Konesi 8
8
1A Saula iŋge ruk tatua na Setepano.
Saula a sasaŋdu kayupok
A i Ŋilu lor a kanisa na gwon Yerusalema na suluje sasanya parik; a ŋutu liŋ iŋge rekin i kak liŋ na Yudaya ko na Samaria, ake luyökie ka ’de logon a ko rekin. 2a ŋutu logon twoju Ŋun kulo nuŋge Setepano, a iŋge gwien lepeŋ parik. 3#Kon 22.4, 5; 26.9-11A Saula yoyoŋgi kanisa parik anyen koŋu se; a wöröjine i midijiik liŋ lupö lukata i momokaddu na ŋutu lyan ko wate, a tiŋdi se i kadi rereket.
Kayupok a tokujo Loŋe Lo ’but i Samaria
4A ŋutu logon a rekin kulo wöröjine totokuöddu kulyaet lo Ŋun. 5A Pilipo iti i köji na Samaria, a tokukiŋdye ŋutu kulya ti Masia. 6A ŋutu Jore parik gwe ko töili geleŋ i tiŋdu na swö kase i yiŋga na kulya na jam Pilipo kune, na yiŋge se lepeŋ ko na meddi se kweyesi na kon nye kune. 7Kogwon mulökö lorok a po kaŋo ko Ŋutu jore i mugunya lulujö ko gworolo lobot, a ŋutu jore logon a babatatu mugunya kase a twatwa, se ko ŋutu podeki iŋge tokela. 8Nyena a lyöŋön gwe a duma i ŋinu köji. 9A lele ŋuto gwe kata i ŋinu köji ko diŋit a najo, karin kanyit a Simona, logon aje tusöŋu ŋutu ti Samaria ko to ’bunun nanyit, kulya adi nye a ŋuto duma. 10A ŋutu liŋ lo ’di ’dik ko temejik yiŋge lepeŋ, a kulyani adi, Lo ŋuto a riŋit na Ŋun nagon luŋu adi Riŋit Duma. 11A se yiŋge leperi kogwon lepeŋ a tusöŋu ŋutu diŋit a najo ko to ’bunun nanyit. 12Ama a na yubbe se kulyaesi ti Pilipo i tokujö na Loŋe Lo ’but lo Tumatyan na Ŋun se ko karin ti Yesu Kristo nu, a lepeŋat iŋge batisa lyan ko wate. 13a ma ’di Simona ko mugun nanyit köti iŋge yubbö, a i mukök nagon nye aje batisa nu, a nye yeŋe gwon ko Pilipo i pirit na geleŋ, a nye iŋge soŋu i meddya na kweyesi se ko sörösi temejik na kona kune.
14A luyökie lo gwon Yerusalema kulo ko yiŋge adi ŋutu ti Samaria aje wuju kulyaet lo Ŋun nu, a se sunyukiŋdye lepeŋat Petero se ko Yoane.
15A na ’durökiŋdye se nu, a se kwakwaddi Ŋun kogwon lepeŋat anyen se böŋö wuju Mulökötyo Loke. 16Kogwon Mulökötyo Loke a ko nyuŋ pokin ko lele lose, lepeŋat tuŋ batisa i karin ti Matat Yesu. 17a kirut Petero se ko Yoane sopakiŋdye könisi kase ko lepeŋat loki, a se wuji Mulökötyo Loke.
18Nyena a na meddi Simona adi ŋutu aje wuju Mulökötyo na sopakiŋdye luyökie könisi kase ko lepeŋat loki nu, a lepeŋ ’deke tiŋdu se gurut, 19a kulyani adi, Tiki ta nan ŋina riŋit köti, anyen ko nan a sopakiŋdya könisi kwe ko lele ŋuto ki, a nye mo wuji Mulökötyo Loke. 20A Petero takiŋdye lepeŋ adi, Ti gurut kunök liki ko do liŋ, kogwon do a yeyeju gwöruŋdyö ’doket na Ŋun ko gurut! 21Kulya kunök ’bayin asut i parundya na kine kulya, kogwon töili ilot ’bayin a lo ’but ko Ŋun i komor.
