Bikh. 4
4
Petero ne Yoana ebweeni we kumuse
1Petero ne Yoana nga baba ne basilomaloma ne babaandu, basaayi balala, omukhulu owe baliindi be Lukaangu, ne Basatukayo balala boola. 2Baba beuliile bubi sikila Petero ne Yoana baba balikho bekisia babaandu bali Yesu aaba aalamusibwe khukhwama mu lifwa, liliekesia lili bafu bakhalamukhe. 3Nio ba baamba mala ba bara mu siboe nabwila bwasia, sikila yaba ekolooba. 4Ne bakali ba baulila burume obwo basuubila, mala babaandu bakucha boola embi chielefu chiraano.
5Oli bwasia babaami be Bayaudi, babemeelesi ne baandiki, babuusiana mu Yerusalemu. 6Bakaanana ne Anasi Omusaayi Omukhulu Lukali, ne Kayafa, Yoana, Alekisanda, ne babaandi ba baaba be luuya lwo Omusaayi Omukhulu Lukali. 7Bemekha barumwa chana ebweeni wabwe ne babareeba bali, “Mukholile kano khu bunyali siina namwe murumikhiire lisina lia naanu khukhola kano?”
8Petero, ne echusiibwe ne Roho Omutakatifu, abakobosia ali, “Enywe babaami be babaandu, ne ba bemeelesi: 9khwaba ne khureebwa endaalo eya luno khulwe sikholwa silayi sisiakholeekhe khu muleme lundi nga ne aonile, 10nono mwesi, ne babaandu ba Isiraeli boosi khemumanye muli omundu owimile ebweeni wenywe yuno, ali omulamu khubirira khu bunyali bwe lisina lia Yesu Kristo owa Nasareti niye enywe mwabaamba khu musalaba mala Wele amulamusia khukhwama mu lifwa. 11#Chiny. 118.22 Yesu ali niye liiandiko liboolanga lili,
‘Libaale nilio enywe babombakhi mwalekelesia,
liakaluukhana liaba lie mu koona.’
12Buonia bunyoolekha khubirira mu Yesu yeng'ene, mu sibala sioosi se aliio na mulala niye Wele aana onyala khukhuonia efwe tawe.”
13Be mu muse barangararwa nga ne babona bunyindaafu bwa Petero ne Yoana ne khumanya bali baba babaandu busa bakhaasoma tawe. Bakhebulila bali babelenge be kumusuumbu ne Yesu. 14Ne khuba nende nilio baloma tawe, sikila babona omundu owaona oyo ne emile ao ne Petero nende Yoana. 15Nio ba baboolela khurura enje, mala barakikha khureebana babeene ne babeene. 16Bareebana bali, “Baabaandu bano khubakholakho siina? Buli mundu mu Yerusalemu amanyile ali bakholile kamayia ke khuukia kano, mala se khunyala khwakekaana tawe. 17Khukhiingilila kamakhuwa kano, kakhasalanila mu baandu ne akeekhe ene tawe, khekhukaanie babaandu bano bakhalomaloma lundi khu mundu yesi yesi mu lisina lia Yesu tawe.”
18Khwako ba balanga mukari mala ba bakaania balekhe khulomaloma ne khukhwekisilia mu lisina lia Yesu. 19Ne Petero ne Yoana babakobosia bali, “Enywe mwabeene khalaka, lili ena lili lilayi mu moni mwa Wele, khumuria enywe namwe khuria Wele. 20Sikila efwe se khunyala khwalekha khulomaloma niko fwabeene khwabona ne khuulila tawe.” 21Nio be kumuse chana ba balaanga, babakaambila burafu ne mala babalekhuula. Babona bali se kanyalikha khubaukuuma tawe, sikila babaandu boosi baba balikho bafumia Wele sikila ka kekholekhe. 22Omundu niye kamayia ke khuonia kekholekhakho aba ne bukhulu bwe kimiiko kibira kamakhumi kane.
Basuubili basaba banyoole bunyindaafu
23Nga Petero ne Yoana ne balekhuulwa, bakobola mu sipupu siabwe mala bababoolela niko basaayi bakhulu ne babemeelesi ba babooleele. 24#Khur. 20.11; Neh. 9.6; Chiny. 146.6 Ne nga basuubili baulila kano boosi baambana alala mu khusaba Wele bali, “Omwami lundi Omubuumbi owe likulu, sibala, ne nyanja ne bioosi bilimo! 25#Chiny. 2.1-2 Mu bunyali bwa Roho Omutakatifu walomaloma khubirira mu kuuka wefwe Daudi omukholi wowo, nga aloma ali,
‘Sikila siina Be Chikholo ne bakhalaale;
sikila siina babaandu ne bakholile chikwangwaani cha busa?
26Babaami be sibala berekekha,
ne baruki bakanaane alala khuyingania Omwami ne Kristo wewe.’
27 #
Mat. 27.1-2; Mk. 15.1; Lk. 23.1,7-11; Yn. 18.28-29 Sikila ng'ali Herodi ne Pondio Pilato bakaanana mu lukoba luno nende Be Chikholo ne babaandu ba Isiraeli khuyingania Yesu, Omukholi wowo omutakatifu, niye wakhola Kristo. 28Babuusania khukhola buli siindu nisio ewe khulwe bunyali bwowo ne lilienya liowo waba wamala khubisia khale oli bikhekholekhe. 29Ne luno, Omwami, loleelesia ke khuriikhirisia niko bakholile, mala okhulekhuule efwe bakholi bowo, khulomalome elomo yowo ne bunyindaafu bwoosi. 30Kololosia kumukhono kwowo khuonia, lundi aana bie khuukia ne kamayia biole khukholwa khubirira mu lisina lio Mukholi wowo omutakatifu Yesu.”
31Nga bamala khusaba, abuundu niio yaba bakaananile aterema. Boosi bechusibwa Roho Omutakatifu mala barakikha khukhwilwacha elomo eya Wele ne bunyindaafu.
Basuubili bakabana bibiindu biabwe
32 #
Bikh. 2.44-45
Sipupu sie basuubili siaba alala mu mebaasio ne mu mwoyo. Se abao na mulala owaloma ali sisiewe aba sisiewe yeng'ene tawe, ne kakhali buli mundu akabananga ne babaasie buli nisio aba nasio. 33Ne bunyali bukali barumwa baana buloli khu lilamukha lio Mwami Yesu, ne Wele abaelesia kumwalaalo kumukali. 34Se abao na mulala khu nibo owataamba sisiindu tawe. Abo ba baaba ne kimikuunda namwe chinju bakusia, ne bayila chirupia nicho bakusiisiemo, 35bachiaana khu barumwa, mala chirupia chikabwa khu buli mulala khuloondekhana ne butinyu bwewe. 36Ne Yosefu, Omulawi niye barumwa batiuukha bali Baranaba owasaalwa abuundu bali Saipurasi (liboola lili, “Omwana we lichuuba”) 37akusia kumukuunda nikwo aba nakwo, mala areera chirupia khu barumwa.
Currently Selected:
Bikh. 4: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
