Yn. 11

Lifwa lia Lasaro

1 # Lk. 10.38-39 Omundu owalaangwa bali Lasaro owamenyanga mu Betania aaba omulwale. Betania lwaba lukoba nilwo Maria no mukooko wabwe Marita bamenyanga. 2#Yn. 12.3 (Maria yuno niye owachukha kamafura kaunya bulayi, khu bikele bio Mwami mala akeeyela lichuune liewe; Lasaro owaba omulwale aba wandaaye.) 3Bakooko bewe baruma likhuwa khu Yesu bali, “Omwami omusaale wowo omukoosi ali omulwale.”

4Nga Yesu aulila, aloma ali, “Bulwaale buno se buleera Lasaro tawe; buliio khulwe khureera luyali khu Wele, mala elaba engila niyo Omwana owa Wele alanyoolelamo luyali.”

5Yesu aba asiima Marita no mukooko wewe ne Lasaro. 6Ne kakhaba kario nga anyoola likhuwa bali Lasaro ali omulwale, akona khabili niio aaba eyo. 7Nio aboolela babeeka bewe ali, “Khe khukobole e Buyuda.” 8Babeeka bewe chana bamukobosia bali, “Omwekisia nyinga eyo busa, babaandu be bweneyo benyile khu khupa ewe kamabaale, mala wenya khukobolayo?” 9Yesu abakobosia ali, “Enyanga se ebechangao chisa ekhumi na chibili buli ndaalo tawe ku? Khwako yesi yesi okeendela mu buwaanga bwe nyanga se etuya tawe, sikila abona buwaanga bwe sibala sino. 10Ne aaba nakeenda mu silo etuya, sikila se ali ne buwaanga tawe.” 11Yesu aloma kano, mala atasakho ali, “Omusaale wefwe Lasaro aakonile, ne ndacha mala musiisimusie.”

12Babeeka bamukobosia bali, “Omwami, aaba ne alikho akona kane aone.” 13Yesu aaba alikho alomaloma khuloondekhana ne lifwa lia Lasaro ne nibo bebaasia bali alomile ke khukona liilo lia busiele. 14Nio Yesu ababoolela abuwaanga ali, Lasaro afwiile. 15Ne ese nasangaalile sikila enywe, sikila se nabeleyo naye tawe, nio musuubile. Khe khuche niio ali. 16Tomasi (olaangwa Mukhwana) aboolela babeeka basie ali, “Fweesi khe khuche nio khufwe naye.”

Yesu ali lilamukha ne bulamu

17Nga Yesu ne ola, anyoola Lasaro amalile mu siliindwa chindaalo chine. 18Betania lwaba embi chi kilomita chitaru khukhwama Yerusalemu. 19Ne Bayaudi bakali baba bechile khubona Marita ne Maria khu baoleelesia sikila lifwa lia wandayaabwe.

20Nga Marita ne aulila bali Yesu alikho echa, arura enje khucha khumwakaanila, ne Maria naye arama munju. 21Marita aboolela Yesu ali, “Omwami, ewe obao andi wandaayase safwiile tawe! 22Ne manyile ndi akhaba luno siosi siosi nisio olasaba Wele alakhuelesia.”

23Yesu amuboolela ali, “Wandaayo alalamukha.”

24Marita akobosia ali, “Manyile ndi alilamukha khu ndaalo emaliilisi.”

25Yesu amuboolela ali, “Ese niise lilamukha ne bulamu. Yesi yesi osuubila mwise alamenya, akhaba nafwa; 26ne yesi yesi omenya mala asuubila mwise salifwa tawe. Ewe osuubila kano?”

27Marita amukobosia ali, “Yee Omwami, suubila ndi ewe oli Kristo, Omwana owa Wele, owarekekha khukhwicha mu sibala.”

Yesu alila

28Marita nga amala khuloma kano, akobolayo alaanga wandaaye Maria mu bwikisi mala amuboolela ali, “Omwekisia ali ano, mala alikho akhulaanga ewe.” 29Nga Maria naulila kano, enyokha khangu arura enje khumwakaanana. 30(Abeele Yesu akhoola mu sirekere tawe, aaba asiili abuundu niio Marita aba namwakaanane.) 31Babaandu baba munju ne Maria ne bamuoleelesia. Nga babona ne enyokha khangu narura enje bamuloondakho. Bebaasia bali alikho acha khulilila esiliindwa.

