JENESIS 31

U Jakob u phet noh jar jar na u Laban

1Bad u Jakob u la ïohsngew ïa ki ktien ki khun shynrang u Laban ba ki ïa-ong, “U Jakob u la shim noh baroh kat kaba la dei ka jong u kpa jong ngi; bad ïa kane ka burom baroh u la ïoh da kata kaba la dei ïa u kpa jong ngi.” 2Bad u Jakob putet u la ïohi ïa ka khmat u Laban, bad ha khmih, kam shym long sha u kum mynshuwa. 3Bad U Trai u la ong ha u Jakob, “To leit phai noh sha ka ri ki kpa jong me, bad sha la ki kur; ma nga ruh ngan long ryngkat bad me.” 4U Jakob te u la phah khot ïa ka Rakhel bad ïa ka Leah sha lyngkha sha ki kynhun jong u, 5bad u la ong ha ki, “Nga ïohi ïa ka khmat u kpa jong phi ba kam long sha nga kum mynshuwa; hynrei, U Blei u kpa jong nga u la don lem bad nga. 6Phi ruh phi tip ba nga la shakri ïa u kpa jong phi katba shong ka bor ha nga. 7Bad u kpa jong phi u la shukor ïa nga, bad u la pynkylla ïa ka bainong jong nga la shiphew sien; la kumta ruh, U Blei um shym la shah ïa u ban pynsniew ïa nga. 8Lada u la ong kumne, ‘Ki kynja ki bathoh bria kin long ka bainong jong me;’ te kumta, kita ki kynhun baroh ki la kha da ki bathoh bria: bad lada u la ong pat kumne, ‘Ki kynja ki bathoh syngkha kin long ka bainong jong me;’ kumta te, kita ki kynhun baroh ki la kha da ki bathoh syngkha. 9Kumta, U Blei u la shim noh ïa ki jingri u kpa jong phi, bad u la ai ïa ki ha nga. 10Ka la jia ruh hamar ba ki ïashit seng khun kita ki kynhun langbrot, ba nga la khmied ïa la ki khmat, bad nga la ïohi ha ka jingphohsniew, bad ha khmih, ki langbrot shynrang kiba la beh pakor ïa ki langbrot ki la long ki bathoh syngkha, ki bathoh bruiñ bad ki bathoh bria. 11Bad u angel U Blei u la ong ha nga ha ka jingphohsniew, ‘Ko Jakob,’ nga te nga la ong, ‘Ha khmih ma nga.’ 12U te u la ong, ‘To khmied mynta ïa la ki khmat, to khmih ruh, ki langbrot shynrang baroh kiba beh pakor ïa ki langbrot ki long ki bathoh syngkha, ki bathoh bruiñ, bad ki bathoh bria: naba nga la ïohi baroh kat kaba u Laban u la leh ïa me. 13#Jen. 28:18-22.Ma nga, nga long U Blei jong ka Bethel ha kaba me la pynsleh ïa uta u mawbynna, mynba me la kular skhem ha nga hangta ïa ka jingkular baskhem: to khie te mynta, to da leit noh na kane ka ri bad to leit phai pat sha ka ri ki kur jong me hi.’ ” 14Bad ka Rakhel bad ka Leah ki la ïathuh bad ki da ong ha u, “Ka dang sah ka bynta lane ka jingïoh pateng ei ei ruh mo ïa ngi ha ïing u kpa jong ngi? 15Hato um shym la ñiew ïa ngi kum ki nongwei mo? Naba u la die noh ïa ngi bad ïa ka dor jong ngi u la bam duh khoit hi keiñ. 16Namar kata, ka spah baroh ïa kaba U Blei u la shim noh na u kpa jong ngi, kata ka long ka jong ngi, bad ka jong ki khun jong ngi: te mynta, ïa kaei kaei ruh baroh katba U Blei u la ong ha me to da leh keiñ.”

17Ynda kumta, u Jakob u la khie joit, bad u la pynshong ïa la ki khun shynrang bad ïa la ki tnga halor ki ut; 18bad u la shim noh ïa la ki jingri baroh, bad ïa la ka spah baroh ïa kaba u la ïoh ïalum, ïa ki jingri keiñ ba u la ïoh hi, ïa kiba u la lah kamai hi ha Padan-Aram ïa ka ban leit noh sha u Isaak u kpa jong u sha ka ri Kanaan. 19Bad u Laban u la leit ban khap shñiuh ïa la ki langbrot: bad ka Rakhel ka la tuh ïa ki durblei ki jong u kpa jong ka. 20Bad u Jakob u la phet noh jar jar khlem da tip u Laban u kynja Syria, naba um shym la ïathuh ha u ba un sa phet noh. 21Kumta, u la phet noh bad baroh katba u don; bad u la mih noh joit, bad u la leit sha shiliang kata ka wah, bad u la thew beit ïa la ka khmat shaphang u lum Gilead.

