Yn. 12

Yesu abakhwa kamafura e Betania

(Mat. 26.6-13; Mk. 14.3-9)

1Chindaalo sita Epasaka ne khoola tawe Yesu acha e Betania mungo mwa Lasaro, omundu niye aba ne alamusie khukhwama mu lifwa. 2Bamung'oonelayo siakhulia sie khukhwikolooyia, mala Marita niye owara khu sialwa siakhulia esio. Lasaro aba mulala khwaabo babekhala asialwa ne Yesu. 3#Lk. 7.37-38 Nio Maria abukula kamafura kaunya bulayi enusu eye lita, ke bukusi bwe angaaki, kakang'oonwa khukhwama khu narito endayi, akachukha khu bikele bia Yesu, mala akeeya ne lichuune liewe. Kumuuya kumulayi kwe kamafura ako kwechula enju yoosi. 4Mulala khu beeka ba Yesu, Yuda Isikarioti, owaba ne alikho acha khumuchaama, aloma ali, 5“Siina sikila kamafura kano ne kakhakusibwe chirupia chimia chitaru che fwesa, mala bachielesie bataambi?” 6Se aloma kano sikila aba aasiima khuyeeta bataambi tawe, ne kakhali aba omwifwi. Asutaanga eoochwa eye chirupia mala buli lwoosi ebaangamo. 7Ne Yesu aloma ali, “Mulekhe abe, mukhamunaania tawe! Lekha akhole nisio alikho akhola khulwe endaalo eye lisiikhwa liase. 8#Likh. 15.11 Enywe muli ne bataambi buli lwosi, ne se mukhabe ne nase buli lwosi tawe.”

Ekwangwaani eye khukhwira Lasaro

9Babaandu balala baulila bali Yesu aba e Betania, nio bachayo, se khuli khubona Yesu yeng'ene tawe ne kakhali bacha khubona akhaba Lasaro yesi, niye Yesu aba ne alamusie khukhwama mu lifwa. 10Nio basaayi bakhulu baboolana khukhwerekekha khukhwira Lasaro yesi. 11Sikila khulwe kamayia ke khumulamusia niye, baloba basaayi mala basuubila mu Yesu.

Khukhwingila mu Yerusalemu ne bikalakala ne lutiri

(Mat. 21.1-11; Mk. 11.1-11; Lk. 19.28-40)

12Endaalo eloondakho babaandu bakali ba baba ne bechile mu Naikara eye Pasaka baulila bali Yesu alikho echa mu Yerusalemu. 13#Chiny. 118.25-26 Nio babukula chisakia che kamakheendu mala barura khucha khumwakaanila ne baapa luyoka lwe khoyo ne baloma bali, “Hosana! Ali ne chikhabi oyo owichila mwisina lio Mwami! Omwami owa Isiraeli!”

14Yesu anyoola epunda akiikhalakho nga liiandiko liboolanga lili,

15 # Sak. 9.9 “Lukoba lwa Sayuni okharia tawe!

Bona Omwami wowo alikho echa ekhaale khu punda eng'ana.”

16Mu siise esio babeeka bewe se bamanyilisia kano tawe; ne nga Yesu ne alamusibwa ne luyali bakhebulila bali kano kaandikwa khu niye mala kakholebwe busa kario. 17Babaandu ba baba ne Yesu nga alaanga Lasaro khurura mu siliindwa, ne khumulamusia khukhwama mu lifwa baba baboolile kakaaba ne kekholekhe. 18Kano niko kakakila babaandu bakali ne bamwakaanila, sikila baba bauliile bali akholile kamayia kano. 19Nono Bafarisayo baboolana bali, “Bona se khulikho khukholakho sisiindu tawe! Lola babaandu sibala sioosi bamuloondilekho!”

Bakiriki baenja Yesu

20Bakiriki balala baba mwabo ba baba ne bachile Yerusalemu khusaaya mu ndaalo cha naikara. 21Bacha khu Filipo (aba owe Betesaita mu Kalilaya) mala baboola bali, “Omwami khwenya khubona Yesu.”

22Filipo acha aboolela Andereya, boombi bacha mala baboolela Yesu. 23Yesu abakobosia ali, “Esaa yolile niyo Omwana wo Mundu anyoolela luyali. 24Ndikho muboolela bung'ali ndi: lumiicho lwe ngano ne lukhakwile mu liloba mala lwafwa, lurama busa lwong'ene, ne lwaba ne lufwa lwaama engaanu engali. 25#Mat. 10.39; 16.25; Mk. 8.35; Lk. 9.24; 17.33 Yesi yesi osiima bulamu bwewe alabutibia, ne yesi yesi obiila bulamu bwewe mu sibala sino alaba nabwo khulwe bulamu bwa mindali. 26Yesi yesi owenya khu khuukholela ese kimilimo khukhwola anonde, nio omukholi wase abe nase niio ndi. Yesi yesi oukholelanga kimilimo, Paapa wase amuelesianga liria.

