JENESIS 45

U Joseph u pynithuh ïa lade ha la ki hynmen

1 # Ki Kam. 7:13. Ynda kumta, u Joseph um lah shah shuh ha khmat kita baroh kiba ïeng bad u; bad u la kyang, “To ai ba ki briew baroh kin mih noh na khmat jong nga.” Bad ym shym la don mano mano ruh hajan jong u, mynba u Joseph u la pynithuh ïa lade ha la ki hynmen hynbew. 2Bad u la kyang da kaba ïam: bad ki Ijipt ki la ïohsngew, bad ka ïing u Pharaoh ruh ki la ïohsngew. 3Bad u Joseph u la ong ha la ki hynmen hynbew, “Ma nga, nga long u Joseph; shisha u dang im u kpa jong nga?” Te ki hynmen jong u kim lah phai ktien shuh ïa u; naba ki la kyiuh eh ha khmat jong u.

4Bad u Joseph u la ong ha ki hynmen jong u, “To ïawan hajan ïa nga, nga kyrpad ïa phi.” Bad ki la ïawan hajan. Bad u la ong, “Ma nga, nga long u Joseph u para jong phi, ïa uba phi la die noh sha ka ri Ijipt. 5Hynrei, mynta, wat ïasngewsih shuh, bad wat ïasngewbitar ïa lade ruh, namar ba phi la die noh ïa nga shane: naba ïa ka ban pynim ïa ki mynsiem, U Blei u la phah ïa nga sha shuwa jong phi. 6Namar la lah don ar snem lypa na ka 'nemsniew hapoh kane ka ri: bad ki dang sah sa san snem, ha kiba yn ym don balur lane ba-ot. 7Bad U Blei u la ïalam ïa nga keiñ ha shuwa jong phi ïa ka ban pynsah ïa kiba na phi ha ka khyndew, bad ïa ka ban pynim ïa phi da ka jingpyllait im bakhraw. 8Mynta te, ym shym long ma phi ba la phah ïa nga shane, hynrei, U Blei hi keiñ: bad u la pynlong ïa nga kum u kpa ïa u Pharaoh, bad u trai halor ka ïing jong u baroh, bad u nongsynshar ha ka ri Ijipt baroh kawei. 9#Ki Kam. 7:14.To pynkloi noh, bad to khie leit kiew sha u kpa jong nga, bad to ïathuh ruh ha u, ‘Kumne u ong u khun jong me u Joseph, U Blei u la pynlong ïa nga u trai halor ka ri Ijipt baroh kawei: to wan hiar noh sha nga, to wat pynslem: 10bad men ïoh shong ha ka ri Goshen, bad men ïoh long hajan jong nga: ma me, bad ki khun jong me, bad ki khun ki khun jong me, bad ki kynhun jong me, bad ki masi jong me, bad baroh katba me don: 11bad hangta ngan bsa ïa me; naba ka 'nemsniew kan dang sah sa san snem; ba ïoh lap ka jingkyrduh ïa me, bad ïa ka ïing jong me, bad ïa baroh katba me don.’ 12Bad ha khmih, ki khmat jong phi ki ïohi, bad ki khmat u para jong nga u Benjamin, ba ka shyntur jong nga hi ka long kaba kren ha phi. 13To ïathuh ruh ha u kpa jong nga ïa ka burom jong nga baroh ha ka ri Ijipt, bad shaphang kiei kiei baroh katba phi la ïohi; to pynkloi noh ruh ïa ka ban ïalam arsut ïa u kpa jong nga shane.” 14Bad u la noh ïa lade ha ka ryndang u Benjamin u para jong u, bad u la ïam; bad u Benjamin ruh u la ïam ha ka ryndang jong u. 15Bad u la doh de ïa la ki hynmen baroh, bad u la ïam ruh halor jong ki: bad ynda kumta, ki hynmen jong u ki la ïakren bad u.

16Bad la bna ïa kata ha ïing u Pharaoh, ba la ong, “Ki hynmen u Joseph ki la wan.” Bad kata ka la bha ha khmat u Pharaoh, bad ha khmat ki shakri jong u. 17Bad u Pharaoh u la ong ha u Joseph, “To ong ha la ki hynmen, ‘Ïa kane to phin leh; to pynkit ïa ki mrad jong phi, bad to khie leit noh ruh sha ka ri Kanaan: 18bad to ïalam ïa u kpa jong phi bad ïa kiba ha ki ïing jong phi de, bad to wan pat sha nga: bad ngan ai ha phi na ka jingbha ka ri Ijipt, bad phin ïoh bam ruh na ka khleiñ jong kane ka ri.’ 19Mynta me la lah ïoh ka hukum, ‘To leh ïa kane; to shim bad phi ïa ki kali na ka ri Ijipt ïa ki khun rit jong phi, bad ïa ki tnga jong phi, bad to wallam ïa la u kpa, bad to ïawan hiar noh. 20Wat ai ruh ba ki khmat jong phi kin ñiew ei ei ruh ïa la ki jingbuh jingsat; naba ka jingbha ka ri Ijipt baroh kawei ka long ïa phi keiñ.’ ”

21Bad ki khun shynrang u Israel ki la leh kumta: bad u Joseph u la ai ha ki ïa ki kali, kumba u la hukum u Pharaoh, bad u la ai ïa ka jingbam ïa ki ha lynti. 22Bad u la ai ha uwei uwei baroh da ki jaiñkup, shi kup shi kup ban ïapli; hynrei, ha u Benjamin u la ai laispah da ki sbai rupa, bad san riam da ki jaiñkup. 23Ïa la u kpa ruh u la phah lam kumne; ïa shiphew ki kadda ba la pynkit da kiei kiei kiba kham bha tam jong ka ri Ijipt, bad ïa shiphew ki kadda kynthei ba la pynkit da u Kew, bad u kpu, bad ka jingbam ba la khreh bang de ïa la u kpa hi baroh shi lynti. 24Ynda kumta, u la pyllait noh ïa la ki hynmen hynbew, ki ruh ki la ïaleit noh: bad u la ong ha ki, “To wat ïamai ho ha kata ka lynti.” 25Kumta, ki la ïaleit kiew noh na ka ri Ijipt, bad ki la wan sha ka ri Kanaan sha u Jakob u kpa jong ki. 26Bad ki la ïathuh ha u, ki da ong, “U Joseph u dang im, bad u synshar halor ka ri Ijipt baroh kawei.” Bad ka dohnud jong u ka la jlep noh, naba um shym la ngeit shuh ïa ki. 27Bad ki la ïathuhkhana ha u ïa ki ktien baroh u Joseph, ïa kiba u la lah ong ha ki: bad haba u la ïohi ïa ki kali ïa kiba u Joseph u la lah phah lam ban kit ïa u, ynda kumta, ka mynsiem u Jakob u kpa jong ki ka la nang shait pat: 28bad u Israel u la ong, “Katta ka la biang; u Joseph u khun jong nga u dang im shisha: ngan leit ban ïohi ïa u shuwa ba ngan ïap.”

Currently Selected:

JENESIS 45: KHB

Highlight

Copy