Konesi 9
9
Saula a löpuggö töili
(Köti Konesi 22.6-16; 26.12-18)
1A Saula nyuŋ gwe i jöggi kopoma i tatuja na ŋutu ti Matat kajujumuk, a lepeŋ iti ko koane duma yu, 2i piyuŋdya na waragalan nagon jopa i kadijik momoresi ti Yudayaki na gwon Damaseke yu kunu, anyen ko nye ködyö a ryö ŋutu logon kebbu lo Kiko kulo, lyan kode wate, a nye ködyo bulöni bulö morga se, a nyököddi se Yerusalema a rereka. 3A na tiri nye Damaseke nagon nye gwe nyona ko köji nu, a ’de ’de parara na po ki pararakiŋdye kanyit i swötön liŋ. 4A lepeŋ ’dorone kak, a yiŋge gworo lo pija nye adi, Saula, Saula, ko nyo nagon do sasaŋdu nan sona? 5#9.5 Wuresi lojore ti beron a koloro kulye kulyaesi kaŋo i lo kalet ko i kalet to 6, amado bubulo ryeju se i 26.14A lepeŋ waddi pija adi, Do a pa pon Matat? A gworo lo waddi adi, Nan a Yesu logon do sasan lo. 6Ŋine ki, ko luŋöni köji, do mo tataki po nagon do mo kökon kune. 7A ŋutu lo jölö ko nye kulo gwo ’de gwo ’dan taliŋ; lepeŋat yiyiŋ gworo ama ti met lele ŋuto. 8A Saula pine ki, a paji konyen kanyit ama a tine bulö meddya, nyena a lepeŋat jiŋge nye ko könin, a joŋgi nye Damaseke. 9Perok musala nye ti bulö meddya, ’bak nyesu kode möju.
10A lele kajujumunit gwe kata Damaseke, karin kanyit a Anania. Lepeŋ a meddya kulya nagon Matat a luŋgu nye adi, Anania. A nye ruŋge adi, Nan malo pon Matat. 11A Matat takiŋdye lepeŋ adi, Ŋine ki, ko iti i kiko lo luŋu a Lorigwo, i kadi na Yuda, ko pije lele ŋuto lo po Taruseu, karin kanyit a Saula; mete, lepeŋ ŋilu gwon i kwakwaddu. 12Lepeŋ ŋilu a meddya kulya kanyit i töili, kweja adi lele ŋuto karin kanyit a Anania luŋö kadi, a sopakiŋdye könisi kanyit ko lepeŋ loki anyen lepeŋ böpö memeddya köti. 13A Anania waddi adi, Matat, ŋutu jore aje takin nan kulya ti ŋilo ŋuto i po narok jore nagon nye a konakin ŋutu kulök Yerusalema yu kunu. 14Lepeŋ lo gwe ni kogwon koanejin temejik a tikin lepeŋ kido anyen ko momokaddu ŋutu liŋ logon ’diŋdya karin kunök i kwakwaddu kulo. 15A Matat takiŋdye lepeŋ adi, Iti, kogwon nan aje wulun lepeŋ a titoni nio, anyen toreaddu karin kwe i ŋutu ti jurön, ko i moran se ko i ŋutu ti Yisaraele. 16A nan ko mugun nio mo kwekiŋdye lepeŋ po jore nagon mo tomiörikin lepeŋ kogwon kulya kwe.
17Nyena a Anania iti tu, a luŋöni kadi, a sopakiŋdye könisi kanyit ko Saula loki, a kulyani adi, Saula luŋaser, Matat Yesu logon a pukökin konut na pöri do ni i kiko nu, lepeŋ lo sunyuŋdyö nan anyen do köti böŋö memeddya, ko anyen do jojore ko Mulökötyo Loke. 18’De ’de a ŋo kunie gwoso kuperu ’do ’done kak kanyit i konyen a nye koti buloni bulo meddya. A kirut nye ŋine ki a batisani batisa,
19a nyesi nyesu, a gwe ko riŋit.
Saula tokujo Damaseke
A nye iŋge si ’da ko ŋutu kajujumuk i pitit na geleŋ ko kulye perok Damaseke yu. 20’De ’de a lepeŋ suluje tokujo kulya ti Yesu i kadijik momoresi ti Yudayaki adi, lepeŋ a Ŋuro lo Ŋun.
21A ŋutu lio lo yiŋga lepeŋ kulo iŋge soŋu, a pije adi, Ŋilo ’bayin a ŋuto logon yöŋö tukaŋu ŋutu liŋ lo ’diŋdya kine karin i kwakwaddu Yerusalema yu lo le? Lepeŋ ŋona ti po ni ko ŋina yeyeet anyen ko momorga lepeŋat, a joŋgi se a rereka ko koanejin temejik yu le? 22Ama a Saula puputuru ŋerot i tokujo ko riŋit, a lepeŋ iŋge te ’ya Yudayaki lo gwon Damaseke yu kulu na kwekiŋdye nye kaŋo adi Yesu ’diri a Masia nu.
