Akisiakinet 18

Euriuni Aburaam ikoku nisapat

1Tatakanu Ekapolon Akuj ani a Aburaam alochokei alu italeunitoe eyakasi Mamure. Esaa ngolo ebooyi Aburaam alokidor a eam keng naparan erirae akolong noi. 2Kingolia ngesi taanyunga ngikiliok nguuni ewaasi. Ani napei aanyungarea ngesi kesi, kikomak ngesi aloeam tolot akisiriam kesi, sodi kijuuru toriedik. 3Tolim tama, “Ngikapolok kang, ani kijoikinito esi ngakiro kang, tolomutu kare nawi kang kainyo arai ayong ekasuban etich kus. 4Kimiekisi ayau ngakipi ngadi kilotareta ngakejen kus, kiangasi alokwap ekitoe logo. 5#Ebura 13:2 Kainuni ayong esi tani akimuj adio, na inyamete esi taanyuneta ngikilinga lu ilooso ngaren. Alakara ayong ani iponeta nawi kang.”

Sodi tolimut kesi tamasi, “Tosub nguna loger lo ilimu.” 6Kikirikiraar Aburaam loeam ni ayei Sara tolimok tama, “Kitemu ngakitemiet ngauni a ngakiria anaajokak tomunak sodi kidorok ngamugati atipei.” 7Tamatar Aburaam nia ayakasi ngibaren, kirum itaok nikanakunan, nak ekasuban etich keng tolimok atamar tosubak. 8Tolem ngesi akimiet ka ngakile, ta akiring sodi nak ngikiliok ngulu. Toliwor ngesi ekoranakini kesi akimuj alokwap ekitoe tanyama.

9Kingita kesi ngesi tamasi, “Nyaani aberu kon Sara?” Tatachak ngesi tama, “Eyei tooma loeam.” 10Tolimok epei kech ngesi tama, “Adaunet a ngilapio a ngikan-koomwon napei tokona,#18:10 adaunet ... tokona; kori ekaru lo moi, ngirwa lu ikote lu tokona lugu. abonguni ayong, nakaneni idouni aberu kon ikoku nisapat.” Ayei Sara lokidor a eam, naabor a Aburaam, apupi ngakiro nguna. 11Amojongito Aburaam ka Sara lokojokon. Anangito ngikaru a Sara lu esalunea tojongo akidounun. 12#Rom 9:9 Sodi tokieni Sara kitama bon ebala, “Ekoe, na tokona kimojongea ayong ka lokile kang kona, epedori akiper ka ekile kang ajoikin ayong a?” #1 Pet 3:6

13Kingit Ekapolon Akuj Aburaam tama, “Nyoni akienia Sara, nabo tolim atamar be apedori akidoun ikoku, na tokona amojongea kona a? 14Eyei ibore etiono ani a Ekapolon Akuj a? Ani enangi ngirwa ngulu, abonguni ayong adaunet a ngilapio a ngikan-koomwon napei tokona, nakaneni idouni Sara ikoku nisapat.” 15#Luk 1:37 Ani kona abulitor Sara, topeg tama, “Nyekiena ayong.” Tolim Ekapolon Akuj tama, “Alioko, abe ikiena bo iyong.”

Imaimai Aburaam Akuj kotere Sodom

16Torotokis ngikiliok ngulu kaneni tananga ni arouneta Sodom. Kirukosi Aburaam ka kesi itenarit alorot. 17Tolimokin Ekapolon Akuj bon tama, “Nyedai ayong ani a Aburaam ngakiro na asaki asubakin, 18kainyo eliwor ngesi ebukut lo eyenikinitae, tarai lo ikileenikinit. Apiari ayong ngibukui daang anakwap kotere ngesi.#18:18 ngibukui ... kotere ngesi; kori kalimokinete ayong ngibukui daang atamar topiarae loger lo kipiarea iyong. 19Aseu ayong ngesi asaki atamar todungok ngide keng ka ngalesea keng akiwap ngakiro kang ka akisub ngakiro na iyookino ka na eteniyete. Ani kesub ngesi kongina, asubakinea ayong ngesi ngakiro daang na echikak.” 20Sodi tolimok Ekapolon Akuj Aburaam tama, “Kona eyakatar ngakiro nakaalak ititakinitere ngitunga a Sodom ka Gomora, nabo erono akisech kech noi, 21alosi ayong aanyun kesubito kesi ngakiro naaronok noi loger lo eirarea ayong kori kemam.”

22Toreas ngikiliok luarei kaneni, toloto Sodom, sodi kidong Ekapolon Akuj erukito ka Aburaam. 23Taapu Aburaam diyete Ekapolon Akuj kingit tama, “Ipedori iyong dir akinyasun lu nyesechito aapei ka lu esechito a? 24Ani ejok toya ngitomwon-kan lu nyesechito lu eyakasi lore ngolo, ipedori iyong akinyasun ere ngolo, nakaneni nyiyuu lutomwon-kan nyesechito eyakasi neni a? 25Ekoe, nyipedori robo cha iyong akisub ngakiro na ikote neni, taar lu nyesechito aapei ka lu esechito. Ekoe nyikokini robo cha iyong nguna. Abe ejoikinit bo ekeriran a akwap kadaang etenoono eriras keng.” 26Tolim Ekapolon Akuj tama, “Ani karukau ayong ngitunga ngitomwon-kan alo Sodom lu nyesechito, emiekini ayong ere daang kotere kesi.” 27Tatachu Aburaam tama, “Torimakinae kare Ekapolon ani arubakinitor ayong kesuruori iyong ekoni bo ayong apua ka ekuron. 28Ani bo keraakasi ngitunga lu nyesechito ngitomwon-omwon ka ngikan, meere ngitomwon-kan, inyasuni iyong ere daang na eraakar ngitunga ngikan iituno a?” Tolim Ekapolon Akuj tama, “Nyenyasuni ayong erai karukau ngitomwon-omwon ka ngikan kaneni.” 29Kingit Aburaam Ekapolon Akuj tama, “Ani bo keyakasi ngitomwon-omwon neni?” Tolim Ekapolon Akuj tama, “Nyenyasuni ayong kotere lutomwon-omwon.” 30Tolim Aburaam tama, “Nyiingo kare Ekapolon, kimiekinae eruorik. Ani bo keyakasi ngitomwon-uni neni?” Tatachu Ekapolon Akuj tama, “Nyenyasuni ayong karukau ngitomwon-uni kaneni.” 31Tolim Aburaam tama, “Torimakinae kare ayong Ekapolon ani arubakinea kesuruori iyong. Ani bo keyakasi ngitomwon-arei neni?” Tatachu Ekapolon Akuj tama, “Nyenyasuni ayong karukau ngitomwon-arei.”

32Tolim Aburaam tama, “Nyiingo kare Ekapolon, kimiekinae eruorik akiruorikinet naga bon. Ani bo keyakasi ngitomon neni?” Tatachu Ekapolon Akuj tama, “Nyenyasuni ayong karukau ngitomon kaneni.” 33Ani erumori Ekapolon Akuj akiruoro ka Aburaam, tolot nisek alosi, tobongo Aburaam dang nawi keng.

Currently Selected:

Akisiakinet 18: ABIBILIA

Highlight

Copy