JENESIS 39

U Joseph bad ka tnga u Potiphar

1 # Ki Kam. 7:9. Kumta, la ïalam arsut ïa u Joseph sha ka ri Ijipt; u nongkam u Pharaoh, bad u nongsumar barangbah ka ïing jong u, u la thied ïa u na ki kti ki kynja Ishmael, kiba la ïalam arsut shata ïa u. 2Bad U Trai u la don ryngkat bad u Joseph, bad u la long u briew ba man bha eh; bad u la shong ha ïing uta u kynja Ijipt u kynrad jong u. 3Bad u kynrad jong u, u la ïohi ba U Trai u la don ryngkat bad u, bad U Trai u la pynman bha ïa kiei kiei baroh ha ki kti jong u ïa kiba u la leh. 4Bad u Joseph u la shem ïa ka jingsngewbha ha khmat jong u, bad u la nang shakri ïa u: bad u la buh ïa u halor ka ïing jong u, bad u la aiti ïa kiei kiei baroh katba u la don hapoh ka kti jong u. 5Ka la jia ruh naduh ka por ba u la buh ïa u halor la ka ïing, bad halor kiei kiei baroh katba u la don, ba U Trai u la kyrkhu ïa ka ïing jong uta u kynja Ijipt na ka bynta u Joseph; bad ka jingkyrkhu U Trai ka la long halor kiei kiei baroh katba u don ha ka ïing, bad ha ka lyngkha. 6Te u la iehnoh ïa kiei kiei baroh katba u la don hapoh ka kti u Joseph; bad um shym la tip shaphang kaei kaei ruh ba u la don, hynrei, tang ïa ka jingbam ïa kaba u la ju bam.

U Joseph u la long ruh uba ibhabriew eh. 7Bad ka la jia hadien kine kiei kiei ruh, ba ka tnga u kynrad jong u ka la shat ïa la ki khmat ha u Joseph; bad ka la ong, “To thiah lem bad nga.” 8Hynrei, u la kyrngah, bad u la ong ruh ha ka tnga u kynrad jong u, “Ha khmih, u kynrad jong nga um tip shaphang kaei kaei ruh kaba don bad nga ha ïing, bad ïa kiei kiei baroh u la buh ha ka kti jong nga; 9uba kham halor ïa nga ha kane ka ïing ym don; bad um shym la khang ei ei ruh na nga, hynrei, tang ïa pha keiñ, naba pha long ka tnga jong u: kumno te nga lah ban leh ïa kane kaba bymman eh, bad ban leh pop pyrshah ïa U Blei?” 10Bad ka la jia ruh, ba katba ka dem kren ha u Joseph ha la ka sngi, um pynshahshkor satia ïa ka ban thiah lem bad ka, lane ban long lem bad ka. 11Ka la jia ruh, hamar kata ka por, ba u la leit sha ïing ban kam ïa la ka jingkam ïing; bad ym shym la don mano mano ruh em ha ïing na ki briew jong kata ka ïing. 12Bad ka la kem bat ïa u na ka jaiñkup jong u, ka da ong, “To thiah lem bad nga:” u te u la iehnoh ïa la ka jaiñkup ha ka kti jong ka, bad u la phet noh soit, bad u la mih noh sha khyndew. 13Bad ka la jia ruh, ynda ka la ïohi ba u la iehnoh ïa la ka jaiñkup ha ka kti jong ka, bad ba u la phet noh soit na ïing, 14ba ka la khot ïa ki rangbah ka ïing jong ka, bad ka la ïathuh ha ki, ka da ong, “To khmih, u la wallam hapoh ïa u kynja Hebru ha ngi ïa ka ban pynjahburom ïa ngi; u la wan bsut sha nga ïa ka ban thiah lem bad nga, nga te nga la kyang jam: 15ka la jia ruh, ynda u la ïohsngew ba nga la kyang jam bad ba nga la pyrta jam, ba u la iehnoh ïa la ka jaiñkup ha nga, bad u la phet soit, bad u la mih noh na ïing.” 16Bad ka la buh ïa ka jaiñkup jong u ha lade, ha ban da la wan u kynrad jong u sha la ïing. 17Bad ka la kren ha u kum da kine ki ktien, ka da ong, “Uta u shakri uba kynja Hebru ïa uba me la wallam sha ngi, u la wan bsut sha nga ïa ka ban pynkheiñ burom ïa nga: 18bad ka la jia ruh, katba nga la kyang eh bad ba nga la pyrta jam, ba u la iehnoh ïa la ka jaiñkup bad nga, bad u la phet noh na ïing.”

19Bad ka la jia ruh, haba u kynrad jong u, u la ïohsngew ïa kine ki ktien ka tnga jong u ïa kiba ka la kren ha u, ba ka da ong, “Kum ha kane ka rukom u shakri jong me u la leh ïa nga;” ba ka jingbitar jong u ka la meh. 20Bad u kynrad u Joseph u la shim ïa u, bad u la buh ïa u ha ka ïing byndi, ka jaka ha kaba la khum ïa ki nongsah byndi jong u syiem; kumta, u la don hangta ha kata ka ïing byndi. 21#Ki Kam. 7:9.Hynrei, U Trai u la don ryngkat bad u Joseph, bad u la pyni ïa ka jingisynei ïa u, bad u la ai ha u ka jingmonbha ha khmat u nongap ïing byndi. 22Te uta u nongap ka ïing byndi u la buh ha ka kti u Joseph ïa ki nongsah byndi baroh, katba la don ha kata ka ïing byndi; bad ïa kaei kaei ruh ba ki la leh hangta, u la long ma u keiñ uba la leh ïa kata. 23U nongap ïa ka ïing byndi um shym khmih ïa kaei kaei ruh em kaba u la don ha ka kti jong u; naba U Trai u la don ryngkat bad u, te kaei kaei ruh ïa kaba u la leh, U Trai u la pynman bha ïa ka.

Currently Selected:

JENESIS 39: KHB

Highlight

Copy