23 #
2 Kor 11.32, 33 A i mukok nagon perok jore aje Iwoŋgu nu, a Yudayaki momori a Iwon anyen tatuja lepeŋ, 24ama a Saula iŋge den yeyeet nase. A se gwe i tiju na kotumiton ti gorom nagon a mariŋ na köji, ko tuparan ko tukwaje anyen tatuja lepeŋ; 25ama a ŋutu kanyit kajujumuk joŋgi lepeŋ kwaje, a tiŋdi lepeŋ i kupö lukata a koluŋdye lepeŋ kak i gorom loki nagon a mariŋ na köji.
Saula gwon Yerusalema
26A na ’durokiŋdye nye Yerusalema nu, a nye ’deke morakiŋdya mugun i ŋutu kajujumuk, ama se liŋ kukujono lepeŋ kogwon se a ko yuŋ adi nye a kajujumunit. 27Ama a Barnaba parakiŋdye lepeŋ a joŋgi lepeŋ ko luyökie yu, a nyönyökökiŋdye lepeŋat adi lepeŋ aje met Matat i kiko, a Matat iŋge jambu ko lepeŋ, ko koti lepeŋ a tokujo ko topurwan i karin ti Yesu Damaseke yu. 28A Saula gwolore ko se i pirit na geleŋ, a wöröni abur Yerusalema kata. 29Lepeŋ totokujö ko topurwan i karin ti Matat, a koti jambi jambu a rerenyani ko Yudayaki logon jambu kutuk na Giriki kulo. Ama a lepeŋat ga ’yi tatuja lepeŋ, 30a nagon luŋasirik lo yubbo kulo aje den kine kulya nu, a se joŋgi lepeŋ Kaisaria, a soŋdi lepeŋ tojo Taruseu. 31Nyenagon i ŋinu diŋit a kanisa gwe ko taliŋ i Yudaya ’bukuluŋ, ko i Galilaya, ko i Samaria, a iŋge gweye ki; a se ŋdine obi, a se gwolore i kugga na Matat a iŋge togolo ko Mulokotyo Loke.
Petero gwon Luda ko Yaŋo
32A na worojine Petero i piriton liŋ nu, a nye koti iti Luda i ’yo ’yu na ŋutu ti Ŋun lo gwon nyu kulu. 33a lepeŋ ryeji lele ŋuto nyu karin kanyit a Ainea logon a bata mugun nanyit liŋ a twan, ko a rogga i dotoet kiŋajin budok.
34A Petero takiŋdye lepeŋ adi, Ainea, Yesu Kristo lo toke ’ya do, ŋine ki ko ŋudu ’ye dotoet inot. ’De ’de a lepeŋ ŋine ki. 35a ŋutu liŋ lo si ’da Luda ko Saron kulo iŋge met lepeŋ, a lepeŋat löpukwene ko Matat ni.
36A nene ŋuto kajujumunit gwe kata Yaŋo karin kanyit a Tabita. (Tabita i kutuk na Giriki luŋu a Doruka, nagon nyönyökö adi Nyajwa.) Lepeŋ ŋupi gwon i parakiŋdya na ŋutu ko a ka ’dokanit na lomerika. 37a gwe sona i ŋinu diŋit, a nye gilö ni ŋilo a twane twan, a ŋutu tukwoji öpu nanyit, a topirikiŋdye i nene kadi na gwon i koŋilore ki. 38Luda ko Yaŋo gwon nyona nyona, a na yiŋge kajujumuk adi Petero gwon Luda nu, a se soŋdi ŋutu murek i luŋgu na lepeŋ adi, Böŋo nyoŋgi po kayaŋ ni, an do ko karakin.
39Nyena a Petero ŋine ŋien, a moraddi ko se i pirit na geleŋ. A na ’durökiŋdye nye nu, a se joŋgi lepeŋ i kadi na gwon i koŋilore nu. A karu ’bejin liŋ dumökiŋdye Petero kiden, gwigwien ko kwekiŋdya lepeŋ boŋgwat nagon a muisi se ko kunie boŋgwat nagon Doruka a riŋakin se na gwoŋdi nye nyuŋ jörun nu. 40A Petero sonyoddi se liŋ kaŋo, a nye rugwuŋökine kak, a kwakwaddi kwakwaddu. A kirut a nye wöriŋöjine ko öpu na yu, a luŋgi lepeŋ adi, Tabita, ŋine ki. A lepeŋ ŋaji konyen kanyit, a na meddi nye Petero nu, a nye ŋiki ki i si ’da. 41A Petero sukiŋdye lepeŋ könin, a ’biluŋdye lepeŋ ki, a kirut nye lupundye kayupök se ko karu ’bejin, a togwi ’dikiŋdye Tabita kase i komor jörun. 42A kine kulya iŋge rekin Yaŋo ’bukuluŋ, a ŋutu jore iŋge yubbö Matat. 43A Petero iŋge si ’da Yaŋo yu ko perok jore ko lele ŋuto i ’baŋ logon a kaŋinyanit lo gobero, karin kanyit a Simona.
Currently Selected:
Konesi 9: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
