Bikh. 3
3
Petero aonia omuleme
1Endaalo ndala Petero ne Yoana bacha mu Lukaangu, mu saa ekhola tisa ekolooba, esaa eye khusaba. 2Omundu owalemala khukhwama mu khusaalwa khwewe aba asilibwa sisialaangwa bali Silayi Lukali. Buli endaalo bamumemaanga ne khumureera asilibwa khusaba chirupia khukhwama khu baandu babengilanga mu Lukaangu. 3Nga abona Petero ne Yoana ne benya khwingila mu Lukaangu, abasaba bamuekho buyeeti. 4Bombi bamuungusa, mala Petero aloma ali, “Khuloleelele!” 5Nio omundu chana abaloleelela, ne erekekheere khunyoola sisiindu khukhwama khu nibo. 6Ne Petero amuboolela ali, “Se ndi ne chirupia chosi chosi tawe, ne kakhali ndakhua nisio ndi nasio; mu lisina lia Yesu Kristo owa Nasareti yinyokha okeende!” 7Nio, amutiila kumukhono kumuseecha amuyeeta khukhwinyokha. Ao ne nao bikhandakilo ne chikheng'engele biaba ne kamaani; 8asuna mu ngaaki, eema mala arakikha khukeenda. Engila mu Lukaangu ne nabo, akeenda, lundi asuniakila mungaaki ne khufumia Wele. 9Babaandu boosi bamubona nakeenda ne khufumia Wele, 10ne nga bamumanya bali niye osabanga lundi owikhalanga asilibwa Silayi, boosi bauka ne khurangararwa khu kaba ne kamwekholekhekho.
Burume bwa Petero mu Lukaangu
11Nga omundu chana ne eamba khu Petero ne Yoana mu matooche ka kalaangwa bali ka Solomoni, babaandu barangararwa mala batima ne becha niio Petero ne Yoana bemile. 12Nga Petero ne abona babaandu, ababoolela ali, “Baisiraeli basiaase sikila siina ne muuka kano, lundi siina ne mukhuungusa efwe? Enywe mwibaasia muli khukholile omundu yuno akeenda khulwe bunyali bwefwe fwabeene namwe buwele bwefwe? 13#Khur. 3.15 Wele owa Aburahamu, Isaaka, ne Yakobo, Wele owe bakuuka befwe, aanile luyali lwe buwele khu mukholi wewe Yesu. Ne kakhali enywe mwamuana khu baruki, mala mwamwikaana ebweeni wa Pilato, akhaba Pilato ne enya khumulekhuula. 14#Mat. 27.15-23; Mk. 15.6-14; Lk. 23.13-23; Yn. 19.12-15 Aba omutakatifu lundi omulayi, ne kakhali eywe mwamuloba, mala mwakhayilila khusaba Pilato amulekhuulile omwiiri. 15Mwera oyo oreera bulamu, ne Wele amulamusia khukhwama mu lifwa, ne efwe khuli baloli ba kano. 16Bubeele bunyali bwe lisina liewe bueleesie omuleme yuno kamaani. Kamakhuwa niko mubona ne khumanya kano, kekholekhe khulwe lisuubila mu lisina liewe. Lisuubila mu lisina lia Yesu nilio likholile omundu yuno aona nga mwesi ne mubona muri.
17“Ne luno bawandaayase, manyile ndi niko enywe ne babemeelesi benywe mwakholela Yesu, kaba kario sikila busilu bwenywe. 18Wele aaloma khaale khubirira mu bang'oosi boosi ali Kristo khukhwola anyaasibwe. Khwako aakhola bung'oosi buno khuba ng'ali mu ngila yino. 19Nono, yekanila, mala mukobolele Wele nio amubeele bubwoni bwenywe. Ne mukhola murio, 20biise bie kamaani karoho bileecha khukhwama khu Mwami, naye alaruma Yesu, oli Kristo niye aamuroborera enywe khale. 21Khukhwola arame mwikulu nabwila siise siola sie khukhola bibiindu bioosi bibe biyia, nga Wele ne aaloma khubirira mu bang'oosi bewe batakatifu be khaale. 22#Likh. 18.15,18 Sikila Musa aloma ali, ‘Omwami Wele wenywe akhamurumire omung'oosi, bulayi bwene nga ne anduma ese, aliba mulala khu baandu benywe babeene. Murie buli siindu nisio akhamuboolele khukhola. 23#Likh. 18.19 Yesi yesi okharia omung'oosi oyo tawe, akharusibwe khukhwama mu baandu ba Wele ne khubunisibwa.’ 24Ne bang'oosi boosi ba balomaloma burume nga Samweli ne naabo babeecha enyuma wewe, boosi baba ne burume bwe kamakhuwa kalikho kekholekha mu ndaalo chino. 25#Lir. 22.18 Lisuubisia lia Wele khubirira mu bang'oosi bewe lili lilienywe, mala musaanga mu ndakaano niyo Wele akhola ne bakuuka benywe. Nga ne aboolela Aburahamu ali, ‘Khubirira mu lisaaye liowo ndabiita chikhabi babaandu boosi khu sibala.’ 26Khwako Wele aarobora omukholi wewe, mala aanyoa amuruma khwinywe, khumuelesia enywe chikhabi mu khukhola buli mulala khwinywe alekhe chingila chewe chimayaanu.”
Currently Selected:
Bikh. 3: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
