JENESIS 40

U Joseph u batai ïa ki jingphohsniew ha ka ïing byndi

1Bad ka la jia hadien kine kiei kiei ruh, ba u rangbah ki nongrah khuri jong u syiem ka ri Ijipt bad u rangbah ki nongshet kpu ki la leh pop pyrshah ïa u kynrad jong ki u syiem ka ri Ijipt. 2Bad u Pharaoh u la bitar eh ïa ki nongkam jong u baroh ar ngut, ïa u rangbah ki nongrah khuri, bad ïa u rangbah ki nongshet kpu. 3Bad u la set byndi ïa ki ha ka ïing u rangbah ki nongphasi, ha kata ka ïing byndi, ha kaba la sah byndi u Joseph ruh de. 4Bad uta u rangbah ki nongphasi u la buh ïa u Joseph u nongsumar bad ki, bad ïa ka ban shakri ïa ki: bad ki la ïashong byndi katto katne sngi. 5Bad ki la phohsniew ïa ka jingphohsniew baroh ar ngut, ïa la ka jong ka jong ka jingphohsniew ha kajuh ka miet, uwei uwei ruh kat kumba shong ka jingpynsngewthuh ïa ka jingmut ka jingphohsniew jong u hi, u nongrah khuri bad u nongshet kpu jong u syiem ka ri Ijipt keiñ, ïa kiba la khum ha ka ïing byndi. 6Bad u Joseph u la leit bsut sha ki mynstep, u la khmih ruh ïa ki, bad ha khmih, ki la sngewsih. 7Bad u la kylli ïa ki nongkam jong u Pharaoh kiba la don bad u ha ka byndi ka ïing u kynrad jong u, u da ong, “Balei ba ki khmat jong phi ki i 'matsngewsih mynta?” 8Bad ki la ïathuh ha u, “Ngi la phohsniew ïa ka jingphohsniew, hynrei, ym don u ban batai ïa ka.” Bad u Joseph u la ong ha ki, “Ki jingbatai kim dei ki jong U Blei mo? To ïathuh ha nga ïa ki mynta, nga kyrpad ïa phi.”

9Bad uta u rangbah ki nongrah khuri u la ïathuh ïa la ka jingphohsniew ha u Joseph, bad u la ong ha u, “Nga la long ha ka jingphohsniew jong nga, bad ha khmih, u dieng soh Waiñ ha khmat jong nga, 10bad ha uta u dieng soh Waiñ la don lai ki tnat: bad u i kumba dang kan shylluit, u dang lah phuh syntiew; bad ki rynjup soh jong u ki la sei da ki soh Waiñ ba la ih: 11bad ka khuri jong u Pharaoh ka la don ha ka kti jong nga: bad nga la shim ïa ki soh Waiñ, bad nga la khem ïa ki ha ka khuri jong u Pharaoh, bad nga la ai ïa ka khuri ha ka kti u Pharaoh.” 12Bad u Joseph u la ong ha u, “Kane ka long ka jingbatai jong ka: Kita ki lai tnat ki long lai sngi; 13sa lai sngi u Pharaoh un kyntiew ïa ka khlieh jong me, bad un pynshong biang ïa me ha la ka kam bad men ïoh ai ïa ka khuri jong u Pharaoh ha ka kti jong u, ha ka rukom kum kaba mynno mynno ruh mynba me la long u nongrah khuri jong u. 14Hynrei, to kynmaw me ïa nga ynda ka la bha bad me, bad to leh sbun ïa nga, nga kyrpad ïa me, bad to pynkynmaw ïa nga ha u Pharaoh, bad to ïalam noh ïa nga na kane ka ïing: 15naba shisha la tuh ïa nga kum ka jingtuh na ka ri ki kynja Hebru: bad shane pat ngam shym leh ei ei ruh em ba kin set noh ïa nga hapoh kane ka ïing byndi.”

16Uta u rangbah ki nongshet kpu ynda u la ïohi ba kata ka jingbatai ka la long ka babha, u la ong ha u Joseph, “Nga la long ma nga ruh kumjuh ha la ka jingphohsniew, bad ha khmih, lai tylli ki kriah kpu halor ka khlieh jong nga, 17bad ha ka kriah kaba kham hajrong la don na ki jaid jingbam baroh ïa u Pharaoh kiba dei jong ka kam u nongshet kpu; bad ki sim ki la bam na kata ka kriah kaba halor ka khlieh jong nga.” 18Bad u Joseph u la ïathuh bad u la ong, “Kane ka long ka jingbatai jong ka: Kita lai tylli ki kriah kpu ki long lai sngi; 19te sa lai sngi u Pharaoh un kyntiew ïa ka khlieh jong me nalor jong me, bad un sdien ïa me halor u dieng; bad ki sim kin bam ïa ka doh jong me na me.”

20Bad ha ka balai sngi ka la jia lyngkhuh ka sngi kha jong u Pharaoh, bad u la thaw ïa ka jingkhawai ïa la ki shakri baroh: bad u la kyntiew ïa ka khlieh ka jong u rangbah ki nongrah khuri, bad ïa ka jong u rangbah ki nongshet kpu hapdeng ki shakri jong u. 21Bad u la khot pat ïa uta u rangbah ki nongrah khuri sha ka kam rah khuri jong u; u ruh u la ai ïa ka khuri ha ka kti u Pharaoh: 22hynrei, ïa uta u rangbah ki nongshet kpu u la sdien: kumba u Joseph u la lah batai ïa ki keiñ. 23Hynrei, uta u rangbah ki nongrah khuri um shym la kynmaw ïa u Joseph, hynrei, u la klet noh ïa u.

Currently Selected:

JENESIS 40: KHB

Highlight

Copy