Akisiakinet 19

Asechanu a ngitunga a Sodom

1Tanangut ngimalaikae luarei ngulu lore a Sodom ebong. Nakaneni ebooyi Loti alokidor a ere. Ani eanyungari Loti kesi, tonyou tolot akisiriamiar, sodi toriedik kijuuru alongaren kech. 2Tolim tama, “Ngikapolok kang, tolomutu kare nawi a ekasuban etich kus, kilotasi ngakejen kus sodi topero. Ani erumor tonyout nataparach toloto ni iloose.” Tatachut kesi tamasi, “Mam, kiperi sua nikalapatan a ere.” 3Nakaneni kimaima ngesi kesi lokojokon, sodi tachamut alomar nawi keng. Kisumuj ngesi kesi. Tolimok Loti ngikasubak etich atamar kidorokis ngamugati napadok, sodi tanyama kesi.

4Ani eringa ngipeyok nyepero, kiriama ngitunga a Sodom awi. Ayakasi ngitunga daang a ere kangolo neni, lusorok ka lumojong. 5#Katu 19:22-24 Tanyarata Loti sodi kingita tamasi, “Nyaalu ngitunga lu apote akiper nawi kon akolongit naga? Kipud nikalapatan nege kainyo kisaki sua etopero kesi.”

6Topudo Loti nikalapatan sodi togolok ekidor. 7Tolimok kesi tama, “Talopae kang, kemaimai ayong esi atamar nyiisuba kare ngakiro naaronok ikote nguna. 8Kingolikisi a, eyakasi tanakookang ngaarei na eringa nyepero ka ngikiliok a ache. Kimiekisi kepudok ayong esi, sodi tosubeta ngakiro nguna isakete asubea. Nakaneni warasi nyiisubeta ngitunga lugu ngakiro ngadi kainyo alomut kesi nawi kang.” 9Nakaneni tatachut kesi tamasi, “Kiyotok kane! Abuni ngoon logo nege erai epeyonon, nakaneni esaki tokona aliwor ngesi kidodenakini ngoni ngakiro na ejoikinit kisubi a? Kisubea tokona sua iyong ngakiro naaronok noi na idwangito nakusubea kesi.” Kijukasi kesi Loti, sodi kiyotut diyete ekidor esakete akibwang. 10Nakaneni kiriyasi ngitunga luarei ngulu Loti tooma kai, sodi togolo ekidor. 11#2 Kapol 6:18 Ani erumor kitumudukana ngitunga daang lu ayakasi nikalapatan, luuchik ka luapolok, sodi tongopik kesi ekidor.

Arotokini Loti alo Sodom

12Tolimokis ngitunga luarei ngulu Loti tamasi, “Ani keyakasi ngitunga kon ngiche nege lu eraakasi talokookon, ka tanakookon, ka talokamuran kon, kori ngiyenet kon, lu elomito lore logo, kipudo kesi atipei, 13kainyo kisaki sua akinyasun ere logo. Eira Ekapolon Akuj ngakiro naaronok na esubete ngitunga lugu nakaneni kimeu sua akinyasun Sodom.”

14Sodi tolot Loti lokiliok lu adikino iusete tanakookeng tolimok tama, “Tonyoutu torotokisi kane kainyo edikino Ekapolon Akuj inyasuni ere logo.” Nakaneni tamasi ngikamurak keng kori ebolia ngesi.

15Ani iwalari, kibunyakis ngimalaikae Loti ebalasi, “Tonyou toriko aberu kon ka tanakookon naarei eyakasi nege, sodi nyikimunyar esi na inyasunere ere.” 16Totinenik Loti anyoun. Nakaneni torwakinos ngitunga luarei ngulu Loti ka aberu keng, ka tanakookeng naarei ani esienitor Ekapolon Akuj Loti. Totinga ngakan sodi torikosi kesi tanang nikalapatan a ere. 17#2 Pet 2:7 Sodi tolim emalaikat epei tama, “Tamatar toyar! Wara nyiingoliu naabor kori nyiiwo a wadio anadipo. Tamataros lomukur sodi nyikinyasun.”

