OBUCHACHILO 37
37
Yosefu nende abasiani babwe
1Yakobo natsiililila okhumenya mushialo shia Kanani. 2Akalondakhwo kano niko amakhuwa kobulamu bwabeinzu ya Yakobo.
Yosefu nali omuraaka wemiyika ekhumi namusaafu, yali niyayanga amakondi nende abasiani babwe, abaana ba Biliha nende Zilifa, abakhasi ba Samwana. Inyanga yindi, Yosefu yetsa naboolela samwana amakhuwa amabi, akabasiani babwe abo bali nibakholanga.
3Ne Yakobo yali niyaheela Yosefu muno okhushila shinga olwa yali niyaheela abaanabe bandi, shichila yebula Yosefu nali omukofu. Mana Yakobo nanabila Yosefu ikaanzu irambi. 4Ne olwa abasiani babwe Yosefu bandi balola mbu, sabwe yaheela Yosefu okhubashila boosi, basila Yosefu khandi shibaboolanga ninaye mumulembe tawe. 5Inyanga yindi mushilo Yosefu yaloora lilooro. Ne olwa yaboolelakhwo abasiani babwe abo, bameeta okhumusila muno. 6Yosefu nababoolela ari, “Recheresie emuboolelekhwo lilooro elia eloorile. 7Khubeele nikhubohanga ebinywa bieyingano mumukunda, ne eshinywa shianje shisinjiile shilunji, nabio ebinywa bienywe biikhung'asiye khushianje, nibishiinamila.”
8Abasiani babwe abo nibareeba Yosefu bari, “Kho toto mwene olakhuruka ifwe? Noho olaba nobunyali khwifwe?” Mana abasiani babwe abo nibameeta okhusila Yosefu khulwa amalooroke nende amakhuwake ako.
9Khandi Yosefu naloora lilooro lindi, ne naboolela abasiani babwe ari, “Eloorile lilooro lindi, eliuba, omwesi nende tsing'ining'ini ekhumi nandala tsibeele nitsinzinamilanga.”
10Ne olwa Yosefu yaboolela samwana nende abasiani babwe, papawe yamuhalabila namureeba ari, “Nililooro shiina elioloorile elo? Opaara mbu, toto isie, mamawo nende abasiani benywe khulakhwinamila?” 11#Ebikh. 7:9Ne abasiani babwe Yosefu nibamukhalishila omukongo, naye samwana nayililisia khumakhuwa ako.
Yosefu akusibwa Misiri
12Inyanga yindi abasiani babwe Yosefu batsia okhwaya ebiayo bia samwana, ahambi nende Shekemu. 13Ne Yakobo nareeba Yosefu ari, “Abasiani benywe shibatsiile okhwaya ebiayo Shekemu? Kho yitsa ekhurume otsie khubo.” Yosefu naboolela samwana ari, “Enjamile okhutsia.” 14Kho samwana namuboolela ari, “Tsia olole abasiani benywe nibaba nibaliyo obulayi nende ebiayo, mana witse umboolele.” Kho naruma Yosefu okhurula mwibanda lia Heburoni natsia niyoola Shekemu. 15Olwa Yosefu yali nali hambi okhuula Shekemu, omusaatsa undi yamunyoola nachenda chendanga mumukunda, ne omusaatsa oyo namureeba ari, “Okhaabanga shiina?”
16Naye Yosefu namukalusia ari, “Ekhaabanga abasiani befwe, ekhusaaya mbu, umboolelekhwo aha bali.” 17Mana omusaatsa oyo nakalusia Yosefu ari, “Bamalile okhutsia shichila embuliile nibaboolanga mbu, ‘Chende khutsie Dotsani.’ ” Kho Yosefu nalonda khubasiani babwe, nabanyoola nibali Dotsani.
18Abasiani babwe nibalola Yosefu nashili ehalekhwo, ne olwa yali nashili okhuula, baboolelana nibarechelesiania okhumwira. 19Nibaboola abeene khu beene bari, “Owamalooro ngwoyo yetsanga. 20Yitse, khumwire mana khumusukune mwiyabo eliamaatsi kakhamamwo, mana khuboole mbu, isolo nabulimo yimuliile, mana khulolekhwo mbu, amalooroke ako kalaba karie.” 21Nebutswa olwa Rubeni yahulila, yahonokosia Yosefu okhurula mumakhono kabwe nababoolela ari, “Khulamwire tawe.” 22Khandi Rubeni nababoolela ari, “Mushilenje shiokhumwira, mumusukune mwiyabo lino elili mushitsiimi.” Rubeni yaboola ario kho mbu, anyalilwe okhuhonokosia Yosefu okhurula khubasiani babwe kho mbu, Yosefu akalushile samwana. 23Kho olwa Yosefu yoola aha bali, bamutiila nibamufwalula ikanzuye irambi, eya yali niyefwalile. 24Nibamutiila nibamusukuna mwiyabo, eliamaatsi kali nikakhamamwo.
25Mana nibekhala hasi okhulia, ne nibachinguula tsimoni, nibalola omukanda kwabandu ba Ishimaeli nikurulanga Giliadi, nikuli netsingamia nitsichinjile obubane, amafura keshing'ari eshilayi nende manemane, nikuchendanga nikukholomokha nikutsia Misiri. 26Mana Yuda nareeba abasiani babwe ari, “Niyinganga shiina eya khulanyoola nikhwira omusiani wefwe, mana okhufwakhwe khuleshe okhumanyikha? 27Chende khumukusie khubandu ba Ishimaeli abali aba Midiani ne shikhulamusaalisia ta, shichila nomusiani wefwe, amatsaayi kefwe keene.” Mana abasiani babwe nibafuchilila. 28#Obuch. 10:13; Ebikh. 7:9Mana olwa abakholi beinganga ba Midiani boolaho, abasiani babwe Yosefu nibakhwesa Yosefu okhurula mwiyabo omwo, mana nibamukusia khu Abaishimaeli abo ebitonye bieifetsa amakhumi kabili, nabo Abaishimaeli abo nibamuyila Misiri.
29Ne olwa Rubeni yakalukha khwiyabo nanyoola mbu Yosefu abulamwo, yarandula ebifwalobie niyelukha. 30Mana nakalukha khubasiani babwe, nababoolela ari, “Omuraaka oyo shialimwo ta, nasi, kho nenzie heena?” 31Mana nibasinza imbusi nibabukula ikaanzu ya Yosefu nibeenikha mumalasile. 32Kho nibayilila samwana ikaanzu eyo, nibamuboolela bari, “Khuchitoolile, henjelesia olole niyiba niyili ikaanzu yomusianiwo noho ta.”
33Samwana nachimanyilisia naboola ari, “Niyikaanzu yomusiani wanje. Isolo nabulimo yiliile omwana wanje, yiranduemwo ebitonye ebitonye.” 34Mana Yakobo narandula ebifwalobie, niyeboha amakunia mushishienjeshie mushibeela niyekhuula omusianiwe khulwa tsinyanga tsinyinji. 35Abasianibe nabakhaanabe boosi halala nibeetsa okhumulemia omwoyo. Naye Yakobo nakhaya nababoolela ari, “Tawe, isie ndalafwa neshikhuulanga omwana wanje.” Mana Yakobo natsiililila okhwikhuula omusianiwe. 36Ebise bienebio, Abamidiani nabo bali nibakusiye Yosefu Misiri khu Potifa, omwimilisi wabelihe liomuruchi wa Misiri.
Currently Selected:
OBUCHACHILO 37: OLUPR
Highlight
Share
Copy
Want to have your highlights saved across all your devices? Sign up or sign in
