JENESIS 43

Ki hynmen u Joseph ki wan pat sha ka ri Ijipt ryngkat bad u Benjamin

1Bad kata ka 'nemsniew ka la nang kham jur ha kata ka ri. 2Ka la jia ruh, ynda ki la ïabam ïa u Kew ïa uba ki la lah wallam na ka ri Ijipt, ba u kpa jong ki u la ong ha ki, “To khie leit sa shi sien, to thied biang khyndiat ka jingbam ïa ngi.” 3Bad u Judah u la ïathuh ha u, u la ong, “Ïa kaba maham u la maham uta u briew ïa ngi, u da ong, ‘Phin ym ïohi shuh ïa ka khmat jong nga, lymda phi don bad la u para ryngkat bad phi.’ 4Lada men phah ïa u para jong ngi ryngkat bad ngi, ngin ïaleit hiar bad ngin thied jingbam ïa me; 5hynrei, lada men ym phah ïa u, ngin ym leit hiar: naba uta u briew u la ong ha ngi, ‘Phin ym ïohi shuh ïa ka khmat jong nga, lymda phi don bad la u para ryngkat bad phi.’ ” 6Bad u Israel u la ong, “Na ka balei phi la leh sniew ïa nga, da kaba ïathuh ha uta u briew ba phi dang don para shuh?” 7Ki ruh ki la ïathuh, “Uta u briew u la kylli bniah eh shaphang jong ngi, bad shaphang ka ïing jong ngi, u da ong, ‘U dang im u kpa jong phi? Phi dang don para shuh?’ Ngi ruh ngi la ïathuh ha u kum ha kine ki ktien: shisha ngi lah ban tip ba un ong, ‘To phin wanlam arsut shane ïa u para jong phi?’ ” 8U Judah ruh u la ong ha u Israel u kpa jong u, “To pyllait noh ïa une u samla bad nga, ngi ruh ngin ïamih bad ngin ïaleit noh; ba ngin ïoh im, bad ba ngin ym ïap noh, ma ngi, bad ma me ruh, bad ki khun khynnah jong ngi de. 9Ngan long ma nga u nongbahkhlieh na ka bynta jong u; na ka kti jong nga men pan ïa u: lada ngam da wallam pat ïa u sha me, bad lada ngam buh ïa u ha khmat jong me, nangta nga la kit rem, nga la pop pyrshah ïa me baroh shi rta: 10shisha lada ngim shym la pyntud kumne, shisha ngi la ïawan katta kat ar kyrwat.”

11Ynda kumta, u Israel u kpa jong ki u la ïathuh ha ki, “Lada ka dei ban long kumta te, to leh ïa kane; to shim na kiei kiei ruh ki babha tam jong kane ka ri ha ki jingdiang jong phi, bad to ïaleit lam arsut sha uta u briew da ka jingai sngewbha, ïa khyndiat ka umkseh baiwbih bakordor, bad khyndiat ka ngap, ïa ki masla, bad ïa ka mirr, ïa ki kwai, bad ki soh Khyllam. 12To shim ruh ar shah da ki sbai bad phi; bad to leit lam noh pat bad phi ïa kito ki sbai ba la buh pat ha ka shyntur ki byrni jong phi; lehse kata ka la long tang ka jingklet pynban. 13To phin ïalam ruh bad u para jong phi, to da ïamih noh, bad to da ïaleit phai pat sha uta u rangbah: 14bad to ai ba U Blei U Badonbor Baroh un ai ka jingisynei ïa phi ha khmat uta u rangbah, bad un phah pyllait noh ha phi ïa uta uwei pat u para jong phi, bad ïa u Benjamin de. Bad ma nga, lada yn pynduh khun ïa nga to yn pynduh khun keiñ.” 15Bad kita ki briew ki la shim ïa kata ka jingai, bad ki la shim ïa ki sbai ar shah ha la ka kti, bad ïa u Benjamin de; bad ki la ïamih noh, bad ki la ïaleit hiar sha ka ri Ijipt, bad ki la ïeng ruh ha khmat u Joseph.