18Nakaneni tatachak Loti ngesi tama, “Mam kare ekapolon kang, 19kingolik a, kisubeta esi ayong naajokak ani kiyuuneta, nakaneni nyamatar ayong lomukur kainyo eloka. Kadolete ayong ngakiro ngache naaronok alorot sodi atotoan eringa nyenanga inaa. 20Itee iyong nyire nidiochichi ia? Eapi nyire ngini. Kimiekinae ayong atolot inaa. Itee iyong atamar erai nyire nidiochichi. Ayari ayong kaneni.” 21Tatachak emalaikat ngesi tama, “Awaa, achamu ayong. Nyenyasuni ayong nyire ngini. 22Tamatar atipei! Emam ibore asubakini ayong eringa iyong nyenanga inaa.” Ani kona abalar Loti edit nyire ngini, tolimokinae ekiro a ere kangolo Soar.#19:22 Soar; esibit ekiro lo a Ngaeburaniae eger keng atamar “Edit.”

Enyasunio Sodom ka Gomora

23Epiripirunit akolong na anangea Loti Soar. 24Sodi tomeu Ekapolon Akuj akim nakariran anadis totep Sodom ka Gomora, 25kinyasu ngirerea ngulu daang ta adipo ngina daang. Tomunya ngitunga daang a ngirerea kangulu ka ibore daang ni arupunit kaneni. 26#Mat 10:15; 11:23-24; Luk 10:12; 17:29; 2 Pet 2:6; Yuda 7 Nakaneni kingolia aberu a Loti naabor sodi kibelei toliwor amoru a amakat. #Luk 17:32

27Kiswakak Aburaam nataparach elilim tolot nisek awaatar ngesi ka Ekapolon Akuj. 28Kingolia ngesi lowae a Sodom ka Gomora, ta akwap daang na ayei nadipo. Kingolik ngesi apuru idaaui anakwap kangina, ekoni apuru ngina na ebunit anadui ana erirae.

29Nakaneni na enyasunea Akuj ngirerea a adipo ana alomit Loti, kitamu Akuj Aburaam sodi kimiek Loti ebuchar toyar.

Ni etorunete Ngimoab ka Ngiamon

30Taramak Loti alo Soar, tolot toloma ka tanakookeng naarei lomukur, kainyo aemit ngesi akiboi alo Soar. Sodi toloma ngesi ka tanakookeng naarei naburibur. 31Tolimok nakookeng naapolon naachi tama, “Amojong apayok, nakaneni emam ngikiliok anakwap kana#19:31 anakwap kana; kori anakwap kadaang. lu kiusete ngoni sodi edoutu ngide. 32Kimiekisi etamata apayok emuna lo epuritoe, sodi atopero ka ngesi, ataanyuneta ngide.” 33Kitamata kesi apakech emuna nakwaare a akolongit kangina, sodi toloma naapolon topero ka apakeng. Ani kona erakaritor apakeng emuna noi, nyeyena ngesi atamar anukiro asubi. 34Ani akwaar nache, tolimok naapolon naachi tama, “Kingolik a, kiperi been ayong ka apakang, kimiek etamata nabo ngesi emuna lo epuritoe akwaar naga, sodi toloma iyong topero ka ngesi, taanyunea ipei yok daang ikoku ani ka apayok.” 35Kitamata kesi nabo apakech emuna lo epuritoe nakwaare a akolongit kangina. Tonyou naachi toloma topero ka ngesi, ani kona erakaritor apakeng emuna noi, nyeyena nabo ngesi atamar anukiro asubi. 36Sodi topotiut tanakookeng a Loti naarei nguna ngide lu aurikini apakech. 37Kidou naapolon ikoku nisapat, tolimok ekiro be Moab.#19:37 Moab; esibit ekiro lo a Ngaeburaniae eger keng atamar “aanyuni ani ka apakang.” Ngesi erai apaakech a Ngimoab tanang akolongit naga. 38Kidou naachi dang ikoku nisapat, tanyara ekiro keng Benami, ngesi erai apaakech a Ngiamon tanang akolongit naga.

Currently Selected:

Akisiakinet 19: ABIBILIA

Highlight

Copy