JENESIS 44

U luta ha ka byrni u Benjamin

1Bad u la hukum ïa uba halor ka ïing jong u, u da ong, “To pyndap ïa ki byrni jong kine ki briew da ka jingbam, katba ki lah ban ngiam, bad to buh pat ruh ïa ki sbai ki jong uwei uwei ruh ha ka shyntur ka byrni jong u. 2Bad to thep ruh ïa u luta jong nga hi, ïa u luta rupa keiñ, ha ka byrni jong uta u bakhatduh na ki, ryngkat bad ki sbai u Kew jong u.” U ruh u la leh katba long ka ktien u Joseph ïa kaba u la lah kren. 3Ka la shai byrngut, bad ïa kita ki briew la pyllait noh, ma ki bad ki kadda jong ki. 4Haba ki la poi shabar ka nongbah, te haba kim pat la jngai, u Joseph u la ong ha uba halor ka ïing jong u, “To ïeng, bad to khie leit beh hadien ïa kita ki briew; bad ynda me la lap ïa ki, to ong ha ki, ‘Hato balei ba phi la siew kylliang da ka basniew na ka bynta ka babha? 5Une um long uta u luta na uba u kynrad jong nga u ju dih, bad da uba u lah ban khan shisha? Phi la leh sniew keiñ da kaba leh kumta.’ ”

6U ruh u la lap ïa ki, bad u la kren ha ki ïa kine kijuh ki ktien. 7Bad ki la ïa-ong ha u, “Na ka balei ba u trai kynrad jong ngi u kren kum ïa kine ki ktien? Ban leh kum ïa kane ka kam, to ai ba kan long jngai na ki shakri jong me haba da lei lei ruh: 8ha khmih, ïa ki sbai ba ngi la shem ha ki shyntur ki byrni jong ngi, ngi la wallam pat sha me naduh ka ri Kanaan: kumno te ngin da tuh ïa ka ksiar lane ïa ka rupa na ka ïing u kynrad jong me? 9Uta na ki shakri jong me ha uba yn shem ïa uta u luta, to ai ba un ïap noh; ma ngi ruh ngin ïalong ki mraw ïa u trai kynrad jong nga.” 10Bad u la ong ha ki, “To ai ba kan long mynta kumba phi la ong: uta keiñ ha uba yn shem ïa uta u luta un long u shakri jong nga; hynrei, ma phi phin ïalong ba khlem jingrem.” 11Ynda kumta, ki la ïa-pynkloi noh bad ki la ïa-pynhiar noh uwei uwei ruh ïa la ka byrni byrni ha tbian, bad uwei uwei ruh u la plie ïa la ka byrni. 12Bad u la wad, da kaba sdang ha u banyngkong eh, bad u la wai ha u bakhatduh eh: bad u shem ïa uta u luta ha ka byrni jong u Benjamin. 13Ynda kumta, ki la kad ïa la ki jaiñkup, bad ki la ïateh biang uwei uwei ruh ïa la ka jingkit halor ka kadda jong u, bad ki la ïaleit kylla noh pat sha kata ka nongbah.

14Bad u Judah u la wan bad ki para jong u sha ka ïing u Joseph; naba u dang sah hi hangta; bad ki la dem ha khmat jong u haduh ka khyndew. 15Bad u Joseph u la ong ha ki, “Kaei kane ka jingleh ba phi la leh? Phim tip ba u briew kat ma nga u lah ban khan shisha?” 16Ynda kumta, u Judah u la ong, “Ngin ïa-ong aïu ha u trai kynrad jong nga? Hato ngin ïakren aïu? Bad kumno shisha ngin ïa-pynksan ïa lade? U Blei u la shem ïa ka kam bymhok ki shakri jong me: ha khmih, ngi long ki mraw ïa u kynrad jong nga, toi ma ngi ruh, bad uta ruh ha uba la shem ïa uta u luta.” 17U te u la ong, “Wat ai ba ngan leh ïa kata haba da lei lei ruh: uta u briew ha uba la shem ïa uta u luta, uta un long keiñ u mraw jong nga; hynrei, shaphang jong phi, to phin leit kiew ha ka jingsuk sha u kpa jong phi.”

