Lir. 14

Aburamu asikula Luti

1Babao babaami bane, Amurafeli omwami owa Sinari, Arioki omwami owa Elasari, Ketorilaomari, omwami owa Elamu ne Titali omwami owe Koiimu. 2Babaami bano bebwaakala babaami baraano Bera, omwami owa Sodomu, Birisa, omwami owa Komora, Sinabu, omwami owa Atima, Shemeberi, omwami owa Seboimu no mwami owa Bela (namwe Soari). 3Babaami baraano bano bareera alala banamae babwe mu Litooma lia Sitimu (enyanja eye kumuunyu.) 4Khulwe kimiiko ekhumi ne kibili, baaba asi we bunyali bwa Ketorilaomari ne babaami ba baaba ne naye, ne mumwiiko kukhola ekhumi na kitaru babakaluukhanakho. 5Mu mwiiko kukhola ekhumi ne kine Ketorilaomari ne babaami ba baba ne naye, becha ne banamae babwe mala baula Barefaimu mu Asiterosi-karinaimu, Basusi mu Hamu, Baemi mu Siabehi-kiriataimu, 6ne Bahori mu sikulu siabwe sia Seiri khukhwola Eli Parani khu lwakha lwe mu sichiimi. 7Mala bakobolayo boola Enimi-sipati (niyo Kateshi) mala baula sibala sioosi sie Baamaleki, ne Baamori babamenya mu Hasasoni-tamari.

8Nio omwami owa Sodomu, owa Komora, owa Atima, owa Seboimu no mwami owa Bela (namwe Soari) barura mala baambanila mwiie, mu Litooma lia Sitimu, 9mala bapana ne Ketorilaomari omwami owa Elamu, Titali omwami owa Koiimu, Amurafeli omwami owa Sinari ne Arioki omwami owa Elasari. Babaami bane bapana ne babaami baraano. 10Litooma lia Sitimu liabamo kamaloo kamakali ke elamu. Ne nga babaami ba Sodomu ne Komora baaba ne belukha bakwa mu maloo ke lamu chana ako ne babaandi bataru belukhila mu bikulu. 11Nio banamae babukula kimiaandu kioosi kia Sodomu ne Komora ne biakhulia biabwe bioosi mala barekukha. 12Babukula akhaba Luti yesi, omwana owa wandaaye owa Aburamu, owaba ne amenyile siimbi Sodomu ne kimiaandu kiewe mala barekukha.

13Ne mulala owelukha, echa aboolela Aburamu, Omueburania, owaba ne amenya amikhoonge kia Mamure Omuamori. Mamure ne bawandaaye Eshikoli ne Aneri baba bauliilisiana ne Aburamu. 14Nga Aburamu ne aulila ali baambile omulebe wewe, arangirira banamae be siseecha chimia chitaru ne likhumi lilala na munaane nibo ekesia liie, ba basaalwa munju yewe, mala abaloondakho, atima khu baami baane abo khukhwola Dani. 15Abwenao akabukhasiamo banamae bewe mala bapana ne basiku mu silo. Niye ne bakholi bewe ba baapa ne khubatimania aboosia Haba, lubeka lwe bunaswa lwa Damasika. 16Mala Aburamu akobosia kimiaandu nikio baaba ne banuulile kioosi, ne Luti, omwana owa wandaaye, ne kimiaandu kiewe ne bakhasi ne babaandu nibo baaba ne baambile.

Melikisedeki aelesia Aburamu chikhabi

17Nga Aburamu ne akobola ne aulile Ketorilaomari ne babaami ba baba ne naye, omwami owa Sodomu arura khucha khumwakaanila mu Litooma lia Siabe (Litooma lio mwami). 18#Baeb. 7.1-10 Ne Melikisedeki, omwami owa Salemu, lundi omusaayi owarumikhiranga Wele owe Angaaki Lukali, asuta kumukaati ne ndali khukhwakaanila Aburamu. 19Nio Melikisedeki amubiita chikhabi ne aloma ali,

“Aburamu abiitwe chikhabi ne Wele owe Angaaki Lukali,

owabuumba likulu ne liloba.

20Ne afume Wele owe Angaaki Lukali,

ooreere basiku bowo mu makhono kowo.

Mala Aburamu aelesia Melikisedeki,

sitonyi silala khu likhumi sia buli siindu.”

21Nio omwami owa Sodomu aboolela Aburamu ali, “Mbe ese babaandu ne ewe obukule kimiaandu nikio okoboosie.”

22Ne kakhali Aburamu akobosia omwami owa Sodomu ali, “Nechubile khu Wele Omunyali Owa Bioosi owe Angaaki Lukali, owakhola Likulu ne liloba, 23ndi se ndabukula aakhaba luusi namwe lukoye lwe siraaro namwe sisiindu siosi siosi siili sisiowo tawe, okhakhola orio waloma oli, ‘Nakholile Aburamu khuuba omuiinda tawe.’ 24Se ndabukula sisiindu siosi siosi tawe ne kakhali busa siakhulia nisio babaandu base baliile, ne kumukabwa kwe babaandu bachile ne nase kwong'ene. Lekha Aneri, Eshikoli ne Mamure babukule kumukabwa kwabwe.”

Currently Selected:

Lir. 14: LUBUKUSU

Highlight

Copy