U Laban u beh nadien jong u Jakob

22Te ki la ïathuh ha u Laban ha ka balai sngi ba u Jakob u la lah phet noh. 23U ruh u la shim ïa la ki para lem bad u bad u la beh nadien jong u haduh hynñiew sngi lynti bad u la lap ïa u ha u lum Gilead. 24Bad U Blei u la wan ha u Laban u kynja Syria mynmiet ha ka jingphohsniew, bad u la ong ha u, “To sumar ba men ym kren ei ei ruh ha u Jakob ka babha ne ka basniew.”

25Ynda kumta, u Laban u la lap ïa u Jakob. Bad u Jakob u la lah pynïeng ïa la ka ïingtrep ha uta u lum: bad u Laban u la pynïeng ruh ïa la ka jong bad ki para jong u ha u lum Gilead. 26Bad u Laban u la kren ha u Jakob, “Hato me la leh aïu, haba kumne ba me la phet noh buhrieh na nga, bad me la ïalam noh ïa ki khun kynthei jong nga kumba ïa ki mraw da ka waitlam? 27Na ka balei ba me la phet noh ha kaba rieh bad ba me la phet noh kumba leh tuh na nga; bad ba mem shym la ïathuh ha nga, ba ngan da ïoh leit on keiñ ïa me da kaba leh kmen, bad da ki jingrwai, bad da kaba tem jingtem, bad ka kanjari, bad da ka duitara? 28Bad ba mem shym la ai ba ngan ïoh ïadoh ïa la ki khun shynrang bad kynthei? Mynta te, me la leh bieit da kaba leh kumne. 29Ka long ha ka kti jong nga ban pynsniew ïa phi: hynrei, U Blei u kpa jong phi u la kren ha nga mynhynne mynmiet, u da ong, ‘To sumar ïa lade ba men ym kren ei ei ruh ha u Jakob ka babha ne ka basniew.’ 30Mynta shisha la me la donkam ban leit wan noh naba me kynmaw eh hir hir ïa ka ïing u kpa jong me, hato balei ba me la tuh ïa ki blei jong nga?” 31Te u Jakob u la ïathuh bad u la ong ha u Laban, “Nga la phet rieh namar ba nga la sheptieng: naba nga la ong, ‘Ba ïoh men da knieh noh na nga ïa ki khun kynthei jong me.’ 32Jar ha uba men shem ïa ki blei jong me, to ai un ïap noh keiñ: ha khmat ki para shynrang jong ngi, to men khmih thuh ïa kaei na kaba dei ka jong me ka don bad nga bad to shim sha me.” Naba u Jakob um shym tip ba ka Rakhel ka la lah tuh ïa ki.

33Te u Laban u la leit bsut shapoh ka ïingtrep u Jakob, bad sha ka ïingtrep ka Leah, bad sha ki ïingtrep ki jong ki shakri kynthei baroh ar ngut; hynrei, um shem shuh ïa ki. Ynda kumta, u la wan noh na ka ïingtrep jong ka Leah bad u la leit bsut sha ka ïingtrep jong ka Rakhel. 34Bad ka Rakhel ka la lah shim ïa kita ki bleithaw, bad ka la lah thep ruh ïa ki ha ka jin ka ut, bad ka la shong halor jong ki ruh. Bad u Laban u la wad ïa kata ka ïingtrep baroh kawei, hynrei, um shem. 35Bad ka la ong ha la u kpa, “U kynrad jong nga un ym sngewsih ba ngam sngewlah khih ha khmat jong me; naba ka la jia ha nga mynta ka rukom ki kynthei.” Kumta, u la twad, hynrei, um shym la shem keiñ ïa kita ki bleithaw.

