JENESIS 32

U Jakob u pynkhreh ban ïashem ïa u Iso

1Bad u Jakob u la nang ïaid noh ha la ka lynti, bad ki angel U Blei ki la ïashem bad u. 2Bad u Jakob u la ong ynda u la ïohi ïa ki, “Kane ka long ka kynhun bah U Blei:” bad u la khot kyrteng “ka Mahanaim” ïa kata ka jaka.

3Bad u Jakob u la lah phah ïa ki nonglam khubor ha shuwa jong u ha u Iso u hynmen jong u sha ka ri Seir, ka khyndew jong u Edom. 4Bad u la hukum ïa ki, u da ong, “Kumne phin ong ha u Iso u kynrad jong nga: ‘Kumne u ong u Jakob u shakri u jong me, bad u Laban nga la shong nongwei noh, bad nga la sah haduh mynta: 5bad nga don ki masi, bad ki kadda, bad ki kynhun langbrot, bad ki blang, bad ki shakri shynrang, bad ki shakri kynthei de: bad nga la phah ïathuh ha la u kynrad khnang ïa ka ban shem ka jingsngewbha ha khmat jong me.’ ”

6Bad kita ki nonglam khubor ki la ïawan phai pat sha u Jakob, ki da ong, “Ngi la leit ha u Iso u hynmen jong me bad u wan ban tan ruh ïa me, bad sawspah ki rangbah lem bad u.” 7Ynda kumta, u Jakob u la sheptieng shikatdei eh bad u la sngewjynjar: bad u la pynbynta ïa kita ki briew kiba la don lem bad u, bad ïa ki kynhun langbrot, bad ïa ki masi, bad ïa ki ut, ha ki ar kynhun; 8bad u la ong, “Lada u Iso un wan ïakynduh ïa kawei ka kynhun, bad u da shoh ïa ka, te kata kawei pat ka kynhun kan ïohlait im.”

9Bad u Jakob u la ong, “A Blei u Abraham u kpa jong nga, bad U Blei u Isaak u kpa jong nga, U Trai uba la ong ha nga, ‘To leit phai pat sha la ka ri, bad sha la ki kur, bad ngan leh bha ïa me;’ 10ngam shym don ka jingdawa ïa iba khyndiat tam eh ruh na kita ki jingleh isynei jong me baroh, lymne na kata ka jingleh shisha baroh ba me la leh ha la u shakri; naba tang bad la u diengduh nga la wan sha shiliang kane ka Jordan; bad mynta nga la wan long ar kynhun. 11To pyllait im ïa nga mynta, nga kyrpad ïa me, na ka kti u hynmen jong nga, na ka kti u Iso: naba nga sheptieng ïa u, ba ïoh un wan bad shoh ïap ïa nga, ïa ka kmie ruh lem bad ki khun. 12#Jen. 22:17.Hynrei, me la ong, ‘Shisha ngan leh bha ïa me, bad ngan pynlong ïa u symbai jong me kum u shyiap ka duriaw, ïa uba ym lah ñiew shuh na ka jingbun bah jong u.’ ”

