqaykita nirmi jutsayuq karkaykanki>>.#9.41 Fariseukuna yachaq kaykarqa tantiyanmanmi karqan Jesústa Tayta Dios kachamushqanta. Mana tantiyarmi jutsayuq karqan. Yachaq kaykarpis mana tantiyaptinmi qapra runaman Jesucristo tinkutsirqan.

Currently Selected:

Juan 9: qvmB

Highlight

Copy