Lir. 13
13
Aburamu ne Luti baukhana
1Nio Aburamu aniina khurura mu Misiri, niye no mukhasi wewe nende buli siindu nisio aaba nasio alala ne Luti. Bengila mu sibala sie lubeka lwe siafubo wa Kanaani.
2Aburamu aaba omuiinda lukali mu biaayo, efwesa, ne mu sahabu. 3Arekukha arura sibala sie siafubo wa Kanaani oola Beteli, abuundu niio ombakha liiema mu khurakikha, akari wa Beteli ne Ai. 4Oola abuundu niio ombakha alutare lwe khunyoa. Abwenao Aburamu esaayilao Wele Omunyali Owa Bioosi.
5Ne Luti yesi, owarekukha ne Aburamu, aaba ne bibiaayo, chikhaafu, ne kamaeema. 6Khwako kamaloba kababoombela, sikila bibaywa biabwe biaba bikali lukali, se banyala khukhwayila alala tawe. 7Mala bulomani bwabao akari we babaayi ba Aburamu ne babaayi ba Luti. (Mu ndaalo echo Bakanaani ne Baperisi nibo ba bamenyanga mu sibala esio.)
8Nio Aburamu aboolela Luti ali, “Bulomani bukhabaao akari wase ne nawe, namwe akari we babaayi befwe tawe, sikila efwe khuli balebe. 9Sibala sino sioosi se sili ebweeni wowo ta ku? Khwaukhane. Waaba nocha kumukhono kumukhasi, ese ndacha kumukhono kumuseecha, namwe waaba nocha kumukhono kumuseecha aba ese ndacha kumukhasi.”
10 #
Lir. 2.10
Luti abona litooma lia Yoritani ali lili ne kameechi kamakali buli abuundu nga kumukuunda kwa Wele Omunyali Owa Bioosi, nga sibala sia Misiri, lubeka lwa Soari. (Akano kosi kekholekha Wele Omunyali Owa Bioosi ne akhonaka Sodomu ne Komora tawe.) 11Nio Luti eroborera litooma lia Yoritani lioosi mala arekukha alola lubeka lwe bukwe. Khwako baukhana. 12Aburamu amenya mu sibala sia Kanaani ne Luti naye amenya mungoba che mu litooma, mala auuyisia liiema liewe aliyila siimbi Sodomu. 13Nono babaandu ba Sodomu baaba bamayaanu, lundi babooni lukali khu Wele Omunyali Owa Bioosi.
Aburamu auyiila Heburoni
14Nga Luti aukhana ne Aburamu, Wele Omunyali Owa Bioosi aboolela Aburamu ali, “Suta chimoni khukhwama niio wimile, mala olole ebunaswa, siafubo, ebukwe ne mumbo, 15#Bikh. 7.5 sikila sibala sioosi nisio obona khakhue ewe ne lisaaye liowo khulwa mindali. 16Ndakhola lisaaye liowo libe likali nga kumuyekhe. Kaaba bali omundu anyala abala kumuyekhe, aba babaana bowo bosi balibalikha. 17Keenda mu sibala sino obone buleeyi ne bukhiikha bwasio sikila khakhuelesie ewe.” 18Nio Aburamu auuyisia liiema liewe acha amenya amikhoonge kia Mamure kiili Heburoni mala ebweeneyo ombakhayo alutare khu Wele Omunyali Owa Bioosi.
Currently Selected:
Lir. 13: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