13Bad hangta u la sah ha kata ka miet; bad u la shim na kata kaba la don ha ka kti jong u ïa ka ban ai ka jingai ha u Iso u hynmen jong u; 14ïa ki blang kynthei, arspah, bad ïa ki blang shynrang, arphew, ïa ki langbrot kmie, arspah, bad ïa ki langbrot shynrang, arphew, 15ïa ki ut ba ai buiñ bad ki khun, laiphew, ïa ki masi kynthei, sawphew, bad ïa ki masi kyrtong, shiphew, ïa ki kadda kynthei, arphew, bad ki khun, shiphew. 16Bad u la aiti ïa ki ha ka kti ki shakri jong u, ha la ka shi kynhun shi kynhun kyrpang kyrpang; bad u la ong ha la ki shakri, “To ïaid sha shiliang ha shuwa jong nga, bad to buh katto katne ka jingjngai hapdeng ki kynhun kawei pa kawei.” 17Bad u la hukum ïa uba ha shuwa eh, u da ong, “Haba u Iso u hynmen jong nga u ïashem bad me, bad haba u da kylli ïa me, da kaba ong, ‘Me dei u jongno? Bad shaei men leit? Bad ki jongno kine kiba ha shuwa jong me?’ 18Ynda kumta, men sa ïathuh, ‘Ki long ki jong u Jakob u shakri jong me; kane ka long ka jingai burom ba la phah ha u Iso u kynrad jong nga: bad ha khmih, u ruh u don hadien jong ngi.’ ” 19Kumjuh ruh u la bthah ïa u ba-ar bad ïa u balai bad ïa kita baroh kiba la bud ïa kita ki kynhun, u da ong, “Kum ha kane ka rukom keiñ, phin kren ha u Iso, haba phi ïashem bad u. 20Phin ong ruh putet, ‘Ha khmih, u Jakob u shakri jong me u don hadien jong ngi.’ ” Naba u la ong, “Ngan pynïasuk ïa u da kata ka jingai burom kaba leit sha shuwa jong nga; bad hadien kata, ngan da khmih ïa ka khmat jong u; lehse u ruh un pdiang sngewbha ïa ka khmat jong nga.” 21Kumta, kata ka jingai burom u Jakob ka la leit sha shiliang ha shuwa jong u: ma u hi te u la sah ha kata ka miet ha la ka jingïalang briew la ka jong.

U Jakob u ïaleh bad u angel ha Peniel

22Bad u la khie joit ha kata ka miet, bad u la shim ïa la ki tnga baroh ar ngut, bad ïa la ki shakri kynthei ar ngut, bad ïa la ki khun shynrang khatwei ngut ruh de, bad u la nang ïaid noh sha shiliang ka khriang i wah duid Jabbok. 23Bad u la ïalam ïa ki, bad u la pynphah ïa ki sha shiliang ita i wah duid; kumta, u la phah sha shiliang ïa kiei kiei kat kiba u la don. 24Bad ïa u Jakob la iehnoh marwei; bad uwei u briew u la ïaleh bad u haduh ban da shai byrngut. 25Te ynda u la ïohi ba um lah jop ïa u Jakob, u la ktah ïa u tlong mat shyieng ka skhep jong u; kumta la kheiñ khylliah u tlong ka mat shyieng ka skhep ka jong u Jakob da kaba u ïaleh bad u. 26Bad uta u la ong, “To pyllait noh ïa nga, naba kan sa shai byrngut.” Hynrei, u la ïathuh, “Ngan ym pyllait ïa me lymda me da kyrkhu keiñ ïa nga.” 27U ruh u la ong ha u Jakob, “Kaei ka kyrteng jong me?” Bad u Jakob u la ïathuh, “U Jakob.” 28#Jen. 35:10.U Angel pat u la ong, “Yn ym khot shuh ïa ka kyrteng jong me, ‘u Jakob’, hynrei ‘u Israel’: naba kum u syiem me la ïoh bor bad U Blei bad ki briew, te me la jop ruh.” 29Bad u Jakob u la kylli ïa u, bad u la ong, “To ïathuh, nga kyrpad ïa me, ïa ka kyrteng jong me.” U te u la ong, “Balei ba me kylli ïa kane shaphang ka kyrteng jong nga?” Bad hangta hi u la kyrkhu ïa u. 30Bad u Jakob u la khot kyrteng ïa kata ka jaka “ ‘ka Peniel’: naba nga la ïohi ïa U Blei markhmat, bad ïa ka mynsiem jong nga la pyllait im putet.” 31Te katta, ka sngi ka la lah mih halor jong u mynba u dang ïaid lait noh ïa ka Peniel, bad u la dkoh na ka skhep jong u. 32Namar kata, ki khun Israel kim ju bam ïa u thied heh ba la lait ran, uba ha u tlong ka skhep, haduh kane ka sngi: naba u la ktah ïa u tlong mat shyieng ka skhep u Jakob ha uta u thied heh ba la ran.

Currently Selected:

JENESIS 32: KHB

Highlight

Copy