Yesu alomaloma ke lifwa liewe

27“Kumwoyo kwase luno kulikho kunaanisibwa, nono mboole siina? Mboole ndi, ‘Paapa okhalekha esaa yino yanjichakho tawe?’ Ne mala, ako niko kakakila necha. Necha nio noole khubira mu saa yino. 28Paapa reera luyali khu lisina liowo!” Mala kumumilo kwauliilikha khukhwama mwikulu, ne kuboola kuli, “Nalieleesie luyali lundi ndakhola ndio.” 29Babaandu bakali ba baba ne bemileo baulila kumumilo okwo. Balala baloma bali likukuma lie fula, babaandi nabo bali, “Malaika ama khulomaloma naye!” 30Ne Yesu ababoolela ali, “Kumumilo kuno se kulomaloome sikila ese tawe, ne kakhali sikila enywe. 31Luno sili siise sie sibala sino khu khalakilwa, luno omwami owe sibala sino alarusibwa khu bwami. 32Ne nga ese nesutibwa angaaki khukhwama khu sibala ndakhola buli mulala anjichekho.” 33(Mukhuloma kano aba ekesia lukano lwe lifwa nilio acha khufwa.)

34 # Chiny. 110.4; Isa. 9.7; Esek. 37.25; Dan. 7.14 Babaandu bamukobosia bali, “Lilaka liefwe likhuboolela efwe lili Kristo alimenya mindali na mindali: Nono ewe onyala khuboola oriena oli khukhwola Omwana wo Mundu asutwe angaaki? Omwana wo Mundu yuno niye naanu?”

35Yesu abakobosia ali, “Buwaanga busiilikho nanywe khulwe siise sitiiti. Chiililila mu lukeendo lwenywe ne musiili ne buwaanga nio sisiilima sikhamufuunikha tawe, sikila oyo okeenda mu siilima se amanya niio alikho acha tawe. 36Nono suubila mu buwaanga ne musiili nabwo, nio mube babaandu be buwaanga.”

Babaandu khutaamba lisuubila

Enyuma Yesu naboolile kano arekukha acha ekisa khukhwama khu baandu chana. 37Akhaba ne aba nakholile kamayia kano koosi mu moni chabwe se bamusuubila tawe, 38#Isa. 53.1 nio nilio Omung'oosi Isaya aboola liole khuba ng'ali:

“Omwami naanu owasuubila burume nibwo efwe khwaboola?

Omwami ekesia naanu bunyali bwewe?”

39Nio se benya khusuubila tawe, sikila akhaba lundi Isaya aloma ali,

40 # Isa. 6.10 “Wele ababofuusie chimoni,

abaminyasiisie kamebaasio kabwe,

nio chimoni chabwe chikhabona tawe,

lundi kamebaasio kabwe kakhamanyilisia tawe,

mala Wele aloma ali,

‘Se balangobolela mbaonie tawe.’ ”

41Isaya aloma kano sikila abona luyali lwa Yesu mala alomaloma khu kewe.

42Kakhaba kario, Bayaudi bakali be bunyali basuubila mu Yesu, ne Bafarisayo bakila se bakalomalomakho abuwaanga tawe, nio bakhabatimania mu sinakooki tawe. 43Basiima khufukiililwa ne babaandu khukhila khufukiililwa ne Wele.

Likhalaka lie kamakhuwa ka Yesu

44Yesu aloma mu mumilo kwe angaaki ali, “Yesi yesi osuubila mwise sasuubila mwise seng'ene tawe, ne kakhali aba asuubila akhaba mu wanduma yesi. 45Yesi yesi oumbona ese abona akhaba oyo owanduma yesi. 46Nechile mu sibala nga buwaanga, nio buli mundu osuubila mwise akharama mu siilima tawe. 47Aaba bali omundu yesi yesi aulila burume bwase mala saburia tawe, se ndimukhalakila tawe, se necha khukhalakila sibala tawe, ne kakhali necha khusiionia. 48Abo boosi babandoba ese ne khulekha khufukiilila burume bwase bali no mundu olibakhalakila. Kamakhuwa niko muboolele niko kaliba bukhalaki khu ndaalo emaliilisi! 49Kano kali ng'ali sikila ese se nalomaloome khu bunyali bwase samwene tawe, ne kakhali Paapa wanduma niye owandaka nisio khoyela ndome. 50Mala manyile ndi Lilaka liewe lireeranga bulamu bwa mindali. Niko ndoma nono kali niko Paapa ambooleele khuloma.”

Currently Selected:

Yn. 12: LUBUKUSU

Highlight

Copy