Bikh. 5
5
Anania ne Safira
1Ne abao omundu niye balanga bali Anania no mukhasi wewe Safira bakusia kumukuunda kwabwe. 2Ne Anania afukiilisiana no mukhasi wewe aramiakho chirupia chindala ne chichiindi areerera barumwa. 3Petero amuboolela ali, “Anania, siina sikila Sietani ne echile mu mwoyo kwowo akila wabea Roho Omutakatifu, webukulilakho sitonyi sie chirupia nicho okusiisie kumukuunda? 4Nga wabeele ne okhaakukusia tawe, kwabeele kukwowo; ne nga wamala khu kukusia, chirupia chabeele chichowo. Nono siina sikila ne okhalaake khukhola sisiindu nga sino siri? Se wabeyile babaandu tawe, ne kakhali wabeyile Wele!” 5Nga Anania naulila ario, akwa aasi afwa, mala buuri bwatiila boosi ba bakaulila. 6Basoleeli bechamo, baboa kumubili kwewe mu ngubo, bakurusia enje, mala bakusiikha.
7Enyuma we chisa nga chitaru chiri, omukhasi wewe echamo nakhamanyile kakekholeekhe tawe. 8Petero amureeba ali, “Mboolele, echino nicho chirupia choosi nicho ewe no museecha wowo mwanyoolile khukhwama khu mukuunda kwenywe?” Akobosia ali, “Yee, nicho chino choosi.”
9Nio Petero amuboolela ali, “Siina sikila ewe no museecha wowo ne mufukiilisiane khukhaka Roho owo Mwami? Babaandu basiikhile omuseecha wowo bali amuliango, akhaba ewe wesi balakhusiikha!” 10Abwene ne abwene akwa mu bikele bia Petero mala afwa. Basoleeli bechamo babona afwiile, nio bamusuta bamusiikha embi no museecha wewe. 11Ekanisa yoosi ne babaandi boosi babaulila kano baria lukali.
Kamayia ne bikholwa bie khuukia
12Kamayia kamakali ne bikholwa bie khuukia biaba bilikho bikholwa ne barumwa mu baandu. Basuubili boosi bakaananilanga mu matooche ka kalaangwa kali ka Solomoni mu lukaangu. 13Akhaba babaandu ne ba bafumianga, se aliio na mulala wenje owerusia khusaanga nabo tawe. 14Ne kakhaba kario babaandu bakali ne bakhasi basuubila mu Mwami, batasikha khu mukaanda kwe basuubili. 15Khuloondekhana nende niko barumwa bakholanga, babaandu bameema balwale khu bitaanda ne khu mikeeka, ne babara khu chingila nio oli Petero abira sisiiniini siewe siole khu balala nga ne alikho abira ario. 16Babaandu bakali becha khukhwama mu ngoba chichaba siimbi ne Yerusalemu, bareera abo ba baaba balwale namwe ne bisieeno, mala boosi baona
Barumwa bapisibwa siibi
17Nio Omusaayi Omukhulu Lukali, ne naabo boosi be kumusuumbu kwewe, ne basaangi be kumukaanda kwe Basatukayo bakhendekhela barumwa lukali, nio babisia khukhola sikholwa. 18Baamba barumwa babara mu siboe. 19Ne kakhali musilo malaika owo Mwami ekula bilibwa bie siboe, abarusiamo, mala ababoolela ali, 20“Khemuche mwime mu Lukaangu mala muboolele babaandu burume bwoosi khuloondekhana ne bulamu buyia buno.” 21Ne nga ne baulila bario, bacha bengila mu Lukaangu mu makhelebeende, mala barakikha khukhwekisia.
