JENESIS 30

1Bad ka Rakhel haba ka la ïohi ba kam kha khun ïa u Jakob, ka la bishni ïa la ka hynmen; ka la ong ruh ha u Jakob, “To ai khun ïa nga, ba ïoh ngan ïap noh.” 2Te u Jakob u la khih bitar lep pyrshah ïa ka Rakhel bad u la kylli, “Nga shong ha ka jaka U Blei mo, uba la khang noh na pha ïa u soh ka kpoh?” 3Ka te ka la ong, “Ha khmih ka Bilhah ka shakri jong nga, to khie leit bsut sha ka; ba kan ïoh kha ma ka halor ki khohsiew jong nga, bad ïa nga ruh yn sa kha khun na ka.” 4Kumta, ka la ai ïa ka Bilhah ka shakri jong ka ha u kum ka tnga; te u Jakob u la leit bsut sha ka. 5Bad ka Bilhah ka la punkhun, bad ka la kha u khun ïa u Jakob. 6Bad ka Rakhel ka la ong, “U Blei u la bishar ïa nga, bad u la ïohsngew ruh ïa ka ktien jong nga, bad u la ai ha nga ïa u khun:” namar kata, ka la khot kyrteng “u Dan” ïa u. 7Bad ka Bilhah ka shakri jong ka Rakhel ka la punkhun biang pat, bad ka la kha sa uwei pat u khun ïa u Jakob. 8Bad ka Rakhel ka la ong, “Da ki jingïaleh jong U Blei keiñ nga la ïaleh bad ka hynmen jong nga, bad nga la lah ruh:” te ka la khot kyrteng “u Naphtali” ïa u.

9Te ka Leah, ynda ka la ïohi ba ka la lah wai noh ban kha, ka la shim ïa ka Silpah ka shakri jong ka bad ka la ai ïa ka ha u Jakob kum ka tnga. 10Bad ka Silpah ka shakri jong ka Leah ka la kha u khun ïa u Jakob. 11Te ka Leah ka la ong, “Ka kynhun kan sa wan:” kumta, ka la khot kyrteng “u Gad” ïa u. 12Bad ka Silpah ka shakri jong ka Leah ka la kha ïa uwei pat u khun ïa u Jakob. 13Bad ka Leah ka la ong, “Kaba suk long ma nga naba ki kynthei kin ïakhot kaba suk ïa nga:” te ka la khot kyrteng “u Asher” ïa u.

14Bad u Reuben u la leit ha ki sngi ka aïom ot Kew, bad u la shem ïa ki kynja soh Mandrakore, bad u la wallam ïa ki sha ka Leah ka kmie jong u. Te ka Rakhel ka la ong ha ka Leah, “To ai ha nga, nga kyrpad ïa pha, na ki soh Mandrakore u khun jong pha.” 15Te ka Leah ka la kylli ha ka Rakhel, “Hato ka long kaba sting ba pha la knieh noh ïa u tnga jong nga? bad phan mon knieh noh ruh ïa ki soh Mandrakore u khun jong nga?” Bad ka Rakhel ka la ïathuh, “To ai namar kata ba u Jakob un ïoh thiah bad pha ha kane ka miet na ka bynta ki soh Mandrakore u khun jong pha.” 16Te haba u Jakob u la wan noh na ka lyngkha la janmiet, ka Leah ka la leit shaw ïa u, bad ka la ong, “To men wan bsut sha nga mynta; naba shisha keiñ nga la shim wai ïa me da ki soh Mandrakore u khun jong nga.” Kumta, u la ïoh thiah bad ka ha kata ka miet. 17Bad U Blei u la shahshkor ïa ka Leah, bad ka la punkhun, bad ka la kha ïa u khun u basan ïa u Jakob. 18Bad ka Leah ka la ong, “U Blei u la ai ha nga ïa ka bainong jong nga, namar ba nga la ai ïa la ka shakri ha u tnga jong nga:” kumta te, ka la khot kyrteng “u Issakhar” ïa u. 19Bad ka Leah ka la punkhun biang pat, bad ka la kha ïa u khun u bahynriew ïa u Jakob. 20Te ka Leah ka la ong, “U Blei u la ai ha nga ïa ka jingai ka babha; mynta u tnga jong nga un da shongneh bad nga, naba nga la kha hynriew ngut ki khun shynrang ïa u.” Te ka la khot kyrteng “u Sabulon” ïa u. 21Bad hadien kata, ka la kha ïa ka khun, bad ka la khot kyrteng “ka Dinah” ïa ka. 22Te U Blei u la kynmaw ïa ka Rakhel ruh, bad U Blei u la shahshkor ïa ka bad u la plie ïa ka kpoh jong ka. 23Bad ka la punkhun, bad ka la kha ïa u khun; te ka la ong, “U Blei u la law noh ïa ka jinglongbeiñ jong nga:” 24bad ka la khot kyrteng “u Joseph” ïa u; namar ka la ong, “U Trai un ai shuh ha nga sa uwei pat u khun.”