U Judah u ïasaid na ka bynta u Benjamin

18Ynda kumta, u Judah u la kynshur hajan jong u, bad u la ong, “Ko kynrad, to shah, nga kyrpad ïa me, ïa u shakri jong me ban kren kawei ka ktien ha ki shkor u kynrad jong nga, bad to wat sngewbitar ïa la u shakri: naba me long kum u Pharaoh. 19U kynrad jong nga u la kylli ïa ki shakri jong u, u da ong, ‘Phi don u kpa, lane u para?’ 20Ngi ruh ngi la ïathuh ha u kynrad jong nga, ‘Ngi don u kpa uba la tymmen, bad u khun ka jinglong tymmen jong u, u bakhatduh eh; bad u hynmen jong u, u la ïap, bad la iehnoh marwei ïa u na ka kmie jong u, te u kpa jong u, u ieit eh ïa u.’ 21Me ruh me la ong ha ki shakri jong me, ‘To wallam arsut ïa u sha nga, ba ngan ïoh buh ïa ki khmat jong nga ha u.’ 22Bad ngi la ïathuh ha u kynrad jong nga, ‘Uta u samla um lah iehnoh ïa la u kpa: naba lada un iehnoh ïa la u kpa, un da ïap noh u kpa jong u.’ 23Ma me ruh me la ong ha ki shakri jong me, ‘Lymda wan hiar u para bakhatduh eh jong phi ryngkat bad phi, phin ym ïohi shuh ïa ka khmat jong nga.’ 24Ka la jia ruh ynda ngi la leit kiew sha u kpa jong nga u shakri jong me, ba ngi la ïathuh ha u ïa ki ktien u kynrad jong nga. 25Bad u kpa jong ngi u la ong, ‘To khie leit sa shi sien pat, to thied ïa ngi khyndiat ka jingbam.’ 26Hynrei, ngi la ong ma ngi, ‘Ngi ngim lah ban leit hiar: lada u para u bakhatduh eh u da don ryngkat bad ngi, te ngin ïaleit hiar keiñ; naba ngim lah ïoh khmih ïa ka khmat uta u rangbah, lymda don u para bakhatduh eh lem bad ngi.’ 27Bad u kpa jong nga, u shakri jong me, u la ong ha ngi, ‘Phi tip ba ka tnga jong nga ka la kha tang ar ngut ïa nga; 28bad uwei u la mih noh na nga, bad nga la ong, “Shisha shisha keiñ la patar lyngkhot lyngkhai ïa u; bad haduh mynta ruh ngam shym la ïohi shuh ïa u.” 29Mynta, lada phin shim noh ïa une de na khmat jong nga, bad lada kan jia ka basniew ei ei ruh ïa u, kumta phin ïa-pynhiar ïa ki 'ñiuhlieh jong nga sha ka jingtep da ka jingsngewsih.’ 30Mynta te, haba nga poi ha u kpa jong nga, u shakri jong me, khlem da don une u samla bad ngi: haba la khum ïa ka mynsiem jong u lem bad une; 31kan sa jia haba u ïohi ba um shym wan une u samla ba un ïap noh shisha: bad ki shakri jong me kin ïa-pynhiar ïa ki 'ñiuhlieh u shakri jong me, u kpa jong ngi sha ka jingtep da ka jingsngewsih. 32Naba u shakri jong me u la bahkhlieh na ka bynta une u samla ïa u kpa jong nga, nga da ong, ‘Lada ngam wallam ïa u sha me, nga la rem noh junom ha khmat u kpa jong nga.’ 33Namar kata, mynta, nga kyrpad ïa me, ba u shakri jong me un ïoh shong mraw ïa u kynrad jong nga na ka bynta une u samla; to shah te ïa une u samla ban leit kiew noh ryngkat bad la ki hynmen. 34Naba kumno ngan leit kiew ma nga sha la u kpa, lada une u samla um don lem bad nga? Ba ïoh ngan ïohi ïa ka jingsniew ka ban jia ha u kpa jong nga.”

Currently Selected:

JENESIS 44: KHB

Highlight

Copy