16Bad u Joseph u la ïohi ïa u Benjamin lem bad ki, bad u la ong ha uba halor ka ïing jong u, “To ïalam ïa kine ki briew shapoh ïing, bad to shohdoh ruh, bad to pynkhreh ruh de; naba kine ki briew kin ïoh bam ryngkat bad nga ha kaba shiteng sngi.” 17Bad uta u briew u la leh kumba u Joseph u la bthah; bad uta u briew u la ïalam ïa kita ki briew ha ka ïing u Joseph. 18Te kita ki briew ki la kyiuh haba la ïalam ïa ki shapoh ka ïing u Joseph; ki la ïa-ong ruh, “Namar kita ki sbai ba la buh pat ha ki byrni jong ngi ha kata kaba shi sien wan, la ïalam ïa ngi shapoh shane; ïa ka ban ïoh ban ïa ngi, bad ïa ka ban pynhap ïa ngi, bad ïa ka ban buh mraw ïa ngi, bad ban shim ïa ki kadda jong ngi ruh de.” 19Bad ki la ïakham kynshur hajan ïa uta u briew uba halor ka ïing u Joseph, bad ki la ïakren bad u hajan ka jingkhang ka ïing, 20bad ki la ïa-ong, “A ko kynrad, shisha ngi la ïawan hiar shane mynnyngkong ïa ka ban thied jingbam: 21ka la jia te, ynda ngi la ïapoi ha ka ïingbasa, bad ba ngi la ïa-plie ïa ki byrni jong ngi, ha khmih ruh, ki sbai jong uwei uwei ruh ki la don ha ka shyntur ka byrni jong u, ki sbai jong ngi kiba biang keiñ ha ka jingthew: hynrei, ngi la wallam pat ïa ki ha la ka kti. 22Ngi la wallam arsut ruh da kiwei pat ki sbai ha la ki kti ïa ka ban thied jingbam: te ngim tip mano ba la buh ïa ki sbai jong ngi ha ki byrni jong ngi.” 23U te u la ong, “Ka jingsuk ïa phi, to wat sheptieng shuh: U Blei jong phi, bad U Blei u kpa jong phi, u la ai ïa ka jingkynshew ha ki byrni jong phi: ki sbai jong phi ki la wan ha nga.” Bad u la wallam shabar ïa u Simeon sha ki. 24Bad uta u briew u la ïalam ïa kita ki briew shapoh ïing u Joseph, bad u la ai um ha ki, bad ki la sait ïa la ki sla'jat; bad u la ai jingbam ïa ki kadda jong ki. 25Ki te ki la ïa-pynkhreh ïa la ka jingai ïa ka jingwan u Joseph ha kaba shiteng sngi: naba ki la ïohsngew ba kin sa ïoh bam jingbam hangta.

26Te ynda la poi u Joseph sha la ïing, ki la wallam ïa la ka jingai ïa kaba ki la don ha la ka kti shapoh ïing, bad ki la ïanguh ïa u haduh ka khyndew. 27Bad u la kylli ïa ki shaphang la ka jingbha jingsuk, bad u la ong, “U koit bha u tymmen, u kpa jong phi uba phi la kren shaphang jong u? U dang im?” 28Ki ruh ki ïathuh, “U koit bha u shakri jong me, u kpa jong ngi, u dang im haduh mynta.” Ynda kumta, ki la ïanguh khlieh bad ki la ïadem. 29U ruh u la khmied ïa la ki khmat, bad u la ïohi ïa la u para, u Benjamin, u khun ka kmie jong u hi, bad u la ong, “Une u long u para bakhatduh eh jong phi, uba phi la ong shaphang jong u ha nga?” Ynda kumta, u la ong, “U Blei un isynei ïa me, ko khun.” 30Bad u Joseph u la leh kyrkieh eh; naba ka dohnud jong u ka la ing hir hir shaphang u para jong u, bad u la wad jaka ha kyndong ba un ïoh ïam; bad u la leit shapoh la ka kamra, bad u la ïam hangta. 31Ynda kumta, u la bta ïa la ka khmat, bad u la wan noh, bad u la kan ïa la ka mynsiem, bad u la ong, “To buh ïa ka jingbam.” 32Kumta, ki la buh ïa ka jingbam ïa u kyrpang, bad ïa ki ruh kyrpang, bad ïa ki Ijipt kiba la ju bam ryngkat bad u ruh de, kyrpang; namar ki kynja Ijipt kim lah bam jingbam lem bad ki kynja Hebru; namar kata ka long kaba ijli da ki kynja Ijipt. 33Ynda kumta, ki la ïashong ha khmat jong u ter ter, ïa uba la kha nyngkong katba kum ka jinglong hynmen jong u, bad u bakhatduh eh katba kum ka jinglong hynbew jong u: te kita ki briew ki la ïasngew lyngngoh paralok hi keiñ. 34U ruh u la phah hi ïa ki pliang jingbam na khmat jong u sha ki: hynrei, ka pliang jingbam jong u Benjamin ka la tam san shah ïa kano kano na ki jong ki baroh. Kumta, ki la ïadih, bad ki la ïakhawai sngewbha bad u.

Currently Selected:

JENESIS 43: KHB

Highlight

Copy