22Nyena löpuŋge töili i ŋina toron inot, ko momo ’yi Matat kode ŋona nye mo pipitökin ŋo na yeye do konut i töili ŋina. 23Kogwon nan a met adi do gwon pötwör gwoso ’deŋgele ko a rereka ko toron. 24a Simona waddi adi, Kwakwasaki ta nan Matat, anyen nene na kine kulya na jam ta kine böŋö gwon ti pokin köyö loki. 25A nagon se aje tökoŋu ko aje jambu kulyaet lo Matat nu, a se yitwene Yerusalema, a i kiko a se iŋge tokujö Loŋe Lo ’but i turön jore ti Samaria.
Pilipo se ko ŋuto lokukwön lo Etiopia
26A kirut malaikatat lo Matat takiŋdye Pilipo adi, Ŋine ko iti i swöt lo loki i kiko logon po Yerusalema tojo Gaja. (Ŋilo a kiko logon tiri i yöbu na sese.) 27a lepeŋ ŋine ŋien a iti tu, a lepeŋ meddi Etiopiatyo logon a kona a ’baŋ, logon a ŋuto lokukwön ko a duma lo tukwörien na Kaŋöake mor na Etiopia. Ŋilo ŋuto a tu Yerusalema i kwakwaddu; 28a i yitö nanyit, a lepeŋ gwe i si ’da i arabia lonyit lo jijiko, keŋdya buk na nebi Yisaya.
29A Mulökötyo takiŋdye Pilipo adi, Iti ko morakiŋdye i ŋilu arabia. 30Nyena a Pilipo wöki ko lepeŋ yu, a nye yiŋge lepeŋ i keŋdya na buk na nebi Yisaya. A Pilipo pije lepeŋ adi, Do kukurun kulya nagon do keken kine le? 31A lepeŋ waddi adi, Nan bubulö kuruŋdyö kine kulya ada? Kogwon ŋuto ’bayin logon nyönyökökiŋdyö nan. A nye luŋgi Pilipo anyen kiyaddu i arabia lukata i si ’da ko nye i pirit na geleŋ. 32#Yis 53.7, 8A kalesi nagon nye keken i kulya ti Ŋun na wurö kune gwe sona adi,
Nye a jikö gwoso köbilityo nagon joŋa i tatua,
ko gwoso kilolor lo gwon taliŋ ko ka ’barinunit i komor,
a lepeŋ gwe a ko paju kutuk nanyit kwöŋ.
33Lepeŋ a lawe a ŋuto gwe ’bayin lo ’duŋgo putet lonyit gwogwo ŋa logon ŋona bubulö jambu i kulya ti nyakwariat kanyit?
Kogwon ru nanyit aje toliki i na kak.
34A ŋuto lo waddi Pilipo adi, Böŋö taki nan ko nebi jambu kulya ti pa i kilo kalesi, lepeŋ jambu kulya kanyit kode ti lele ŋuto? 35a Pilipo poki i jambu suluja ko kilo kalesi, a nye takiŋdye lepeŋ Loŋe Lo ’but lo Yesu.
36A na tiri se i kiko nu, a se ’duröki i pirit nagon pioŋ gwon kata, a ŋilo ŋuto pije adi, Pioŋ makune! A nyo lo teŋgi nan i batisa? [ 37A Pilipo takiŋdye lepeŋ adi, Do bubulö batisa ko do a yubbo ko töili ilot liŋ. A lepeŋ waddi adi, Nan a yuŋ adi Yesu Kristo a ŋuro lo Ŋun.] 38A lepeŋ saŋi saŋu anyen arabia totogwo ’da, a se liŋ murek Pilipo se ko ŋilo ŋuto iti i pioŋ kata, a Pilipo batiddye lepeŋ. 39a na poŋdi se kaŋo i pioŋ kata nu, a Mulokotyo lo Matat joŋgi Pilipo kaŋo ’de ’de, a ŋilo ŋuto tine met lepeŋ köti; a nye kölumbö iti i kiko lonyit ko lyöpön a duma. 40Ama a Pilipo puköki A joto, a wöröjine i köjino liŋ totokuöddu Loŋe Lo ’but tojo nye a ’durökin Kaisaria yu.
Currently Selected:
Konesi 8: BBE
Highlight
Share
Copy
Want to have your highlights saved across all your devices? Sign up or sign in
Bari Bible © United Bible Societies, 1979.