32Maria ola niio Yesu aaba, ne abwene ne abwene nga namubona, akwa mu bikele biewe. Aloma ali, “Omwami, obao andi wandaayase safwiile tawe!” 33Yesu amubona ne alikho alila, lundi abona babaandu ba baba naye ne balikho balila. Nio kumwoyo kwewe kwechula bubeeleli, mala anaanisibwa lukali po. 34Abareeba ali, “Mu musiikhile waena?”

Bamukobosia bali, “Omwami, khowiche obone.”

35Yesu aliila. 36Bayaudi baloma bali, “Bona nga beele ne amusiima lukali!” 37Ne balala khu nibo baloma bali, “Se akhola omubofu abona tawe ku? Andi sakhiingilile lifwa lia Lasaro?”

Lasaro alamusibwa

38Yesu anaanisibwa lundi lukali mala acha e siliindwa. Siliindwa esio siaba nga libina mala baba bekalileyo kubaale. 39Yesu arusia lilaka ali, “Rusiayo kubaale oku.”

Marita omukooko owo mundu ofwiile chana akobosia ali, “Omwami, bubolo bulaba bukali, abeele mu siliindwa chindaalo chine!” 40Yesu amuboolela ali, “Se khuboolele ndi waaba nosuubila kane obone luyali lwa Wele?” 41Barusiayo kubaale mala Yesu alola mu ngaaki aloma ali, “Paapa, khuupila ewe orio, sikila ewe undekeeresianga. 42Manyile ndi buli lwoosi ewe undekeeresianga, ne ndoma kano khulwe babaandu baali ano, nio basuubile bali ewe owanduma ese.” 43Enyuma we khuloma kano, alaanga ne kumumilo kwe angaaki ali, “Lasaro rura enje!” 44Lasaro arura enje, kamakhono kewe ne bikele biaba biaboelwe mu suuka che khu siikhilamo, ne mu moni mwewe baba bamuboyilemo esuuka ekiindi. Yesu ababoolela ali, “Khemumukangulule mala mumulekhe ache.”

Ekwangwaani eye khukhwira Yesu

(Mat. 26.1-5; Mk. 14.1-2; Lk. 22.1-2)

45Bayaudi bakali ba baba ne baloondile khu Maria babona niko Yesu akhola, mala bamusuubila. 46Ne kakhali balala khu nibo bakobola khu Bafarisayo, mala bababoolela niko Yesu aba nakholile. 47Nio Bafarisayo, ne basaayi bakhulu bekhala nende be kumuse mala baboolana bali, “Khulakhola siina? Lola kamayia kano koosi niko Omundu yuno alakholanga! 48Khwaaba ne khumulekha busa achiililile mu ngila yino, buli mundu alamusuubila mala Barumi balecha bonake Lukaangu lwefwe ne kholo yefwe!”

49Mulala khu nibo, olaangwa Kayafa, owaba Omusaayi Omukhulu Lukali owe Lukaangu kumwiiko mwenokwo aloma ali, “Enywe se mumanyilekho sisiindu siosi siosi tawe. 50Se mubona muli buli bulayi khwinywe khulekha omundu mulala afwe khulwe babaandu khukhila ekholo yoosi ebune?” 51Ng'ali se aboola kano omwene yeng'ene tawe, ne kakhali nga ne aba Omusaayi Omukhulu Lukali owe Lukaangu kumwiiko mwenokwo, aba alikho ang'oola ali Yesu alikho acha khufwa khulwe Bayaudi. 52Ne seli khulwe Bayaudi bong'ene tawe, ne kakhali lundi aaba alikho acha khufwa nio areere mu mubili mulala babaandu ba Wele boosi babasalaanila.

53Khukhwama khu ndaalo eyo Bayaudi be bunyali barakikha khuboolana nga ne banyala bamwiira. 54Khwako Yesu se akeenda abuwaanga mu Buyuda tawe, ne kakhali arekukha acha abuundu aandi siimbi ne asiangalaamwe, alukoba nilwo balaanga bali Efuraimu. Nio amenya ebweeneyo ne babeeka bewe.

55Siise sia Naikara eye Pasaka siaba siimbi ne babaandu bakali baama chimbeka chichiindi baacha mu Yerusalemu khukhola kimilukha kie khukhwekwalaasia, naikara ne khoola tawe. 56Baenjanga Yesu, mala nga ne bebuusia alala mu Lukaangu, bareebana bali, “Mwibaasia muli siina? Ng'ali salikho echa mu naikara yino tawe, namwe aleecha?” 57Basaayi bakhulu ne Bafarisayo baba baanile kamalaka bali Omundu yesi yesi omanyile niio Yesu ali, khukhwola abuule nio bamuambe.

Currently Selected:

Yn. 11: LUBUKUSU

Highlight

Copy