Konesi 10
10
Petero se ko Kornelio
1Lele ŋuto kata Kaisaria yu karin kanyit a Kornelio. Lepeŋ a duma lo teŋ na kamörök mia geleŋ. Ŋina teŋ luŋu a teŋ na Italia. 2Lepeŋ a katwöyönit lo Ŋun, a lepeŋ se ko mede nanyit liŋ kuŋge Ŋun. Lepeŋ a ka ’dokanit parik lo Yudayaki logon a lomerika, a lepeŋ tine jaran kwakwaddu Ŋun. 3A i lele lor ko saa musala na koriri, a lepeŋ meddi kulya kanyit i töili, lepeŋ a met malaikatat lo Ŋun ’bura i lupuŋdyö ko lepeŋ ni, i luŋgu na lepeŋ adi, Kornelio! 4A lepeŋ diŋe ŋilo malaikatat go ko kujönö, a pije adi, Kulya a nyo pon duma lio? A malaikatat waddi lepeŋ adi, Ŋun aje ruk kwakwasesi kunök se ko ’dogga inot na ŋutu lomerika, a lepeŋ iŋge yeye do. 5Nyena soŋinana soŋdi ŋutu Yaŋo i luŋgu na lele ŋuto karin kanyit a Simona, logon köti luŋu a Petero;
6lepeŋ ŋilu gwon a kömutöt ko Simona kaŋinyanit lo gobero logon mede nanyit gwon nyona ko tör na ’balaŋ lo. 7A nagon malaikatat lo jambu ko nye lo aje ŋiorö kaŋo nu, a nye luŋgi köliŋönök kanyit murek lo kita mede se ko lele kamörönit lo kilo logon kitakiŋdya lepeŋ perok liŋ. Ŋilo kamörönit a katwöyönit lo Ŋun. 8A Kornelio nyönyökökiŋdye se ŋo liŋ, a soŋdi se Yaŋo yu.
9A kotumalu nanyit nagon se gwon i kiko nyona ko ’dur köji nu, a Petero kije i lo ’dek lo kadi nyona ko tuparan kiden i kwakwaddu. 10A nye iŋge moka magor a ’deke nyesu. A nagon kinyo nyuŋ tetena nu, a nye gwe gwoso ŋuto lo rurudwe, 11a nye meddi ki a ŋaju, a nene ŋo a nagalaŋ gwoso boŋgo muket ’duruu kak. Ŋina boŋgo a leleyo goŋesi kanyit iŋwan a kölwene tojo ko kak. 12a gweyarijin liŋ ti kijakwa ko ti ŋo lo gwögwöŋtu kak, se ko ti kwen ti ki gwe i lukata nanyit.
13A gworo takiŋdye lepeŋ adi, Petero, ŋine ki, ’duŋge ko nyesi. 14A Petero waddi adi, Ti gwon sona pon Matat; kogwon nan kwöŋ a ko nyesu ŋo nagon abur kode nagon jakiŋdya ŋutu lut i kulya ti keri. 15A gworo köti kulyani ko lepeŋ daŋ tomurek adi, Do ti bulo luŋgu ŋo nagon Ŋun aje toke ’ya na adi nye a ŋo nagon abur. 16A kine kulya iŋge kona daŋin musala. A ’de ’de ŋina ŋo nyököjine ki yu i ’diko.
17A nagon Petero nyuŋ gwon i dwadwa ’yu kanyit i töili ko ŋo na met nye kine kweja nyo nu, mete, a ŋutu logon Kornelio a son kulo aje pija ko kadi na Simona gwon ya, a lepeŋat gwe nyu gwogwo ’dan i kötumit. 18A se luŋgi luŋgu a pije pija ko ŋona lele kömutöt kata nyu, karin kanyit a Simona logon köti luŋu a Petero.
19A nagon Petero nyuŋ yeyeju po na met nye na, a Mulökötyo Loke takiŋdye lepeŋ adi, Mete, ŋutu musala kulu ga ’yu do. 20Nyena pine ki, kiyaddi kak. An do ko kujönö moraddu ko lepeŋat, kogwon nan lo sunyuŋdyö se.
21A Petero kiyuŋdye kak ko ŋutu kulo ni, a kulyani ko se adi, Nan nyelo logon ta gaga lo. Kulya a ti nyo na pöri ta kine? 22A se waddi adi, Kornelio duma lo kamörök lo sunyuŋdyö yi. Lepeŋ a ŋuto lo rigwo ko kukuk Ŋun. a ŋutu liŋ ti jur lo Yudayaki luŋgi lepeŋ a lo ’but. A malaikatat loke takiŋdye lepeŋ anyen luŋgu do kanyit midi anyen nye ko yiŋga kulya nagon do jajam kine. 23Nyena a Petero luŋuddi lepeŋat kadi anyen gwon a kömu kanyit. Ko ’bure a lepeŋ pine ŋien a moraddi ko se, nyömöji ko kulye luŋasirik lo yubbö kulo lo gwon Yaŋo yu kulu.
24A i kotumalu nanyit a lepeŋat ’dure Kaisaria, a Kornelio gwe i mömöŋdu na lepeŋat. Lepeŋ a lupuŋdya karu kanyit se ko julin kanyit lo nyanyara kulo i pirit na geleŋ. 25a na ’durökiŋdye Petero nu, a Kornelio wuyuŋdye lepeŋ a gubakiŋdye mugun kak kanyit i mokosi i twöju na lepeŋ.