36Te u Jakob u la sngewbitar, bad u la kren pynrem ïa u Laban: bad u Jakob u da ïathuh u la ong ha u Laban, “Hato kaei ka jingryngkang jong nga? Bad kaei ka pop jong nga ba me la wan beh shit eh katta nadien jong nga? 37Haba me la khyllie ïa ki jingbuh jingsat jong nga baroh, hato me la shem aïu na ki jingbuh jingsat baroh ka ïing jong me? to buh ïa kata hangne ha khmat ki hynmen hynbew jong nga bad ki jong me, ba kin ïoh bishar hapdeng jong ngi baroh ar ngut. 38La arphew snem mynta ba nga la shong bad me, ki langbrot kmie jong me bad ki blang kynthei jong me kim shym la liat khun, bad ïa ki 'lang shynrang na ka kynhun langbrot jong me ngam shym la bam keiñ. 39Ïa kata kaba la tar da ki mrad khlaw ngam shym la wallam ha me: nga hi nga la pynburia ïa ka; na ka kti jong nga me la pan ïa kata, la kaba la tuh mynsngi, lane kaba la tuh mynmiet. 40Kumne ka la jia ïa nga; mynsngi ka jingshit ryngkhiang ka la bam duh ïa nga, bad u thah mynmiet; te ka jingïohthiah jong nga ka la kynriah noh na ki khmat jong nga. 41Kumne keiñ, nga la don arphew snem ha ka ïing jong me; nga la shakri ïa me haduh khatsaw snem na ka bynta ki khun kynthei jong me ar ngut, bad hynriew snem na ka bynta ki jingri jong me: bad ïa ka bainong jong nga me la pynkylla jin shiphew sien. 42Lymda U Blei jong u kpa jong nga, uba U Blei jong u Abraham bad uba ka jingsheptieng burom jong u Isaak u la don lem bad nga, shisha men da la lah phah noh suda ïa nga mynta. Ïa ka jingkhuslai jong nga bad ïa ka jingleh minot ki kti jong nga U Blei u la ïohi, te u la sneng pynrem ïa me mynhynne mynmiet.”

Ka jingïateh kular hapdeng u Jakob bad u Laban

43Bad u Laban u la ïathuh ha u Jakob, u la ong, “Kine ki khun kynthei ki long ki khun kynthei jong nga, bad kine ki khynnah ki long ki khynnah jong nga, bad kine ki jingri ki long ki jingri jong nga, bad ïa kiei kiei baroh katba me ïohi ki long ki jong nga keiñ: bad nga lah ban leh aïu mynta ka sngi ïa kine ki khun kynthei jong nga, lane ïa ki khun jong ki, ïa kiba ki la kha? 44Te ale mynta, to ngin ïathaw ïa ka jutang, ma nga bad ma me; bad to ai ba kan long ka sakhi hapdeng jong nga bad jong me.” 45Te u Jakob u la shim ïa u maw, bad u la pynïeng mawbynna ïa u. 46U Jakob u la ong ruh ha ki para shynrang jong u, “To ïalum ïa ki maw;” bad ki la ïashim ïa ki maw, bad ki da ïa-pynlong ka kynton ïa ki: bad ki la ïabam hangta de halor kata ka kynton. 47Bad u Laban u la khot kyrteng ïa ka, “ka Jegar-sahadutha”: hynrei, u Jakob u la khot “ka Galeed” ïa ka. 48Bad u Laban u la ong, “Kane ka kynton ka long ka jingsakhi hapdeng jong nga bad me ha kane ka sngi.” Namar kata, la khot “ka Galeed” ïa ka; 49bad “Mispah” ruh; naba u la ong, “U Trai un da khmih thuh hapdeng jong nga bad jong me, haba ngim ïadon shuh markhmat paralok hi. 50Lada men pynshitom ïa ki khun kynthei jong nga, lane lada men shim da kiwei pat ki tnga nalor ki khun kynthei jong nga, ym don mano mano ruh bad ngi ban long sakhi ïa kata; to khmih, U Blei u long u sakhi hapdeng jong nga bad jong me.”

51U Laban u la ong ruh ha u Jakob, “Ha khmih ïa kane ka kynton, bad ha khmih ïa une u mawbynna ïa kiba nga la pynïeng hapdeng jong nga bad jong me. 52Kan long ka sakhi kane ka kynton, bad un long u sakhi une u mawbynna ruh de, ba ma nga ngan ym ïaid palat ïa kane ka kynton maw sha me, bad ba ma me ruh men ym ïaid palat ïa kane ka kynton maw bad ïa une u mawbynna sha nga, ïa ka ban pynsniew keiñ. 53U Blei jong u Abraham bad U Blei jong u Nahor, U Blei jong u kpa jong ki, un bishar hapdeng jong ngi.” Bad u Jakob u la smai da ka jingsheptieng burom jong u Isaak u kpa jong u. 54Ynda kumta, u Jakob u la pynïap doh halor uta u lum, bad u la khot ïa la ki para shynrang ïa ka ban ïabam ïa kata ka jingbam: bad kumta ki la ïabam bad ki la ïasah baroh shi miet ha uta u lum.

55Bad u Laban u la khie dang step eh, bad u la doh ïa la ki khun shynrang, bad ïa la ki khun kynthei, bad u la kyrkhu ïa ki: kumta, u Laban u la leit wan noh, bad u la leit phai pat sha la ka jaka.

Currently Selected:

JENESIS 31: KHB

Highlight

Copy