OBUCHACHILO 36
36
Tsinzibulo tsia Esau
(1 Akak. 1:34-37)
1Abalondakhwo bano nibo abolwibulo lwa Esau (niye Edomu). 2#Obucha. 26:34Esau yateeshia abakhasibe okhurula mutsimbia etsia Abakanani. Ada yali omukhaana wa Eloni Omuhiti, Oholibama yali omukhaana wa Ana, owali omusiani wa Zibeoni Omuhiwi. 3#Obucha. 28:9Basematsi yali omukhaana wa Ishimaeli ne nali omukhaana wabwe Nebayotsi. 4Ada omukhaye wa Esau yebula Elifasi, naye Basematsi niyebula Reueli. 5Oholibama yebula Jeushi, Yalamu nende Kora. Abo nibo abali abasiani ba Esau aba yebula olwa yali namenyanga mushialo shia Kanani.
6Mana Esau nabukula abakhasibe abo, abasianibe, abakhaanabe nende abandi boosi abayamenyanga ninabo, nabukula khandi tsing'ombetsie tsiosi nende emianduchie chia yali nanyoolile mushialo shia Kanani, ne natsia mushialo shindi ehale okhurula khumusiani wabwe Yakobo. 7Bakabukhana shichila omukunda kwa bamenyangamwo shikwali okubahela okhumenyamwo boosi ta, okhuba tsing'ombe tsiabwe tsiali tsinyinji khandi emiandu chiabwe boosi babili chiali eminji muno. 8Kho Esau natsia namenya mushialo shiebikulu shia Edomu.
9Abalondakhwo bano nibo abolwibulo lwa Esau, samwana abandu ba Edomu, abali mushialo shiebikulu shia Edomu. 10Abasiani ba Esau bali, Elifasi, owa Ada yebula, Reueli, owa Basematsi yebula. 11Abasiani ba Elifasi bali Temani, Omari, Zefo, Gatumu nende Kenazi. 12(Timina yali omukhasi omubiikha wa Elifasi omusiani wa Esau. Timina yebula nende Elifasi omusiani mbu, Amaleki). 13Abasiani ba Reueli bali, Natsani, Zera, Shama nende Miza.
14Omukhasi wa Esau oulangwa mbu, Oholibama, owali omukhaana wa Ana, omukhaana wa Zibeoni, yebulila Esau Yeushi, Yalamu nende Kora.
15Abalondakhwo bano nibo abasinjilili betsimbia tsiabolwibulo lwa Esau. Elifasi, omusiani wambeli wa Esau, niye owali kuukanyene aboluyia lwa Temina, Omari, Zefo, Kenazi, 16Kora, Gatamu nende olwa Amaleki. Bano boosi bali abolwibulo lwa Ada, omukhasi wa Esau.
17Reueli, omusiani wa Esau, niye owali kuukanyene aboluyia lwa Nahatsi, olwa Zera, olwa Shama nende olwa Miza. Bano boosi nabolwibulo lwa Basematsi omukhasi wa Esau.
18Abasiani ba Oholibama, omukhasi wa Esau bali Yeushi, Yalamu, nende Kora. Ne buli mulala khubo yali omusinjilili woluyialwe. Abo boosi bali abasiani bomukhasi wa Esau mbu Oholiba. Oholiba yali omukhaana wa Ana. 19Abo boosi bali abolwibulo lwa Esau (niye Edomu), ne buli mulala khubo yali omusinjilili woluyialwe.
Abolwibulo lwa Seiri
(1 Akak. 1:38-42)
20Abasiani ba Seiri omuhori bali Lotani, Shobali, Zebeoni, Ana, 21Dishon, Ezeri nende Dishani. Buli mulala khubo yali omusinjilili woluyialwe mu Abahori bolwibulo lwa Seiri, abali mushialo shia Edomu.
22Abasiani ba Lotani bali Hori nende Hemani. Naye Timina niye owali omukhaana wabwe Lotani.
23Abolwibulo lwa Shobali bali Alawani, Manahatsi Ebali, Shefo nende Onamu.
24Abasiani ba Zibeoni bali Aya nende Ana. Ana niye owalola tsisebele tsiamaatsi kayia pia, olwa yali niyayanga tsisishili tsia Zebeoni mushitsiimi.
25Abaana ba Ana bali Dishoni nende Oholibama, omukhaana wa Ana. 26Abasiani ba Dishoni bali Hemudani, Eshibani, Itsirani nende Cherani.
27Abasiani ba Ezeri bali Bilihani, Zawani nende Akani.
28Abasiani ba Dishani bali Uzi nende Arani.
29Abemilisi betsinzibulo tsia Abahori bali Lotani, Shobali, Zibeoni, Ana, 30Dishoni Ezeri nende Dishani. Abo nibo abemilisi betsinzibulo etsiarula mu Abahori okhulondana nende oluyia lwatsio mushialo shia Seiri.
Abaruchi ba Edomu
(1 Akak. 1:43-54)
31Abalondakhwo bano nibo abaruchi beshialo shia Edomu, abaruka omuruchi oundi yesi yesi nashili okhurukakhwo abandu ba Isiraeli tawe. 32Bela, omusiani wa Beori yaruka eshialo shia Edomu, niyamenya mwitookho lia Dinihaba. 33Olwa Bela yafwa, naye Yobabu omusiani wa Zera weshialo shia Bozora naruka mushilenjeshie. 34Olwa Yobabu yafwa, naye Hushamu oweshialo shia Tema naruka mushilenjeshie. 35Olwa Hushamu yafwa, Hadadi omusiani wa Bedadi yaruka mushilenjeshie. Hadadi niye owakhupana lihe nende Abamidiani mushialo shia Moabu ne nabahula. Yali niyamenya mwitookho lia Awitsi. 36Olwa Hadadi yafwa, Samula omusiani wabwe Misireka yaruka mushilenjeshie. 37Olwa Samula yafwa, Shauli owarulanga mwitookho lia Rehobotsi, owali niyamenya hambi nende omwalo kwa Yufurate yaruka mushilenjeshie. 38Olwa Shauli yafwa, Baalihanani omusiani wa Akhabori naruka mushilenjeshie. 39Olwa Baalihanani yafwa, Hadari yaruka mushilenjeshie. Baalihanani yamenyanga mwitookho lia Pawu. Naye omukhasiwe yalangwa mbu, Mehetabeli, omukhaana wa Matiredi, khandi nali omwitsukhulu wa Mazahabu.
40Abasinjilili betsimbia tsiolwibulo lwa Esau, okhulondokhana nende wabamenyanga, bali Timina, Alawa, Yetsetsi, 41Oholibama, Ela, Pinoni, 42Kenazi, Temani, Mibizasi, 43Magidieli nende Iramu. Abo nibo abali abasinjilili betsimbia tsiabolwibulo lwa Edomu, niye Esau, samwana Edomu. Ameera kabwe ako kali okhulondikhana nende ewa bamenyanga mubialo biabarukanga.
Currently Selected:
OBUCHACHILO 36: OLUPR
Highlight
Share
Copy
Want to have your highlights saved across all your devices? Sign up or sign in