Ka buit u Jakob

25Ka la jia ruh, ynda ka Rakhel ka la kha ïa u Joseph, ba u Jakob u la ong ha u Laban, “To phah noh ïa nga, khnang ba ngan ïoh leit sha la ka jaka, bad sha la ka ri. 26To ai noh ha nga ïa ki tnga jong nga bad ïa ki khun jong nga, kiba nga la shakri ïa me na ka bynta jong ki, bad to pyllait noh ïa nga: naba me tip hi ïa ka jingshakri jong nga ïa kaba nga la shakri ïa me.” 27Te u Laban u la ong ha u, “Nga kyrpad ïa me, lada nga la shem ïa ka jingsbun ha khmat jong me, to wat leit noh: namar nga la shem ba U Trai u la kyrkhu ïa nga na ka bynta jong me.” 28Bad u la ong ruh, “To buh biang ha nga ïa ka bainong jong me, nga te ngan ai ïa ka ha me.” 29U te u la ong ha u Laban, “Me tip hi kumno nga la shakri ïa me, bad kumno ki jingri jong me ki la long bad nga. 30Namar ka la long khyndiat kaba me don mynshuwa ba la poi ma nga, hynrei, mynta, ka la nang roi sha kaba bun byrhien eh; bad U Trai u la kyrkhu ïa me ha ki sla'jat jong nga: te mynta hato lano ngan ïoh kamai ïa la ka ïing hi?” 31Bad u Laban u la ong, “Ngan ai aïu ha me?” Bad u Jakob u la ïathuh, “Men ym ai ei ei ruh ha nga: hynrei, lada men leh ïa kane ïa nga, ngan da sumar bad ngan ri biang pat ïa ki kynhun langbrot jong me. 32Ngan ïaid lyngba ïa ki kynhun langbrot jong me mynta ka sngi, bad ngan pynkhlad noh nangta ïa ki bathoh bria bad ïa ki bathoh bruiñ baroh na ki langbrot, bad ïa kita kiba lam saw baroh napdeng ki khun langbrot, bad ïa ki bathoh bria bad ïa ki bathoh bruiñ napdeng ki blang: te na kum kita hi kan long keiñ ka bainong jong nga. 33Kumta, ka hok jong nga kan ïoh kheiñ na ka bynta jong nga ha kaba lashai lashisngi, haba kan sa wan wad ïa ka bainong ha khmat jong me: bad baroh kat ki bymlong bathoh bria bad bathoh bruiñ hapdeng ki blang, bad ki bym lam saw hapdeng ki langbrot, kata kan long ba ñiew kum kaba la tuh bad nga.” 34Bad u Laban u la ong, “Ha khmih, to ai ba kan long kat kum ka ktien jong me.” 35Bad ha kata ka sngi, u la pynkyrpang noh ïa ki bathoh shuid bad ïa ki bathoh pan na ki blang shynrang, bad ïa ki bathoh bruiñ bad ïa ki bathoh bria baroh na ki blang kynthei, bad baroh kat kiba don khyndiat ka balieh ha ki, bad ïa kiba lam saw baroh hapdeng ki langbrot ruh de, bad u la aiti ïa ki ban ap ha ki khun shynrang jong u. 36Bad u la buh lai sngi lynti hapdeng ki jong ki bad ki jong u Jakob: bad u Jakob u la bsa ïa kiba dang sah na ki kynhun jong u Laban.

37Ynda kumta, u Jakob u la shim ïa ki tnat im u dieng Libneh, bad ïa ki jong u dieng soh Khyllam bad ïa ki jong u dieng soh Ot; bad u la khoh ïa ki thoh syngkha balieh ha ki, da kaba pynpaw ïa ka met lieh ka jong kita ki tnat. 38Bad u la buh ïa kita ki tnat dieng ïa kiba u la khoh ha khmat kita ki kynhun, ha ki nur ha ki jingseng um, ha kaba kita ki kynhun ki ïawan dih um, ba kin ïoh ïashit seng khun haba ki ïawan ban dih um. 39Bad kita ki kynhun ki la ïashit seng khun ha khmat kita ki tnat dieng, te ki kynhun ki la kha khun da ki bathoh shuid thoh pan, bad da ki bathoh bruiñ bad ki bathoh bria. 40Bad u Jakob u la pynkhlad noh ïa ki khun langbrot, bad u la pynphai ïa ki khmat ki kynhun u Laban shaphang kita ki bathoh syngkha, bad sha kita kiba lam saw baroh ha ki kynhun u Laban; te ïa la ki jong ki kynhun u la buh kyrpang hi bad um shym la buh ïa ki ryngkat bad ki kynhun u Laban. 41Ka la jia ruh, kat haba kita ki jingri kiba kham khlaiñ ki ïashit seng khun, ba u Jakob u la nang buh nang buh ïa kita ki tnat dieng ha khmat kita ki kynhun ha ki nur ki jingseng um, ba kin ïoh seng khun ha khmat kita ki tnat dieng. 42Hynrei, haba ki langbrot ki long kiba tlot, um ju buh keiñ: kumta, kita kiba kham tlot ki la long ki jong u Laban, bad kita kiba kham khlaiñ ki jong u Jakob. 43Kumta, uta u briew u la roi shikatdei eh, bad u la don shibun ki jingri, bad ki shakri kynthei, bad ki shakri shynrang, bad ki ut, bad ki kadda ruh de.

Currently Selected:

JENESIS 30: KHB

Highlight

Copy