26Ama a Petero ’biluŋdye lepeŋ ki, a kulyani adi, Ŋine ki, nan ko mugun nio a ŋuto kana. 27a nagon se nyuŋ jajamaddu nu, a lepeŋ luŋöni kadi a ryeji ŋutu jore a momora. 28a nye kulyani ko se adi, Ta ko ’börik köti deden adi saret a ko rukökin Yudayaki i mora ko ŋutu ti lele gweyari kode i ’yö ’yu na se; ama Ŋun a kwekin nan adi ti nan gwe ti luŋgu lele ŋuto adi lepeŋ gwon abur kode a lut i kulya ti keri. 29Nyena na sonyoddi ta ŋutu i luŋgu na nan nu, nan a ko renya po. Nyena nan ’dek pija ta adi ko nyo nagon ta luluŋ nan?
30A Kornelio waddi adi, I perok iŋwan lo lwöŋgu, gwoso i na diŋit na, nan gwon köyö kadi i kwakwaddu i saa musala na koriri, a nan iŋge meddya lele ŋuto a jupu boŋgwat na kokobbu gwo ’dan köyö i komor.
31A lepeŋ luŋgi nan adi, Kornelio, Ŋun aje ruk kwakwasesi kunök ko aje yeye ’dogga inot na lomerika.
32Soŋdi ŋutu Yaŋo yu i luŋgu na Simona logon köti luŋu a Petero.Lepeŋ lu a kömutöt ko Simona kaŋinyanit lo gobero midi, logon si ’da nyona ko tör na ’balaŋ. 33Nyena a nan soŋdi ŋutu ’de ’de i luŋgu na do. Do a koŋdya ’bura kogwon do a po. Nyena yi liŋ kulo ni ko Ŋun i komor anyen yiŋga kulya liŋ nagon Matat a sarakin do i jambu kune.
Petero lo jambu
34 #
Nyö 10.17
A Petero suluje jambu adi, ’Diri nan a met adi Ŋun ti gwon a kanyunyumönit lo ŋutu; 35ama lepeŋ ruruk ŋutu ti jurön liŋ logon kukuk lepeŋ ko logon koŋdya po nagon a na ’but kulo.
36Ta deden adi lepeŋ a sunyukiŋdyö ŋutu ti Yisaraele kulyaet a tuŋge Loŋe Lo ’but lo taliŋ kogwon Yesu Kristo, logon a Matat lo ŋutu liŋ. 37Ta deden po nagon a pokin i jur lo Yudaya ’bukuluŋ, suluja Galilaya i mukök nagon Yoane a tokujö i kulya ti batisimo. 38Ta a den kulya ti Yesu lo Najareta, gwoso nagon Ŋun a we ’ya lepeŋ ko welet nagon a Mulökötyo Loke se ko riŋit anyen koŋdya kita. A lepeŋ iŋge wöröji i piritön liŋ koŋdya po na ’but se ko i toligga na ŋutu liŋ logon gwon ko ŋilo kaŋöönit i riŋit kulo; kogwon Ŋun gwon ko lepeŋ.
39Yi aje met kulya liŋ nagon nye a kon i jur lo Yudayaki se ko i Yerusalema. A ŋutu iŋge tatu lepeŋ i ’bikikindyö na lepeŋ i ködini ki. 40Ama i lor tomusala lonyit Ŋun a topi lepeŋ i twan, a iŋge tikin lepeŋ i meta. 41Ti gwon a ŋutu liŋ lo meddya lepeŋ, ama ka ’de yi logon Ŋun a wulun a kokwe a katökorok kulo. A yi iŋge nyesu ko a möju ko lepeŋ i pirit na geleŋ i mukök nagon nye aje ŋien i twan nu. 42a lepeŋ iŋge sarakin yi anyen tokukiŋdyö kine kulya i ŋutu, ko anyen tokurukiŋdyö adi Ŋun a wulun nye a ka ’dupönit lo kulya ti ŋutu lo gwon jörun se ko logon a twatwa kulo. 43Ŋilo a nye logon nebijin liŋ köju a jambu i kulya kanyit adi ŋutu liŋ logon a yubbö lepeŋ kilo mo pipitöki i toronjin kase kogwon karin kanyit.
Ŋutu logon ’bayin a Yudayaki a tiki Mulökötyo Loke
44A nagon Petero nyuŋ jajambu nu, a Mulökötyo Loke ’duki i ŋutu liŋ lo yiŋga ŋilo kulyaet kulo. 45a Yudayaki logon a kayupök lo moraddu ko Petero kulo iŋge söŋu kogwon Ŋun a ’bukö kiŋdyo ’doket na Mulokotyo Loke ma ’di i ŋutu logon ’bayin a kase köti.
46Kogwon lepeŋat a yiŋ se i jambu na kutusen ka ’de ka ’de se ko i pupurja adi Ŋun a duma. A kirut Petero pije pija adi, 47Kilo ŋutu aje wuju Mulokötyo Loke gwoso na wuji yi köju nu. Lele ŋuto ŋona bubulo teŋgu se i batisa ko pioŋ le? 48a kirut lepeŋ saŋi saŋu anyen kilo ŋutu babatisa i karin ti Yesu Kristo. Nyena a kilo ŋutu pije Petero anyen monuŋdyö ko se ko kulye perok.
Currently Selected:
Konesi 10: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