Omusaayi Omukhulu Lukali chana nende be kumusuumbu kwewe balaanga babemeelesi Bayaudi mu muse mala barumania bareere barumwa ebweeni wabwe khu khwama mu siboe. 22Nga baliindi ne boolayo, khunyoolamo barumwa tawe, bakobola mu muse ba baboolela bali, 23“Nga ne khwolile mu siboe, khunyoolile siekaalwe lundi banamae boosi baliindile bilibwa, ne nga khwikuule bilibwa, se khunyoolilemo omundu tawe!” 24Nga basaayi bakhulu ne omukhulu we banamae be Lukaangu baulila kano, bauka lukali khu kakekholeekhe khu barumwa. 25Nio omundu okundi echa ababoolela ali, “Rekeeresia! Babaandu nibo mwareere mu siboe abosiina mu Lukaangu balikho bekisia babaandu!” 26Mala omukhulu owe banamae ne babaandu bewe bacha bareera barumwa chana, kakhaba kario se barumikhira kamaani tawe, sikila baria bali babaandu banyala khubapa kamabaale.
27Bareera barumwa mukari babemia ebweeni we kumuse mala Omusaayi Omukhulu Lukali ababolela ali, 28#Mat. 27.25 “Efwe khwaamukaaniisie mu burafu lukali khuli, ‘Mukhekisiakho mu lisina lio mundu yuno tawe,’ ne bona niko mukholile! Mwekiisie mu Yerusalemu mwoosi, lundi mwenya khukhurakho efwe kumusaango kwe lifwa liewe!”
29Petero ne Barumwa babaandi bakobosia bali, “Khukhwola khurie Wele khukhila babaandu. 30Wele owe ba raara befwe, alamusia Yesu niye mwera khulwe khu mubaamba khu musalaba. 31Oyuno niye Wele aniinia mwikulu mu bwikhalo bwe kumukhono kwewe kumuseecha abe Omwimeelesi lundi Omuonia, aelesie babaandu ba Isiraeli bubweyaangu bwe khukhwekanila nio babeelwe bubwoni bwabwe. 32Efwe khuli baloli khu biindu bino, akhaba Roho Omutakatifu yesi, oli siianwa sia Wele khwaabo bamuria.”
33Nga be kumuse ne baulila kano, bakhalala lukali, benya bali barumwa berwe. 34Ne mulala khu Bafarisayo owalaangwa bali Kamalieli, omwekisia owe Lilaka, niye baandu boosi baba baelesia liria, enyokha eema mu muse mala aana lilaka barumwa barusibwe enje. 35Nio aboolela kumuse ali, “Baisiraeli basiaase, lola bulayi niko mwenya khukhola babaandu bano. 36Mukhebulila omundu bali Teuta eecha ne elaanga khuba omundu omukali, babaandu embi chimia chine bamuloondakho. Teuta oyo nga eerwa, babeeka bewe boosi basalanila mala kumukaanda kwewe kufwa. 37Enyuma wa kano Yuda Omukalilaya eecha mu biise bie khubala babaandu, aombelesia babaandu bakali bamuloondakho, ne kakhali yesi erwa, mala babeeka bewe boosi basalanila. 38Bulayi bwene, muboolela ndi mukhakhalakila babaandu bano sisiindu siosi siosi tawe. Balekhe busa! Kaba bali niko barekekhe ne khukhola kali ko mundu busa aba kalawao, 39ne kaba ne kali ka Wele, semulabanyala tawe. Kane mukhole murio mube ne muyingana ne Wele!”
Kumuse kwaloonda niko Kamalieli akukelekela. 40Balaanga barumwa becha mukari, babaapa kimikhomwa ne khu bakaania balekhe khulomaloma mu lisina lia Yesu, mala babalekhuula. 41Nga barumwa ne barura mu muse, baba basangaafu, sikila Wele alola ali bolaanile khu khupisibwa siibi sikila lisina lia Yesu. 42Ne bachiililila khukhwekisia ne khukhwilwacha Elomo Endayi eya Yesu Kristo buli ndaalo mu lukaangu ne mu chingo che babaandu.
Currently Selected:
Bikh. 5: LUBUKUSU
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 2019
